咁就介紹下綠島等大家方便黎玩
綠島位於台東外海既一個縣，亦叫火燒島，最出名應該係白色恐怖時期關押政治犯的監獄，施明德係其中之一。
個島好細，大概15平方公里，有一半係山路，亦都有世界唯三既海底溫泉。
適合黎既月份大概由3月到10月中，天氣好熱，夏天可以肉眼見到銀河。
冬天因為東北季風影響，船班少而且可能會隨時停船封島。
交通資訊
從台北或高雄出發到台東(台北大概4個鐘，高雄大概2-3個鐘就到)
可以去富岡漁港坐船(船程1個鐘)旺季一日大概3-6班船
或到台東航空站坐16座飛機(一日3班 風大雨大就唔飛 網上面只賣4個位)
島上交通(以下以台幣計算)
一般會以機車代步450/日
如果無電單車牌，可以租電動車。有兩隻，有車牌可以租雙人座450/日，無車牌只能租單人座600/日，行盡唔到40，未必夠力行山路。
當然可以租單車但會好辛苦，夏天三十幾度氣溫
絕對唔建議行路。
玩樂行程
島上面最多人簡一定係潛水同浮潛。綠島既海長年大藍水，能見度超過20米。
未有潛水牌、唔熟水或者驚水可以試下體驗潛水先，綠島既體驗都係教練一對一，好安全。
最深唔超過12米，兩粒鐘左近，影相拍攝都包住入面，盛惠2500
有牌既話可以簡岸潛同船潛，基本上全島海邊都可以潛水，行落去就得。但船潛既話潛點都比較深，潛店一般會要求有AOW。
想考牌既話，OW一般有3日2夜同4日3夜簡，3日既話會緊湊啲，可能會由你入島到夜晚到走都係上室內堂或者落水。4日既話就有時間可以放鬆下周圍去下。AOW既話3日就夠，比較特別就係綠島上堂一般會有夜潛，其他地方未必會安排到。
浮潛個價大概係400，但教練一對十以上，水面有時因為好多浮潛餵魚會濁，但如果真係好驚水可以玩下。
近年新興既SUP，大概1200-2000不等，多人簡都係日出/日落團，係海中間睇日出日落係幾正。
其他可以玩既包括藍洞浮潛、夜訪潮間帶睇海邊生物、夜釣等等。
飲食
唔好要求太高，唔太難食就可以接受。有全家,7-11但無其他大型連鎖店，好多鋪頭會出事，小心簡。
近年就開左好多年輕人開既文青餐廳，反而可以試下。酒吧都開左好多間，比起前幾年起碼夜晚多左活動可以做。
不過記得飲酒唔好渣車，夜晚好危險。
水肺潛水疑難
Q:自由潛水同水肺潛水有咩分別？
A:自潛係近年興起既運動，要一口氣閉氣下潛到上升。水肺就咩樽落水，可以係水底呼吸。兩樣野雖然好似但係完全唔係同一回事，需要既技巧技術都唔同，自潛比起水肺有危險，雖然睇落門檻好低但都建議上堂學好安全技巧。
Q:水肺潛水有無危險嫁，唔識游水學唔學得？係咪100%成功
A:一般休閒潛水有風險但唔高，跟足指示注意安全就好少發生意外。
其實係綠島浮潛出事機率高過潛水。
唔識游水都學得，我就係最佳例子。不過首先要唔怕水同埋需要花更多時間心機去學，建議學之前體驗潛水先。
另外一定要過到PADI既上堂標準先會出牌，唔係100%成功，你怕水怕到連望落海都唔敢就唔洗諗。
Q:係香港學定出去學好？
A:香港學就方便，時間可以就星期六日唔洗請假。國外學就水靚啲多野睇啲，一般上堂都係3-4日。
有人話香港上堂係練技術，因為一般能見度都係2-3米。我自己覺得如果學果陣都唔靚就好難吸引人繼續玩潛水。
Q:新手應該買咩裝備。
A:先確定自己會一路玩潛水，否則買完第二年就囉去賣。
Mask>Fin>wetsuit=computer>REG+BCD呢個順序慢慢買，一套裝備保養得好可以用十幾年
Q:咁多潛水牌要考到幾時
A:如果你淨係玩，考到AOW加多個高氧專長就夠用。
Q:唔同機構有咩分別
大型機構如PADI, SSI, NAUI, CMAS等等，學既課程內容要求唔同，但都係國際通用既潛水機構，唔會話你渣住PADI去SSI既潛水機構就唔比你潛。係非專業既程度下，你考完SSI既初階係可以考PADI既進階。
有興趣黎綠島玩或者學潛水歡迎問我，想推薦其他潛水店或者住宿問題都可以問，有問盡答！但一樣藍絲黑警中立撚唔好黎，無謂大家面阻阻，多謝
http://t.me/ProDiverOscar
唔好夜晚去就得
