【pH值介乎於7飄浮的愛情故事】《一腳踏兩船》(4)

Jeff都仲係眼中只有我咁望住我嚟食嘢～

同時又好照顧我～幫我拎件Pizza～又幫我拎舊炸雞～

見我唔夠食咁，仲會分埋佢嗰份俾我～

講真...其實個大話都冇乜咁大不了姐～

最重要係...唔俾Jeff知咪得囉～

只要唔俾佢知...對佢嚟講就唔係大話...

「食到成個嘴都係喇～」Jeff拎張紙巾俾我～

『唔該～』我接過張紙巾，抹抹嘴，『咁食Pizza係咁㗎啦～』

「冇話唔係～我都係～」Jeff都拎張紙巾抹抹自己個嘴～

『車～』我抹乾淨個嘴，摸摸自己個肚仔，『好滿足吖～』

「係吖呢？」Jeff都摸摸自己個肚，「直頭滿晒添啦～食到咁飽得唔得㗎？」

『咪散陣步先返去囉～』反正時間尚早～咁早返去都冇嘢做㗎啦～

屋企人又唔會理我幾點返～隨時唔返都唔知添啦～

係喎...佢哋今日使唔使OT？唔知喎～冇講喎～不嬲都唔講㗎啦～

「好吖～咁行得未先？」Jeff拎個銀包出嚟～

『行得㗎喇～』我都摷摷銀包，『呢餐我俾喇～』

「唔係輸到我咩？」

『輸到我喇！尋日Lunch你咪俾咗囉～』

「係～但放咗學我哋掃街你俾咗喇嘛～」

『我比咗魚蛋燒賣嗰啲咋嘛～』

「嗰啲都係啦～呢餐我㗎喇～」

結果都係俾Jeff手快快咁拎埋張單去賣～

然後我就同Jeff拖住手咁行～

一十指緊扣嗰吓...成個Feel突然就出晒嚟！

咩Feel？剛才同LB拍攝嗰陣個Feel...

點會勾返起同LB十指緊扣嘅Feel㗎呢？

明明我都有同Jeff十指緊扣...而家再十指緊扣...唔係應該刪除晒同LB嘅Feel先係㗎咩？

我究竟講緊乜？1999咁...

喂又好難怪我㗎喎！Feel呢樣嘢本來就係難以解釋㗎啦！

呢啲都唔重要！最重要嘅係...我成個腦都係LB！

我一路同Jeff十指緊扣咁拖到實一實行海旁...成個腦就係剛才同LB拍日落黃昏嘅畫面...

唔單止喺腦海裡面不停浮現...甚至乎喺眼前出現！就好似戴住Vision Pro睇戲咁！

點會咁㗎？可唔可以唔係咁吖？

「嗯？」Jeff捏一捏我隻手，「做咩吖？」

『吓吓？做咩咩做咩吖？冇...冇咩吖...』有啲咩吖？俾Jeff發現咗啲咩吖？

「冇？」Jeff打量住我，「咁多嘢諗咁嘅？」

『吓吓？諗？諗咩吖冇咩諗吖...呃...冇～都係諗返拍嘢啲嘢咋嘛...』都係唔好瞞（咁多）Jeff...

「哦～好辛苦？」

『呃...都幾啦...雖然都有時間休息嘅...之但係都叫做拍咗成日...』

「有啲咩拍㗎？」

『冇～都係扮吓日常生活咁囉～扮Send Message囉～扮睇書囉～咩都係扮囉～』

「咁做返平時咁就OK？」

『都係㗎～好似平時咁啦～不過有啲拍得唔係咁好...或者導演想要多幾個唔同角度，要Hold住吖...Keep住吖...』

「唔緊要啦～都拍完晒啦～」

『係咯係咯～都拍完晒啦～』

完晒...真係完晒？

點解總係好似...有啲嘢...仲有啲嘢...有啲咩嘢呢？

同Jeff十指緊扣咁拖實行海旁...身邊都有唔少情侶...

一對一對...有啲同我哋差唔多年紀...有啲就大我哋少少...大啲應該係結咗婚嘅夫妻...

一路行...一路望望佢哋...佢哋個樣都變成我同LB咁嘅樣...

我同LB拖住咁行...攬住咁行...笑得好開心咁打情罵俏...

一對又一對都係咁...全部都變成我同LB...

點解吖？點解會有咁嘅幻覺㗎？

係唔係因為...太過入戲？仲未抽離到？

一定係...純粹只係太過入戲...一定係...一定係...

『不如坐陣咯～』唔好再望...

「咁快就行到攰喇？」Jeff Fing Fing我隻手～

『係吖係吖～』我就拉住Jeff坐喺海旁嘅欄杆...

唔好俾自己有機會再望街上嘅情侶...

同Jeff望住個海...吹吹海風...

夜麻麻又黑漆漆...其實都唔係好睇到啲乜...不過都幾好Feel...

又勾返起我剛才同LB吹海風...

唔好再諗喇！完咗㗎喇！乜都完晒㗎喇！而家返翻嚟喇！同Jeff一齊...

我眼定定咁望實Jeff...

「嗯？」Jeff又眼定定咁望實我，「做咩？」

我擰擰頭...擰擰頭...只係眼定定咁望實Jeff咁擰擰頭...

而家眼前嘅...係Jeff...係我真正嘅男朋友Jeff...

我一手就攬實Jeff！錫落去！

攬到實一實！不停咁錫！伸埋條脷過去！

圍住Jeff條脷打轉！打轉！唔理有幾多口水！勁肉緊咁攬實Jeff嚟打茄輪！

攬實嚟打茄輪多一陣...

「嗄...」Jeff回一回氣，「做...做咩？」

『冇...』我眼定定咁望實Jeff對眼，一對只有我嘅雙眼，『你唔覺得好有Feel㗎咩？』

「覺...係好有Feel...」我冇等Jeff講落去...

『有Feel就得啦...』我又攬實Jeff嚟錫！伸晒脷咁圍住佢條脷打轉！打轉！

其實身邊都仲有唔少情侶...不過我就完全無視！

我乜都唔理...就只想得返我哋兩個...全個世界就只有我同Jeff兩個...

我要返呢種感覺...未拍MV之前同Jeff拍拖嘅感覺...

要好好咁捉緊...Hold住...呢個先係現實...呢個先係真實...

我係Jeff嘅女朋友...Jeff先係我嘅男朋友...

拍MV還拍MV...現實還現實...兩回事嚟嘅，你千祈唔好混淆。

周頌茵！話緊你吖！唔好混淆呀！

TO BE CONTINUED

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

[Day 09－正式發佈] PART 01

“很感激 喜歡我十年仍不休”

都係同每朝一樣...

已經將[Day 08－拍攝終結] PART 04 Upload上Penana

晚

留名錫錫下，有lb幻覺

啲女人如果突然間對你好親熱，9成都係有嘢發生過

晚

大王晚