[毒撚出城]半自駕半鐵膠8日南九州之旅

當年未有車牌要搭巴士去呢度真係玩死左自己
用左差不多一日只去到呢一個景點

但我發覺揸高速公路要超速先勉強追到Google Map個時間

高千穗峽,神社,鐵道都可以行,係天岩戶太遠行唔到,巴士班次又疏
踩單車係力之表現

今次好享受

好似未試過5點就入住旅館，第二日10點先走

雖然Topic係毒撚出城，但今次係兩個人去

正，去邊度玩

都係，搭南阿蘇鐵道要夾好班次先得

我都奇怪架啦....單拖點會食住得咁豪呀...
仲買張2人火車飛

我當年朝早8點搭車，一日去晒鵜戶神宮、日南Sun Messe、青島、海幸山幸，但而家做唔到啦

唔知嗰時發咩神經走去踩

年青

咁有啲Sad

我好彩同行人好鍾意郊外

上回提到搭九州橫斷特急2號去到新水前寺站落車


喺新水前寺站出閘後落天橋轉搭熊本市電，市電A同B系統都可以由新水前寺站搭到去通町筋

通町筋有熊本其中一個影熊本城最靚嘅角度，馬路、市電站加埋熊本城

離遠影完熊本城就行下通睇吓食咩做午餐，最後都係揀返勝烈亭

勝烈亭可以話係熊本必食餐廳之一，最出名就係六白黑豚炸豬扒

午餐時段食勝烈亭有午市餐單，價錢會比其他時段平幾百Yen左右

今次叫咗嚴選六白黑豚里脊肉套餐，套餐有140克炸豬扒、飯、味噌湯；另外叫多一份炸蠔

兩樣嘢食都好好味，即使係第三次食都冇覺得退步

食完午餐就到今日最最最重要嘅行程，熊本熊廣場

熊本市政府趁今年10周年幫熊本熊廣場大翻新，7月時重新開幕，翻新後嘅熊本熊廣場變到好色彩繽紛

熊本熊今日有兩個見面表演時間，分別係11點半同2點，見面表演時間可以喺官網上查到

門口有熊博期間限定扭蛋

裝修後嘅熊本熊廣場空間比以往大咗好多，舞台亦都由牆邊移到正中央


熊本熊嘅收藏品唔再集中收埋喺辦公室內，第一間房Fan's House就有熊本熊坐過嘅電單車、第一屆日本吉祥物大賽冠軍獎盃、辦公室電話等

熊本熊廣場內有一隻1:1熊本熊公仔，最難得係呢隻1:1熊本熊公仔整得非常神似，好似本尊坐咗喺度咁

熊本熊簽名同自畫像


第二間房有一張貼滿熊本熊足跡嘅世界地圖，熊本熊連南美洲都去過

呢間房都有收藏熊本熊周邊產品，例如四驅車同零食

10月份熊本熊會以萬聖節服裝同大家見面


最後行埋手信區，買完嘢再等熊本熊出場

大約表演前45分鐘，職員會將場地嘅櫈重新排列，等小朋友可以坐喺舞台前，亦都作為遊客同舞台嘅分隔

熊本熊入場後一如以往會同大家傾計，例如問大家來自邊度等等


熊本熊首先同大家跳Kumamon Touch，360度舞台啱晒活潑好動嘅熊本熊，好幾次都跳到去我面前

跳Kumamon Touch時有幾個動作要掂耳仔、額頭，熊本熊手短掂唔到要事後用魔法棒補返


唔知問緊咩問題，俾提示要俾到瞓喺舞台

最後熊本熊跳多一首歌就同大家講再見

離開熊本熊廣場後搭熊本市電A系統返熊本站前，趕喺4點完場前行熊博2023嘅熊本鐵道節

雖然話係鐵道節，但熊本熊廣場都有一個攤檔賣紀念品


話明係鐵道節JR九州當然有份，今年JR九州帶咗SL人吉Head Mark同58654銘牌嚟參展



亦有大量SL人吉照片，唔同年代都有

現場有賣58654百歲紀念乘車券，我都有買一張收藏

JR九州其他D&S列車介紹就只得3個易拉架

超大張嘅感謝SL人吉橫額


南阿蘇鐵道主力宣傳2023年7月15號全線運轉再開，但我今朝已經坐完

睇埋其他攤檔再影多次熊博牌就繼續行程

行完熊本鐵道節又搭熊本市電A系統，今次喺花畑町落車再行過去熊本縣物產館

行完物產館就向熊本城方向行，但目的地唔係熊本城


熊本城上次已經行過，今次行熊本城旁邊嘅櫻之馬場城彩苑，櫻之馬場城彩苑可以稱得上係熊本市嘅葵廣，整個場地都係賣小食


首先試吓咁得意嘅熊形燒，叫咗吉士同朱古力兩隻味，同其他人形燒味道差不多，只係變咗熊本熊樣


另外都買咗抹茶雪糕，揀咗一杯5%同一杯玄米茶，真係好好味難怪咁多人排隊



行完櫻之馬場城彩苑又去到花畑廣場，今日仍然有RKKまつり2023，但今日活動6點就完場


趁活動未完喺花畑廣場買串鐵板魷魚食，本身前一晚已經想試但行完Kumamon Village呢度已經完場閂門試唔到，好在今日趕得切

食完魷魚又搭熊本市電A系統返熊本站，行去酒店拎返行李就喺自助機劃埋熊本站去鹿兒島中央站嘅新幹線指定席，今次張Pass終於冇插錯方向

雖然拎完行李都趕到6點40分嘅さくら561號，但さくら停足5個站先到鹿兒島中央站，寧願行一陣熊本站肥後よかもん市場再搭7點01分嘅みずほ609號

行完熊本站肥後よかもん市場再入閘先剛剛好6點40分

上到月台大把時間就慢慢影相，先影熊本站站牌

再影站務員喺月台上工作嘅地方，有開關閘門嘅制、每日列車運用表等等

みずほ609號同樣用N700列車，再一次坐到非常舒適嘅指定席座位

大約40分鐘車程就到達鹿兒島中央站


由櫻島口(東口)方向行，一出站就見到之後3晚住嘅酒店

最後3晚住嘅鹿兒島西鐵Solaria酒店，就喺鹿兒島中央站對面同鹿兒島機場高速巴士站樓上

酒店房間唔算大但好整潔，而且係乾濕分離浴室，每晚房價只係600蚊，超值

夜晚係房間望出去乜都睇唔到

放低行李後去鹿兒島中央站旁邊嘅AMU Plaza食晚飯


AMU Plaza 5樓有好多餐廳，但我事前已經揀好食利久牛舌，呢個係牛舌極定食3枚6切

食飽後去酒店旁邊Aeon買香印提子返酒店邊Hea邊食，完結大滿足嘅第五日

我都岩岩去完 第一次自駕
香港渣左7-8年
去到基本可以無縫交接
好撚易渣
泊位又易

唔知點解九州遊記特別好睇，尤其睇到比較少人去既地方就會勁開心
btw我都無耐係鹿兒島住過呢間西鐵酒店 (仲寫緊，有排先到 )，超正

我上次都住DORMY INN同泊佢個停車場，但之後發覺笨左，酒店後面個地下場700定800yen max，下次去就泊街算，Dormy Inn 個多層場我上次去得返啲豬頭骨位，個場又唔係闊落，我七人車扭到癲先入到

青島我泊青島站，免費😂

DORMY INN早餐個南蠻雞好正

我二月去陣已經封咗條路，果條馬路行死人，勁斜，而家都未整返棧道，唔通好難搞