[毒撚出城]半自駕半鐵膠8日南九州之旅

德之島有咩玩

通常啲人出島都係聽屋久島、種子島或者奄美大島多，好少聽德之島

繼續第一日喺界 霧島嘅行程，返到房間睇完日落再Hea到7點半就落去2樓餐廳食晚飯


入座後已經見到檯面放咗中文餐單，雖然係簡體而且翻譯有啲奇怪，但睇得出旅館有認真對待唔同國藉住客

首先第一道前菜係炸糯米團，個醬汁有少少甜酸味加上海膽鮮味，食完好想問職員有冇得添食

順帶一提，負責上菜嘅職員來自埼玉縣，英文水平一般但會好努力去嘗試介紹每一道菜

第二道菜係鯛魚、蝦、雜菌煮成嘅清湯，清湯非常鮮甜而鯛魚、蝦煮過後仍然保留鮮味


再繼續就係寶樂箱，箱入面放咗七款不同食物，光線由上照入箱內會呈現島津家家紋

係正中間分別係好好味嘅三文魚籽伴甜蝦紹興酒漬、秋刀魚丸配毛豆醬、冇咩味嘅煙鴨胸、粟子糕、穴子小袖壽司

外圍就係好咸嘅白玉胡桃味噌、雞肉葡萄乾糕、兩款魚生同另一樣食到上癮嘅橙醋雞皮

最後一道前菜就係天婦羅，分別有帆立貝、鮭魚、茄子同蓮耦

去到主菜部分，職員先將清湯底煮滾後加上大量鰹魚片煮多3分鐘，喺煮嘅時候已經聞到好香嘅鰹魚味

3分鐘後就可以加入鹿兒島黑豚，中間卷住嘅係五花肉而旁邊鋪喺碟上係里脊肉，即係平時成日講嘅梅頭

兩款肉都非常好食，可惜界 霧島係冇得即場單點多一份黑豚肉



食完黑豚涮涮鍋後，職員會拎一盒蕎麥麵入嚟加落剛才嘅高湯再煮3分鐘，但老老實實呢個蕎麥麵太淋身冇想像中咁好味

最後就食埋甜品，分別有提子、紅薯黑糖雪糕同埋鹿兒島名產糕點輕羹

整體而言個晚飯非常好味，雖然當中有部分食物我係唔食或者覺得唔好食，但成個晚餐食物水平好高，其中三文魚籽伴甜蝦紹興酒漬、橙醋雞皮同黑豚肉係食完想即時Encore

食飽後由2樓餐廳返到3樓大堂，見到Lounge已經搖身一變成為表演場地

呢度每晚9點15分都會有一場關於天孫降臨嘅表演，但表演只有日文冇其他語言


不過聽唔明日文都唔怕，整個15分鐘嘅演出只有頭段由司儀講解部分係日文，之後神話故事人物打鼓時係完全冇對白

界 霧島嘅安排幾好，即使係第二輪7點半先食晚飯，食飽後都可以睇到9點15分嘅表演，而睇完表演後大家亦可以繼續享用酒店其他設施

第二日行程朝早繼續係界 霧島


前一晚睇咗天氣預報話今日會好天，不過由房間望出去都係有啲濛，望唔清櫻島

但太陽昇起嘅時候天空變成橙色，襯托住矇矓嘅櫻島又有另一番風味


未夠7點已經梳洗完畢落去大浴場再浸多次，朝早望住櫻島浸浴簡直係人生一樂也

浸完浴就返房間等食早餐，呢個時候竟然見到櫻島冒煙，冒煙嘅形狀同酒店準備嘅入住資訊咭一模一樣

Hea到9點鐘就落去餐廳食早餐，早餐一盤過一次上晒，非常方便

主食係黃尾魚西京燒，配上幾道由豆腐製成嘅前菜同埋3件油揚魚肉棒天、毛豆、五目，成個早餐好啱我口味，我第一次食旅館早餐食到冇淨

食飽後再返房Hea多一陣，欣賞埋最後嘅房間美景

大約十點多啲就Check Out離開界 霧島，準備揸2個鐘頭車去下一站宮崎

個人嚟講非常喜歡界 霧島，由入住同離開、晚餐同早餐體驗、以及溫泉設施同景色我都覺得係頂級，不慚係星野集團旗下酒店

網巴出post，當然留個靚名先得啦
揸車去日向，應該會去埋馬背呱

自從打風吹冧咗幾條火車橋後，而家南九州鐵路遊無以前咁好玩

原先計劃離開界 霧島後直接揸2個鐘頭車程去到日南鵜戶神宮，途中經過堀切峠見到外邊風景咁靚，就泊低架車喺道之駅鳳凰落車行一陣

道之駅鳳凰非常多手信同特產賣，買完手信再過馬路到海邊展望台睇風景


由展望台望出去就見到宮崎日南海岸最出名嘅鬼之洗衫板，鬼之洗衫板係一個超巨型嘅波浪狀岩石，由青島一直伸延到堀切峠，喺堀切峠可以從高空欣賞，而去到青島就可以近距離接觸

好慶幸突然心血來潮去鵜戶神宮途中停一停低，否則今個旅程就會有個非常大嘅遺憾

會去馬背，但嗰日陰天有雨

冇咗肥薩線同3架觀光列車真係差好遠，但呢啲天災嘅嘢又唔到JR九州控制到

離開堀切峠後沿國道220號揸多半個鐘頭車就去到鵜戶神宮，揸車去鵜戶神宮有兩個停車場可以揀，分別係巴士站嘅觀光駐車場同海邊嘅第一、第二駐車場，我就揀咗泊遠啲行耐啲嘅觀光駐車場


喺觀光駐車場泊好車就跟住樓梯開始行

上咗幾級樓梯望向左手邊就會見到好大個鵜戶神宮石碑喺山邊，呢個石碑旁邊就係未有鵜戶崎隧道時舊參道嘅入口

行到樓梯頂就係鵜戶崎隧道入口，鵜戶崎隧道連接住觀光駐車場同鵜戶神宮，望落有多少似千與千尋入面嘅隧道，喺度影相打咭一流，亦都係我泊車係觀光駐車場嘅原因

穿過鵜戶崎隧道後接返舊參道嘅八丁坂返落海邊

由觀光駐車場開始行，大約行10分鐘就到達鵜戶神宮神門，如果選擇泊車喺第一、第二駐車場，落車嘅位置就喺神門附近

經過神門到就達樓門，樓門上面有個超大嘅繪馬，正面就係鵜戶神宮嘅神明兔仔

過咗樓門之後有條千鳥橋，再經過埋就到達著名嘅玉橋

由玉橋上望出去就係廣闊嘅太平洋同海邊嘅鵜戶神宮合照最佳地點，相信大部分嚟鵜戶神宮嘅遊客都係睇到呢個角度嘅相而到臨

不過玉橋比較狹窄而且另一邊已經係長樓梯，影相時唔好阻到其他人同埋多加忍讓，如果有其他人需要通過最好讓咗俾人先，等冇人先慢慢影

喺玉橋上影完相就行呢條長樓梯落去鵜戶神宮，樓梯石頭大小不一，行樓梯時千萬要小心唔好掛住睇外面風景


落到樓梯底望向左手邊就係位於洞入面嘅鵜戶神宮本殿

洞入面重有一塊御乳岩，呢塊岩石都係同神話故事有關，係豊玉姬上岸產子後留低自己嘅乳房去餵哺小孩，亦都因為呢個故事鵜戶神宮成為祈求安產嘅地方


鵜戶神宮嘅岸邊亦都有一塊龜岩，如果遊客能夠將運玉拋入岩石上嘅洞就可以達成願望，男生要用左手而女生要用右手

我都用200Yen買咗5粒運玉試試運氣，但睇嚟我願望太難實現，龜岩唔可以俾我達成


參拜完鵜戶神宮後沿路返回觀光駐車場，上車後就繼續下一個景點

由我落車開始計直到返到停車場拎返車，參觀時間用咗1個鐘，大家計劃行程時都可以用嚟參考

離開鵜戶神宮揸10分鐘車就到達日南Sun Messe，入場費1000Yen

日南Sun Messe位於山上面，2017年我搭巴士嚟嘅時候喺巴士站落車行上去公園入口行到想死，所以非自駕人仕去日南Sun Messe參觀要有心理準備

日南Sun Messe最出名當然係摩艾像，連門口歡迎牌個位都係摩艾像

由入口行去摩艾廣場唔需要上落斜，平路行2-3分鐘就到

日南Sun Messe摩艾像係世界上唯一正式許可復刻，係正版唔係翻版


上一次參觀嘅時候有活動所以摩艾像前搭建咗個超巨型嘅台，今次終於可以冇遮擋咁影晒7個摩艾像

每個摩艾像都高5.5米，分別代表7種唔同運，摸下佢哋就會提升運氣，正中央就係最特別嘅世界和平

下年年中去 連去邊都無idea 係見UO平飛一野就買左8日鹿兒島入同走

喺日本留名支持

我又唔係咁睇 香港基本上全部都有街燈而且冇乜山路 喺泊車難啲

嚟緊去能登，都心大心細想租車
但自問手車唔係好好，又唔識日文，又自己一個人
有咩事就企咗喺度

摩艾廣場接近係日南Sun Messe最底層，影完摩艾像就行上山去埋其他景點

日南Sun Messe另一個打咭位就係山腰嘅韆鞦，呢個位置可以望住摩艾像玩韆鞦，亦都可以影埋玩住韆鞦同摩艾像合照

整個日南Sun Messe唔止得7個摩艾像，韆鞦附近亦都有個緣切摩艾像，意思就係摸一摸會將唔好嘅緣份切斷

借位幫緣切摩艾像影到好似有頭髮咁

再向上行就到達戀人之丘，呢度有2個摩艾像同心心合照位


戀人之丘旁邊係另一個好多遊客影相、七彩顏色嘅觀賞者

觀賞者由今井祝雄創作，7個人面向海剛好對應返下面7個面向陸地嘅摩艾像

我都係8日，8日玩南九州幾Perfect

想Hea就淨宮崎加鹿兒島
想滿足啲去多幾個地方可以玩埋熊本或者高千穗
想行軍咁玩就跟我個Plan去晒咁多地方

山路我反而冇問題，係怕其他駕駛者篤油爭位出唔到迴旋處

自己1個揸車先好，真係慢慢嚟唔得咪停埋一邊研究下，反而有人喺旁邊會大壓力啲

睇住你份功課黎抄 再加加減減

好多年前跟團，當中一個行程去鵜戶神宮。
可惜當時落大雨，我哋個個揸住把遮

印象最深刻嘅係見到人地日本local團個女導遊著住西裙高踭鞋白手套擔住把遮上石級
我仲驚行快兩步會仆死

觀賞者後面就係天空之塔，個名叫塔但其實只係一座普通建築物，甚至連屋上展望台都冇，不過入面有餐廳同廁所可以解決生理需要

穿過天空之塔就去到太陽之階段，行埋呢條樓梯就去到日南Sun Messe最高點


日南Sun Messe最高點就係地球感謝之鐘，同個名一樣即係多謝地球嘅意思

由地球感謝之鐘望出去，太陽之階段、天空之塔同摩艾像會成一直線，不過天空之塔擋住咗睇唔到最下面嘅摩艾像


冇行返原本嘅路離開，兜咗另一邊睇埋天地望蝶

最後先返去停車場拎車離開日南Sun Messe

日南Sun Messe範圍比較大，行嘅路亦都相對比較辛苦，雖然公園內有哥爾夫車可以租，但租車必須拎有日本車牌，所以香港遊客都係乖乖行路啦

我用咗大約1個半鐘頭差不多行晒整個公園，途中都唔算好趕咁行亦都有啲位係慢慢影相，例如排隊影韆鞦位等

離開日南Sun Messe就揸1個鐘頭車去青島，由於去程已經停咗喺堀切峠睇風景，回程直接揸到青島先停低，然後快快手喺附近搵地方食晏 (但其實時間已經係4點食下午茶)


返到青島附近見到有個好大嘅招牌寫住漁師之牡蠣小屋，加上餐廳前面有好大個停車場就諗都唔諗泊低架車入去食嘢

漁師之牡蠣小屋係炭火燒烤，入座要收炭錢770Yen


下午茶時間唔想食太飽唔洗食放題，少少地1320Yen叫咗1KG蠔嚟燒 (大約12-13隻蠔好似係)，啲蠔好鮮甜好好味


另外又叫多咗隻龍蝦刺身，呢隻龍蝦刺身2500Yen幾抵食，不過龍蝦頭唔可以再煮味噌湯就差啲

另外叫多咗帆立貝同其他食物，埋單唔洗5000Yen但食到好滿足

最近青島參道嘅停車場要500Yen，免費仔就揀去附近免費停車場泊車，免費但要行5分鐘先到青島參道


青島參道商店街唔算好長好熱鬧，加上我去到嘅時間已經係下晝5點，更顯冷清

行到岸邊見到眼前景色個人即時涼咗截，仆街啦冇Check潮汐表而家水漲睇唔到鬼之洗衫板

好在去程時心血來潮停一停堀切峠，雖然唔可以好似青島咁行上去影相但總算叫做睇到鬼之洗衫板

由於5點幾係當日潮汐水位最高時間，過橋時啲浪喺旁邊不停拍打，好擔心行到一半時會變林峯「Let's Get Wet」

有驚無險過到對岸，影返青島神社個石碑先

影完相就由右手邊嘅沙地行過鳥居進入神社範圍


青島神社本殿位於青島正中央，旁邊有好多樹木包圍幾有南國風情，但亦都係咁所以日落時份就變得好昏暗

本殿旁邊重有一條繪馬隧道


穿過隧道後就到達一個神秘嘅投瓮所，用200Yen買一隻瓷碟再掉去中央位置就可以消除災難

參拜完青島神社回程時太陽已經落到山下，而海水水位同浪比去程時更高更大，幸好回程過橋都冇同林峯玩遊戲

天氣唔好去宮崎應該冇嘢好睇

但有啲位置我特登做鐵膠先咁行，你可能要執一執