【pH值介乎於7飄浮的愛情故事】《一腳踏兩船》(5)

「喂～」Crystal輕輕拍一拍我，「算啦你～唔好嬲Jeff啦～佢都係為你好姐～」

『連你都話佢為我好吖？幾時企咗喺佢嗰邊㗎？』你平時唔係睇Jeff唔順，乜都話佢唔啱，話佢阻住我哋㗎咩？

「我份人最講道理嘅～」Crystal得得戚戚，「邊邊有道理咪幫邊邊囉～」

『吓？！』我聽咗啲咩吖？

「你吓乜鬼吖吓？」Crystal冷眼打量住我，「咁佢真係為咗唔影響到你，為你帶嚟不必要嘅麻煩，先犧牲自己咋嘛！」

『嘩...你講到佢好偉大喎...』仲講到好似我唔啱咁添...

「好明顯啦！」Crystal理直氣壯咁點點頭，「你咁都Get唔到就唔好話自己係人哋個女朋友喇～」

其實Crystal都講得啱嘅...

我係明Jeff嘅心意嘅！不過就係嬲嬲豬囉！

都話咗女仔係咁㗎啦！

就算你嘅出發點係為我好，我係唔鍾意唔滿意就係你錯！

仲要係錯晒嗰隻！啱晒嗰個從來都係我！

係咁蠻不講理㗎喇！唔鍾意吖？唔好鍾意囉！

『係係係...』我都係敷衍Crystal...然後趁住仲未上堂就拎部電話出嚟睇睇...

都係打返開IG...碌碌...又多咗好多心心同留言...

我都係隨便碌...隨便睇...就睇到連LB都有心心我啲相同Story！

差唔多每張相每個Story都有心心！

當然就唔止得我一個發現...有好多留言都話LB出現！

但係有幾多個心心都好...幾多個留言話LB出現都好...LB佢自己就冇留過一個言...

「咦咦？」Crystal又八八卦卦咁偷望我部電話，「LB出現喇？有心心喎～」

『咩吖？都係做宣傳姐...佢哋呢幾日都有講過會喺IG嗰啲地方做啲動作咁...叫我配合吓咁囉...』我諗就係啦...

宣傳要開始做㗎喇...大多數都係由IG開始...

不過就冇講到啲細節...總之都係俾吓心心做啲連動令個曝光率高啲咁囉...

「哦～～～」Crystal仲係古古惑惑咁，「淨係心心咋？咁你又要點配合？心心返佢？」

『我諗係啦...去返佢度心心佢啲相咁囉...都未有進一步指示...要我做嘢嗰陣佢哋會同我講㗎喇...』係吖係吖...就係咁啦...

所有嘢都係任人擺佈㗎姐...冇自己嘅主張㗎...唔代表個人立場...

但如果...即係我話如果...如果啲心心係LB自發俾㗎呢？

咁都好似...唔錯吖～

有咩咁唔錯？

冇～冇咩嘅～只係覺得...我啲相同Story係值得俾心心咁囉！

唔係你以為啲咩吖？

其實都好正常姐～做人唔好吝嗇俾Like俾心心～大家都開心啲～正能量啲吖嘛～

不過正能量還正能量！唔好FF多咗就得喇！

我自己又有冇FF多咗？

唔好咁荒謬啦～你估我係Crystal咩？

你睇佢個古惑樣！又唔知FF咗去邊啦！

唉我都冇佢咁好氣～

不過呢個世界...有時就係真實比FF更荒謬...

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

繼續碌碌部電話...都係睇返LB啲心心...

真係每張相都有心心...

好彩我從來都唔Post啲性感相上去㗎姐！唔係咪好老尷！

LB派心心派到出面

都係做宣傳姐