[偽鐵膠×非鐵膠] Green爆日本兩極超地獄級絕唱之旅

我估佢聽日即日來回稚內

Yes and NO!!!

山長水遠去到過晚夜感覺抵啲

揸pass就係搭得愈多感覺愈抵

08:30 旭川駅


旭川早晨！


今日既目標當然就係：最北端！
第一次去北海道，當然要去最北端！
09:00乘搭特急宗谷號前往わっかない．稚内！


有小小時間，買張北之大地入場券先
跟住去埋買便當拿上車慢慢食


但入左閘後發現有古怪

宗谷呢？
宗谷呢？
宗谷呢？

宗谷，你去左邊呀？唔通我睇錯時間？唔通班車已經走左？
まさか。。。。。

那種事情應該唔會發生架，但面前既事實係。。。。。






特急宗谷號，消失了。

Day 3 / 北海道旅客鉄道株式会社

坐巴士啦

今日も頑張れ 宗谷本線

09:00 ライラック


北海道之旅第三日，結果係咪即日來回稚內？Yes & NO!!!
今日真係plan左去稚內架
BUT!!! 一落雨就車都唔撚開，但說好的落雨呢？呢到天朗氣清播
唔通連個天，都唔撚鍾意我？

下次真係要睇清楚有無開車先入閘

搭巴士仆過去？咪玩啦，首先旭川得高速巴士去鬼志別要5個鐘，係無直去稚內的
或者可以等到13:35搭特急サロベツ，但去到都天黑，唔改酒店呀！唯有取消囉，唔去喇！

咁今日點算好？堂堂JR PASS holder唔通要淪落到去動物園餵企鵝？唔要呀！
電光石火之下跳上了09:00開出既特急Lilacライラック，提早去札幌玩返日啦！
因為無劃位只能夠坐自由席，完全無心情食便當了

深川、滝川、砂川、美唄、岩見沢
然後就係北海道都會區，札幌了……

有時睇唔同人既遊記真係有啲感動
好難得有另一伴肯陪自己癲

什至我自己都未必會咁做
所以睇到人地做
真係好有feel

10:25 札幌駅


丁香號差唔多埋站變得好慢，大約遲左10分鐘先到站
殺破囉！札幌！
不愧於成個北海道人口最集中既地方，終於有返都會區大車站既feel


不過個站咁多人係因為好多乘客滯留於此，一個所謂札幌圈既大雨就搞彎晒成個北海道交通

小樽—札幌 減班
札幌—岩見沢 運休
岩見沢—滝川 運休
札幌—千歳 運休
学園都市線 減班

但果陣既天氣係咁樣既，真係唔知邊到大雨

去新千歲機場既快速都無埋，堆滿好多去機場既乘客，但睇落好淡定啦可能呢D場面佢地都見慣晒 (同埋搭國內線既話應該比較容易改)，係趕時間就一早搵路走左啦

聽講釧網本線都死埋，如果今日先去搭釧路濕原小火車，好可能就會被困塘路了，我地算好彩



由於個便當最後都無食到，所以當然要來品嘗札幌美食補返數
待績

11:00 奥芝商店

本身聽日先去既札幌結果出現係今日
plan果陣仲好糾結到底札幌會留到幾耐食到一餐定兩餐
如果有兩餐當然會想食晒味喒拉麵同埋湯咖喱啦！
但如果今日食得一樣，會揀邊個先？


札幌駅行個零字，有小小小小雨咁啦
係某棟野地庫搵到呢間奧芝商店，所以最後決定大家一齊食湯咖喱，攝取下北海道既野菜
拉麵唯有有緣再會啦，而且評價好既拉麵都比較唔就腳



店舖環境唔錯


呢支POKKA SAPPORO由昭和27年出既RIBBON ORANGE
相信個款一直無改過，好有情懷feel
市面上唔流通，應該得餐應士多先有


去唔成稚內就只好食返宗谷牛補數啦
呢到既湯咖喱主打蝦味湯底，不過就唔係話好濃厚
但硬係覺得牛同湯咖喱始終唔係好夾


北海道既辣好似流行用1-10scale (當然有10+)
我叫左7級已經食到個口痺痺地，支橙汁飲晒都未食完

呢間湯咖喱未必係最好食，但一定係最人氣之一
離個站近已經贏人幾條街 (地理)
北海道有幾間，另外東京駅同埋八王子都有分店

食完出去條通道已經堆滿晒等食既客人，推斷都達到一小時以上級別
條巷個環境，唔……類似尖沙咀星座冰室咁上下啦
每次見到呢D情況都會好廈幸咁有精力早突，早突除左慳排隊食野時晶又爭取多D觀光時間，雙贏！




スープカリー 奥芝商店 駅前創成寺 (3.59)
https://tabelog.com/hokkaido/A0101/A010101/1041930/

接住落來
就會參觀札幌最具標誌性既景點

呢棟曾經係SOGO既ESTA
係我踏足北海道之前，8月底已經成為左歷史，砍掉重錬

有無發現樓主今次影d相好多都歪歪地？
除左手勢問題之外，感覺北海道D路好多都唔係平既……


返去札幌駅，好似無咁混亂了
雖然綠窗都唔少人，都去取消返張今日回程既宗谷號先
因為唔取消既話，果段時間就會book唔到其他指定席
揸普通pass可能無咩所講，但揸Green Pass就會蝕到入肉


當然唔會忘記
買返張北之大地入場券

12:45 札幌時計台

係札幌駅直行幾分鐘，就來到一個好出名既地方喇
日本三景好多人都識，但日本最伏三景又有無聽過？
而最伏三景就係




同埋呢到 札幌市 札幌時計台！ (現在地)
估唔到札幌大都會都有景點入選！

如果睇旅遊書既相會擺靚角度影到好有青春氣息
但現實當然就係往往摧毀你既幻想
連個鐘都俾D樹葉遮住晒，不過就係佢既特色

其實呢D地方咁出名，背後都有好多歷史好多故事
但咪話外國遊客，就算日本人自己都未必感興趣

所以跟團都有跟團既好處，導遊會同你講好多耶穌令你唔會悶好充實 (利申家窮未跟過團)
而自由行往往重視畫面好靚而容易忽略景點背後既故事，一來睇唔明當地文字又未必有相關背景知識二來時間寶貴唔得閒去閱讀

然而札幌時計台對北海道開拓史係一個十分重要既標誌


所以時計台係可以參觀既，俾200YEN就可以入去
不過裡面講解歷史既部分對絕大部分遊客都係好悶
我淨係影左呢部唔知幾多年前既電腦


行上一樓就會去到禮堂，其實呢到本來係叫「旧札幌農学校演武場」，札幌農学校也就是現在北海道大學的前身




美國麻省出身William S. Clark，明治時期崛起札幌農学校以及開拓北海道功臣之一
佢憑住淵博既學識，文理雙全教埋英文，就任教頭短短9個月就創造了呢個學校，以及呢塊蝦夷地既命運
所以係北海道最重要既人物之一，係羊之丘展望台可以搵到佢最霸氣銅像


出返來，發現原來有個打卡位可以禽上去 (不過我都係無禽到)
俾遊客一個美好既角度去影呢個時計台
btw後面棟野睇落似特登執過來，無咁破壞呢個角度既觀感

其實都幾唔錯丫，但的確就係打個卡就走得既地方

都係果句，歷史既野識條鐵
所以跟住又要搵地方去lu，去埋就完結呢一日，希望在明天！

14:48 快速エアポート


路過北海道庁旧本庁舎，但係令和大修緊要2025年先翻新完

今日剩返既時間去邊到好
北海道神宮？北海道大學？羊之丘公園？狸小路商店街？
今日唔想坐地鐵又唔想坐巴士，所以應該係無咩地方好去了


結果都係行左轉DAIMARU


有pass就係想搵架車坐下，其他地方有機會再去啦
所以最後坐左札幌圈既快速Airport
佢係有叫做U seat既指定席，雖然唔係Green已經高人一等
又幾舒服，雖然路程唔長都叫可以抖一抖

btw呢班車都係遲左成兩個字先出現，係月台等到有小小唔耐煩

15:22 小樽


因為所以就出現係一個本來完全無plan過無諗住去既地方
唔係新千歲，而係札幌一番人氣近郊，小樽！
月台已經好有懷舊既氣息～話晒有120年歷史

呢個地方就唔點介紹喇，想快速完左呢日遊記佢
完全無做功課就去，遊客mode全開

但係因為唔好肚餓，無去三角市場喇




由於到達時間已經唔早，車站唔算多人
指定動作，買左北之大地入場券先


一出車站就見到donki，破壞晒風景
中間仲會路過旧国鉄手宮線路軌，號稱北海道第一條鐵道
好多遊客係度扮鐵膠影相，我地就完全無視左


直行10分鐘就去到條好出名既運河了
見到有艇仔團


無咩特別好做係運河附近鳩行hea下
errrrrrr....天氣唔好真係扣分
係咪好似城門河呢……我唔同意，其實城門河仲靚！

運河附近好多展館，多到一定睇唔晒
所以小樽可以玩幾耐好因人而異
我地去到都好晏，一個都無入去


去到呢個小樽出拔小路火の見櫓


可以爬上去的，而且免費
條樓梯有少許隱蔽，亦唔係人人都知可以上去


從上面望落運河既風景都唔錯，睇到石狩灣(廣義就係日本海)
特登趁無車影多兩張，不過上面好窄好逼影完就落返去了
btw前面條橋叫做淺草橋


落返去最多遊客同埋團客聚集既地方
終於搵到呢個「經典」觀賞角度
天氣唔好唔緊要丫，P下佢咪得，睇下幾浪漫？
收貨啦，雖然都係城門河靚D

9月因鐵因為落雨停左幾次

揸green pass 但最後要課金坐內陸機札幌落函館

陰鳩公

16:45 小樽堺町通り商店街


小樽真係超多館，呢個叫浪漫館


然後就行埋呢條堺町通商店街掃下街
就返去喇

日本三大遊客商店街 (by 樓主)
小樽堺町通商店街
舊輕井澤銀座通商店街
由布院湯之坪街道

呢三個地方有個共通點，都係好出名既必去級遊客景點，視乎個人可以消磨成日都唔夠，但亦有唔少巴絲去完話好悶無野做
我就覺得都係用來放鬆心情既好地方，風景就唔算特別，如果做下功課睇睇邊D舖頭想去就更好了，真係好睇合唔合緣


不過呢隻吉祥物好猥瑣……


小樽音樂盒館，入面好似好靚


最後行到街尾決定上去食蛋糕飲茶
D茶超好飲，但要配埋蛋糕先飲到個味道
老婆仲買左好多北海道限定茶包返去
總算不枉此行

小樽洋菓子舗ルタオ 本店 (3.57)
https://tabelog.com/hokkaido/A0106/A010601/1000304/

18:03 南小樽駅


沿住坂道行5-10分鐘


就去到南小樽駅了


呢個站無機劃指定席，但好彩仲有綠窗
staff好好人幫我地出左指定席 (雖然係英文飛)
札幌唔肯出叫我地搭返自由席


因為整備新幹線法所以終於起緊既北海道新幹線北斗至札幌段
對沿線地方真係唔知係咪好事
新小樽駅個位置閪到死，並行在來線又話要廢轉巴士，但仲邊有人揸巴士


又係搭返快速Airport返去殺破囉


今次終於準時啦！bye bye喇小樽

19:00 ライラック



係札幌車站行左陣就最後一程了
返旭川首選搭Lilac，因為另一架特急Kamui神威係無Green的，但除此之外無其他分別


今日終於有Green Car搭喇！開心返


一人坐一個單丁位，感受下2+1既美好


今晚晚餐就係呢盒因為去唔到稚內
而揹左成日既蟹海鮮便當


岩見沢、美唄、砂川、滝川、深川
唔洗個半鐘，就返到去旭川了！

今日未到9點就返到酒店
酒店超先進！洗衣機可以用IC卡，呢D先叫智方便！



今日意外既札幌小樽遊終於完喇，係咪好悶呢
但相信睇得呢個遊記既巴絲都會知道，樓主當然係無咁易放棄既！
所以趁得返一日係北海道玩，都一場來到啦！本身決定左要去喇！當然要決行日本最北端！

我地將會順利到達！各位放心唔會令大家失望架！



所以次回予告：今日も頑張れ 宗谷本線
(寫埋聽日又夠鐘外出取材，不過好短)

感謝各位睇到呢到。晚安。

Day 3 / 北海道旅客鉄道株式会社
完