[毒撚出城]半自駕半鐵膠8日南九州之旅

每次搭觀光列車都一定要拎

上回講到搭Cityview巴士去到城山落車



落車後跟住指示行去城山公園，本身以為落車就係城山展望台，點知都要行5分鐘先到

城山展望台唔係好大，一眼就望得晒

城山展望台上面有個櫻島介紹展示板

城山展望台望落下面就係天文館通，對面海就係櫻島

城山展望台係另一個鹿兒島著名景點，望出去鹿兒島市街同櫻島嘅景色喺唔少海報、Postcard都睇到

影完相就坐低慢慢食剛才買嘅Mister Donut早餐

食飽就行返落去停車場等Cityview巴士

城山展望台唔需要逗留太多時間，正常情況逗留半個鐘搭下一班Cityview巴士離開就啱啱好，不過我食埋早餐又慢慢Hea，我係城山足足留咗1個鐘

第3班Cityview巴士係藍白色設計，巴士明顯比綠色同紅色嗰架殘舊

今次上車後試坐車尾嘅座位，但呢度唔好睇都唔好坐，有得揀坐返下面普通座位好過

由城山上車，途中經過南州公園，大約25分鐘車程就到仙巖園

仙巖園入場費1000Yen，門口職員見我拎住Welcome Cute Pass，教完我買入場券後俾埋紀念品我


買完入場券影埋個門口就入去參觀，仙巖園比我預期大好多，而且入面有唔同設施包括餐廳手信鋪，幾值得去


入場後先去左手邊鹿兒島世界文化遺產中心參觀，入面介紹鹿兒島有咩文化產業已經列入世界遺產或者想申請成為世界遺產

世界文化遺產中心有個窗口可以望到外面已經係世界遺產嘅舊集成館，可惜今次冇時間過去參觀

另外亦都有反射爐跡都係世界遺產，世界文化遺產中心以模型復原反射爐供遊客參觀

位於世界文化遺產中心外嘅反射爐跡

世界文化遺產中心範圍唔大，大約10分鐘已經行完，之後就可以參觀仙巖園其他景點

入場嘅地方唔係仙巖園正門，而家見到呢個先係，仙巖園正門 (即係舊島津家別墅正門) 1895年已經建成，差唔多有130年歷史

正門旁邊有個仙巖園石碑，有班泡菜阿豬媽喺度瘋狂影相，起碼影咗10分鐘

等到阿豬媽影完就到我影，名勝仙巖園

影完石碑經過錫門就係御殿，要俾多600Yen先可以入去參觀，冇課金只可以轉右去庭園


庭園係仙巖園最多人嘅地方，大部分人都唔係欣賞庭園設計而係影櫻島


除咗庭園，仙巖園最入嘅秀成莊草皮廣場影櫻島都好靚，而且呢度冇咁多人可以慢慢影，影埋火車都得

行到肚餓就去仙巖園入面嘅御膳所櫻華亭食午飯

櫻華亭午市餐牌有幾個組合可以選擇而且價錢唔貴，2000-3500Yen已經食到鹿兒島黑豚、黑毛和牛等

如果坐到窗邊座位，更加可以望住櫻島食飯
https://youtu.be/Ructj04_uk0?si=E4v9xjFW7JekOWQw
入座後擺部電話拍縮時，拍到食完離座

我揀咗最貴嘅黑毛和牛涮涮鍋3500Yen，成個餐有前菜、刺身、主菜、甜品，超級好食

非常推薦大家花3個鐘留喺仙巖園，上午參觀仙巖園內唔同景點，最後喺櫻華亭食埋個午餐再離開

我自己行得比較急，10點19分到達後大約留咗2個半鐘頭就搭12點49分Cityview巴士離開，再次搭到藍白色舊車

順住Cityview巴士路線，15分鐘車程就到達櫻島棧橋


落車後行入櫻島棧橋搭船去櫻島，櫻島渡輪每15-20分鐘一班，甚至凌晨都每小時有一班船，要去櫻島遊覽非常方便

搭櫻島渡輪喺鹿兒島呢邊直接上船就得，去到櫻島港落船先會收費，如果用Welcome Cute Pass都係去到櫻島港先出示


去程搭到粉紅色嘅櫻島丸

櫻島丸2011年落水，船艙望落仍然新淨

櫻島渡輪有名嘅烏冬立食店位於3樓船中央

最後參觀埋4樓觀光層，然後企喺船頭等開船

雖然上船影咗好耐相，但要等第十八櫻島丸泊岸後我架船先會開
(同時間後面櫻島火山悄悄噴煙中)

開船後瘋狂影櫻島火山

旁邊高速船碼頭同時間有班噴射水翼船開出，睇咗幾分鐘望住佢由水上變成水翼航行


另一架航行中嘅櫻島渡輪第十六櫻島丸

10分鐘多啲船程就到達櫻島港，最新嘅第二櫻島丸喺碼頭休息中

企喺船頭睇埋泊岸先施施然落船

櫻島歡迎你

去到櫻島第一時間睇清楚櫻島地圖，雖然櫻島好大但搭櫻島Island View巴士只會遊覽櫻島西邊

櫻島Island View巴士可以喺櫻島港巴士站上車

櫻島Island View巴士一日有15班，每半小時一班，坐一圈需時55分鐘

我搭2點正開車第10便用小型巴士，得十幾個座位而且企位都唔多

同埋櫻島Island View巴士更改時間表後，部分展望所即到即開唔再停留幾分鐘俾乘客上落車，所以直接搭到湯之平展望所先落車

湯之平展望所建築物入面有小賣店、觀景台兼具埋防災避難用途


入去參觀前先睇外面嘅櫻島火山介紹展板

湯之平展望所係旅客能夠去到而且最接近火山口嘅景點，呢個湯之平展望所標高373米嘅碑非常受歡迎，落車後一定要影相

湯之平展望所建築物有兩層，下層係小賣店，去上層嘅樓梯有圖畫介紹櫻島歷史

櫻島前後經歷過4次大爆發，每次噴出嘅溶岩喺櫻島不同地方構成獨得風貌，當中又以1914年大正爆發最嚴重，噴出嘅溶岩令到櫻島同大隅半島連埋一齊

除咗近代4次大爆發外，櫻島亦有其他爆發歷史


由建築物上層望向東邊櫻島火山，左手邊同中間係冇火山活動嘅北岳同中岳，右邊就係仍然非常活躍嘅南岳

睇完櫻島火山再望埋另一邊，南邊可以見到指宿市同開聞岳

西邊就係鹿兒島市

北邊就係姶良市同霧島市

喺湯之平展望台留咗25分鐘就離開，剛剛好搭到下一班車，另一架車係普通巴士，座位比較多望落都較新

今次搭到櫻島旅客中心先落車，途中經過櫻島港雖然唔洗落車但都要再展示Welcome Cute Pass俾司機睇

入到去左手邊有個劇院，每日輪流不停播放一條13分鐘長關於櫻島嘅短片，而該條影片喺Youtube上有得睇

右邊就係展覽室入口

櫻島旅客中心內有幾個螢幕顯示實時櫻島火山監察紀錄

櫻島形成嘅5個階段，由29000年前姶良火山臼形成到櫻島北岳露出海面，到最後大正爆發將櫻島同大隅半島連埋

櫻島有分噴火同爆發兩種情況，噴煙達1000米就係噴火，今年已經有169次，最近一次係今朝10點40分

而爆發再嚴重啲，今年都有68次


兩次大爆發流出嘅溶岩喺櫻島形成新土地，又要再一次提及大正爆發將櫻島同大隅半島連埋一齊

2022年櫻島火山總共爆發85次，唔知今年會唔會超過上年呢


兩個櫻島地形圖同模型，好清晰睇到櫻島三個主要火山口

最後介紹埋櫻島裝火山灰嘅克灰袋同小學生對應火山爆發嘅裝備

櫻島旅客中心就喺櫻島溶岩海濱公園旁邊，喺旅客中心用大約30分鐘 (睇埋短片就45分鐘) 參觀，之後出去海濱公園浸埋足浴就冇得頂

離開櫻島旅客中心由另一個門口行出去就係櫻島溶岩海濱公園

浸足湯前行埋遊步百選嘅溶岩海濱遊步道



沿途睇到大正爆發所流出嘅溶岩，不過頭一兩個位置睇就好驚喜，睇多兩個就覺得一模一樣

喺遊步道影櫻島火山

行咗大約5分鐘就行返轉頭去櫻島溶岩海濱公園浸足湯，可能海邊太大風，足湯要近出湯位先暖，其他位置都係凍嘅

浸完足湯後就沿海邊行返櫻島港碼頭

離遠已經見到呢個碼頭，本身以為係政府設施點知係公園嚟

櫻島港碼頭、櫻島渡輪同櫻島火山合照

由櫻島溶岩海濱公園行10分鐘多啲就返到櫻島港碼頭，櫻島港碼頭同鹿兒島櫻島棧橋唔同，呢邊要等有船泊岸乘客落晒之後先可以入閘上船

回程搭第十六櫻島丸，1999年落水，係櫻島渡輪最舊嘅船


船艙同甲板都有年代感

不過第十六櫻島丸船頭睇風景最方便，可以企喺正中間無遮無擋咁睇日落


落船後冇行返入大街搭鹿兒島市電，直接喺櫻島棧橋等市營16號巴士返去鹿兒島中央站

精彩！好似去多次咁！大愛

返到鹿兒島中央站後近近地去鹿兒島屋台村食晚飯

鹿兒島屋台村由高見橋搬到西鐵Solaria酒店地庫後好似冇咗個風味


行咗個圈睇晒咁多屋台餐牌後揀咗大隅區域16號屋台


叫咗個鹿兒島縣產豚肉涮涮鍋，個豚肉好食到不得了，湯底又有超多娃娃菜，完全符合我口味

另外叫多一份鹿兒島黑毛和牛，同樣都係好好味，但平時無牛不歡嘅我竟然覺得今次豚肉比和牛出色，可想而知個豚肉係幾咁好食

去到南九州一定要試地雞刺身，地雞刺身味道唔濃但口感一流，美中不足係有筋部分會比較難咬同吞

最後係炭火燒牛肉同豚肉 (唔知自己叫咗邊個部位)，雖然兩樣都好食，但都係涮涮鍋最好食

食完屋台都未夠8點就去多次AMU Plaza行街，今次去到6樓行埋TAITO Station同買可麗餅食

食埋可麗餅就返酒店執行李準備第八日離開鹿兒島返香港

開心時光過得特別快，話咁快就去到第八日最後一日行程
https://youtu.be/3YhzTxD7H28?si=jJBzl5EOhPd--Zuh
第八日朝早都有幫櫻島火山拍縮時影片，但今次唔係影日出而係日出後

開始拍影片時個天重有少少黃

拍完影片個天已經完全變藍

喺酒店Hea到9點就Check out去巴士站搭車，由鹿兒島中央站去鹿兒島機場嘅巴士站就喺西鐵Solaria酒店1樓，由酒店去巴士站完全唔需要離開同一座建築，非常方便

巴士站內有兩部機場巴士專用售票機，利用專用售票機就唔需要慢慢揀目的地或價錢，直接選擇人數就得

機場巴士單程1400Yen

機場巴士班次非常頻密，部分時段更加每10分鐘就有一班車

上車時將車飛交俾職員，同時職員會問你搭咩航空公司，方便佢安排去到機場後嘅停站次序


大約40分鐘車程就去到鹿兒島機場，第一站就係國際線大樓

今日搭12點40分飛機回程，早3個鐘9點40分到達已經有十幾人排緊隊等Check in

鹿兒島機場國際線暫時只得香港線復航，12點40分完成今日唯一航班就可以收工

起飛前2個半鐘先開始Check in，但飛鹿兒島玩嘅香港人都好有時間觀念，10點10分開始Check in時已經有幾十人排緊隊，所以溫馨提示大家一定要盡早排定隊

鹿兒島地勤辦事效率非常好，Check in過程超級順利

完成Check in就行去國內線大樓食早餐同參觀


國內線大樓有好多手信鋪、餐廳，Check in後離境前有時間可以過去行一陣

國內線大樓有個地方好值得參觀，就係Sora Stage航空展示室，Sora Stage航空展示室有兩個出入口，分別係2樓同3樓展望台，我就由2樓開始參觀

Sora Stage航空展示室第一部分先介紹鹿兒島機場歷史，由1933年舊鴨池空港到而家嘅鹿兒島機場

第二部分講飛機，世界第一部飛機、日本第一條部飛機等等


第三部分介紹客機，有波音747、A380、和諧機等


第四部分就係有鹿兒島航線嘅航空公司，兩個香港代表放咗喺最尾

睇完文字展覽就到實物展示

先有2部模擬飛行遊戲機

跟住有波音747-400 Winglet同波音747-300引擎扇葉

有個飛機機內體驗房但冇開放參觀

參觀完Sora Stage航空展示室後經另一個出入口由3樓展望台離開，3樓展望台出入口擺咗個波音747-300引擎罩，好正

鹿兒島機場展望台範圍好大，足足有成座國內線大樓咁長

由展望台望出去重可以見到霧島連峰

離開展望台順便喺3樓餐廳食埋早餐，今次呢間餐廳叫福福(?)

套餐有赤身丼同冷烏冬 (可以揀熱)，1300Yen幾抵食

南九州除咗宮崎牛出名外，鹿兒島黑牛都非常有名，鍾意食牛嘅人一定唔可以錯過南九州


食飽都重有時間就去埋國內線大樓門外浸足湯，為8日南九州行程劃上完美句號


差唔多夠鐘就返去國際線大樓離境入禁區，禁區唔係好大一眼睇得晒，所以我登機時間前20分鐘先入禁區


終於要上機，UO847返香港，負責飛行係A320NEO，編號B-LCU

剛由鹿兒島機場起飛時天氣十分好，清楚睇到下面嘅吹上濱海岸同遠處上甑島、下甑島


未到台灣天氣已經變到非常差，外面乜都睇唔到

大約3個鐘機程順利降落香港機場

第一次望住自己件行李由飛機搬出嚟


香港機場中場客運廊喺10月中重新啟用，有幸成為用到中場客運廊嘅首批旅客

雖然望住自己件行李由飛機搬上車，但因航地勤唔知偷懶定點，現場有十幾人包括自己等咗1個鐘以上，行李帶都停埋都未見行李送到，最後要去行李詢問處搵職員嗌機叫人搵行李

雖然最尾有少少阻滯，但整體而言我都係非常滿意快運服務

順利打完8日遊記冇爛尾，趕得切喺飛沖繩前完成唔洗拖大家

而家準備入機場，返嚟後先打埋後記、南九州旅遊資訊甚至可能騎劫呢度出少少沖繩遊記

祝你旅途愉快

咁早出po

睇相覺得喺湯之平睇櫻島火山個形狀好似怪怪地，無咩氣勢咁
但望返向海個邊景色又唔錯

等樓主再出遊記