(live) 裸辭獨遊日本四國三星期 (3)

個防波堤咁凍頂到成晚咁勁

依家諗返起 係咪你成日吹夜風先感冒

第一站，嚟到 仏生山の森






根據網上資料，應該係有個花園同動物睇下，算我唔好彩，我本身都唔係好大興趣，志在行個圈咁



有隻羊喺出面用圍欄圍住，你佢自己一隻，睇佢個樣真係悶到仆街，生無可戀咁樣，不如撞死我啦



一見到我就衝過嚟，我冇草比你食㗎，我都係窮撚一個



仲有戶外bbq玩，我諗個定位就好似西貢燒嘢食咁上下





嚟到仏生山の森嘅主體，一間文青cafe，係呢片有啲荒蕪嘅近郊地區，有棟咁嘅建築，以本地人嚟講係有打卡嘅價值


但如果你喺旅客，除非你好似我咁無聊如果唔係唔駛特登嚟



買咗杯自稱自家制嘅雪糕，味道就不過不失，喺300羊貴咗小小



比咗錢先知，原來剩係買呢杯雪糕，喺唔可以堂食

我又未肚餓住，唯有出去企係門口食。今日天氣幾好，係街上食都夠舒服嘅

樓主酒量廢到

我諗都應該係 嗰陣作息太差喇，自己一個癲癲地

凌晨嗰陣再凍啲 所以咪話要縮喺欄桿下面 但個感覺又好似好正，逆風而行咁樣

我之前明明冇咁屎㗎 應該係戒咗一排，依家先越嚟越渣，講真，酒精真係對濕疹唔掂


btw 生日快樂呀

下一站，去到仏生山嘅地標，仏生山温泉，距離我大約一公里步行距離左右。本來我睇啲台仔攻略網，我行呢一公里嘅途中，會經過唔少精品美食或者文青手作店，點知今日我一係就搵唔到，一係就閂咗門，今日唔知咩事



本身我係諗住沿途行下呢啲商店，去到終點喺溫泉打個卡就算，依家直接行到去終點，就咁掉頭返車站就好似好冇癮...





主要都係擔心自己濕疹嘅問題啦諗咗一陣決定入去問下櫃檯，點知櫃檯嗰度竟然有個居日英國鬼仔，喺日本咁耐終於第一次完全流暢咁同人溝通佢仲同我講話佢之前個室友都係香港人


佢哋都幾nice，佢哋喺度討論緊，一個話咩個溫泉反而對濕疹有幫助，一個就話好似唔係太好，結論就係佢哋放我入去試下先，如果我一覺得唔舒服就即刻走，佢會退返錢畀我


入口大堂，幾chill，可以隨便揀本書，然後攤喺左邊啲枱櫈嗰邊




(圖片自google)，入面係好新淨，我本身都鍾意呢啲木色，週圍都會keep住清潔同乾爽，唔會有一種澡堂嗰種殘舊嘅污漬，仲可以望下個天，算係唔錯嘅地方

另外，個鬼仔仲有行入嚟問下我浸成點，有冇過敏呀，好關照我




最尾我浸浸下都係有啲唔舒服，浸咗一陣就走了，換好衫之後根據日本傳統，一定要買啲朱古力奶飲嘅！


一邊喺大堂啲榻榻米嗰度躺平，一邊飲朱奶




夜晚的仏生山温泉

個溫泉外貌又幾靚

係幾新淨舒服嘅，喺高松留得耐少少嘅話可以考慮

渣渣林啦

浸完溫泉，慢慢行返去仏生山站，始終唔係熱門遊客好地方，當地居民又係揸車多，週圍真係幾乎冇咩人



差唔多半個鐘先一班，慢慢等啦，享受下日本夜晚冇人嘅車站


返到市中心，最後一晚果然都係要食我最愛嘅燒肉！




可能係我唔識食或者唔好彩，我都係對當地嘅橄欖牛冇咩大興趣，因為我未食過一餐我覺得好好食嘅。

我個人嘅至愛始終都係宮崎牛，所以當然再次嚟到專食宮崎牛嘅 ぴこぴこ精肉店 瓦町










呢張係咪好似影得幾pro




實際情況



最後一晚了，縱使之前不斷delay返香港嘅飛機，但旅程始終會有完結嘅一日，樂觀啲咁諗，正正係因為佢有限，先顯得呢段時間嘅寶貴，早抖

牙病巴有冇去過吉隆坡！

早晨，最後一餐飯，揀返我第一餐嘅烏冬店Udon Bou，嚟個有始有終

可能因為我食太多烏冬，感覺冇我第一次食嗰陣咁好食，但當然仍然都係水準之上




最後一個想去嘅地方，網吧 快活club

短短地坐一個鐘，體驗下喺日本做三和大神嘅感覺話唔定我都真係有機會喺日本訓網吧。



完全個室，比想像中寬敞，張圖影唔到，其實底下張梳化床係墊高咗，距離真正地面仲有一個空間，個位可以用嚟放鞋或者其他雜物

而上層有個紙巾盒嗰一張枱，寫住話可以承受10定20kg嘅重量，已經預咗位置畀人放gip，真係幾貼心 呢個配套令到旅客嚟瞓網吧，真係可以成為事實。



原來加錢有vr房玩



一打開電腦，呢個預設頁面，嘩全部都係借錢廣告，估計應該都係啲二三線財仔

漫畫迷嘅天堂漫畫藏書量遠超我想像，書店都冇佢咁齊，可惜我唔識日文，我相信真係所有想睇嘅漫畫，都可以喺呢度搵到


另外一啲最新嘅報紙同埋雜誌



最新一期jump






免費飲品與雪糕，免費離講算合格，杯雪糕好鬼甜，食唔落第二杯，懷疑喺特登



一小時網吧tour完結，臨走前見到原來出面仲有大locker，如果攞到位嘅話，旅行瞓呢度喺真係ok


最大問題應該係，外國人冇得用book位嗰個apps，要walk in，我唔知淨係四國，定係全國都係咁嘅規則啦

去過一次，個人覺得幾悶，城市D景點幾廢，野食就岩我地口味

慘了
有冇咩嘢食推介呀

都係大路果D

終於po到呢一張圖了，呢一張喺同時象徵主開始與結束嘅一張遊記相，係我今次最後一眼去用肉眼看見四國呢片土地，為期大約一個月有旅程，在此完滿結束


呢一個月，好似度過咗一段唔屬於自己嘅人生，我會永遠記住呢一段日子。



感謝睇到呢一度嘅各位，三個post每一條留言我都有睇幾乎每一條我都會盡量覆返你，係有幾條睇咗幾個鐘之後認真留言嘅巴打，我唔知點樣認真嘅覆返你，所以一直冇覆到，抱歉，亦再次為我嘅末期拖延症道歉


最後亦希望可以幫到其他準備去四國嘅連登仔，見到自己影響到一個陌生人嘅一個微小決定，已經令我覺得好滿足

最尾張酒店相好似唔錯，酒店咩名?
好少見旁邊會放長枱長椅

Comfort Hotel Takamatsu，我最尾一晚轉咗酒店，呢間係之前係高松約食飯嘅連登仔巴打推薦我的


張長枱好正呀，如果你要開工撳電腦，坐呢度舒服過平時啲酒店枱好多

(半live) 重新出發，獨遊吉隆坡六天
https://lih.kg/3548202
- 分享自 LIHKG 討論區


順便賣下廣告，新遊記post來了

快活club係會員就可以book位 外國人都得

正，已bookmark
下次去日本望下佢地集團有邊幾間d 房係呢隻design