【pH值介乎於7飄浮的愛情故事】《一腳踏兩船》(4)

[Day 09－正式發佈] PART 03

我同Jeff仲有電燈膽Crystal（咁講佢好似好衰咁～）一齊食飯盒～

我又夾Crystal舊燒鴨嚟食～

「喂我㗎！」Crystal又想夾返我舊叉燒～

『唔准夾叉燒！』我擋住Crystal！又夾舊油雞俾佢，『食雞啦～雞啱你～』

「你就雞～」Crystal把口就咁講～其實佢都鍾意食雞～

「係唔係想要叉燒？」Jeff就想夾舊叉燒俾Crystal，「我俾你...」

『唔准！』我立即夾走Jeff舊叉燒！『我嘅！』

「Jeff你真係唔識㗎喎～」Crystal帶住點點恥笑咁擰擰頭，「除咗女朋友，唔可以對其他女仔咁溫柔㗎～」

「吓？」Jeff一頭問號，「係咁㗎咩？」

「唉～」Crystal擰擰頭，「所以咪話你唔識囉～學吓啦～」

『嗯嗯～』我都好同意咁點點頭～

「哦...」Jeff都仲係一頭問號...

究竟Jeff學唔學得識？

我諗就難啲喇～

係唔係個個男仔總係對男女之間嘅關係遲鈍啲？

尤其係年紀細嘅時候？

初中嘅男同學都總係傻吓傻吓咁～

遇到鍾意嘅女仔又唔敢接近...

接近到又唔敢表露心意...

支支吾吾咁...都唔知你想點...

好多時明明大家都係有Feel～但因為你唔敢行出一步...行多幾步...就彼此錯過...

唔通要個女仔開口同你表白咩？！俾晒機會俾晒暗示你就好去鹿啦！

咁又係由幾時開始，男仔會變得大膽？

面皮幾尺厚咁周圍撩女仔...口甜舌滑口花花...走去Flirt人...

係單純大個咗？定係錯過得太多學精咗？

食完Lunch再Hea多陣，都夠鐘上堂。

我哋三個行返上班房途中，又多咗同學望過嚟...

入到課室又多咗同學留意我...

佢哋都會偷偷又好...光明正大咁又好...望過嚟又細細聲討論咁...

我都只好扮到若無其事咁...唔係可以點？

認真我到而家都仲係未識得點樣面對...總之人哋唔走過嚟問我就唔理咁多啦～

盡量專心咁上埋下晝嘅堂...

然後又平安無事咁放學～

Crystal見Jeff行緊過嚟，就無奈咁擰擰頭：「唉～今日都係唔做電燈膽喇～」

『扮咩吖你～明明你今日就有嘢做啦～』我記得㗎～要幫佢媽咪唔知做啲乜吖嘛～

「係吖係吖～係咁啦～」Crystal執好晒啲嘢仲孭好埋個袋，行去同Jeff揮揮手，「唔阻你哋吖～俾返個女朋友你吖～Bye～」

「哦...Bye...」Jeff同Crystal揮揮手後，就行到過嚟，「執好晒嘢？」

『嗯嗯～』我孭好埋個袋，『行得～』

同Jeff一齊行落樓梯，沿途都係勁多同學望住我...男女都有...

「喂喂就係佢喇！」

仲會聽到佢哋講...

「我都話係我哋學校㗎啦！」

雖然都係細細聲講...

「真係喎！真係佢嚟㗎！」

但係都聽得出佢哋係驚訝...

「我之前都有留意佢㗎喇！」

我都係繼續扮乜都聽唔到...

「真人都好靚喎！」

縱使同佢哋擦身而過...

一直同Jeff行到出學校門口...

「呃...」Jeff企喺學校旁邊望兩望，「我喺你身邊會唔會唔係咁好？」

『嗯？』我打量住Jeff，『有咩唔係咁好？』

「話晒你而家都有咁多人留意...」Jeff再望兩望...

都真係有唔少正離開學校嘅同學望過嚟...

『有咩問題？』我又唔多在乎身邊啲唔識嘅同學，『就算點都好，咁我同你都係拍緊拖㗎嘛～冇理由要影響到我哋㗎～』

「嗯！」Jeff放心晒咁點點頭！「你啱～」

『啱就行啦～』我就同Jeff一齊行～

真係唔影響就唔影響？

有時候就係而家唔影響，遲早都會影響...

同Jeff都好似平時一樣，放學冇嘢做就行吓街～睇吓嘢～

行入書局扮吓文青睇吓書～（其實我冇話對邊個作者有興趣～基本上都唔知而家邊個作者紅緊～）

拎啲書上手睇兩眼～又揭兩頁～

睇圖多過睇字啦～

又睇吓有啲咩精品～

睇吓呢樣～又睇吓嗰樣～拎喺手同Jeff一齊睇睇：『呢個靚唔靚吖？』

「靚吖～靚吖～」Jeff都點晒頭～

『你咩都話靚㗎啦～』只要係我拎喺手～

「哈哈...」Jeff尷尬咁摸摸頭，「咁真係靚吖嘛～」

我就冇Jeff咁好氣～只係甜絲絲咁笑笑口～擰擰頭～

繼續行街睇嘢～又去MUJI拎啲筆嚟畫公仔～

其實沿途都有唔少人留意到我！總會突然就擰個頭嚟望住我！

你以為我留意唔到咩？只係我扮傻咋嘛...

當然身邊嘅Jeff都一定留意到啦！仲俾我更敏感添！

不過我都係唔理咁多～

『喂呢支筆O唔OK吖？』

同Jeff有傾有講～

『喂呢個筆盒呢～好似唔錯喎～』

拉返Jeff嘅注意過嚟！

『不如買埋佢啦～一人一個～』

只屬於我同Jeff嘅二人世界～

同Jeff行多兩行...都仲係咁多人望過嚟...

只能夠講LB真係個大明星...個MV一出就咁多人睇過...

究竟有咩地方可以少人啲...起碼冇咁多人留意到我...

就喺呢個時候，咁啱我哋就路過戲院！

『喂喂！』我拉住Jeff隻手Fing兩Fing！『不如睇戲咯！』

「睇戲？」Jeff望住間戲院點點頭，「都好喎～好似好耐都冇睇過戲～咁有咩戲睇？」

『入去睇吓先啦～』我就拉住Jeff入戲院～

有咩戲睇都唔係重點啦～最重要係入戲院睇戲黑麻麻㗎嘛～咁咪冇人留意到我囉～係唔係醒先～

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

同Jeff一齊嚟到戲院睇睇有乜戲睇～

在場其實都唔算有太多人～都係得啲放咗學嘅學生～

我哋學校就冇乜～都係嚟自五湖四海其他學校啦～

無喎
你明明成日喺小學門口識啲小學生

晚

係嘅話我一早俾人拉咗喇 仲有得俾我寫故咁開心

揸𨋢晚

joanne好欲求不滿咁喎

邊方面先