[偽鐵膠×非鐵膠] Green爆日本兩極超地獄級絕唱之旅

推下先準備去稚內喇

鐵膠去小樽竟然唔去睇機關車
盒便當室溫成日都冇事

標題咪講左樓主唔係鐵膠

係我睇文速度太慢定係樓主去得太多旅行
越積越多日

肯定係後者

人地一轉40日
我一年加埋都無

Day 4 / 今日も頑張れ 宗谷本線

今日係「北之大地暴走篇」最後一日，說好的稚內
稚內到底有咩咁吸引點都要去？就是想去，呢個理由夠充分未？
我地戰勝左颱風蘇拉，又點會咁易向JR北海道低頭！

最北端之旅係成個行程最精彩既部分之一，長氣多圖
尤其如果你有計劃即日來回既話，呢個寶貴經歷會幾有參考價值
成日淨係去果個地方打個卡已經可以講好多野




準時起身，因為住宿extend左一日唔洗執野住
係AEON MALL入面食個摩斯早餐後又出現係旭川站


以後學識左入閘前確認運行狀況，同埋睇清楚要去邊個月台
今日終於見到喇，紅色大字特急宗谷，6號月台！


無事無幹既時候會顯示呢個ekinet既廣告
尋日明明係顯示運休情報
即係話見到廣告時候代表是日服務正正常常


宗谷本線由旭川到稚內全長259.4km
因鐵呢年吹雞話考慮廢一堆無咩人用既站，但如果真係廢晒，剩返既站就如圖所示同特急停車站一模一樣，即係架特急宗谷號會變成各停既特急

故此吹雞後宗谷本線多左好多遊客搭

09:00 宗谷


出現了！今日終於有宗谷搭，唔洗搵宗介借錢喇！
大大件龍友都幾多，車一到舉起晒相機

特急宗谷係由札幌開始到稚內，全程396.2km行5個半鐘
一日只有一班，亦係JR定期運行特急唯一沒有數字編號 (好似係)
因為宗谷就係宗谷，獨一無二


月台堆滿乘客，好可能因為尋日宗谷唔撚開，變左唔少人好似我地咁索性直接改遲一日去。btw今日既指定席係爆晒，Green Car得半卡9個位任何一段都劃唔到了 (正常，因為坐得都幾肯定係直剷最北端)，我地最終只能中途先去返指定席。一開始只能上自由席，讓左個位俾老婆住，我就罰企算喇

即日來回稚內係咪痴線？係，首先樓主不嬲痴線
二來車上睇黎都唔少乘客同樓主一樣咁痴線


開出了！士別三日，如隔三秋！ (錯晒



好彩沿途都有人落車，也不是全部都係遊客
去到名寄終於可以去返僅有既指定席
我真係逐個站check下邊到開始有返位架
但係依然係無Green，最終都係接受現實又蝕左一程俾JR PASS


樓主每次都讀錯做音威子符既音威子府



天塩中川



列車駛經問寒別附近可以欣賞到天塩川
北海道第二大河川，全長256km縱貫成個宗谷地區
是日天朗氣清睇咩都覺得靚

特急宗谷號經過「雄信内」特登係咁影
呢個站有咩特別？其實就係一個幾乎無人用既車站
如果經過下D秘景車站，櫻主都會嘗試影下
據官方統計呢個站使用人數係零，因鐵告訴你，係零呀！



但呢個站近來變得出名左，呢D站北海道大把啦有咩特別？
因為有個叫做「西園寺」既超有名鐵道Youtuber
係佢個「100万円で日本一周の旅」第2日 (更新速度比本遊記慢好多)
就由稚內搭去左北海道呢個拍烏蠅既站，仲要落埋車，但下班車幾個鐘之後！

https://www.youtube.com/watch?v=jaL6-6dZltU


呢個站出到去基本上就係咩都無，如果有野既話好可能就係熊


跟住後來就有人發現係Google街景睇下呢個站時
就發現呢個秘景車站個街景竟然影到人
而呢個人係乜水唔駛估啦，咪就係西園寺囉
去呢D烏不生蛋既地方俾Google街景車影到，係咪痴線？


最後經過「幌延」、「豊富」，三個半鐘話短唔短，話長唔長
搭個飛機都咁上下啦，有風景睇時間感覺會快D，愛恩斯坦話時間係相對架嘛
係咪好折磨？尋晚訓夠，今日暫時未有呢種感覺


呢架特急宗谷號順利進入稚內了！
跟住當然就係搭巴士去宗谷岬了，待續！

北海道咁多偏僻幾乎無人搭嘅站，遲早應該都難逃被廢站嘅命運

下年送左富良野 - 新得先

拔海好似都捱唔過下年

睇twitter 落合駅鏟哂啲雜草執返靚仔哂

睇到酒店用Sharp 呢部洗乾衣機就頭痕、洗完都唔干、中伏兩次
第一次齋洗6KG、追加3次乾衣=¥800、唔乾
第二次洗+乾3KG=¥600、9成乾

多米酒店正好多、洗衣6KG唔駛錢、追加兩次乾衣=¥200, 全部乾晒

12:37 南稚内駅


唔遲唔早岩岩好，特急宗谷號順便到左南稚内駅啦
宗谷本線走線十分筆直，而且都係平地，比起完走石北本線輕鬆好多
坐火車係北之大地劃過既感覺真係好正！淨係呢程車已經充滿「旅行」既感覺，我覺得大家都要試一次！
有人話過，係北海道山長水遠去到好遠既地方，本身就係旅程既一部分，搭完呢程車完全明白！


大部分乘客正常都會搭到去終點稚内，我地極少數選擇早一個站落
反正回程都會去終點站上車，仲有去宗谷岬既巴士都會經呢到



有小小時間可以參觀下


發現站前無巴士站牌，問左職員先知邊度上車
要行幾分鐘路

12:51 日本のてっぺんでアクティブバス


巴士站位置距離車站以鄉下來講都少許遠，如圖示
係間柏青哥前面，稚內都要玩柏青哥


遲左小小出現，但係我地唔係搭一般既路線巴士
而係呢架鮮為人知既觀光巴士，叫做「Active Bus」

12:45由稚內開出，唔會果到上車因為得兩分鐘時間
車上無乘客 (即係包車 )
司機大佬停低緊車語重心長地同我地講
呢架唔係路線巴士喎，而且會兜路，兜呢到兜果到
確認我地有無上錯車
唔知點解咁多時間講左一大堆野，最後一句「わかる？」
我真係想答佢「わっかない！」
最後每人俾左2000YEN買左呢張巴士車飛

要留意只有6-9月先會運行


開車囉


好快就見到日本最北端麥當勞叔叔
坐左係出面望住間M記
同埋有人去影佢既美姿


沿住国道238号行，有好靚既海景睇
btw條路最遠去到網走



路經日本最北端空港，稚内空港
可以搭ANA去新千歲同埋羽田
有十數名乘客上車，巴士變得熱鬧起來

13:50 宗谷丘陵


我地首先來到既係宗谷……丘陵！
呢架觀光巴士有別一般路線巴士，去到咁上下會兜入去宗谷丘陵


隱約望到大海


司機又語重心長解說完一輪後
停5分鐘俾大家落去chill下


地理小知識：
丘陵即係Windows XP Wallpaper咁解
而宗谷丘陵既形成就追溯到冰河時期
不斷凍結融解而形成呢種周氷河地形


chill完後就繼續出發了



好多宗谷牛


終點在望！
待續

三大失望唔係長崎荷蘭坂喎

好似長崎荷蘭坂同埋沖繩守禮門都有人講係

雖然都未去過，但覺得明明札幌時計台起碼有得入去行下，失望程度理應無其餘三個咁一眼睇完咁差

做咩連最伏三大都要爭光環

可能太多日本遊客去完覺得呢啲地方都係中伏、怨念太重

因為我冇去長崎嗰個但有去沖繩

沖繩仍然未訪，有排都未排到佢

臨落車之前司機大佬再次語重心長忠告各位乘客


揸得呢條線既卡佬好清楚唔少人係搭鐵即日來回稚內，而且一定預計到今日架巴士會好爆，因為邊日無人搭巴士，就自然會知道因鐵又收左皮喇

樓主都語重心長提醒各位
1. 路線巴士時間已經改左
2. 架觀光巴士6-9月先有，亦唔保證下年仲會有

我都係咁啱有免費機票先快閃