沙鯭 由細到大都喜歡 , 可以滾豆腐湯,也可以加中芹油鹽水煮 , 中價魚成日有
鯇魚 又名草魚 因為真係食草 做地盤買飯盒車基本上日日都有鯇魚 星期一清蒸,星期二梅菜,星期三雪菜,星期四豉汁......地盤人喜歡食鯇魚(包括我自已) , 因為一般地盤11點半左右就開飯 (有D師父更早) , 食完有時12點都未夠 , 仲有成個鐘有咩做? 咪訓囉 , 但一食完就訓好易食滯 , 起身谷住度氣做野好辛氣 , 食魚比較易消化,也無咁容易食滯。
鯇魚其實煮法都唔少,除了蒸,滾湯,豆豉煮外,仲可以薑蔥魚腩,水煮魚,酸菜魚,有好多人覺得鯇魚泥味好重,其實呢十年八年隨著養魚技術進步,泥味都少左一大半,當然肉質都唔同左,幼細好多,無以前咁粗,不過各有各好,我老豆就話現在D鯇魚已經唔係鯇魚
鯇魚的另一改良品係脆肉鯇 , 不過有真.脆肉鯇同假.脆肉鯇 , 有機會再講
生魚 又名蛇頭魚 肉食類 會成哂成個魚塘其他魚 粗生粗養 我細個我阿爸好喜歡買生魚兩食,魚骨魚尾魚頭滾西洋菜,魚身就炒中芹,現在大條生魚愈來愈貴,一條都過百元。
鮫魚 點解叫鮫魚? 因為真係好膠 你切過起肉就知有幾膠 打魚蛋一流 , 大條可以香煎
馬頭魚 算係街市最便宜的海魚之一 , 特點係有一種獨有的油香味 , 有D人喜歡,也有人不喜歡,煎香一流,但初學者可以試多幾次,因為魚肉易散,唔易翻魚,建議油熱多少少先落魚,煎耐少少先翻魚 ,如果都搞唔店就試下用冬菜蒸都好正
講住咁多先 , 有機會再分享
不過十個街市有九個都話係三刀
