(live) 裸辭獨遊日本四國三星期 (3)

黎緊去兩星期，我要睇多d

樓主要繼續寫落去呀，雖然我而家先爬到Post 2中段
同埋嚟緊我要plan我個行程未必咁快睇得晒

多謝你鼓勵龜速更新中，應該得返四日左右其實

又係時候鞭下樓主快D 出文

樓豬

樓主召喚

再冇文我就整個面具男聖巡之旅

上回講到喺神社睇完景同埋撚完貓，落返山周圍行下，我已經特登揀咗星期日過嚟，但呢度啲人真係唔會比面你，週末都照樣可以提早閂門，一間開緊嘅鋪頭都搵唔到


周圍行咗一陣，難得見到一間士多仔有開門，唔少遊客都聚咗喺呢度食雪糕 雖然都有啲貴，但佢依家獨市生意，都要畀佢賺㗎啦




冇咩特別，純粹就係用嚟打發時間，食住雪糕hea住望海咁樣，完全就係退休生活





本身我係諗住踩去有少少距離嘅燈塔，點知一架單車都搵唔到，直到見到呢張告示牌 之前女木島都有，就諗住呢度一定有添，冇單車嘅話真係好難消磨時間





去到另一個島上著名嘅藝術品，歩く方舟，見佢官網形容呢件藝術品為：「在堤防展示從舊約聖經諾亞方舟獲得靈感的立體作品。方舟上有四座著色為白和藍的小山，把方舟彷彿即將渡海的模樣視覺化。」


冇乜點樣聯想到呢種感受，藝術呢家嘢我真喺識條鐵 都係循例打卡算啦，唔好搞咁多嘢

早啲行返去碼頭算了，行返去途中行過啲民居嘅路，原來喺度黐塊poster可以咁鬼平，500yen就可以貼三個月

真係搵張白紙寫住「面具男到此一遊」貼出嚟都得 (頭盔：講笑)




另一件迷之藝術品




返到去碼頭等船，順便再研究一下呢個地標建築，男木島の魂，的確係一個好靚嘅建築，特別係佢個屋頂，原來係用英文字母同埋日文組成



上網睇啲遊記，見到話原來喺陽光照射之下，企喺正面呢個角度睇，地下就會有好多文字嘅倒影，但我今日就乜都睇唔到，唔知今日太陽發生咩事




上船走了 忍唔住重申一次，望住啲屋一層一層上去建築模式，好靚




結論就係，男木島真係冇咩好做 除非hea到好似我咁樣玩，如果唔係好似大部分人咁，一日玩曬男女木島，係合理嘅方案，唔使好似我咁分兩日去

坐船返嚟高松港之後，行返去高松jr站附近食乜嘢好，呢個時候見到有條友喺度擺地攤，擺咗張牌大大隻字寫住「完全無料」，跟住寫啲乜嘢我就睇唔明啦


但根據我遠距離觀察，佢應該係免費幫人用書法寫佢個名 (冇影低佢擺攤個樣，所以偷咗佢ig張圖，順便當幫佢宣傳下啦)





我見到之後都心旭旭想試下，但本毒撚又唔敢行過去最怕佢唔識講英文，衝出嚟柒，又或者佢淨係識寫日文漢字，唔識寫我呢啲繁體中文漢字 最尾我喺附近徘徊咗幾分鐘，兩次扮行過偷睇下，其他時間就企喺遠處望住，最後終於儲夠勇氣行過去


好彩佢英文相當唔錯，雖然有啲口音，但英文應該好過我少少，喺四國嚟講係非常罕見 好彩佢都識寫繁體中文漢字，好快潦咗個好型嘅書法畀我，可惜我po咗出嚟等於直線自爆唯有遮住佢啦


有興趣可以去佢ig睇下佢作品風格，佢同我講係寫得多，佢自己創出嚟嘅一個流派





同佢吹左陣水，首先我問佢係咩人，佢話答唔到我，勉強可以叫做東京人，但佢好多年前已經賣咗東京間屋，周圍旅居，好耐冇返過去了，呢種浪子生活真係好撚型，我都想過啲咁嘅生活



佢話平時主要都係靠幫人寫字為生，但平時係街擺檔嗰陣就會免費寫，佢已經去咗世界好多地方擺攤，可能因為咁佢英文都唔錯

雖然佢未嚟過香港，但之後又傾到佢喺馬德里住過一段時間，而我又喺嗰邊讀個半年書，搵到啲共同話題可以吹下水，估唔到我竟然喺日本同人傾西班牙野


我哋都算係幾好傾，但見到仲有其他人想搵佢寫字，咁就費事阻住佢啦 之後我ig sent番張合照相畀佢，佢都用繁體中文覆我「謝謝」



最後附上合照一張

即刻走去睇果個IG 睇下有無樓主無格相，結果無

我有檢查過先post的

四國冬天建唔建議去？

我個人就唔清楚，睇下呢度有冇人冬天去過

樓主好撚靚仔的
利申：現實中識佢

樓主有冇計劃黎緊去邊度旅行