300日浪遊到南極，直到世界盡頭（V）

千奴

170 回覆

196 Like 3 Dislike

千奴 2023-10-21 11:37:27

六年前某日，我問女朋友，你最想同我去邊度旅行？任你揀一個地方，我帶你去。當時我以為就算唔係講日韓台，你話去瓦努阿圖都大我唔到。點知你竟然話要去南極。我真係諗都冇諗過呢世人會去呢度。

呢個答案，擊中咗窮撚嘅死穴

但作為女神心中完美嘅男神，冇理由即刻就Bam，所以我走咗去搵究竟去南極要預幾多銀兩

皇天不負有心人，比我發現咗原來呢個世界有樣嘢叫last minute南極船飛

就係噉，我地踏上咗一個為期三百幾日嘅旅程，路線係噉：
香港－內蒙古－蒙古－俄羅斯－愛沙尼亞－拉脫維亞－立陶宛－波蘭－烏克蘭－土耳其－伊朗－希臘－保加利亞－羅馬利亞－塞爾維亞－波黑－克羅地亞－斯洛文尼亞－意大利－瑞士－法國－盧森堡－德國－古巴－墨西哥－伯利茲－哥倫比亞－厄瓜多爾－秘魯－南極－阿根廷－智利－秘魯－玻利維亞－阿根廷－烏拉圭－巴西－葡萄牙－摩洛哥－突尼西亞－埃及－香港

一啲印象都冇？唔緊要

即刻追返舊Post：

直到世界盡頭 https://lihkg.com/thread/436262/page/1
直到世界盡頭（II）https://lihkg.com/thread/535194/page/1
直到世界盡頭（III）https://lihkg.com/thread/1958353/page/1
直到世界盡頭（IV）https://lihkg.com/thread/2472294/page/1

時光飛逝，寫吓寫吓終於都嚟到旅程嘅尾聲

仲記得啱啱開始連載嘅時候，連狗都未出，而家已經有連兔了

經歷過19年，肺炎，每次再諗返呢個旅程就更加慶幸曾經出發。雖然斷斷續續停寫咗好多次，但每次都總有人話因為睇到呢部遊記而出發。有好多仲已經去完返埋嚟，連佢自己嘅遊記都寫完埋。所以我知道今次都係時候到我真真正正噉埋尾。最後多謝大家一路支持睇到嚟呢度

事不宜遲，即刻繼續睇埋戇鳩鳩北非之旅

老老實實，諗唔到有咩理由會負評

麻婆豆腐世一 2023-10-21 11:38:39

留名> <
一路有追030

千奴 2023-10-21 11:45:53

話說之前講到我病住噉去咗摩洛哥嘅舍夫利萬，瞓咗一覺出咗身冷汗之後總算可以出街行吓。

舍夫利萬係摩洛哥最出名嘅旅遊區之一，就算冇聽過呢個城市嘅名，你或者都對呢個藍色小鎮略有印象。呢度有啲名氣全因家家戶戶都將佢嘅屋企油成藍色，遊客嚟度就可以瘋狂打卡。而除咗呢樣嘢之外，呢度可以話係乜嘢都冇。

所以我哋嚟度呢度，主要都係影吓相，畀我呢個仲發緊燒嘅病人抖抖，同埋買啲車飛準備去下一個地方。

我哋經過咗大半年之後嚟到北非，最主要係想睇吓撒哈拉沙漠，呢個細細個聽三毛流浪記講到咁遙不可及嘅地方，忽然就變得近在眼前。而摩洛哥本身大部份國土就喺呢片沙漠之中，要親身踏足照計唔係太難。我哋輕輕鬆鬆就去到巴士站買飛。

沙漠雖然水都無滴，但唔知點解總係有啲人住喺嗰頭。我哋經Toni大佬嘅指點後，得知撒哈拉嘅邊緣有個叫小鎮叫Merzouga，只要搭公共巴士去到嗰度，就可以再Join啲當地團到此一遊。唔記得咗邊個係Toni？咁就要睇返伊朗嗰段我哋相識嘅經過，同埋去到智利重遇嘅故事。

但呢度係摩洛哥，車飛唔係你話買就買的。我哋一去到櫃台，就有兩條MK𡃁仔走埋嚟撩我哋傾偈。

：我

：MK
MK：你哋想去Merzouga？
我：係呀。
MK：你哋去嗰度做咩？
我：去睇撒哈拉沙漠呀。
MK：嗰度冇得就咁去架喎。
我：吓？唔係有呢班車咩，點冇得去？
MK：你哋跟我過嚟。

如是者我哋就懵盛盛噉離開咗櫃台，跟咗佢哋入咗間房。

佢哋拎晒啲早有準備嘅Folder出嚟，入面全部都係其他遊客喺撒哈拉好開心噉影嘅相，十足以前尖沙咀鐘樓拎住本嘢叫你參加維港半日遊嗰啲阿姨。

MK：你哋想去睇沙漠，跟我哋啦。
我：我哋諗住搭巴士就得啦。
MK：冇㗎，巴士去唔到個沙漠，你落咗車都會唔識路。
我：噉呀⋯⋯想知幾錢一個。
MK：我哋收得好平，你上網睇親都要三四百歐，我哋頂爛市二百歐一位。
我：唔係喎，我哋之前有朋友去過，一半都唔駛㗎喎。
MK：你哋朋友幾時去呀？季節唔同，而家旺季二百好平啦。

乜二月凍冰冰日照又短，去沙漠都係旺季咩？

MK：我諗都係唔使啦，我哋搭返巴士自己去就OK。
我：其實你哋係咪嫌貴呀？你哋畀到幾錢？
MK：唔係呀，我哋唔駛啦，自己去自由啲。

如是者擾攘咗成半個鐘，最後由二百歐減到百四歐，我哋都不為所動。屌你咩