【重甜】【明就明 唔明就黎明】《XG快落》(6)

而家嘅我...明知粒糖係毒藥...想食都冇得食啦～

就算想死都死唔去～唔生唔死咁～半天吊～

呢個就係被選中嘅人嘅命運嘛？

我都行出房，路過一間房...望入去...晴晴就幫惠惠剪緊頭髮...

挨喺門邊望住晴晴好細心...又好溫柔咁...一個大姐姐幫小妹妹修修長髮...

呢個畫面...絕對係我睇清地獄真相以嚟...最美麗嘅一幅油畫...

講到好文藝～好藝術咁呢～

我本身就唔係一個文藝藝術嘅人...唔好喺度扮喇～

再喺屋裡行多幾步...見到細孖已經同新哥喺間房裡面傾緊唔知乜...然後又坐喺電腦前撳嚟撳去...

再行幾步...又見到大孖同阿德喺房裡面整緊啲槍...

行到落去廳...咁啱就見到阿南喺出面入返嚟...

阿南都冇理到我，只係撳住手機坐喺張爛梳化上...

我都唔知有乜好做，只好都坐喺爛梳化，望住阿南喺度撳電話...

好彩廢人唔止得我一個姐～

睇阿南個樣...又殘又頹又冇生氣又冇動力咁...

「你唔好咁望住我得唔得...」阿南望都唔望我一眼...

『Sor...Sorry...』原來有發現我望佢㗎？

點都好啦～唔望咪唔望囉～你又唔係女～

無所事事...無所事事...不知不覺又差唔多日落...

大細孖都落咗嚟，入咗廚房準備煮嘢食。

新哥都同阿德邊傾邊行過嚟...

新哥問阿南一句：「點吖？出面咩情況？」

阿南碌碌手機：「都係咁啦...冇咩異樣...我哋今日喺出面做嘅好事...都係隻字不提...」

吓？原來阿南係睇緊出面嘅新聞？

我估係掛...乜睇得到㗎咩？我都唔知添...

咁睇嚟...廢人都係得我一個咋喎...

「都估到...」新哥點點頭，「傷亡人數呢？查唔查到？」

「淨係知平民咋...」阿南碌碌手機摸摸頭，「有十二人受傷...其中三人傷勢嚴重...四人危殆...另外有六十四人死亡...當中有架巴士受爆炸波及造成...啲資料唔係好詳盡咋...佢哋根本就唔在乎人命...」

嘩新聞隻字不提都有咁多資料？

又係點樣查到返嚟㗎？

咁睇嚟我唔單止係廢人...直頭係垃圾...

「明白...」新哥點點頭，「等陣我會Send埋俾總部...你就繼續留意，有咩新消息就通知我。」

「OKOK...嗚呀...」阿南打個喊露繼續碌手機...

咁我就繼續做垃圾啦～

就喺呢個時候...

「登登登凳～」晴晴就拖住惠惠落到嚟～

惠惠有晴晴幫佢悉心打扮換返套靚衫之後，可愛得意又乾淨整齊～

大家都行到埋嚟惠惠面前～

「嗱呢個呢就係頭先講過嗰個新哥哥喇～」晴晴就為惠惠逐一介紹～

惠惠都仲係好怕生咁～尤其係對住啲大哥哥～

咁都好正常嘅～始終都係小妹妹嘛～

對住啲大姐姐係好啲嘅～尤其係晴晴～惠惠總會喺晴晴身邊～

咁都OK啦～起碼唔抗拒～

然後，大家都幫手煮嘢食～開檯～準備好今晚嘅晚餐～

我同阿德放咗幾隻叉同羹～

新哥拎咗幾隻碟同碗～

阿南又係坐定定等食～

然後大細孖就拎咗一大煲唔知咩嚟嘅嘢放喺餐檯：「好～～～食得飯～」

晴晴就拖住惠惠行埋嚟同大家一齊坐低...

然後...

「願榮光歸香港！」我都同大家一齊大嗌！

「好！今日大家能夠平安咁救咗惠惠出嚟...」新哥喺煲唔知乜嘢裡面幫惠惠𢳂落隻碗度，「大家食得開心啲！」

又係嗰啲粥唔似粥...忌廉湯又唔似湯嘅忌廉肉碎煲...

惠惠食一啖...已經皺晒眉...唔想再食落去...

我明吖...難食到...小妹妹又點會頂得順...

「小朋友要食多啲嘢㗎喎～」晴晴就氹氹惠惠，「姐姐餵你喇～」

只見晴晴餵惠惠～惠惠又皺晒眉咁勉強食...細細啖咁食...細細啖咁食...

望住惠惠雖然食得勉強...但總算食得落口...

而我呢個身為大人都覺得難食而唔食...咁咪係一個壞榜樣？

唔得！我係唔可以做一個壞榜樣！

冇錯呢！其實食物係好珍貴！喺呢個真實嘅地獄裡...

我都要食！就算再難食...都要感恩咁食晒佢！

終於可以好好咁食晒成餐晚飯～

阿德同阿南就拎齊晒啲碗碟餐具去洗～

「惠惠～」晴晴拖住惠惠，「同晴晴姐姐一齊瞓好唔好吖？」

「嗯嗯～」惠惠帶住微笑點點頭～

「咁我哋上去咯～」晴晴就拖住惠惠上樓，「仲可以睇到星星添㗎～」

「真係㗎？」

「真㗎～姐姐唔會呃你嘅～不過要刷咗牙先喎～唔係會飳牙仔㗎喎～」

「嗯～」

睇星星吖？

我行出室外...抬頭望上天際...

今晚個天都真係幾清...總算見到萬天星光呢...

「喂...」新哥行到出嚟，企喺我身，「出嚟睇星吖？」

『嗯...聽到晴晴話睇到星星...』我望一眼新哥，『係呢...打算點安置惠惠？唔會真係跟住我哋吖嘛？』

唔係話惠惠拖累我哋...而係跟住我哋會有危險...

就好似今日咁...我體會到會有幾危險...

「唔會～」新哥擰擰頭，仰望星際，「聽日會送佢去我哋組織專門照顧小朋友嘅地方...」

『照顧？』我都仰望星際，『訓練佢哋成為殺人武器咋嘛？』

「絕對冇啲咁嘅事...」新哥擰擰頭，「只係想保護佢哋...」

『保護佢哋？好似晴晴咁？」我打量住新哥，『訓練到殺人唔眨眼都叫保護？』

「唔想再有小朋友...甚至晴晴再殺人唔眨眼...」新哥單手搭住我膊，認真咁望實我，「我哋做大人嘅，就要做返大人應有嘅責任...好好保護佢哋...」

為咗唔好再有小朋友...為咗晴晴唔再殺人唔眨眼...

我同新哥仰望星際...

做返大人嘅責任...好好保護佢哋！

TO BE CONTINUED

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

[Day 13－背後匕首] PART 01

總算叫瞓到...終於有一晚係瞓得著...

或者係因為兩晚都瞓得差...或者尋晚嘅空氣比較好...

已經將[Day 12－危機四伏] PART 03 Upload上Penana

細個好憎啲人咁衰
大個就會變成細個最憎個啲人
呢個可能就係大人嘅責任

睇嚟飛揚好響往個細路保護設施喎

好有道理 等我抄低佢先

又俾你發現咗添
喺嗰度做 一定好安全

咁啲細路會好唔安全

一定更加安全 我會全心全意全力咁保護佢哋

飛揚要出手了

出手保護小朋友

你放過啲小朋友啦
他只是個孩子啊.jpg

你教我架

我係保護佢哋咋 你哋諗埋啲衰嘢

領悟力強吖

我地就得個諗字
你就得個做字