【pH值介乎於7飄浮的愛情故事】《一腳踏兩船》(4)

[Day 09－正式發佈] PART 01

“很感激 喜歡我十年仍不休”

都係同每朝一樣...

“近日舊同學說我已 耿耿於你心六百週”

都係有Jeff打嚟叫我起身...

“很可惜 這一世未能長廝守”

都係一樣由得個電話繼續播歌...

“我愛過哈囉吉蒂嗎似乎沒有”

都飛咗去留言...然後...

“很感激 喜歡我十年仍不休”

又Loop咗好幾次...

『嗯嗯...』

所有嘢都好似冇變過咁...

「喂早吖～夠鐘起身喇～」

成個禮拜都冇變過...

『唔唔...唔...』

冇錯...已經過咗成個禮拜...

「仲未醒吖？好遲㗎喇～」

拍攝完結之後...已經過咗成個禮拜...

『唔唔！唔...唔...』

呢個禮拜都係做返個學生妹...

「喂喂喂...懶瞓豬～起身喇懶瞓豬～」

『唔～～～起囉起囉...』

都係返學放學...行街拍拖...

「但係你把聲仲係好懶喎～」

一切都冇變過...

『錫啖就唔懶...』

可以有啲咩改變呢？

「啜啜卜～」

一直都係咁...又有乜咁出奇呢？

『好喇～唔喇懶～』

人生基本上就係每日都做差唔多嘅嘢...

日日如是...是如日日...

絕大部份人都係過住平淡而且乏味嘅生活...

但係又好多人都想有突如其來嘅改變...

為平淡乏味嘅生活帶來點點刺激...

咁真係好咩？

有時突如其來嘅刺激又未必一定係好...

有時突如其來嘅刺激你又未必接受到...

而更真實嘅係...改變往往就係喺你毫無準備之下...措手不及...

突如其來吖嘛～兜口兜面講俾你聽㗎啦～

『刷緊牙喇唔唔唔唔唔...』

要講到今個禮拜最突如其來嘅改變...我諗就只有個MV出咗街囉～

『換緊衫啦～戴返個Bra先～』

係吖～個MV發佈咗喇～就喺尋晚咋嘛～

我自己都有睇～講真...襯埋首歌...真係不得了...

每一個鏡頭都好夾啲歌詞！

由暗戀...表白...初初一齊...

成個MV都好有故事性...而且好有代入感...

即係我自己睇返自己同LB喺MV裡面...好容易就代入其中...就好似親歷其中...同LB拍緊拖咁...

呢啲就係拍攝同剪接嘅威力？

當然劇本都好重要啦～

雖然冇對白...但正正就係冇對白！單靠配合歌詞都可以咁有故事性！大癲！

聽講個劇本好似係搵咗個網絡作家寫嘅～

邊個？冇留意喎...我都唔睇網故嘅～

而我都Loop咗唔少次㗎～首歌又好聽～MV又拍得好～

Loop完尋晚都好瞓啲添～

『出咗𨋢啦～唔係你點聽得返我把聲吖～』我離遠咁望，就望到Jeff已經喺每日等我嘅位置等緊我。

望住佢仲係呆呆咁企定定...企定定...

我就鬼鬼祟祟咁行快兩步...然後一嘢就拍落去：『喂～日日都企喺呢個位㗎你～』

「喂～」Jeff帶住微笑點點頭，「咁樣先容易俾你見到吖嘛～」

『你都知你自己唔起眼呢？』我古古惑惑咁打量住Jeff～

講真對比起LB嚟講...Jeff就真係冇咁起眼嘅...

或者...冇對髀...冇傷害啦～

「哈哈...」Jeff無奈咁笑笑口，摸摸頭，「係囉係囉...」

『不過我一定見到你嘅！』我用力咁點點頭！『就算唔係企同一個位！就算喺人群之中！』

「係？」

『梗係！』

「好啦～咁我哋去搭車啦～唔係就遲到喇～」

『咩唔係就遲到吖？好準時囉好唔好？』

「好準時咁遲？」

『咩吖日日都好準時喺呢個時間嚟到！而家去搭車啱啱好囉！』

「係係係～咁行喇～」

同Jeff一齊行落去黨鐵站～

都係同平時一樣時間～冇遲冇早～時間啱啱好～

都係同日日都見到嘅嗰班人一齊等車～

又一齊入同一班車～

咪話咗人生就係咁枯燥乏味～

勁多人勁迫咁之下，Jeff都同平時一樣，企喺我身後護住我～

之但係當你以為所有嘢都係同平日一樣，千篇一律之時...

我感覺到好似...有啲怪怪地...

好似...有幾個人望望我...又望望手機...

有幾個學生又係咁...望完過嚟同佢哋幾個Friend細細聲講又偷偷望過嚟...

嗰對情侶又係...個女仔睇完部手機又拍拍佢男朋友細細聲講...又同佢男朋友一齊望過嚟...

都唔止啲學生...就連啲西裝友...OL都係...都係...望望手機又望過嚟...

有個肥毒L就仲誇張！望望手機再望望我...然後嚇一嚇咁！

有咩咁驚訝呢？未見過學生妹吖？成個車廂都係啦！

我就真係唔係好知，到底發生過什麼事喇...

直至到Jeff都睇睇手機，然後拍拍我：「個MV勁多Views...仲有留言...好多好多...仲有人留意到你添喎...」

『吓？個MV？』我睇睇Jeff手上部電話...

嘩...真係好多喎！

一晚咋喎...就咁多人睇過㗎喇？（唔擔保有幾倍係好似我咁Loop咗成晚嘅...）

啲留言...有人話覺得我幾靚女？

問有冇IG？

IG...IG...IG？！

我立即拎部電話嚟撳返開個IG睇睇...

嘩！（差啲嗌咗出嚟）多咗幾萬follower？！

點會...尋晚同Jeff邊傾電話，邊碌IG都冇人突然走嚟Follow㗎喎...

一晚之間...突如其來？！

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

車廂裡嘅乘客好多都有偷偷望過嚟...又睇睇手機...

睇嚟佢哋都有睇過個MV...認得出係我？

話晒個MV都化咗妝㗎喎...我而家冇化㗎喎...

晚

晚

玩完嚕
joanne開始做ig女神，就更加覺得jeff無聊又普通

揸𨋢晚

大王晚

自己女朋友係IG女神 係好事定壞事呢

睇你想要乜

晚

我只係想要女朋友

大王晚

咁你要去小學搵