[偽鐵膠×非鐵膠] Green爆日本兩極超地獄級絕唱之旅

雖然行路去左本州
但結果還是搭左山陽本線返去小倉，彈入又彈出
畢竟小倉係大站，所有新幹線包括碌粟米都必停
而果個新下関就真係拍烏蠅喇


返到小倉開始肚餓，搵到呢個「三十步橫丁」
號稱只要從出口行三十步就有野食


結果又係去左食拉麵
博多ShinShin，小倉都有得食
但係感覺真係水皮D，同博多有分別
不過咁，小倉感覺唔係一個好適合食好西既地方
所以都算係不過不失


今次北九州之旅就暫告一段落
繼續搭Sakura回去

搭Sakura之前先坐了Kodama慢慢un
去到一個叫徳山既站
山口縣雖然有五個新幹線站咁多
但存在感都是偏低既，也有班次會全數飛站


徳山駅對住就係徳山港，只需步行3分鐘就到碼頭
好可能係全日本最接近新幹線車站既碼頭


而徳山港係可以搭船去九州既竹田津港
呢個就真係鮮為人知登陸九州既途徑
因為對面係大分縣国東半島
距離最近既JR站宇佐(USA)要25km以上
係個完全無鐵路既middle of nowhere

西園寺當時就係假裝係徳山駅酒店過夜
不過凌晨搭船偷渡去九州再即班搭返轉頭，成功完成任務


呢到山口縣可以買到已經唔存在既SL山口雪糕
跟住返上去搭返本來要搭既Sakura
一氣返去關西！

搭搭下新幹線無聊玩下小遊戲
就係學西園寺探訪日本五大國寶名城
松江城、姫路城、彦根城、犬山城、松本城
去影張相留念


最容易當然係新幹線都見到既姫路城
但我地搭果班車唔停，可以點好？

邊個話一定要落車？
影囉！










到底樓主有無成功影到姫路城呢？
大家都搵下丫


結果：

Hi樓主我又返嚟啦

九州搭新幹線去新大阪，最快Nozomi唔洗兩個半鐘就到
而我地搭Sakura都唔輸太多，只係停多小小站，好快就到喇
搭左咁多日車兩三個鐘真係濕濕碎
加上樓主認為Sakura既Green Car真係幾唔錯
Sakura同Nozomi另一個唔同就係佢一定係新大阪止步
所以我地係度落車了，總算完結左呢場櫻花大戰


返到去樓主最有陰影既地域之一，西日本地頭
新大阪呢個站幾咁方便唔洗再講啦
可以順便望下呢期Pop-up store做乜咩主題
所以係度放個小break就繼續上路喇
而跟住落來就係樓主最愛既，特急Thunderbird了！


車來了！


不對錯，呢個先係
Thunderbird從富山縮短到金沢之前，
前身叫「雷鳥(らいちょう)」，代表中部立山既稀有鳥類
但現在野生的似乎已經在日本絕滅
好快又再縮短了，唔再改短D索性叫做「サンダー(Zapdos)」就算？
都仲係鳥類丫好似係


Green Car真係屈機，2+1
單丁位可以J爆琵琶湖美景，可惜已經天黑


Thunderbird絕對係JR特急既皇者
尤其連敦賀都通過既37號次，擁有特急最快「表定速度」(即係行車距離就咁除以時間粒史)
然而呢個地位已經到左夕陽
3月16日北陸新幹線延長到敦賀之後，Thunderbird就會相應縮短
故今次都算係一種餞別喇


22分鐘就到京都，比新快速還要快小小
所以揸西日本周遊券，搭Thunderbird來回京都大阪係好爽
想體驗民情迫車可以搭返新快速，至於Haruka不了

今次送Thunderbird就係京都止步啦

野生雷鳥尚未絕種，好似話仲有3000隻左右
睇人哋爬劍岳、槍岳之類有時都會見到幾隻

特急

京都夜繽紛

京都，你會想到甚麼？
和服？寺廟？紅葉？嵐山？小火車？

呢D人所共知既野就唔需要我多介紹了
今晚帶大家一齊夜繽紛，見識京都既另一面！


從0號月台對出既改札出閘，又到左大家都好熟悉既京都駅
(硬係覺得上面有人望住我地咁，係咪錯覺)


我地又去中村藤吉食芭菲咯
ほうじ茶


食完就周圍行下，有條好神秘既樓梯可以上去
睇落還是有人行既所以應該無問題 (?)


真的行上去了


原來去左呢到
京都駅每日都好多人用，但係第一次去到咁高


但轉身行出戶外先發現新世界
原來京都駅仲有咁高！真係唔知……
真係哥倫布發現新大陸


搭電梯上去，仲長過朗豪坊果條天國的階梯
呢到望返落去好似去左科幻城市咁
仲有小小去左Midgar既感覺，but我發現自己似乎都有小小畏高

呢個「京都駅ビル」1997年落成，當初有7名國內外建築家被邀請為設計，包括有大家都應該聽過既安藤忠雄，但最終以原広司成功擔任，梅田Sky Building、札幌巨蛋也是他的作品，所以呢棟野係好有性格


而果條睇落似通通既橋的確係有入口既
就收埋係10樓京都拉麵小路入面


好似入左時光隧道咁


除左可以望到京都夜景外


還可以俯望京都駅車水馬龍既大堂


當年有人玩捉伊因玩到去京都駅果陣
條友就區埋左係度 (遊戲中需要定時報GPS俾鬼)
但隻鬼去到大堂明明GPS話係度，然而搵極都搵唔到
根本係完全俾人撚狗




最後落返去，終於見識到京都駅既全貌
跟住出去行個圈

續．京都夜繽紛


一步出京都駅中央口，就見到京都塔
右邊就睇到色彩繽紛噴水池表演，係JR西既Granvia隔離


有D肚餓了睇下徙步圈有咩好西食
轉右鳩行下，一兩個字就閒到好香港豬骨味


京都百名店第一旭 (3.75，關西圈屬上弦)
但係條隊太長了30人以上一個鐘應該走唔甩
我地今晚唔係訓京都，唯有忍痛放棄返去吧


繼續前行就可以返到車站，通過較少人行既天橋
能夠飽覽京都駅既路軌，別有一番風景
可見在來線月台都係G/F，而新幹線就係高架的


再繼續行原來會去到京都駅既另一邊：八条口
呢邊近年多左好多相對經濟既住宿選擇
早知今晚住呢到算


最後登上東海道新幹線既月台
東海道新幹線終於在本遊記登場了！
全國PASS只好搭Hikari了


而來到既正好是……連登好出名既N700S！
Hikari也可能會出到N700S喔！


不過樓主覺得東海道新幹線
甚至JR東海在來線Green Car都真係無咁好坐就是了
N700S都唔例外
但東海道新幹線Green Car有三卡要坐通常都有位
所以坐得JR東海既Green
真係有錢人唔想同賤民迫先會捨得坐←個人意見


今日咁就完了，都叫做去到一個景點
遊車河來講今日都算係充實啦
嘛那個西園寺聖巡其實都係順便架咋
咁岩去到既地方有佢既足跡咪朝聖下

次日最終章，直截了當決戰東海道，直落成田吧！

Day 7 / 尋找西園寺的世界
完

我都有follow ZAKI
都幾好睇
一嚟佢主打名古屋/關西那邊
二嚟佢啲企劃夠痴線/有趣
例如一日坐哂成條山陰本線
喺大阪用北陸本線去新潟要坐幾耐

Day 8


首先俾個小遊戲大家玩
估下樓主尋晚最後從京都去左邊度訓？

名古屋？

名古屋你上次都有去果間花車本店？

終於…來到了最後一日喇
亦都係全國JR PASS最後一日
是日唯一主線任務就係夜晚去到成田機場搭夜機走人


今日起身Check out已經10點，訓到盡
疲累連日累積
已經再無更多精神周圍fing




呢到就係被認為係日本最悶既名古屋喇
今次揀左三交INN，因為果陣 booking . com 又有神秘特價
可步行到車站，又有大浴場，名古屋來講算十分好了
三交INN個三交來由「三重交通」，難得淨係揸巴士都可以開展酒店業務，東京都有間係浜松町

不過有樣野真係好想講，名古屋既人真係完全唔識英文既
想同佢地謂Engrish? No No，全部都係痴撚線酒店
Reception仲擺左成堆生字卡，有咩需要拿張卡去就得

點解今次會揀左名古屋住
其中一個原因就係想係返呢到食早餐


樓主已經四度來呢到食野，我諗店主應該已經認得呢條毒L
不過今次星期日大排長龍，大概有半個鐘有多吧，可能真係愈來愈出名了
只是今日都沒太多行程所以好好享受吧

呢間咖啡店係名古屋本身已經好出名，台灣都好多人講
招牌小倉多士上面既果醬係最大賣點
加上搖曳露營劇場版，長大後既凜醬去左名古屋生活，有時就會過來呢到放鬆下壓力。果期亦令到多左fans過來朝聖

不過缺點就係份量唔大無肉食，食完無耐又會想食野了

コーヒーハウス かこ 花車本店（3.73）
https://s.tabelog.com/aichi/A2301/A230101/23005509/

食完早餐，睇左時間
就慢慢行返去名古屋駅

果陣做緊「五等分の花嫁」與JR東海既合作活動
呢個作品都肯定係愛知縣既代表級作品了
但樓主無接觸過所以唔講lu

唔憂柴憂米既JR東海以前唔點會搞呢D野
甚至鐵道相關既商品化都十分保守
但第5代社長柘植康英係2014年上任後就「轉左死性」
並大力推動「聖巡系旅遊」促進觀光
(唔止動漫既，文化、歷史等等都算係)
但其中最具代表相信非LoveLive Sunshine莫屬了
淨係因為去聖地沼津而令到好多fans使用東海道新幹線
(唔通真係搭飛機去係正新幹線路軌但無站既靜岡機場咩……)


連N700系都能變成新幹線戰士了 (不過駕駛者比較冷倣就是)
出左兩季+一套劇場版既新幹線戰士今年春天又會有新作
但似乎定位好唔同就是了，以前主要就俾小朋友睇既

因為老婆都未去過名古屋玩 (雖然好悶)
但今日天氣睇落唔錯
所以都係按原定計劃搭去靜岡一遊
跟住就真係走架喇

名古屋都係有緣再會啦
實有機會既


本身搭11:42 Hikari出發
但唔知點解食懵左上錯左架早5分鐘既Kodama
我地入到車廂開始發現「有d唔對路」
到察覺真係上錯車果陣，門已經剛剛閂實左
撼門都無用
無辦法喇，唯有罰坐站站停既kodama啦
最後一日竟然犯如此低級錯誤，會唔會返唔到機場架

12:52 静岡駅


由於無咩點影相，借返2019年既相用
始終無pass真係比較唔捨得來靜岡玩

呢個ICON十分反映當地人對富士山既印象
佢地眼中既富士山係有缺憾唔完美既
還要活在無法預測既火山活動既陰影之下
(報紙佬一無野寫就會吹幾時爆發)
保持到良好心理健康生存下去其實唔容易
點解同大自然共存係天災大國經常講既課題

静岡駅位於静岡縣既縣廳所在地静岡市
人口依家67萬，多年前合併埋以小丸子同埋足球為名既清水區
然而觀光本身唔太吸引，無咩外國人係度出沒
但作為一個東海道主要地區，連同縣內另一大城市浜松市
其農林水產以及文化輸出極為豐盛


靜岡縣內既體壇盛事一覽無遺



不過成個站最諷刺既野
JR東海在靜岡縣既重視真係有點那個
所以起磁浮新幹線果陣，因為有一小段經過靜岡縣
就瀨野了


靜岡縣就以影響大井川供水為由未有允許動工
直接撬起左磁浮新幹線通車日程
最終由2027年變成「2027年以降」

海鮮BOOKMARK

附近路過就有個模型為主題既小型博物館
因為模型最大廠TAMIYA就係靜岡發祥
趁有小小小小時間上去行兩轉


呢到有唔同模型展示，介紹一下模型既歷史
入場無料
不過就未必有好大驚喜，同你行轉玩具店差唔多


當然有四驅車賽道可以玩
期間限定擺左個5線賽道，通常係3線 (日本人很愛期間限定就是)
TAMIYA最流行既模型非四驅車莫屬
四驅小子四驅兄弟風麾一時
近年開始流行文藝復興
係中環PMQ開設田宮模型香港旗艦店
入面都有條賽道俾大家使出麥林旋風


BANDAI同靜岡縣有咩淵源
就係70年代設立子公司BANDAI模型
工場位於現時既清水區
同TAMIYA也相當有淵源，但詳細唔係度講啦
所以靜岡為日本模型發祥地係實至名歸
(不過呢，依家BANDAI模型9成都唔係日本製架喇)

是次靜岡快閃之旅總算不枉此行
(仲竟然有意外收穫！)
本身仲想參觀埋將成棟靜岡Marui買起左既駿河屋本店尋下寶既
但今日訓晏左又排隊又搭錯車搞到無闣時間
不過唔緊要啦，仲有一個終極環節等待我地！

我地買埋小小靜岡茶葉就繼續上路
14:27 搭Kodama慢慢un


新幹線經過風景相標準位置—富士川橋梁
是日之富士山景指數為：滅。

(其實一個plan係落新富士鳩行下
但咁既天氣。)



15:01 到達熱海駅
星期日明明應該無咩特別活動都超多人
因為首都圈既人都要放假，唔想長途拔涉又想浸溫泉就係呢到
所以溫泉排名通常都好高


事不宜遲說好的終極環節即將登場！

15:31 サフィール踊り子


應該好多人估到係呢個啦？

都係plan行程第唔知幾多個version
先諗起要嘗試擺佢落去
去程基本上都係一個月之前就秒殺晒所有海景位
回程比較容易，所以最終都係執雞


出現了！
サフィール踊り子 Saphir ODORIKO


佢係全車Green Car
用全國Green Pass就當然洗盡佢坐埋佢啦
我地唔係淨係識搭新幹線架！
當中仲有「Premium Green」，無任何pass可以免費搭


雖然唔係坐Premium Green
座席已經唔係一般Green Car
級別與近鐵特急火鳥Premium Car相近


車廂好有空間感，睇風景都心曠神恰


根府片附近會徐行一點
欣賞一下相模灣吧


以富士山天然水沖既咖啡
真係係唔同D


見到呢架小田急浪漫特快
就知道已經去到藤沢了


去到橫浜成堆人落車


不過我地當然搭到尾，去車頭睇下風景
(伊豆方向車頭為Premium Green，東京方向為普通Green)
睇下最前面既小鐵膠幾開心 (真的好興奮呀！)




16:57 又返到東京駅喇
大家數下我地到底去左幾多次東京駅？

まもなく最後一程車！

多人橫濱落車係因為伊豆急下田去到橫濱嘅特急券係最抵買嘅

Btw 除咗影玻璃要小心 影反光嘅車身都要小心