(live) 裸辭獨遊日本四國三星期 (3)

上回講到，今日係躺平日，去咗食完幾出名嘅松下製麵所之後，又走咗去youme town 嗰度行。


除咗去鳩hea之外，主要目的係要買多一個細喼。如果大家有印象嘅話，事源係我本身個喼爛咗，所以就喺日本呢邊買咗個新嘅喼，但on9樓主冇度size，買咗一個比本來個喼細好多個新喼搞到而家冇位放行李







所以喺某連登好友嘅建議之下，就直接買多個細喼算啦，當係一開二，唔好搞咁多嘢 其實個質感幾好，有時用作短途旅行都唔錯用。


另外喺一間相機鋪，買咗個二手腳架，我攝影幾乎係門外漢，見全部嘢加埋都係二千尾yen，平平地執嚟玩下。

結論，今日戰績，就係買咗以下兩樣嘢

買完嘢之後，又走咗入去裏面間壽司郎，其實啲嘢食真係同香港差唔多，只係平少少



要講嘅話就係呢嚿炸池魚壽司，香港好似唔見有，佢係冇骨嘅，好似fish and chips咁樣食，都幾好食

返酒店安頓好，執好新喼之後，原來已經搞到好夜。已經去到最尾幾日，咁就臨尾去多一次嗰一間開得比較夜嘅炸串店


招牌都係冇變過啦，仍然係90yen一串佐賀牛，你話邊度搵呀



都嚟咗幾次了，都冇咩特別好講，老細都認得我，語言不通咁樣隔空吹咗幾句水，跟住我就自己摺埋一二邊


今次都係嗌返一啲我食過覺得好食嘅炸串，詳情可以睇返我上幾次嚟嗰陣嘅遊記。左手揸住杯燒酒，右手揸住炸串，好放肆





點都要嗌少少新嘢嘅，嗌咗份炸豬扒，但呢份有啲伏，純粹係靠佢嗰個調味得好嘅沙律蛋頂住



都係必點啦，唔使多講




循例再share多一次地址
https://maps.app.goo.gl/1P2bJ9yGh3UqeyiZA

食完炸串，諗起間居酒屋喺附近 (唔知大家有冇印象，總之係一間對我勁好，係咁請我食嘢嘅小店)。我咁啱身上又有一啲之前喺岡山買嘅小手信，仲諗住過去打個招呼，點知今日冇開，睇嚟老細開唔開門都幾隨心

(但又老實講句，其實佢哋真係熱情得滯，我哋又溝通唔到，其實我都係有啲驚走入去，見到佢冇開門之後，雖然覺得可惜，但同時都有鬆咗一口氣，人真係矛盾呀，想去講聲拜拜都唔敢)





返酒店之後，瞓唔著，可能係覺得今日躺平得太過份，想搵啲嘢做下，最後都係又踩住架酒店單車，踩去海邊hea




已經唔係第一次特登踩過嚟了，呢間嘢都係冇開門嘅 呢間鶴丸都算係小有名氣嘅烏冬店，而且特點係聲稱開到凌晨，好想凌晨時分食碗烏冬暖下胃呀！！！






就嚟踩到去海邊，咁就諗住買定支嘢飲啦，本身凌晨時分我已經吽下吽下，入咗銀入去之後先發覺唔對路，應該係豉油或者湯底之類嘅嘢？ 放啲咁嘅嘢喺飲品機度真係大伏



如果真係買咗，到時喺海邊，舒舒服服咁打開啲嘢飲嚟嘆，結果成口豉油，成個mood咁就收咗皮

啱啱收到天文台通知，估唔到小犬真係打得成8號，各位早唞 小心水浸

訓醒就見到更新

最後有冇飲到

使唔使咁早起身 痴撚線㗎你


冇呀，嗰陣我最後關頭突然清醒咗一下，最後冇買到，撳個掣退返啲銀仔出嚟

可能個腦知道你更新，就整醒左我

我瞓先啦

好好休息，過幾日記得完埋個 post 佢

wow 支持樓主

希望今年內追得完

7月買機票 到我依家人在九州 樓主都未出完

樓主肯得閒講兩句已經算係咁，遲啲你就會發現佢成個月潛水

我記得一個月前話就黎完 不過佢好似話更新一次要用兩粒幾鐘 可能唔得閒掛

唔使擔心 我現實中識佢 我會捉鳩返佢入嚟出文

靠你追樓主了

畀人捉咗上水

聽日更新聽日更新

真係差一兩日 我都唔知點解搞咁耐，睇落其實打咗好少嘢，但通常都係要過幾兩個鐘

可能係依家狀態唔太好，要好全力感受返當時嘅回憶會有啲吃力，但一定會盡力做到最好嘅！

得㗎喇，你肯完咗佢就得，慢慢，不過最緊要快。

定期黎檢查下更新完未 加油

推推佢