[足球/穿越]重來一次的足球人生（10）真係準備出書！

「嘩……」兩名男生不禁發出驚嘆。

「其實咪好似你哋踢波咁，由細做到大自然好熟，」小忍笑道。「我織嘢都好叻㗎，我織頸巾……」

「無乜人想知。」舞木看了她一眼，半開玩笑地說道。

「你講咩話！？」身材肥胖的小忍立刻一臉不忿地用鼓棍輕敲銅鈸，營造出快要生氣的氣氛。

「有時我見你哋踢波都會諗：究竟你哋練嗰個動作練咗幾多次？其實我諗個心情應該係一樣。」長久也說道。

「嗱咁講咪有深度好多囉。」蕭智堯也望向小忍，笑著說道。

「係你哋啲男人雙重標準！」

……

聽到木門打開，女兒喊道「我返嚟啦」，父親看著那道背著結他袋的身影匆匆穿過走廊上了樓梯，不由得微微一笑。

「青春期真係好。」長久和彥回過頭來笑道。

「講到你好大個咁，你喺大學無拍拖咩而家。」母親立刻以火眼金睛看向兒子。

「點同呢，阿妹少女心事，我已經係成年人啦嘛。」

「成咩年人，你而家二十歲都未夠，連幫我買煙同酒都買唔到啊。」父親大笑道。

「唔係啦，不如你去八卦下阿妹而家咩情況啦，」母親臉上的表情隨即轉為擔憂。「之前聽你講話個男仔喺香港好似有女朋友？你阿妹會唔會俾人呃㗎。」

「嗰個好男仔嚟，唔會搞咩一腳踏兩船嘅。」長久和彥搖頭道。

「真穗咁鬼得意，又高又瘦，我係男仔我都想追佢啦，俾呢啲女仔鍾意，邊有男仔會拒絕㗎。」母親不以為然。

「媽，男人睇男人好準㗎，就好似妳哋女人望女人咁，係咪狐狸精一望就知啦。」

正說間，樓上又傳來了結他聲，三人一同朝天花板看去後互望了一眼。父親輕輕一笑，緩緩從梳化站起朝走廊而去。

「我去啦，反正好耐無同個女傾偈。」

有冇人話俾我聽邊個係小忍？

長久真穗好姊妹，好少寫，有長久先有佢出場

女兒八歲時，便首次捧起自己的結他。

與很小就對足球產生濃厚興趣的哥哥和彥不同，真穗似乎十分喜歡聲音溫暖清澈的木結他，要學習結他絕非易事，還要花費大量的時間與心力去練習，更別提那些會讓手指尖疼痛的鋼弦。

因此當看到女兒幾乎沒有任何怨言地堅持下來時，他既感到意外也覺得欣慰，因為自己曾經也是個出過唱片的樂隊成員，有孩子能繼承衣砵總是件好事。

「喀喀」

門後的結他聲停下，父親帶著笑意輕輕推開木門，只見真穗正抱著木結他坐在書桌前，桌上顯然是一些樂譜之類的東西。

「爸爸？做咩？」

「八下妳睇下妳練歌練成點。」父親笑著把門關上，然後一屁股坐在她的床上。「妳呢排已經日日放學都練㗎啦喎，今晚連飯都唔返嚟食，返嚟仲要練？」

「下個禮拜就係啦嘛，想練熟啲。」真穗嘟著嘴，把放了不少樂譜的文件夾合上，這個動作父親當然看在眼裡。

「……到時表現咩歌？」

「嗯……」真穗眼睛有點不安分地左右晃了晃。「都係啲比較新嘅流行歌，講咗你都唔識㗎啦。」

「無妳自己寫嘅歌？」

長久真穗聞言抬起頭朝父親看了一眼，他雙手撐在床褥上，嘴上還是像平時那樣掛著輕鬆不已的微笑，但好像什麼都知道一樣。

「……有。」

「彈嚟聽下？」

「唔制。」

「以前咪又係咁彈，怕咩醜啫。」

「以前點同啫，以前仲係細路女。」

「妳而家都係細路女啊，」說到這裡，父親輕嘆了口氣。「不過都得，到時想彈畀某個人聽嘅時候，有咩地方彈得唔好嘅話就無人話畀妳聽㗎啦。」

長久真穗聽到他這麼說，想當而然地投來懷疑的眼神：「係咪阿哥又同你亂講咗啲咩？」

「唔使佢講，妳彈嘅聲，」父親指了指她胸前的結他。「我聽到㗎嘛。」

父親自小便教導，雖然樂譜、和弦手勢、歌詞、節奏等基本都是固定的，但人與AI的最大分別在於感情變化與起伏，作為演奏及演唱的人，你有沒有全心投入演出，台下的聽眾一聽便會知道。

「妳彈結他，每一次彈同掃，其實都係喺度表達緊自己嘅感情狀態。」父親續說道。「所以妳阿媽或者聽唔出，老竇我係知嘅。」

「唔係……我……」真穗當然想反駁，但很快便感到雙頰滾燙，隨即閉嘴不語。

「總之……妳阿媽同阿哥都關心妳嘅，不過妳放心，我唔會亂講啲咩。」說到這裡，父親似乎已得到想要的答案，便又站起來一副準備離開的樣子。「我畀妳嘅建議就係，練歌嘅時候，唔好淨係諗點樣練熟首歌，而係要將妳想表達嘅感情，傳達畀妳想傳達嘅人知道。」

聽到樓梯傳來腳步聲，長久和彥與母親很快便交換眼神，確認回到客廳的只有父親一人時，兩人便急不及待地開口問剛才聊了些什麼。

「講下結他經，確認下佢技術有無退步咁囉。」父親坐下，神色輕鬆地答道。

「妖，叫你問呢啲咩，講緊個男仔啊。」母親一臉嫌棄地說道。

「無問喎。」

兩人異口同聲地「吓」了一聲。

「咁你上去做咩？」

「關心個女囉。」

「咁你關心咗啲咩出嚟？」

「就係知道真穗有好畀心機咁寫歌同練歌，」他看了兩人一眼，嘴角的笑意變得強烈了起來。「係關心嘅，下個禮拜我哋一齊去捧佢場啦。」
________________

食女女

文

劇情需要未

呢段幾warm