300日浪遊到南極，直到世界盡頭（V）

咩靚嘢特別嘢都已經經歷過晒
依個真

食大左個胃,番唔到轉頭

之前睇到去南極返番去亞軍庭之後就冇睇
呢個旅行係18年果時?

希望唔好爛尾 支持

正

係呀17-18年

去到Couchsurfing Host嘅屋企，屋企果然企理好多，亦睇得出屋主都有啲錢，隨隨便便就執咗間空房比我哋住兩晚了。傾咗陣偈，屋主話佢都好鐘意旅行，亦都去過香港，所以好鐘意邀請旅行嘅人嚟同佢傾吓旅行心得。佢問我哋香港最好玩係咩，我就話最鐘意係行山方便同埋多嘢食選擇，叫佢下次嚟行吓麥理浩徑 佢話行山佢就唔知，但佢記得香港啲嘢食係麻麻地，佢比較鐘意突尼西亞嘅嘢食


佢哋鐘意日日食呢啲


聽到佢噉講，就知道佢品味係幾咁獨特 喺佢嘅指引之下，我哋搭車去到Sousse附近嘅海岸城鎮Monastir。



Monastir距離Sousse大約半個鐘車，呢度望到地中海，出名海灘靚，係歐洲客熱門嘅渡假地方位於呢度嘅清真寺Great Mosque of Monastir都有超過一千年歷史。



想睇地中海又去厭咗歐洲嘅話，可以選擇嚟呢度，可以話別有一番風味。


成個Monastir都係少少藍白加啲土黃嘅色調，統一嘅建築風格同顏色令成個城市睇起嚟幾舒服。行完清真寺又喺海邊散步，不知不覺就渡過咗悠閒嘅下午。


第二日我哋入咗內陸少少嘅城市Kairouan。呢個城市今日寂寂無名，但曾經都輝煌過。喺第七世紀嘅時候，即係司馬炎統一三國之後嘅四百年左右，有一個橫掃中東南歐嘅伊斯蘭帝國倭馬亞王朝就係呢度建立咗個新城市，當時好多人就慕名而來讀可蘭經，令到呢度一度成為遜尼派嘅伊斯蘭中心。


所以嚟到呢度同幾乎所有伊斯蘭國家嘅主要城市一樣，都係可以睇到好多伊斯蘭嘅建築，亦即係清真寺


我哋毫無計劃噉走入咗個清真寺，先發現佢可能就係呢度嘅地標Great Mosque of Kairouan，見度有旅行團慕名而嚟睇呢舊嘢，我就覺得自己真係頹到極點。竟然到咗景點都唔知。



但係鬼咩，佢連個名都同尋日Monastir嗰個一模一樣，又係Great Mosque。突尼西亞到底有幾多個Great Mosque of 乜乜乜所以我覺得我哋嚟到旅程嘅尾段迷失唔係冇原因。日日都係睇清真寺，我又唔識分佢哋有咩唔同。第七世紀同十七世紀嘅清真寺對我嚟講，其實都係嗰啲嘢。我除咗覺得佢哋幾靚，就比唔到其他感想了


Kairouan嘅Medina入面有個好奇怪嘅景點叫Bir Barouta，我哋知係景點因為門口棟晒啲牌叫人入去睇。上咗一條窄窄嘅樓梯之後，就見到有隻駱駝好陰功噉比人綁住咗喺度原來佢係負責喺度迎賓，同埋定時定候圍住一個井轉圈打水。佢哋號稱嗰啲係聖水嚟，不過呢度啲人日日有得飲似乎人生都冇咩變化。只係唔知隻駱駝比人綁咗喺度幾多年


真係要講嘅話，相比起摩洛哥，突尼西亞有樣嘢好吸引，就係物價真係好低。摩洛哥都已經唔貴，但呢邊係更誇張。突尼西亞嘅貨類係Dinar，當時一個Dinar大約係3蚊港紙。因為面額太大，佢哋仲有一個單位milim，係千蚊之一Dinar。



喺啲麵包舖買呢啲包，係200milim，即係五六毫子就買到啦而且佢哋啲包真材實料，平時喺香港十蚊買個包食兩個都未必飽，佢呢啲咬半個已經好夠。只要唔嫌佢太乾，喺呢度食當地嘢真係好抵食。

喺Kairouan附近，除咗清真寺之外，仲有樣嘢值得一睇，就係突尼西亞嘅鬥獸場。鬥獸場原來唔係得羅馬先有，突尼西亞因為鄰近意大利，曾經都比羅馬帝國統治過，所以都會搵到古羅馬嘅遺跡。而全北非最大嗰個El Jem鬥獸場就係喺Kairouan隔離，佢嘅規模比起羅馬鬥獸場一啲都唔輸蝕。對比起經歷過地震嘅羅馬鬥獸場，突尼西亞呢個保存得更加完整，遊客數量仲要少十倍，可觀性相常之高。但我哋當時連搭幾個鐘車都懶，可想而知真係幾頹

完全feel到，如果淨係一個國家你會好珍惜所有景點，你去咁耐，依個景點又唔係非去不可

完全明
我以前去成個月旅行冇計劃可言 所有嘢都係隨心
反而去四五日旅行就會乜景點都想塞晒落去

去完D景點就有種等走既感覺

自從喺突尼斯第二次中伏，我哋對北非嘅Airbnb已經失去信心。既然質素都冇乜保證，不如搵吓Couchsurfing有時反而有驚喜。



我哋好快就喺迦太基搵度沙發主雖然唔知迦太基有咩睇，但既然搵到另一個Host，我哋都無謂喺Sousse打擾太耐，我哋同呢邊嘅屋主講拜拜，邀請佢下次再嚟試吓香港嘅嘢食，就坐車向突尼西斯北部進發。


迦太基喺突尼斯隔離，係曾經極為繁盛嘅古都，早喺公元前8世紀就由腓尼基人建立以迦太基為首都嘅強國，無論貿易同農業都好勁，仲一路打到上西班牙同意大利，耶穌未出世已經稱霸地中海，只係後來羅馬帝國崛起呢度先慢慢由盛轉衰。雖然羅馬帝國有喺呢度建立新城，但冇幾耐之後又比阿拉伯人入侵打到爛晒。阿拉伯人重建屬於佢哋嘅迦太基之後，又輪到十字軍東征再將呢度剷成廢墟。從此迦太基就淡出咗歷史嘅舞台，成為一個名不經傳嘅地方。

迦太基嘅沙發主都好鐘意招呼遊客，一見到我哋就同我哋分享自己喺Couchsurfing個評分有幾高，個個住完都會比五粒星佢但就話唯獨招呼過一個中國嚟嘅女仔比佢一星評分。然後佢就係噉話嗰個女仔好古怪，一嚟到就係咁撩佢飲酒，夜晚就撩佢扑嘢總之就覺得佢唔係嚟正經旅行。個屋主話佢唔係呢種人，提供免費住宿唔係想換呢啲嘢所以就請咗佢走，結果就反而比人負評咗之後我八掛走去起底，因為Couchsurfing啲留言都係公開，好容易就搵到嗰個女仔嘅Profile，似乎真有其人。睇返佢搵過嘅Host，發現佢都去幾多非洲旅行連毛里塔尼亞、馬里呢啲西非國家都比佢住過。如果個Host講嘅嘢係真，真係諗唔到有人會揀呢啲地方撩人扑嘢

呢個世界無奇不有。見個屋主講嘢有文有路，差啲信錯咗今次呢間係一間正常嘅住宿，冇諗過嚟咗呢度直接令我哋提早結束旅程返歸


首先屋主係食煙嘅，而且日日都係屋入面狂煲，對我哋呢啲唔食煙嘅人嚟講真係好痛苦。佢仲要有養貓，其實啲貓日日食二手煙算唔算虐畜 女神對氣味比較敏感，聞咗一陣已經唔多舒服，開始頭痛。另一個更加大嘅問題，係佢供水唔穩定。明明問佢嘅時候就話有熱水，但可以忽然有幾個鐘連凍水都冇埋，廁所水又冇，連屎都冇得痾而且呢個屋主唔似Sousse嗰個咁有錢，比唔到一間房我哋，只係喺廳開咗張梳化床比我哋瞓。夜晚嘅時候隻貓就會喺個廳度喵喵叫。雖然你係好得意，但我谷咗成晚屎比我抖吓得唔得

喺度第一晚女神已經瞓唔着，摸一摸額頭原來已經發緊燒。同埋唔知係咪呢度污糟，個身開始有啲一撻撻周身痕。情況有啲似當時喺玻利維亞Huayna Potosi噉。呢幾日喺突尼西亞本身已經唔知做緊咩，望到身邊嘅人咁唔舒服，不禁再質疑繼續落去係想睇啲咩。係咪想試吓蘇丹喀土穆嘅醫院有幾先進？

屋主不時問我哋O唔OK，但我哋喺度借宿，又唔好意思話佢。Airbnb比咗錢都仲有得屌，呢度人哋免費比我哋住，我哋又可以講啲咩呢？望住女神噉樣，而我自己都好難話好享受噉嘅狀態。呢一晚我決定提早返歸，即刻㩒入去Emirates個網站改機票，由一個月後阿迪斯阿貝巴飛香港，改咗做六日之後開羅飛。一切都嚟得好突然。改完機票嗰一刻成個腦一片混亂，又唔係好唔捨得完，又好似冇好期待返去。只係覺得，噉就完啦？我噉就出咗嚟三百幾日，終於要返屋企啦。


知道咗好快就返歸，唔駛再擔心冇熱水沖涼，唔駛再食啲又鹹又乾嘅阿拉伯餐，唔駛再每日都唔知聽日瞓邊，可以隨時食譚仔飲凍撚茶，女神好似如釋重負，好快就退咗燒，冇再咁令人擔心。

我哋喺迦太基放棄咗睇清真寺，而係大部份時間都留咗喺Sidi Bou Said一帶，吹住地中海嘅海風。呢度建築好多都採用咗藍白色Santorini風嘅設計，好有南歐感覺。


Sidi Bou Said唔止外國人鐘意嚟，連突尼斯嘅本土人都鐘意。佢就好似香港嘅長洲梅窩噉。呢度距離首都只係二十公里，揸車半粒鐘就到。一到假日，突尼斯人就會嚟呢度整個小旅行，加啲想像力就好似去咗希臘一樣。



行吓市集又去吓海邊。明明就我所見嚟玩嘅華人都唔少，但啲當地人見到我哋都仲會好有興趣，周時有人嚟搭訕問我哋點解嚟玩。唔好問啦我都唔知點解


突尼西亞算係伊斯蘭國家當中最為開放嘅其中一個，對遊客不論男女一啲限制都冇。想知一個地方有幾拘謹，通常睇當地啲女人點樣包頭就知。好似伊朗嗰啲都會包得比較實，好似露咗啲頭髮出嚟就會比啲宗教警察打，呢度嗰啲就求鳩其，就算扮遊客完全唔包都應該冇人理佢。理論上呢度仲有酒禁，但我哋個屋主都一於少理，第二晚叫埋啲朋友上嚟食煙劈酒開Party，完全當可蘭經冇到，仲邀請我哋一齊飲可惜我哋真係唔太好呢啲嘢，而且一早已經比佢啲煙燻到就嚟窒息，所以只係畀面咗一陣，飲兩啖就迴避咗佢哋玩到好夜，但都知道我哋想休息，所以佢哋將個廳讓咗比我哋瞓覺，佢哋就移師去廚房縮埋一角煲煙。我哋作為客人，主人家比我哋搞到縮埋一邊，氣氛真係有啲尷尬。雖然佢哋話冇所謂，但我哋都難免感到唔好意思。但我又覺得我哋冇錯，唔食煙我哋都唔想，我都好感激佢比個廳我哋，冇趕我哋出街只希望佢下次可以接待返啲鐘意食煙飲酒嘅旅人，噉就皆大歡喜。

離開突尼西亞，我哋坐飛機去到旅程嘅最後一站，埃及。因為三日之後我哋已經坐緊飛機返歸，所以喺埃及我哋只會留喺開羅，冇機會再去其他城市。知道得返三日，扣埋出入機場，基本上只係得兩日，我哋又變返普通遊客一樣，計劃好一日去睇金字塔，一日去睇埃及博物館，唔再鳩Fing。



一嚟到開羅，知道好快就會返香港返工，我哋都冇再就住駛費，直接搵咗間正式少少嘅酒店Book三晚，有熱水，有床褥，冇煙味，痾屎唔使驚臭親屋主，只覺得有正常住宿嘅旅行真好。一入到酒店大堂，門口Bellboy幫我哋拎行李上房嗰吓，真係有啲眼濕濕


第一晚喺開羅懶懶地，又去咗食老麥。全個非洲得三個國家有麥當勞，分別係南非、摩洛哥同埃及。喺摩洛哥已經錯過咗一次，一於喺度補返。埃及嘅麥記係冇豬柳強，而且喺呢度算係貴價嘢食。當時嘅埃及鎊大約係1兌0.5，食一個餐48鎊相當於25蚊，以佢街邊1-2鎊買到個包嘅物價，算係非常昂貴。喺度真係要幾有錢先會m記加大咁奢侈，唔係講笑


第二日我哋即刻去咗終極出名嘅景點，吉薩金字塔群。金字塔真係細細個就已經聽過，今日嘅金字塔已經係比一堆城市建築圍住嘅一個遊客園區，旁邊就係啲咩「最接近金字塔嘅Pizza Hut」、「最佳視野KFC」之類嘅店舖，對一個屹立咗四千五百幾年嘅遺跡嚟講，可以話係霸氣全失。

睇古蹟當然就要買飛，入咗場之後好快就迎來第一個挑戰。

吉薩金字塔群園區基本上就係一片爛地。入到去跟住海量嘅遊客向住啲金字塔行，照計冇咩問題，但就有個當地人走埋嚟提醒我地，右邊嗰條路係封咗，佢帶我哋行左邊嗰條。


早喺飛嚟埃及之前，就聽好多人講過，埃及最多就係騙子，Toni早我哋少少嚟咗呢度，叫我哋喺度唔係唔好咁易信人，而係直情唔好信人。呢度十個人入面有一百個都係呃你嘅。我哋望住右邊通向金字塔嗰條路咁多人，又點會封咗呢嗰個人就話係封咗呀，佢哋唔知，陣間就被迫行返轉頭架啦。我哋決定繼續向前試吓行，點知佢仲未心息，一路跟住我哋，不斷話我哋咁傻唔信佢，呢度園區咁大，係都要揀條封咗嘅崛頭路。不過跟咗幾分鐘之後，終於證明條路一啲問題都冇，直行返香港都仲得。

一路行會有好多人叫你騎駱駝，又話唔使錢嚟試吓，我哋真係唔特別想騎，就不停噉拒絕


好唔容易搵到一個靚位近距離望吓座塔，慢慢影吓相突然出現一個好客嘅警察拖住隻駱駝同我哋打招呼，話Welcome to Egypt! 見佢著住制服，我哋都禮貌回應

：警察　：我
警：要唔要同駱駝影張相？
我：唔使啦，我哋影吓金字塔得啦。
警：影啦，遊客通常都好鐘意駱駝。
我：真係唔使啦！
警：我同嗰啲做生意嘅人唔同，我係警察嚟。
我：點解警察拖住隻駱駝咁得意嘅？
警：因為呢度多遊客，我係好歡迎遊客嘅，真係鐘意你哋先想同你哋影相，畀吓面啦！
我：你講到噉，我唔影咪好冇禮貌？
警：係呀！我會好傷心架。
我：（極不信任，決定試探一吓）影相要比幾多錢㗎？
警：唔使錢㗎！都話鐘意你哋先影，純綷歡迎大家，我哋警察點會收錢呢？
我：噉好啦，多謝你咁好客，噉我哋影一張啦。

既然講到明唔收錢，佢又真係著晒制服，噉都唔影好似真係我好冇禮貌。我哋決定放低戒心，感受吓埃及人好客之道。


影完之後，我哋同警察叔叔講Thank You，就準備繼續行吓。

點知佢閘住我哋唔比走

我：我哋影完想繼續行吓。
警：No，No，No！

見佢隻手指喺度妹吓妹吓，真係唔敢相信

我：乜唔係唔收錢咩，你講明唔收錢我先影㗎喎，你又話同出面嗰啲人唔同嘅
警：總之你就影咗，你一定要擺低啲嘢先走得。
我：咁撚癲？

如果我即刻跑走，佢會唔會求其塞個罪名比我拉我返差館？我嘗試同佢理論多一陣，佢都係堅持我哋要「擺低啲嘢」。諗深一層，佢咁無賴都得，就算我唔影，佢都可以唔比我走嘅，根本就冇得避。我問佢噉你即係要收幾多錢，佢就話我唔係收錢，只係我好心比隻駱駝同你哋影相，你哋都要比啲心意，大家公平。噉得啦，如果只係心意，我將身上嗰罐可樂比佢飲，都好真誠啦。點知佢又唔要。

結果我哋兩個比佢搞到好燥，最後嬲嬲地拎到1鎊（5毫子）出嚟，話你要就要唔要就唔好要，鐘意就拉我哋返去，我哋落口供會照直講呢件事或者佢都怕麻煩，見我哋企到咁硬，鬧咗我哋幾句就收咗個1鎊走人。我諗啲外國人慣咗十歐廿歐噉擺低，先養大咗佢哋個胃口但著住警察制服都噉樣明張目膽真係好痴線，而且佢嗰個呃錢嘅手法根本毫無邏輯可言。嚴格嚟講都唔叫呃錢，係夾硬嚟叫你比錢佢。

雖然成個景點都已經鬼五馬六但係一場嚟到，都介紹吓呢個古跡。


吉薩金字塔群係由三個金字塔組成，其中最大亦係最古老嗰個就係胡夫金字塔，另外仲有兩個細少少嘅喺旁邊。胡夫金字塔係古代七大奇蹟唯一仲存在嘅建築，後來有組織發起重選新七大奇蹟嘅時候，仲因為金字塔冇入選而搞出咗啲風波，最後要頒個「榮譽奇蹟」比佢。不過點講都好，金字塔嘅歷史價值係無容質疑，而當時嘅技術嚟講，估計要有10萬人一齊起足廿年，先有辦法將二百幾萬舊石頭打磨再砌好。


而且佢嘅結構之穩固，令到佢經歷咗幾千年風雨、戰亂同無數人去盜墓，都仲可以保存到今日。

金字塔嘅內部都有啲地方開放參觀。當然入去嘅時候要搵啱入口，唔好聽啲撚樣話呢度唔入得，嗰度唔比行，然後佢就會喺第二度帶你入去之後收錢



金字塔係一座陵墓，入面嘅通道難免有啲陰森，如果比人困咗喺入面都幾恐怖。


睇完呢幾座金字塔，順便睇埋出面大名鼎鼎嘅獅身人面像史芬克斯。呢座世上最古老嘅雕像，估計同金字塔一樣都係有四千幾年歷史。雖然冇咗個鼻，但都算係相當完整了。

拜訪完金字塔，返到酒店休息，不禁覺得有啲唏噓。堂堂世界奇跡，就比啲惡俗嘅導遊、黑警毀滅咗。咩四大文明古國，中國印度埃及巴比倫（今日伊拉克），今日都已經變晒痴撚線地方地球到底發生了甚麼事？

見到post 忍唔住叫出嚟!
樓主你返嚟喇

千奴巴原來返咗嚟繼續出文終於有可以睇到呢個post的結局嘅曙光，好感動

估唔到你地嘅長旅行都係完得咁突然，不過都好明白嗰個感覺 所以有時都好佩服啲流浪幾年嘅人，唔知佢地到底經歷過啲咩先做得到。

強帖留名,慢慢睇

金字塔內部有啲咩睇
定就係你影嗰兩張相咁 得條路望下兩邊幅牆

今日肯定可以出得晒

其實我已經寫完咗，搵返啲圖就搞掂，多謝你支持到呢度

覺得人生唔係拍戲，好多嘢都冇得準備好晒先開始同埋結束。越重要嘅事往往都越係突然。亦都因為預測唔到，每一個moment先至份外珍貴

我㩒返六年前早期嗰啲post，好似已經死咗圖，大家睇唔睇到？

內部都係黑媽媽，影相都影唔清楚。基本上就係睇下啲通道，都有啲乜都冇嘅密室。收埋法老王木乃伊嗰啲應該一係挖咗出嚟，一係就唔開放。

睇唔到啦

睇嚟要搵另一個網搬過去，至少自己可以睇返

時光荏苒，終於到咗尾二嗰日。我哋按照計劃參觀博物館。開羅嘅交通好混亂，我哋塞咗一陣車先到。

埃及博物館當時係埃及最大嘅國家級博物館，但其實有另一個更大型嘅大埃及博物館（The Grand Egpytian Museum）早喺2012年就開始起緊，但起到我哋喺開羅嘅時候都未完工，再經歷埋武漢肺炎，去到上年足足十年先正式開放，取代咗當年舊博物館嘅地位。


不過我哋去嘅舊埃及博物館都已經好有睇頭，包括黃金面具、木乃伊等等嘅重量級館藏。源遠流長嘅歷史加上豐富嘅埃及神話故事，對於睇咗咁多博物館嘅我哋嚟講，仍然相當吸引。

埃及博物館有分普通門票同影相門票，如果淨係買普通飛，係唔可以喺入面影相嘅。本身喺入館之前，我哋諗住隨便行吓，就冇買影相嘅飛，連相機都擺低咗喺寄放室。但入到去之後發現都值得一影，就想出去補返張飛，點知就出事了。

我出返去售票處補完票，去到寄放室想拎返部相機，個職員就話冇得拎喎。

：我　：博物館職員
我：你好，我想拎返自己個袋攞啲嘢。
博：冇喎。
我：冇？我頭先擺咗我個袋喺度喎。
博：（隻手指又小兒麻痹噉妹吓妹吓）冇呀。
我：點樣冇？我個袋唔見咗？
博：冇唔見，不過唔係就噉直接攞。
我：噉要點攞？
博：你懂的。

見到佢同上次金字塔黑警一撚樣嘅表情，當堂嬲咗屌你老母，呢度冇講過拎返自己嘢要比錢㗎喎最癲係後面成村人排緊隊，佢都可以若無其事噉勒索。我再大聲啲嗌埋隔離個職員過嚟，問佢請問你哋係咪要收錢先比返個袋我？係咪有呢個規矩？隔離嗰個冇出聲，唔敢認同自己個同事，但都唔敢得罪佢，只係話佢新嚟唔係好識

今次佢連警察制服都冇，我都唔驚佢做啲咩。我連一蚊都唔拎出嚟，淨係堅持你唔比返個袋我，我就頂住條隊一齊攬炒 職員見我唔就範，可能都費事嘥時間喺我身上，不如嗱嗱聲放過我呃下一個仲好。佢秒藐嘴藐舌噉話OK you win，就死死哋比返個袋我。擾攘一輪之後總算力保不失。

唔講呢啲員工，博物館係幾值得睇。我哋行吓抖吓都留足成個下晝。出返去嘅時候，天色都開始變暗。喺埃及嘅最後一個觀光日，亦係呢個旅程嘅最後一個Full Day，就快完了。


我哋坐住的士跨越尼羅河，呢條見證人類五千年文明嘅長河，今日兩邊都係高樓同酒店。世界再大，我哋終究都係離唔開城市，終於都係要返去，一切又好似回到最初的起點。

喺開羅嘅最後一晚，我哋喺酒店門口遇到兩個啱啱到埗嘅背包客，見佢哋孭住咁重背囊就傾咗幾句。原來佢哋兩個係出嚟長途旅行嘅中國女仔，第一站就揀咗埃及，嗰日正正係佢哋旅行嘅第一日。我哋旅途結束之際遇上啱啱出發嘅旅人，總覺得係命運嘅安排，就好似同我講，我哋未完嘅旅程，就等其他人嚟幫我哋完成。以埃及作為佢哋嘅起點，我相信佢哋嘅旅程將會無比刺激，衷心祝福佢哋路上一切平安


第二朝，我哋喺酒店附近買咗呢啲幾毫子一份嘅早餐，唔知係咪因為最後一餐，味道出奇地好，好似從來冇食過咁清新嘅阿拉伯食物。


就係噉，我哋就坐上咗返香港嘅飛機。回想返一年前，由決定咗出發，突然就決定好辭職，突然就訂好咗機票保險，突然就買齊裝備，回過神嚟就發現想縮沙已經太遲。一年之後，一切都係一樣突然。突然就買咗回程機票，突然就坐上飛機，突然就完咗旅程。冇好激動，亦都冇好唔捨得，心情出乎意料地平靜。

我甚至冇將自己返屋企呢件事話比屋企人知。當日輕輕的走，今日輕輕的回來。我同女神喺赤臘角機場分開，各自搭車返自己屋企。當我去到屋企門口㩒門鐘嗰吓，反而有少少緊張。開門嘅係一年冇見嘅阿媽。我望住佢唔敢相信嘅神情，終於可以好似日劇主角噉樣，講出呢句遲咗一年嘅對白：

「我返嚟啦！」

（全文完）

終於完，千奴巴要永遠同女神幸福落去