補充返我第1日喺博多站附近食嗰間烏冬嘅資料
間嘢叫「牧之烏冬」(Maki no Udon)
剛好我最後一晚睇電視(縣民show)講福岡有介紹到
所以想追記返啲介紹
牧之烏冬喺福岡人之中都幾出名
據說牧之烏冬總店位於糸島市
而佢有個理念就係湯頭一定係由總店淆出嚟
其他分店唔會自己製作湯頭
所以分店只會開喺可以將湯保持最佳狀態下嘅運輸距離度
因此即使喺福岡算出名 但冇福岡以外開分店
成為咗當地獨有門外不出嘅隱世美食
而你睇返我第1日影嗰幅相
見到啲烏冬係粗身嘅
呢個係特色之一
另外牧之烏冬推薦嘅軟硬度係偏軟
比起四國嘅幼身有咬口嘅烏冬別有另一番風味
鍾意軟嘢嘅人有福了
嚟福岡 除咗博多拉麵外
不妨試下深受當地人喜愛嘅特色烏冬啦