[偽鐵膠×非鐵膠] Green爆日本兩極超地獄級絕唱之旅

呢D有錢都搭唔到既應該唔係我短期目標喇
來年如果去完北海道根室仲順利生存既話，應該就會直落去埋福井

山陽拎全國真係想哭

我上次都拎咗本書結果唔係攰到瞓，就係望風景望全程連歌都無聽

11:56 指宿のたまて箱


一躍南下鹿兒島，距離我地既終點已經相當接近只是一箭之地
順理成章就係沿住指宿枕崎線完成最後一部曲了



雖然指宿枕崎線係一條線，但實際上運行上係兩截
鹿児島中央ー指宿ー枕崎，後段車就疏好多了
我地可以搭12:02枕崎行普通列車直到我地既終點

雖然話一箭之地都要接近3個鐘，相對既姐……


然而作為遊客當然先順便搭觀光列車指宿的玉手箱
令呢個旅程唔好咁單調啦
基本上每日運行而且仲有三往復，好易搭到
但想搭到心儀班次建議盡早，我地都係好彩執到雞


可惜今日派了一架後備車出來
第二次搭既老婆一睇就知道佢本來就係曾經服務鹿児島中央ー吉松既車人之風，當係懷念下
但因為車上太多人 (特別係香港同鄉)，所以無咩點影車裡面了


然而是日天氣不似預期
錦江灣上成個櫻島睇唔到
仲有架車好chok


但係大丈夫
坐觀光列車好似一定要食布甸，開心返


當然唔少得記念乘車證啦
九州既大部分係同一風格 (除了新既雙星4047等等之外)
吸收乘客搭多D唔同既車，儲齊晒會好有成就感

12:48 指宿駅


呢架觀光列車種別係特急，唔洗一個鐘就去到指宿了
如果搭幾分鐘之後果架普通車，會遲成半個鐘先到站
加上果架車會停一陣先開車，我地係指宿有一段時間參觀下


指宿除了以砂浴為名外
同日本唔少治海地方一樣流傳住一個龍宮傳說，然而日本神話我0識


指宿有幸與日本最北端稚内駅締結成姊姊車站
點解唔係西大山同埋枕崎，因為果兩個都係無人站


又到左Pokemon坑渠蓋時間，指宿了吸引了好多伊貝進駐
因為指宿讀上來是「Ibusuki」，很像「伊貝喜歎」

呢到其餘8個坑渠蓋分布係指宿唔同地方
水、火、雷、太陽、月亮、葉、冰、仙子
可是出面落雨我就唔去搵了，留係車站等車算




最後雖然有小小唔甘心，但總算有一個了結
買左樓主最後一張入場券
JR最南端西大山駅，因為果種係無人站所以可以係度買

13:27 指宿枕崎線


係指宿無所事事一陣之後，搭返車繼續往終點
呢個站既車往南行大部分只會在一站之後既山川止步
要去埋西大山、枕崎，全日僅僅得7班車咁疏
如果樓主miss左呢班車，下班車係差唔多係4個鐘之後


好快就見到開聞岳，即係就來去到西大山喇
雖然天氣麻麻地但成座山仍然好清楚可見




13:45 從指宿出發唔洗廿分鐘就到左JR最南端車站
西大山喇
架車會2分鐘後繼續行駛，開車時30秒會吹雞提醒返大家
所以我地JAJA臨打個卡就上返車喇
不過唔知點解有條友成日企係條柱後面阻撚住晒
(張相條柱後面係有人，都係就返個角度先影到咁，如果唔係肯定當場diu9左條友 )






繼續旅程，其實上返車既乘客好少啦
可以眺望開聞岳，亦有人係開聞落左車，但又唔係去行山 (?)

雖然座山標高僅有924米，但形狀工整 (比富士山更對稱)
屹立於錦江灣既海邊，四圍無遮無擋
以日本百名山而言十分稀有，因為山大部分都係內陸的
所以「薩摩富士」之名可是實至名歸

佢屬於成層火山，最近火山活動好似係2000年

佢亦都係「日本百名山」之中標高排尾二
考下大家，咁最矮係邊個呢？
提示：有睇樓主武廢後第一個遊記一定識答！




由指宿搭去枕崎都要差唔多個半鐘
好漫長呀……
搭左咁多日新幹線同埋特急，搭返普通車個時間觀念好唔一樣

但係點都好
終於見到終點了

開聞站應該係落車轉番巴士掛

我當年去個陣又係有條友企到最前條柱 完全冇諗過其他人都要影

佐多岬係真係秘境黎 好值得去

由佐多岬望番開聞岳又係另一種感覺

14:49 枕崎駅


大江南北縱貫篇
終點：枕崎駅，到了！


14:49 唔遲唔早岩岩好！


乘客十隻手指數得晒，大部分都似居民
除左我地兩個外，似乎仲有一名獨遊遊客


枕崎駅就是指宿枕崎線既終點了
大部分遊客最多只會去到西大山，去埋枕崎就真係要再多小小誠意喇！


GOOOOOOOOAL!!!


雙雙陣亡


本日 14:49 枕崎 - 2日前 20:43 稚内
即係話我地由稚内出發到枕崎唔足48小時！
而48小時前，我地仲係宗谷岬等緊巴士！

宗谷→ライラック→北斗→はやぶさ→サンライズ瀬戸→さくら→指宿のたまて箱

北之大地仆落去南國風情
完全係時空扭曲，痴線

獲得成就：JR縱斷完成！

枕崎市本身無咩吸引既觀光名勝
主要以漁業為主既小城市


有一個枕崎市文化資料中心ー南溟館
果期咁岩擺緊當地既鐵道展覽
雖然話行5分鐘，但果到應該係山上怕中暑所以無去了


枕崎駅一日得6班車
(呢到唔會有人搭JR去鹿兒島中央)




周圍都寫住呢到係「本土最南端始発。終着駅」


最後係觀光案內所買左張到達證明完成任務

16:00 鹿児島交通


完成任務後當然就返鹿兒島喇，舟車勞頓左咁多日開始到極限了
總無理由搭返指宿枕崎線返去，因為條路線係兜大路，要差唔多3個鐘

JR九州亦都考慮緊廢除指宿枕崎線既指宿ー枕崎段
意味住連西大山都唔想放過
呢個吹雞效果似乎就無北海道咁勁喇，但其實成個日本既鐵道衰落都一樣嚴重，尤其九州天災一樣特別多


以前其實仲有南薩鐵道從枕崎經加世田去到鹿兒島本線既伊集院
但1983年豪雨成條收皮


但九州係巴士大國，搭巴士返去既簡單又直接
樓主再次幫襯鹿兒島交通
16:00 搭特急「枕崎—鹿児島」，大約個半鐘就返到去喇
本來仲有「特急直行」，中間只停一站加世田，但似乎時間表又改鬼晒得返一日一班


巴士好有南國風情，出發了


南國風情感覺截然不同
周圍都係民居，同一片無際既北海道好大對比
同埋好曬好熱

(老婆已經完全陣亡左)


鹿兒島車又好多
呢到D站牌有莫名其妙修正過，因應近年呢到既行政劃分既變化


巴士路線治住國道225號又上又落又上又落
chok到傻傻地
但已經能俯視鹿兒島市區了


巴士落返地差唔多到
老婆已經表示暈車浪，搭左咁多日Green，一日就chok返晒出來

見到摩天輪就代表真係就到站了
我地今晚就住係鹿兒島中央附近，所以係度落車
不過都發生了小插曲，樓主無散紙佢又唔收外來IC卡
擾攘左一陣先解決到問題

今晚住宿係ソラリア西鉄ホテル鹿児島
望到櫻島
價錢同係東京求其住晚三星差唔多


跟住就搭左路面電車去天文館，即係鹿兒島市區既鬧市


晚餐去左黑豚Shabu Shabu完結本日
辛苦晒！

吾愛人 文化通り店 (3.51)
https://tabelog.com/kagoshima/A4601/A460101/46003937/

Day 6 / 豬突猛進 直擊最南端
完

呢個9+ONE日遊記進度條終於去到80%喇
感謝各位巴絲一齊感受呢個緊張又刺激既旅程

剩返兩日就要開始回程返成田喇
行程本來仲有好多想法，但最後會相當簡單直接唔會有太大驚喜架喇
因為玩左咁多日咩都夠晒皮了，不過都盡量令內容豐富小小啦

(雖然真係趕住出新遊記)

btw最後最後會總結埋成個JR PASS使用心得先會正式完結本遊記
今年應該完唔到架喇

Chapter 3 大江南北縱貫篇
- 完 -

想講雙星張印仔卡都係呢個format

最後20%呢

2024年完到？

Chapter 4 一氣呵成終結篇

樓主陣亡左成個月，終於來到了Day 7
呢個月實在發生太多事，咪話寫遊記，連登都唔點得閒上
寫遊記對於忙碌時既樓主實在係好大精神負擔

從稚内搭火車到去枕崎，唔係D咩人生成就
不過就令成個人散鬼晒


所以難得住間唔錯既酒店，食返個早餐先啦
享受一下薩摩風情


(相片由老婆提供)
對鹿兒島市民而言，當地最大地標也許唔係櫻島
而係呢個稱為「AMURAN」既摩天輪

是日行程簡簡單單，因為聽日就要結束行程了
所以都係沿住新幹線一路返去吧

Day 7 / 尋找西園寺的世界

11:32 門司港

結果2023年兩度訪問鹿兒島
樓主都無認真去遊覽過，櫻島都無上過去

早上9:17就離開鹿兒島了
又係搭新幹線Sakura，啦啦啦就去到小倉


轉個頭就到了北九州一番人氣景點門司港
星期六超多遊客呢


門司港駅歷史超過130年，駅舍極具懷舊風格
我上次來既時候都仲係重建緊，搞左7年先完工，但跟住就武廢了


步行幾分鐘參觀九州鐵道紀念館
其實就好小型，300YEN就可以入去，所以都係攝下時間

12:00 潮風号


北九州銀行特約：土日祝先會開車既潮風号


可能係全日本最便宜既觀光列車，300YEN就可以搭
可以考慮買埋Clover Ticket，800YEN暢遊関門海峽


呢架小火車本身真係無咩特別
只是沿途可以欣賞門司港景色，算係唔錯


好快就見到関門海峽大橋
全程10分鐘就到関門海峡めかり了

呢到對遊客而言已經是九州能踏足既最北端
(真正既最北端係過小小既貨櫃區，常人無法進入)
對面就已經係本州山口縣下関市了


関門海峽大橋對香港人也許唔係好特別既景點
因為同青馬大橋真係差唔多
但今日風和日麗所以都唔錯啦


不過呢到當然唔一樣，可以行路去對面
「関門トンネル人道 」，屬於国道2号一部分


行人通過係無料，推單車先要過路費
出發！行路上本州！


幾分鐘就到左縣界喇
亦相信係全日本最多人打卡既縣界
因為其他縣界都係middle of nowhere
正如你唔會見到有人係香港區界打卡一樣


呢到係Youtuber西園寺大型節目「全日本捉迷藏」登場地方之一
兩組人係海底相遇決戰，西園寺差D就俾鬼捉足game over
其實大部分日本人都未必知道本州同九州之間係可以行路去
反而對唔少成日去日本玩既遊客，直頭係常識
西園寺在節目講過本州去九州有好多方法，遊日達人一聽就估到
(當然仲有一D不知人知既……)


呢條海底隧道大約需時三個字
好快就登陸喇

登陸本州，望返對面九州係咁既樣


遠望門司港


呢到個巴士站叫「御裳川」
可以搭返去唐戸、下関


等左一段時間終於有巴士到
好爆無位坐

搭巴士廿分鐘到，到左下関駅了
歷史悠久，1901年開業
也是現時JR西日本與JR九州既交匯點之一


下関駅也是豪華觀光列車「瑞風」既終點站之一

除咗火車巴士船飛機行路揸車之外仲有咩方法

遊水