填飽埋個肚就即刻狗衝去沙漠。大約行咗半個鐘，望返後面就已經唔係好睇得清條村，前面更加係除咗沙之外乜嘢都冇。
我哋就係住喺後面遠處嘅嗰堆屋其中一間。越行得遠，後面嘅村落就越模糊，前面嘅沙漠就越壯闊。呢個就係我哋所期待嘅撒哈拉沙漠。唔使搞咩花臣，最重要係冇庫布其嗰啲濕鳩火車。
係沙漠嘅中間，有一間荒涼嘅屋仔。如果當時參加咗舍夫利萬嗰兩條MK嘅團，應該就九成九會瞓嗰度。但呢啲所謂嘅沙漠住宿，通常都會比村落入面嘅更加簡陋，都肯定冇熱水沖涼，如果同我自己行入嚟睇嘅景色一樣，真係非常無謂。
我哋把握黃昏前嘅太陽，坐低好好欣賞呢片全世界最大嘅沙漠。同戈壁唔同嘅係，呢度啲沙顏色偏橙。原來沙漠都有分紅沙黃沙。唔知真係因為唔同顏色定係經歷多咗，今次再睇沙漠同啱啱出發嗰時睇嘅感覺完全唔同。
蒙古嘅沙漠係金黃色嘅，當時抱住初出發嘅熱情，覺得仲有全世界等住我去探索，只係覺得好靚好靚。今次嚟到沙漠，諗到話咁快就過咗成十個月，旅程都嚟到尾聲，再加埋啲沙橙橙紅紅噉，有種夕陽嘅憂傷。
可能係有啲唔捨得，第二日我哋又走多咗入沙漠一次。
今次一樣咩都冇做。望住啲沙微風吹拂，白雲東來西去。多謝妳由戈壁陪我走到撒哈拉。
我哋喺撒哈拉沙漠渡過咗2018年嘅年初一，少少遺憾係冇得逗利是。諗起由以前逗人利是到冇得逗利是，再到派利是比人，都算係人生嘅里程碑。就好似去旅行噉，由睇人遊記到唔駛再睇人嘅遊記，再到寫遊記比人睇。人生就係咁玄妙。
以前聽人講，長途旅行嘅人去耐咗，反而會變得唔敢返屋企。因為旅行已經變咗佢嘅Comfort Zone。當旅程完結，要重新走返入社會，面對搵工，身邊人嘅比較，反而會好難適應。旅途上一切都美好，因為所有煩惱都可以玩完再講。今次差唔多要完，我究竟準備好未呢？
反正都要搭飛機嘅話，就索性唔去，直飛突尼西亞。喺中南美洲，就算治安再差，大部份國家都可以陸路過境，一個接一個噉玩。所以經常會聽到啲歐美人唔使返工就穿越美洲長征，由阿拉斯加玩到落阿根廷，無論搭公共交通定自己揸車，普遍都冇咩問題
但喺非洲就唔同玩法，先唔講冇乜邊本護照可以通行無阻。就算你唔怕麻煩逐個逐個拎Visa，都有好多國家長期戰亂，好似利比亞南蘇丹呢啲，關口根本係唔開，就算開咗你都未必夠膽過
所謂環遊世界，好多時都只係講緊環遊先進嘅世界。其實世上唔輪到我哋去睇嘅地方絕唔係少數。對嗰啲地方嚟講，無論係佢哋自己出去旅行，定係其他地方嘅人去佢哋到玩，都係非常之奢侈嘅事。
我哋喺Airbnb訂好咗住宿，根據Host嘅指示去到指定嘅地址，竟然完全搵唔到間嘢。我哋旅行咗咁耐，由於去嘅國家太多，有時只係留十日八日嘅國家就唔會買電話卡，如果唔係下下要畀幾百蚊上網就好貴
當時我哋冇Data，不斷問路上嘅人知唔知嗰個阿拉伯文嘅地址喺邊。首先英文已經唔係個個識，有啲勉強溝通到嘅，又個個指嘅方向都唔一樣。由中午搵到天黑，最後有個路人好肯定就係某個位，但嗰度根本就冇人住。借埋電話打比個Host，先發現原來佢比錯咗地址
即係你喺房入面打飛機冇問題，但你幾舊水租間房出去係咪應該清潔下呢？我哋問個Host發生咩事，佢話佢以為我哋今晚唔嚟，所以冇執到房，頭先我哋打去先求其將自己張床清咗比我哋瞓。噉即係啲鳩毛係佢哋嘅？
嗰日Marrakech得幾度，天寒地凍，個熱水爐仲要壞埋。個Host好好客噉話唔緊要，即刻比個水煲我哋煲熱水沖涼。煲滾咗之後一睇，成煲水都係油漬
如果唔係太夜，真係好想即刻搵過間。
所以真係唔好咁易話以後唔咩咩咩。又好彩當時去咗，如果唔係就同烏克蘭俄羅斯一樣，下次唔知幾時再有機會。
由廣場望出去，一定會見到一座特別高嘅清真寺。庫圖比亞清真寺（Koutoubia Mosque）係馬拉喀什嘅地標，已經起咗八百幾年。頂部嘅黃金波波同塔身嘅拱型圖案都係好摩洛哥特色嘅建築風格。作為伊斯蘭世界最熱門嘅旅遊國家之一，加埋同西班牙葡萄牙嘅距離之近，呢度對歐洲遊客嚟講係非常吸引。佢哋去摩洛哥仲方便過我哋去泰國。
呢兩個宗教嘅信徒真係撈亂骨頭咗好多世。
