(live) 裸辭獨遊日本四國三星期 (3)

非
好快開始更新！！

【遊日情報｜建築大師安藤忠雄操刀設計・直島新美術館2025年春開幕！！】

https://www.facebook.com/photo/?fbid=710125147811991&set=a.643487424475764

講下講下又新一年

上文提到，深夜食完吉野家，準備聽日朝早去犬島。

犬島嘅交通有啲麻煩，個島唔係每日都會營業，而且要先去豐島再轉船去。結果係眾望所歸，第朝我係成功走咗班船

跑到去碼頭嘅時候得返兩三分鐘，工作人員唔畀我上船了，眼白白望住隻船離我而去


今日成個人都係坐船mood，呢個時候抬頭見到小豆島嘅船，一於拍板，今日轉戰小豆島！計埋今次，我已經係差唔多第四日生活喺小豆島，真係有啲過份咗



話說等船嘅時候，見到兩個白人女仔都喺走咗架船，好焦急咁查緊行程，跟住前公司有個職員主動行過去，用好流利嘅英文同佢哋傾計，建議佢哋每日嘅船程，應該係我成個月中聽過最好嘅英文，好勁下



再次到達小豆島，今次首先上咗去碼頭2樓個毒撚展區，上次行過嘅時候已經閂咗



擅長捉弄人的高木同學，其實我只係睇過第一季，但我都大約知道，佢之後嘅舞台搬咗嚟小豆島，所以你周圍都可以見到呢套動漫嘅週邊



仲有幾張書枱畀你打卡，望住啲中學書枱，我只係感受到歲月不饒人

跟住再次嚟到Ginshiro，又一次食咗兩份素麵，都係咁好食多謝上個post巴打推介



呢間素面店，枱頭有啲蒜油用嚟畀你調味，幾好食嘅，上次我因為驚會打爛所以冇買到

聽完有巴打講唔使擔心之後，今次就點都係買咗先，估唔到指手畫腳之下，店員主動幫我包實咗，之前擔心得太多





其實小豆島，我有興趣嘅地方都已經去得七七八八，今天就決定踩下單車，入咗去應該係土莊港唯一一間電動電單車，Shodo island Rental bicycle service，租金接近2000 Yen 係真係幾貴，鬼叫佢做獨市生意，但單車嘅品質都ok嘅



首先近近哋，再次踩咗去天使之路。今日天氣暫時都唔錯，但今次就費事去踩沙，喺度望咗一陣就踩走咗，反正都唔係第一次嚟

有文推

目的地為小豆島橄欖公園 先前同我食飯嗰位巴打，佢甚至踩咗去二十四之瞳館，距離比較遠一倍，聽佢分享完，今次我都想喺小豆島踩下單車


正式開始長征之前，再次經過呢個號稱世界最窄嘅海峽，我唔識睇日文都get到，原來係有張類似證書嘅嘢攞



回一回帶，上次喺落大雨嘅時候經過呢個景點，咁個鐘同城門河差唔多水平 但如果你打開google map嚟睇，又真係世界最窄嘅海峽，一場嚟到，就去攞張嘢囉



攞證書個地方有少少難搵，盛惠200 Yen

離開最窄海峽之後，正式開始認真踩了，呢度嘅路有部分路段冇單車路，行人路亦非常窄，但同時太多車又好難踩馬路，可能要停一停推車。但大部分路段都算舒服嘅，係就好似下圖二咁樣，有條單車路，一係就冇乜車，可以好似下圖一咁樣直接踩馬路






呢段單車路都有唔少大上大落嘅位置，好彩有電動單車幫手，如果唔係我膝頭應該已經報廢咗

但係，上完大斜路之後，沿著大馬路一邊爆衝落去下斜坡，快到唔係好敢煞車嘅速度，一邊望住右邊嘅海景，個感覺真係好舒暢，多巴胺都分泌曬出嚟




望返紀錄，土庄港踩去橄欖公園，大約係12k，來回就大約25k左右

樓主我呢啲廢j，平時喺沙田踩去大埔就已經差唔多了，如果踩埋去大尾篤，就已經會攰到趴喺度，今次即日踩咗25 K，對我嚟講已經係超額完成，電動單車乃真神器也

我依家係直島打手，推薦大家都去下
(又多咗個理由重遊四國了)

下文呢？我準備好㗎喇

咁可以交換電話做朋友啫，你以為我期待咩

樓主嘅高松精彩咁多嘅，睇嚟要去多次

行程淨返一兩日左右，就嚟完㗎喇

燒肉喺ぴこぴこ精肉店？ 佢同烏冬都係正嘢


男木島嗰度我嗰陣自己一個，人又冇貓又冇，攞住個七仔三文治自己望海 但我見到間舖嘅環境都係好warm，feel到應該大家鄰舍關係幾好


我今次冇試過，入當地人屋企嘅感覺係真係幾好，係幾年前去鹿兒島嘅時候，試過喺吉松畀人招待入佢屋企，因為佢見我係咁望住座神社，而佢就係呢個神社嘅主持，而神社後面就係佢屋企
(廣告：有出過遊記post)

我留得耐啫

ひ〜君食堂?
https://maps.app.goo.gl/eJ2irzSmQaEb7ALQ7

順便一提，呢度附近係紅燈區，絲打嘅話要留意下治安


你係識日文？唔識日文衝入去真係好難搞 我記得個炒麵係幾好食，但佢個骨付鳥就一般般，但佢係見我鍾意食先特登整畀我，我都冇資格話佢唔好食


老細真係幾好傾㗎，同埋身邊的顧客都可以一齊傾埋一份，你同佢哋傾計期間，有冇提起過之前有條香港後生仔嚟過？

終於更新 差唔多睇到結局啦

感謝支持，聽日繼續更新，訓了

又走數了

對唔住各位
聽日一定更新

上回講到去小豆島踩單車，踩完12公里，終於踩到去橄欖公園。我都唔係第一次嚟了，其實冇咩特別好講，只要天氣好，喺橄欖公園做乜嘢都係好正



首先又入去買咗杯雪糕，今次試咗呢個新地杯裝，橄欖味雪糕仲唔夠，仲要用啲橄欖油浸住




樓上有個咖啡廳，有啲打卡位咁樣，但上次同今次嚟都係冇開門




其實真係整得幾靚，仲特登整咗繁體中文，上次第一次嚟就係全程揸住佢行，今次攞返張返去收藏

再臨魔女之家



買多咗支新地桶，行住去再望下個風車，上次已經影咗，今次唔使再玩騎著掃把同個風車合照

隨心咁樣週圍逛下，放低咗嗰種急住要打卡嘅心態，唔係好似上次咁，大家排住隊去影相打卡，跟住走人，今次好似又留意到更多嘢




遠處見到原來有梯田，唔知係咪又係一個景點呢？

時間差唔多了，要準備沖返去碼頭，事源因為單車鋪六點就收工，逼住要還車，要早啲走人，有得揀我都想再闖蕩耐啲


踩單車嘅其中一大好處，就係你會更加留意旅途中週圍嘅事物。


踩住單車回程期間，經過呢間舖頭，我即刻就認得出個商標，頭先我喺碼頭嗰間銀五郎素麵店買嗰支蒜油，就係呢一個牌子，原來係銀五郎同呢間嘢合作，互相幫大家宣傳下




佢主要係賣橄欖護膚品同埋橄欖油，但我驚我皮膚敏感，買咗支橄欖唇膏玩下就算了



Tōyō Olive
https://maps.app.goo.gl/mnL5orDjCJZAZth4A