[毒撚出城]半自駕半鐵膠8日南九州之旅

離開高千穗鐵道後就揸15分鐘車去天岩戶神社

由停車場行入去係天岩戶神社西本宮

喺河嘅另一邊重有東本宮，不過今次唔會去東本宮，反而會再行遠啲去天安河原

由西本宮去天安河原嘅指示好多，先行一小段馬路再由斜路落到岩戶川旁，眼前就係太鼓橋

過橋後繼續沿住岩戶川行


大約行15分鐘就由西本宮行到去天安河原，天安河原係神話故事中天照大神隱身嘅地方，呢度環境咁清優難怪天照大神留喺度唔願出去

由天安河原洞入面望返出去，成個環境好舒服好靚

傳說許願後成功疊起石頭，願望就會成真

喺天安河原留咗一陣見天色開始昏暗就返去西本宮停車場拎車離開

由天岩戶神社返去高千穗途中會經過高千穗鐵道天岩戶站

呢度影出去高千穗鐵橋好靚，只可惜已經錯過咗最後一班小火車，既然冇得影小火車所以快快手影完幾張相就繼續揸車返高千穗

冬天唔開架
水位太高

多謝推介，睇吓條片先

咁Sad

不過睇返官網應該係關水位事，冬天撞啱水位低應該都有機會開

繼續第三日行程，上回提到去完天岩戶神社同天安河原，跟住就揸車返高千穗


返到高千穗就直接去今晚住嘅高千穂 離れの宿 神 隠れ，旅館個名同個位置好貼切，真係好隱匿

喺門口泊好車就經呢條咁低調嘅小徑進入旅館

旅館大堂除咗負責Check In/Out嘅Counter之外就係得3張櫈1個爐


旅館只有8間房，只得兩間有露天風呂，今晚入住呢間山吹係其中一間

房間係和洋式設計，入到房左邊係鋪咗榻榻米嘅廳，外邊係庭園同露天風呂

右邊就係兩張單人床同梳妝台


浴室內同室外都各有一個風呂，保溫板下面已經放滿溫泉水，打開就浸到熱辣辣嘅溫泉

今晚嘅旅館都係一泊二食，Check In後都冇再外出，留喺房Hea到食飯


晚飯嘅地方就係旅館大堂後方，入面有8個獨立空間對應返8間房，食晚飯同食早餐都坐返同一張檯

晚飯可以揀5點半、6點同6點15分開始，Check In時已經揀定，咁早開飯食飽後行去睇夜神樂就啱啱好

入座前職員已經Set好檯，坐低後就開始上菜

今次餐單得英文，冇中文甚至日文都冇，有啲菜式要Google先知係乜

首先會上6樣前菜，分別有蕃薯、竹筍壽司、蝦、煙鴨胸、燒油甘魚同蒟蒻

然後都未開始食就連續捧多3碟前菜入嚟，有燒魚、吞拿魚同油甘魚刺身

最特別係個竹筒，入面好似焗芝士加麻薯咁，食完都唔知自己食咗乜

跟住有個清湯，非常清甜

之後就係天婦羅，有茄子、青椒、南瓜同蕃薯(定薯仔?)

燒魚就係一款叫櫻鱒嘅品種，幾好味，英文寫Cherry Salmon但唔係我哋平時食開嘅三文魚

最後就上埋高千穗牛涮湔鍋、飯同味噌湯


高千穗牛有成4片，每片都棉胎咁大張，而且入口即溶超級超級好食

食飽後上埋甜品，有柿、和菓子同非常酸嘅啫喱

食完咁滿足嘅一餐就返房Hea，等消化到咁上下先去浸溫泉

第四日朝早6點就起身，除咗係前一晚早訓之外，亦都因為高千穗朝早有個地方好值得去




由旅館揸10分鐘車就到達國見之丘，國見之丘係高千穗盤地內一座小山，每年9-11月都極大機會睇到雲海

但國見之丘喺早上冇巴士到達，如果要睇雲海除咗自駕就只可以包車，算係比較麻煩但都值得去嘅景點


望向東邊高千穗方向，天氣麻麻加上唔多雲，唔太壯觀


望去西邊阿蘇山方向就正啦，雲層飄浮喺山腰，得返個山頂突出嚟

睇完雲海就返旅館Hea多陣等食早餐

早餐餐單同樣入座前已經放好喺檯面

坐低冇耐已經全部食物一次過上晒，籃中間全部都係漬物、亦都有燒魚同玉子燒、沙律、豆腐、味噌湯、粥同埋飯

食飽後會上埋咖啡或茶，茶就係港女打咭最愛玫瑰花茶

完成早餐後，我都Check Out準備揸車去日向市

8日行程喺南九州，唯獨係今日朝早多雲有雨，離開高千穗去到日向市見到個天氣都唔算太差，決定按原定計劃照去景點



第一站先去大御神社

大御神社社殿起喺海邊背住大海，建築規模唔算好大但供奉住天照大神

社殿旁邊重有一塊大空地，好天時喺度望出去太平洋好靚，不過今日天氣咁差就...

好快咁參拜完大御神社社殿就行去鵜戶神社

由大御神社行去鵜戶神社只需要5分鐘，頭段係非常易行嘅路但去到後段就要沿岩壁行落石灘

落到石灘望入山洞就係鵜戶神社，而鵜戶其實就係解洞穴，所以呢個鵜戶神社同日南鵜戶神宮都叫鵜戶而且都喺山洞入面

由鵜戶神社望返出去，感覺除咗係洞穴內冇咩特別

但行過少少再望出去，用多少少想像力，個洞口就變成好似一條龍飛上天，亦都係龍宮(鵜戶神社)個龍宮嘅來源

有無去睇夜神樂？
多唔多人?

喺大御神社留咗45分鐘後又去下一個景點



第二個景點係距離大御神社只係5分鐘車程嘅願いが叶うクルスの海

呢個位置嘅柱狀岩被海浪侵蝕變成好似個十字咁，所以又叫十字海

加埋旁邊有舊石睇起上嚟好似日文「叶」字，聞說喺度許願的話願望又係可以實現

喺十字海逗留咗幾分鐘就繼續去下一個景點，5分鐘車程後到達馬背茶屋就泊低車

喺馬背茶屋左邊就見到遊步道入口

遊步道比較平坦只有少量上落斜，大約行5分鐘就到馬背展望所，展望所有玻璃地板可以行上去打咭


馬背整個地區都係柱狀岩，當中日向岬呢個位置更加有高70米嘅柱狀岩壁，大自然嘅威力真係驚人

冇去到睇呀，本身興趣不大加上食飽唔願郁

前幾年去過鹿兒島 人比大城市少 幾好行
仲去埋櫻島

喺馬背展望所影完相再向前行多1分鐘就到達日向岬

日向岬上面行出去嘅步道正正就好似行咗喺馬背上面

行到最盡頭嘅路有少少崎嶇，每行一步都要望清楚，如果唔係就會跌落兩邊幾十米高嘅懸崖


由馬背上望返左右兩邊嘅柱狀岩景色，真係好靚好壯觀，可惜係今日天氣太差

喺步道最盡頭望出去太平洋反而被前面嘅草叢遮住咗

我反而喜歡行返後少少，連埋左右兩邊柱狀岩同正前方馬背遊步道影張全景

離開馬背後見有時間淨就行埋樓梯上山去細島燈塔


細島燈塔望落唔算太古老，但原來已經有過百年歷史，1910年已經屹立喺日向岬上為船隻照明


細島燈塔有個展望台，不過展望台望出去景色反而冇馬背上望出去咁靚

離開細島燈塔後唔好轉左落樓梯行回頭路，轉右行斜路反而會更快返到馬背茶屋

由落車開始行遊步道到去埋燈塔回程返到馬背茶屋大約用咗1個鐘，配合埋大御神社同十字海玩一個早上剛剛好；不過去呢3個景點都係天氣最重要，事前我都怕今日天陰有雨要改行程，但幸運地只係毛毛雨就按原定計劃出發，希望有機會可以喺藍天白雲下嚟一次

喺馬背茶屋開車後，經過Aeon買埋午餐就返去日向市還車

由第一日中午落機1點開始租車，到第四日中午1點去到日向市還車，順利完成4日3夜自駕行程，之後就開始3日鐵膠行程同用鹿兒島Welcome Cute Pass玩鹿兒島

喺Toyota還車後行5分鐘就返到日向市站，幾方便

日向市站規模好細連閘機都冇，入閘時Show Pass俾職員睇就過得，第一程車搭1點30分嘅特急ひゅうが11號

上到月台影埋個站牌

特急ひゅうが11號用4卡編成787系特急電車，除Green Car外全車自由席

上到車影埋車廂入面，第1卡頭半部分係Green Car，其餘就係普通車廂


787系特急電車嘅座位由1992年投入服務後都冇更換過，但坐落係舒適嘅

坐定開車後就拎埋剛才喺Aeon買嘅午餐出嚟，有油甘魚、鰹魚、吞拿魚刺身、海鮮丼同燒魷魚

45分鐘車程去到宮崎站就同月台轉乘特急きりしま11號去鹿兒島

特急きりしま11號同樣用4卡編成787系特急電車，但就唔係全車自由席


2個鐘頭車程除咗後段沿住錦江灣邊行嘅時候可以睇櫻島火山外，其餘時間都係冇嘢做，甚至因為太多隧道連上網都時得時唔得

去到鹿兒島中央站落車後又影站牌，然後利用40分鐘轉車時間出閘行一行鬆一鬆

差唔多夠鐘又入閘搭車，今次搭新幹線みずほ608號去熊本

上車前影埋鹿兒島中央新幹線版站牌

みずほ608號用N700列車，係山陽直通九州新幹線嘅7000/8000番台，只有8卡車廂

用JR Pass搭九州新幹線特別係N700行走嘅班次，劃指定席就可以享受到2+2配置座位；相反搭自由席只能坐到3+2配置嘅座位


N700嘅指定席舒適度可以媲美Green Car

九州新幹線入面みずほ係最快嘅班次，由鹿兒島中央出發，中途不停站只需要40分鐘就去到熊本站

落車後去到新幹線收費大堂第一時間搵熊本熊影相，除咗超巨型嘅熊本熊頭外，閘入面Family Mart都有熊本熊身影


出閘後先試用自助機試吓預約指定席，將JR Pass插入左下角出磁票位置 (但記得插啱方向，否則就好似我張Pass咁印錯位) ，然後揀返出發同到達車站、日期、時間，最後就可以揀埋搭邊班車同想坐咩位，成個過程非常容易，唯一難度應該係搵站名，事前查定站名日文第一個字係乜就解決到問題


原先想增值其他IC Card喺熊本用，但見到咁得意嘅熊本熊IC Card就忍唔住要買返張

2000Yen一張入面有1500Yen儲值可以用，但熊本熊IC Card只能喺熊本縣內用，其他地方完全用唔到


買完IC Card就行去熊本站旁邊The NEW Hotel Check In，The NEW Hotel前身係熊本新大谷酒店，不過疫情後已經易手而且冇咗熊本熊主題房，但酒店就喺熊本站隔離位置非常好，冇熊本熊主題房都照樣入住

鹿兒島好正呀，景點同餐廳又集中，飛過去又近

唯一係出入機場比較唔方便

Check In放低行李後又出發


2023年10月7至11月5號喺熊本市會舉辦熊博，熊博個熊係指熊本， 但作為熊本縣吉祥物，熊博個標誌直接用熊本熊代替個熊字

為期1個月嘅熊博好多活動，10月呢個星期喺熊本站前有くまもとレイルウェイフェス (熊本鐵道節)，啱晒身為鐵膠嘅我


雖然今日嘅活動已經完結，但會場內仍有好多位可以影相打咭


影完相就搭熊本市電A系統去櫻町，難得地搭到9700型低地台電車，9700型喺1997年已經投入服務，係日本第一代低地台電車

10分鐘多啲車程去到辛島町就落車

好辛苦咁穿過人群去到櫻町花畑広場，迎接我係另一個熊博會場同另一堆人群

原來呢兩日喺花畑廣場有RKKまつり2023，難怪咁熱鬧咁多人

當然我唔係為咗RKKまつり2023而嚟，穿過人群入到熊本櫻町去2樓嘅Kumamon Village

Kumamon Village有個小舞台，逢星期日下午1點熊本熊就喺度同大家見面


Kumamon Village重有好多熊本熊收藏品 (非賣品) 同紀念品

當中最受歡迎就係熊本熊車牌系列，經常賣到斷貨


行完Kumamon Village就去埋5樓戶外區域睇4米高嘅熊本熊

呢隻熊本熊超大隻，不過略嫌唔夠肥，再肥啲會得意啲

影完熊本熊再喺5樓影返落去花畑廣場，RKKまつり2023真係好熱鬧好好氣氛

行完熊本櫻町準備去下通食晚飯時冗好見到RKKまつり2023表演嘉賓離開，封晒路咁好大陣象

離開花畑廣場準備過馬路去新市街，雖然遊客成日都話去熊本行上下通，但其實主要係行新市街同下通，甚少人會行到去上通

行完新市街轉個彎就係下通

10月份嘅熊本特別多活動，除咗熊博之外，喺銀座通亦都有舉辦熊本銀杏祭，只可惜我去到時已經完場

行完成條下通，決定食黑亭拉麵


雖然去過熊本好多次，但黑亭拉麵咁耐都未試過，第一次食揀最基本850Yen嘅拉麵，好味但未去到非常好味


拉麵唔大碗所以另外叫多一份蒸餃同煎餃，各480Yen，我自己偏好煎餃多啲

淨係拉麵又點會夠，返酒店前去埋麥記買最新出嘅朱古力批

買咗朱古力批同吉士批，兩款都非常好味，加埋Aeon買嘅提子，今個宵夜非常豐富

等一等食個晚飯同推埋第4頁先開始第五日行程

都去到高千穗點解唔去埋阿蘇火山
自駕可以上去火山口
途中有間碳火燒雞超正
草千里有赤牛食

我都諗緊鹿兒島定名古屋好