往門司港GO
架車嘅地板QRcode嚟呢喂
但嘟唔到嘢
同小倉幾近 好快到
O哩
零哩先啱 因為呢度係九州鐵路起點
港口風情
一出站行出嚟就聞到味咖哩味
港口總係出名食咖哩
呢條連絡橋每日都會起起降降 時間啱話唔定可以見到有船通過
過咗橋可以去31樓高嘅展望台望下景
圈住嗰度就係宮本武藏決戰佐佐木小次郎嘅地方
不過門司港冇船過去 對岸下關先有
另一邊係源平合戰古戰場
我喺個展望台度hea陣
話晒都成300入場費 順便諗下跟住去邊度
落返嚟剛好見到開橋 過唔到住
望下側邊個大連友好紀念館先
大連同呢邊喺戰前嘅年代開始已經有交流
呢個館嘅外牆都係用大連嘅花崗岩同大連嘅工匠製作
而家上層係私人俱樂部 地下係中餐館
中間有間房仔介紹大連市
過返橋 諗到去邊 既然咁近就搭船去下關打個白鴿轉先
往下關 單程400 冇來回飛賣 回程喺下關再買
船仔細細幾快 又係幾分鐘船程
好有速度感
其實可以行路過去都得
就係咁我離開咗福岡縣去咗山口縣了
但嚟咗呢邊到底有咩做呢
一出碼頭就係明治39年嘅舊英國領事館
但今日休館
唔知去邊就即search
見到有唔少台灣人都分享嚟下關嘅一個對台灣有好深歷史影響嘅景點
就係馬關條約嘅簽約地喇
睇嚟唔係好遠 都係徒步可到嘅距離
路過一座神社 上面寫皇紀
即係第1代天皇神武天皇即位嘅記年
喺皇權最盛嘅明治時代曾經廣泛使用 戰後就唔再公式使用喇
由於日本神話同天皇家有直接關係 所以神社而家都重有用
呢間神社叫龜山神社 有個相當大嘅鳥居
知唔知相入面嘅鳥居有咩奇怪呢
有啲好特別嘅別
搵唔到有咩特別?
咁放大啲睇
有個波塞咗喺個山字度
話說大概昭和30年代左右 即係195X至196X
附近有居民打棒球嘅時候唔覺意將個棒球打咗落個山字度
而個波就從此kick咗喺度 咁多年來無論颱風暴雨地震個波都唔跌落嚟
由於唔跌落嚟 啲人就開始用呢個波取個意頭
「唔跌落」->「唔落榜」
龜山神社亦變咗出名求學業同考試
呢個位置對海
所以亦係江戶後期同外國(西洋人)交流多咗 攘夷思想下用嚟炮轟鬼佬嘅炮台山
神社度有咁大個河豚像
下關係出名河豚
據說食河豚曾經被禁 然後有次第一代內閣總理大臣去下關嘅時候被河豚嘅美味感動
將全面被禁嘅河豚解禁為受管制
河豚日文叫Fugu 而下關人就會讀Fuku
同福同音 意思河豚係帶來福氣嘅福魚
我以前有個PO講過點解剪髮舖會叫「床屋」
而呢個地方(龜山神社旁)就係床屋呢個稱呼嘅起源
行咗一陣 終於到咗馬關條約締結地
有清朝同日本代表嘅像
左邊嗰位當然就係我哋熟悉嘅李鴻章
座嘢變咗間食河豚嘅高級旅店 唔係客人唔入得
佢旁邊就係馬關條約展覽館
但過咗入場時間添
我發覺我去親邊度都休息
同春帆樓連接嘅旁邊係赤間神宮
叫神宮嘅都係同天皇家有密切關係嘅神社
而呢度裡面同時係安德天皇陵
有平氏一族嘅墓
旁邊係著名怪談 無耳芳一
故事簡略地講嘅話 係一個叫芳一嘅僧侶被惡鬼纏身 有高人指點芳一全身寫滿經文去避鬼
果不然惡鬼就見唔到芳一 但芳一冇哋耳仔都寫經文 惡鬼見到佢耳仔 於是就被鬼扯甩
咁點解和尚嘅故事喺神社出現
因為赤間神宮以前係阿彌陀寺 明治時期神佛分離改建赤間神宮