[毒撚出城]半自駕半鐵膠8日南九州之旅

同埋單車似乎係當年冇車牌下最好嘅選擇

你下年3月又黎日本，好羨慕

我冇揸開去到日本都唔怕，有揸開更加冇問題啦

偽毒可恥

樓豬返鹿兒島之後有咩搞

點解鹿兒島個邊唔揸埋車?
D 巴士都係幾疏下

佢係少數唔會爛尾嘅巴打黎

我好鍾意九州，嘢又啱食風景又靚

BTW 我都等緊你個遊記

我諗住方便就冇考慮其他車場，我揸細車還好都算易泊

我好少喺日本酒店食早餐，通常都一大早就出門

睇返個牌好似整到今年12月先完工

其實今個星期五就飛日本

你嘅意思係啱啱去完南九州，過幾日又去日本旅行？



留名睇你post 或live

去指宿、櫻島

去指宿有揸，但搭JR去到指宿先租車

啲高速好爽 踩到130條路都好靚
係有時啲山路有啲長 渣到眼訓
新牌仔要小心啲

點解可以又去

都兩星期啦

今次快閃沖繩，去埋沖繩我就去齊47都道府縣不過未玩齊，福井同鳥取只係經過而未玩

飛鹿兒島但去到第六日先留喺鹿兒島玩，今日都係要早起身搭JR



早起的鳥兒有蟲吃，5點幾一起身望出窗見到櫻島日出，有冇咁靚呀

睇日出睇到6點幾就出門口去鹿兒島中央站搭車

去3號月台搭6點54分普通車去指宿

去指宿玩一定要搭特急指宿玉手箱，特急指宿玉手箱一日3個來回班次，最早出發係9點56分出發10點47分到達，最遲回程係3點07分出發4點到達

即日來回想玩到盡又要搭特急指宿玉手箱，一係一大早出發搭最遲回程，一係9點56分出發然後搭普通車回程，身為喜歡早睡早起嘅人當然揀前者

又一次影鹿兒島中央站站牌

朝早6點54分普通車用2抽キハ47系氣動車總共4卡車行走


早上搭指宿枕崎線風光明媚，坐喺車上沿住海邊行駛望住太陽慢慢升起，不得了

食完早餐睇完風景，8點07分去到指宿站落車

指宿日文いぶすきし頭兩個讀音同伊貝日文イーブイ非常似，然後指宿市借呢個啅頭整咗9個伊貝渠蓋擺喺9個不同地方，吸引遊客去影相


指宿站內亦有幾個特急指宿玉手箱打咭位，襯朝早未有遊客時幫佢哋影晒相先

指宿站前Toyota朝早8點就開門，就算一大早開始行程都可以租車

順利拎到部2017年Vitz後，揸20分鐘車去西大山站，泊好車後襯未有列車到站先去對面嘅中園久太郎商店行吓


中園久太郎商店係西大山站旁邊嘅漬物工場，兼營埋西大山站觀光案內所，商店內可以買到JR日本最南端車站證明書

買完紀念品就返出去影車站

車站外有代表幸福嘅黃色郵筒，可以喺中園久太郎商店買Postcard喺度寄出

西大山站月台、站牌同埋開聞岳合照

西大山站站牌

JR路線最北最南最東最西車站，最西嘅佐世保2022年11月已經去過，今次再嚟到最南嘅西大山車站，希望不久將來可以去埋最北嘅稚內同最東嘅東根室

JR日本最南端車站標柱

影完晒相就等9點11分嘅列車到達，準備影列車、JR日本最南端車站標柱同開聞岳合照

列車一接近車站就瘋狂影相，最後揀咗呢張相同大家分享

加多一張列車同JR日本最南端車站標柱嘅合照

西大山車站一日只有幾班列車，往枕崎方向分別係6點23分、7點48分、11點54分、1點47分、2點43分(星期六日限定)、5點34分、6點53分；往指宿方向分別係7點09分、8點36分、9點11分、2點34分、4點56分 (其他嗰啲太早或太夜唔講)。自駕人士想影車要記住以上時間，提早到達車站準備，至於非自駕人士可以選擇一早7點48分到8點36分走或者1點47分到2點34分走，咁就可以搭到JR去西大山站同影車

離開西大山站後揸10分鐘車去長崎鼻，長崎鼻停車場由にしき屋管理，雖然都係免費但會收到宣傳單張

長崎鼻其中一間商店アロハおみやげ品店因為兩公婆鬧交唔開鋪而上過千奇百趣

由停車場行5分鐘就到達龍宮神社

龍宮神社外形真係整到好似傳說中嘅龍宮咁

指宿龍宮傳說相關圖，入面嘅人物經過咁多日睇咗咁多神話故事都相當熟悉，不過呢度有埋圖畫精美好多

龍宮神社另一邊鳥居對住一望無盡嘅大海，成個環境好靚 (如果冇埋座建築物更好)

參拜完龍宮神社後繼續向前行，影霧島錦江灣國立公園碑時可以影埋後面嘅開聞岳

霧島錦江灣國立公園碑旁邊有蒲島太郎同靈龜，跟住指示參拜同許願，願望就會成真

許願後行去長崎鼻燈塔睇風景

呢個位整咗個心心俾遊客影心心同長崎鼻燈塔

但我拎個心心嚟影開聞岳

長崎鼻燈塔非常細座亦都唔可以上去參觀，但仍然非常受歡迎

長崎鼻燈塔望出去嘅風景實在太靚，好天時甚至望到屋久島

喺長崎鼻燈塔留咗一陣慢慢睇風景，影埋開聞岳之後返去にしき屋買埋手信就離開

自駕人士可以過嚟行吓，長崎鼻 (龍宮神社同燈塔) 可以逗留45分鐘至1個鐘，視乎大家會喺燈塔Hea幾耐睇海

至於非自駕人士就要留意指宿巴士班次 (https://www.ibusuki.or.jp/access/80fad575261cdcf7175ec16d95911f5c.pdf)，現時一日得返6班車會比較難計劃行程

離開長崎鼻後揸半個鐘車返到指宿砂浴會館，2017年嚟嘅時候因為打風玩唔到砂浴，今次嚟到終於試到

而家玩砂浴唔可以拎電話或者相機入去影相，要影相就影呢個牌

入去前先影一影玩砂浴嘅地方，一陣都會經過呢度行落去

喺砂浴會館門口搵到火伊貝渠蓋，完成度1/9

先上2樓大堂俾錢，最平玩一次1100Yen，加埋包頭用毛巾1300Yen，再要埋抹身毛巾就1500Yen

俾錢後就行返落1樓更衣室同大浴場

更衣室門外有隻巨型伊貝

門外亦都有指示介紹玩砂浴嘅流程，先去更衣室換浴衣，然後離開砂浴會館到外面沙灘玩砂浴，官方建議每次玩砂浴唔好超過10分鐘，完成砂浴後返去砂浴會館沖身同浸浴


浸完大浴場抹乾身後可以返去2樓大堂休息一陣先繼續行程

雖然每次玩砂浴建議時間係10分鐘，但連埋俾錢、換浴衣、沖身、浸浴等等，整個過程都要1個鐘頭

離開砂浴會館後開車去食午餐，途中經過船廠見到噴射水翼船上排，即刻搵個地方停低影相

10分鐘車程後去到目的地道之駅山川港活お海道

食午餐嘅地方就係道之駅入面嘅市場食堂鶴之港

市場食堂鶴之港嘅午餐好抵食，食魚生壽司都只係900-1400Yen

我叫咗最豐富嘅山川刺身定食都只係1300Yen，已經有6款刺身、漬物、味噌湯、飯

食飽後行一陣道之駅，然後揸車去山川站影相，呢度係JR日本最南端有人車站

諗住入去買返張西大山站入場券，點知JR日本最南端有人車站只得平日4-6點有人

離開山川站後去到指宿最後一站知林ヶ島，一落車就喺停車場見到葉伊貝渠蓋，完成度2/9

影完渠蓋就開始行去知林ヶ島

知林ヶ島係錦江灣上一個連島沙洲，當潮退時海面會露出沙洲小路，遊客可以利用沙洲小路出現嘅時間到知林ヶ島遊覽

沙洲小路出現嘅時間每日唔同，雖然牌上寫本日終了，但根據指宿官方網站 (https://www.ibusuki.or.jp/tourism/view/chirin/load/) 提供嘅潮汐表，今日沙洲小路出現由11點55分直到3點50分



影完介紹就開始行上沙洲小路，沙洲小路都幾難行，每行一步隻鞋都入沙

幾經辛苦行到沙洲小路中間，喺度影返幾張相先

根據官方資訊，行沙洲小路去知林ヶ島單程需要30分鐘，我影完相望一望時間，應該唔夠時間行晒整條沙洲小路，決定忍痛中途放棄，下次我一定會再嚟架

如果大家都有計劃行沙洲小路去知林ヶ島，一定要預留足夠時間同查清楚潮汐表

沿住海邊行返停車場拎車，跟住就揸返指宿站前Toyota還車

還車前當然要入滿油，呢度油站入油時會用布蓋住倒後鏡，呢個做法幾好，防止司機未完成入油就開車走人