[遊記]關西北陸15日避年之旅

食完野已經三點多少少
於是拿拿淋狗衝去今日既戲肉 - 姬路城

姬路城係全國十二現存天守之一
至今已經有接近700年歷史
經歷過多次大大小小既戰爭
當中包括二次世界大戰
仲有造成大量傷亡既阪神大地震之後
都幾乎絲毫無損，仍然趷立不倒
因此成為左希望既象徵

而且無論喺建築群保存既完整度
定係當中蘊含既歷史故事
抑或係城堡給予既象徵地位
都比其他天守高幾班
所以又有「日本第一名城」既稱號

姬路城喺唔同季節
開門時間都唔一樣
例如冬天係開朝九晚五
最後入場時間係4點
依家夏天日照時間長左，就開朝九晚六
如果想去既話記得去返官網確認開放時間

由JR站去姬路城有幾種方法
可以選擇行路、俾100円搭巴士或者租單車
既然岩岩食飽左野
最適合就係做下簡單運動，即係行路
於是一路沿住商店街向前行


直至見到本町商店街
就知道差唔到去到啦


行左大約15分鐘
終於去到姬路城公園門口



不過都仲要行過木橋、穿過城門


再兜過一大片草地


先黎到天守閣一帶既付費區域


每人俾左1000円
成功獲得入場券兩張

原本俾多50円就可以參觀埋隔離既好古園
不過好古園仲早過天守收工
去到既時候已經停止售票
今日就緣慳一面
咁就專心睇下眼前呢個木造天守啦

入到付費區域都仲有一段路要行
首先跨過菱の門
代表住正式踏入天守閣範圍


跟住行到去將軍坂
上一堆又長又斜既樓梯

牆上既窿又叫做狭間
係打仗嗰陣用黎放各式各樣既武器
去擊退進攻既敵人

にの門

去到進入天守既中後段
比起一開始既菱の門已經細左一大截

再捐過目測得米半高既ほの門 (左下角)

門口做到咁細都係防守既一環
能夠增加進攻既難度

最後再檻幾級成呎高既樓梯


終於黎到姬路城天守閣入口


由於係姬路城係木造既天守
所以入去一定要除鞋
入面既公公婆婆會俾個可降解膠袋入起對鞋
然後就要拎住對鞋行哂成個天守


一行入去係個不見天日既空間


行上一樓有少量展板講下歷史

不過黎到姬路城
比起講舊屎，睇建築好似比較重要
歷史都有佢既價值
只係樓豬對歷史既興趣一早被教畜磨滅哂


由一樓望出去
主要望返前方既備前丸跡 (即係塊大草地)
同遠方望落成水平線既高樓


一樓角落位置既石落し

從字面睇會認為係用黎投石既地方
但係實際上係用黎監視敵人居多
不過有需要時都會利用呢個窿向下方攻擊

二重の扉
由一大一細既鐵門所組成

全個天守有4隻咁既鐵門
由外面望係見唔到呢隻門既存在
主要用黎抵擋外來既攻擊
同埋有防火既功能
不過就唔知戰鬥嗰陣實際點樣應用

破風の間


只要有三角屋頂出現既地方
基本上就會有呢個設計存在
牆上有兩隻窗係用黎通風
當中右邊有框有手把嗰隻係開得既

武具掛け

用黎掛刀刀槍槍等等武器既牆架

武者隱し

用黎俾武士匿藏既地方
萬一有人入侵既時候
就會喺入面突襲

成個天守只係用兩條大木柱支撐主要結構
除左呢條東大柱
仲有一開波就見到既西大柱


經過幾百年既洗禮
條柱都抵受唔住壓力裂開左
亦都有傾斜既情況出現
依家要搵鋼圈固定條柱本體
再另外進行外部加固
防止情況進一步惡化
而本身西大柱實在爛得太緊要
早幾年大維修既時候直頭成條木換左
依家見到既木柱
已經唔再係幾百年前嗰條

石打棚

專登將個窗做高左
方便由高處監視外面
同埋以高台做支架進行射擊

為左符合現代法例而加既消防喉轆


好斜既樓梯......

級級都成呎高，踏板又窄
唔扶住兩旁既扶手，根本無辦法行上去

一路行一路睇下風景
同埋古代建築既奧妙
用左半個鐘終於行到上天守閣頂層

成層基本上就係睇風景
同埋呢個長壁(刑部)神社

據說現時神社供奉既係火神同災難之神
祈求呢座偉大既堡壘免受災害

辛辛苦苦上到黎
梗係四邊都要留個念

首先係東面
望落去以民居為主


南面
即係向住JR站嗰一面
仲有隻氣勢磅礡既魚虎襯托下


西面

近處既古建築係西の院庭園
只要買左姬路城入場劵
就可以一次過參觀埋庭園內部
不過今日時間有限就冇入到去

最後係北面
一樣都係以住宅居多


喺頂樓留左大約十分鐘
望住個天逐漸染紅
又聽住天守即將閂窗既廣播
天守入面冇照明設施
閂哂窗就會黑鼆鼆，乜柒都睇唔到
於是就行返落去

所謂上山容易落山難
面對住又高又難踩既樓梯
每次向下行既時候都一步一驚心


由4樓望向JR站方向

雖然冇頂樓既風景咁宏偉
不過就無遮無擋，開揚d

除左窗外遠方既風景之外
由建築物望返去自身既另一部分
甚至係室內部分
景色亦同樣優美




越向下行
本身企埋一二邊既職員(?)
漸漸圍哂去樓梯附近
一邊吹水一邊笑笑口恭送僅餘既遊人
懷疑係想俾壓力未走既人
等佢地可以快快趣趣清場收工

黎到尾聲
會見到天守閣既結構模型
成個結構都好公整，冇乜多餘野

然而現代科技好左
個個都鍾意向難度挑戰，成日簡單複雜化
呢d簡約既線條美好似消失哂咁

除左結構
天守入面仲展出左古時姬路城既模型


見到呢塊木板
意味住即將行完成個天守閣啦

行完天守閣
太陽已經落左一半


襯住未正式閉城
快快手去埋草地
把握最後機會近距離影下姬路城


有個架放俾人固定部電話/相機去影相


雖然日落西山
不過向住姬路城嗰一邊仲係非常之藍



草地某個角落仲有付費望遠鏡
可以望返去JR站嗰邊


影到有人趕羊先捨得走
成為左呢日最後一批離場既客人





雖然仲未睇夠
不過改變唔到人地要收工既事實
只能怪自己預得太少時間
希望以後有機會再黎拜訪啦
再見啦姬路城



除左行上天守既過程比較艱辛之外
個人覺得姬路城基本上係無缺點
以日本咁多個現存天守黎講
可以話係交通最方便既一個
而且無論係觀賞性定係歷史價值
都係日本眾多名城之中名列前矛
而且姬路市俾人既感覺亦好悠閒
唔似得大阪會人逼人
除非體能真係好差
見到有目測年過八十既老人家
喺屋企人扶持之下照樣行上姬路城
否則絕對值得用最少半日黎遊覽一下

終於追完

我去姬路個日撞正落大雨
有個位搭左棚維修緊
西丸入面城牆有千姬既少少歴史故事
然後介紹埋你去千姬天滿宮參觀

不過我行完姬路城已經勁肚餓
附近無野食
所以無去到

落大雨真係好煩

今次時間唔夠，淨係行左個城
之後應該會搵機會去多次
到時行埋你講嗰d

行完姬路城之後
慢慢沿住商店街行返去JR站


前面咁岩有班中學生
可以踩住單車返放學
唔知點解有少少羨慕


中途經過間超市
就入左去行個圈

一盒士多啤梨都幾貴
一盒連稅要過千円
當時計返港紙即係超過60蚊
同香港既日式超市差唔多價
不過香港應該冇乜機會買到兵庫縣產既生果
所以都照買左一包返酒店慢慢食

去姬路呢日係日本既節分日
相當於農曆既立春
傳統上會喺呢日食一條叫惠方卷既食物
所以周街都有惠方卷賣
連超市都唔例外



惠方卷據說源自大阪
一般會以七種食材包成壽司卷
寓意象徵吉祥既七福神
「惠」解作恩惠、有利
「方」意指方向
只要向住吉利既方位
一口氣食哂成條卷
就能夠消災解難
迎接幸福既一年

正宗既惠方卷由於材料多
包到成碌棍咁粗
我地就冇咁大胃口
只係各自買左條閹割版既惠方卷體驗下


話說中午食完御好燒之後
見到隔離有間水產店
由於頭先隻蠔真係超好食
食完念念不忘
而咁岩行完一大輪又開始有少少肚餓
於是就行返去食野

一坐低店員即刻放低左兩隻蠔做前菜


然後再啪返幾隻生蠔


仲叫左燒蠔同焗蠔


所有蠔都好新鮮好好食
只係冇頭先嗰隻咁甜

海鮮炒麵

估唔到個炒麵內有乾坤
個煎pan其實好細，只係煎蛋size
但係入面竟然都收埋左四五隻蠔

各自食左大約10隻蠔
再飲左杯highball就收皮
埋單只係4000円左右
咁既質素同價錢
香港一定搵唔到

貝屋 マルホウ
https://tabelog.com/hyogo/A2805/A280501/28049069/

食完蠔行過隔離food court
再叫左一板十粒明石燒試下
全部都圓碌碌好得意

明石燒其實同章魚燒好近似
但係食落口就非常淋身
一咬開就會爆漿
如果連本身偏淋既大阪章魚燒都唔鍾意既話
建議慳返幾百円去食其他野

食完就搭車返大阪
回程唔趕時間就慳返舊錢
搭一個鐘車程既新快速算數

明石燒有蛋香味好多

其實落雨去幾有feel
睇到人地啲去水點run
咁大座城可以做到完全無水氹
就算日本新建築都做唔到

比起彥根城
姬路城震撼好多
1000yen入料真心唔貴

明石燒配柚子鹽好食到癲

終於又返到大阪


即刻返酒店放低d野休息下
直到10點幾先再出去搵食
難波夜晚好似都好熱鬧
於是去左嗰邊睇下有咩宵夜
點知男朋友又行去d奇奇怪怪既地方
又係紅燈區


最後去左24小時無休既花丸軒

由於夜已深，開門既餐廳唔多
所以出面大排長龍
大約等左半個鐘先有得食

幸福拉麵 (半麵)


正常份量好似多舊叉燒食


湯頭偏杰身，味道幾濃
同埋肥膏都多所以有d油
叉燒正正常常
舊豬軟骨煲到淋哂
d骨入口即溶仲好入味
不過味玉睇樣就知一般啦
作為宵夜黎講
雖然比較重口味
但係天寒地凍黎食返碗熱辣辣既麵
個人都會醒神d

花丸軒 難波・法善寺店
https://tabelog.com/osaka/A2701/A270202/27002618/

食完大約12點
眼見仲趕到終電返心齋橋
於是行快幾步返難波


行到半路
前面個大叔突然仙女散花
喺衫袋一手fing左一堆銀紙出黎
然後若無其事咁繼續同人邊行邊吹水
見到咁既場面第一下係呆左
隔左兩三秒先識衝上去
同個大叔講跌左好多錢
唔知佢係咪飲醉左
佢都隔左幾秒先意識到自己真係跌左錢
俾返哂d錢個大叔之後又繼續趕車

好似係第一次喺日本坐終電


終電比想像中多人


搭左一個站就落車
再去酒店樓下7仔買下野飲就返歸

Day 13 完

Day 14

踏入旅途既尾聲
係時候休養生息
hea到三點先出房門
出發之前搵左間喺梅田既天婦羅
雖然係tabelog百名店
不過唔知係咪過左lunch hour
竟然唔洗等就入得

以為鋪頭有些少名氣
就算可以walk in都應該會爆場
點知入到去
得兩個婆婆坐喺bar枱角落嘆緊茶

一坐低就上天婦羅汁、鹽同熱茶

嗰幾條青瓜同甘荀到食完都唔知點食法

之後係前菜

一開始以為全部都係小菜黎
點知右邊嗰碗用黎撈飯既漬物
等我仲就咁乾哽，中哂伏
不過d昆布乾絲鹹鹹酸酸咁
越咬越多口水，不自覺想繼續當零食食

炸物係逐款上
首先有兩隻蝦

蝦肉夠彈牙夠爽
不過嫌個炸漿厚左dddd

蘆荀

條荀好嫩，又脆又甜
都唔知幾耐冇食過爽脆既蘆荀

唔記得咩魚同青椒

舊魚一條骨都冇，又好滑
青椒一咬落去會爆汁，仲好清甜
冇嗰陣難食既草青味

蟹腳

呢個冇乜印象，應該普普通通

紫心蕃薯

本身係成舊dum落油鑊炸
直到上碟嗰刻先將佢一分為二
食落好鬼香甜
點解香港冇甜既蕃薯食架

另一款炸蝦

呢個冇份食唔評論

雜菜天婦羅

作為埋尾既菜式
佢非常滿足到我想食炸野既欲望
咬落去層炸漿脆卜卜
入面都係爽脆既
但係又冇油膩既感覺
食完都唔覺好大負擔

萬一真係唔夠食
或者有指定款式想食
都可以逐件追加
不過夜晚book左燒肉就唔食咁飽了

由於淨係掛住食
所以唔係每件炸物都有影相
冇記錯既話每人有八件天婦羅
雖然份量唔算非常多
但係勝在可以睇住師傅逐件炸起
同埋每件炸物都有簡單介紹
連前菜同飯同簡單甜品同飲品
平均每人食左大約3000円
可以話係蔗渣既價錢，高級既享受

走嗰陣鋪頭前面已經有一堆人排緊隊
睇黎應該係準備食個early dinner


芦屋天がゆ ルクア大阪店
https://tabelog.com/osaka/A2701/A270101/27057135/

唔知點解覺得去旅行唔係早早出發好蝕

唔想太早起身
同埋不停搭車同搬搬抬抬，體力不繼
不過三點先起行的確奢侈左少少

食飽飯叉足電
又係時候去行街


食完lunch其實已經5點
太陽都開始落山


上左去大丸13樓行Pokémon centre


今作既御三家不了


結算條龍睇見都唔開胃
結果只係行左5分鐘就走左


明明印象中以前大半層都係仆街芒
依家似乎縮左水
分左一部分俾其他遊戲同動漫作品做專賣店

有多啦A夢定係叮噹


多人到on9既one piece
聽講淨係入鋪頭都要排半個鐘


有芒亨


仲有當時只係開左個幾月既Nintendo store


入面多人到要拎整理卷
好彩只係需要等一round
即係10分鐘就入得


除左大人細路都識既mario系列之外


仲有嗰期好hit既splatoon



同埋lockdown時期人人都爭住玩既動森
條圍裙勁靚，差d忍唔住買


本身唔諗住買野
點知唔小心敗左個splatoon amibo
同埋卡比公仔返屋企
隻公仔已經變左做狗玩具

行完13樓
再去左樓下Tokyu hands睇下雜貨
跟住就直落地庫準備搭車返難波

偶然見到呢杯聞名不如見面既仙台名物

以前睇遊記覺得杯野好新奇有趣
見到有就買黎試下
點知又真係幾好味
不過飲到尾有種越飲越甜
想收手既感覺

行完街返左去道頓堀
諗住睇下有咩手信
求其執d野返屋企


行行下又黎到打卡位



水上觀光船

想當年拎住大阪周遊卷
見可以免費坐船就搭左一轉
其實都係沿住條河遊個大運
真心冇乜特別
如果要俾錢坐既話就不了
印象中都幾貴，好似要成千羊

話雖如此
不過依然有一車車遊客準備坐船


唔坐船就行下donki


入面幾乎清一色寵寵寵
連廣播同影片都係泡文


道頓堀donki最特別既地方
就係可以坐摩天輪
不過當時冇開到


呢間donki又細又多人
而且幾乎連日文同中文都聽唔到
完全唔知點解可以吸引到千千萬萬個泡仔泡女
喺晚飯時間衝入去掃貨
地下全層都係排隊等俾錢既泡菜
根本逼到行唔到
最後兩手空空行返出去
凌晨再過左去望下，入面拍哂烏蠅
不過好多貨架都俾人洗劫一空

日本真係要去偏鄉先掂，周圍都係遊客

跟住行去難波食燒肉


臨飛之前嗰晚 (即係兩星期前)
心血來潮想返香港前食多餐平平地既燒肉
第一下就諗起曾經試過搏walk in
但係失敗收場既國產牛放題
打算去官網預約嗰陣
發現已經冇哂靚時間
心齋橋一帶既分店
晚市得返5點同9點呢d閪時間揀
抱住街要襯早行既心
最後預約左比較夜既時段
好彩book得夠夜，唔係上一餐落唔切格

其實大阪有好多更加好食既燒肉
揀國產牛主要因為對佢有d情意結
同埋食得多好野都要還下俗
順個靚便過下放題癮

準時去到國產牛

呢間野又係勁多泡菜幫襯
一坐低嗰下
個侍應竟然同我地講泡文

食得放題梗係要叫到成枱野食


牛肉正正常常
唔算好肥美但係都唔會又瘦又韌


去到中途食下菜清清味蕾


臨尾食肉食到濟，但係又未飽
於是叫左碗烏冬填肚


最後每人一份甜品
嗰陣做緊蜜瓜主題
當然要試下期間限定既食品
左邊好似係奶昔，右邊係芭菲

蜜瓜味唔係嗰d好假既藥水味
感覺好清爽
食完一堆肉飽飽濟濟
食返d清新脫俗既野就岩哂

食得放題
都預左肉既質素冇散叫嗰d咁靚
不過話哂都係用國產牛
差極都有個譜
而且重點係用同樣既錢
喺香港一定食唔到同樣質素既肉
同埋佢個甜品又係幾出色
唔怪得成日都話國產牛係被燒肉耽誤既甜品鋪

あぶりや 道頓堀御堂筋店
https://tabelog.com/osaka/A2701/A270202/27087584/

國產牛樓下就係難波另一間donki
於是又走左入去睇下有冇野岩買



唔知發生咩事
成個貨架都空空如也


收銀處打左最少五六行蛇餅
應該八成都係香港人
排撚左個半鐘先成功埋單鬆人


道頓堀兩間donki都比想像中少野賣
相對疫情前冇咁好行，唔係太買得落手
同埋收銀條龍實在排太誇張
下次要買野都係行返藥妝鋪同超市算

行出donki已經係凌晨一點半
周圍既大廈都熄哂燈


個燒肉都落左一半格
見到對面有一蘭就諗住黎個是靚宵

點知過到去原來冇開門
要去到道頓堀中間先有24小時營業既分店
但係挑起左條宵夜癮就冇咁易熄滅
於是照行過去


入到去有個哥哥仔話要等「一陣」先有位
一般人聽到一陣
都諗住係五至十分鐘左右啫
咁一場黎到等幾分鐘又冇乜所謂
於是就買左食劵



點知打開門就中大伏
佢老味前面起碼有二十人等緊入座

早知道要等咁耐就唔撚買劵
最後等撚左半個鐘先有位

再等5分鐘終於有麵食

屌那星個湯底味精湯黎
飲多兩啖就頸渴
個麵份量又細，仲要有鹼水味
而且得幾塊仔叉燒
攝牙罅都唔夠
點解我要俾咁撚多錢
等咁撚耐食碗咁撚難食既野
好彩有枝好夠氣既可樂頂下
下次再聽到邊個一蘭好食
要捉佢去打先得

食完明明已經接近凌晨3點
但係等位條龍依然都係咁長
懷疑有好大部分人都係俾店員水鳩左

如果好想食拉麵宵夜
奉勸大家行多幾步去花丸軒
等待時間應該相差無幾
價錢又差唔多
但係好食過一蘭多多聲

一蘭 道頓堀店別館
https://tabelog.com/osaka/A2701/A270202/27084189/

半夜三更都仲有人busking


打卡位半夜一樣熄哂燈


由於夜已深
男朋友話好攰好眼瞓
唔想再拎住一袋二袋行
於是飛的返酒店

排隊排左5分鐘
搭的士車程8分鐘，收左1000円
其實仲耐過就咁行返酒店
連的士司機都話我地哂錢
不過嗰下唔想聊交嗌就屈服左
返到酒店就極速執好行李上床瞓覺


Day 14 完

凌晨飛的都要排隊

前一晚執行李執到凌晨4點半先瞓
結果到左朝早
兩條友一齊完美錯過哂所有鬧鐘
直到10點幾男朋友先突然扎醒
然後再叫醒埋我
好不幸地酒店要求10點就要check out
梳洗到一半就收到電話
話延遲退房要收錢
雙人房每個鐘收2000円，最遲1點要走
鬼叫大家都唔知醒
呢舊錢抵俾人罰

張相明明一路都喺到
唔知點解呢日好多人都對住幅相起勢咁影


最後一日行呢堆路了




雖然住左喺心齋橋
但係幾日都去左梅田嗰邊
都冇好好行過條商店街
下次可能直接住梅田好過

本身book左11點食蟹道樂
但係因為遲左起身
最後遲左20分鐘先去到
預約email寫到明30分鐘都唔出現
就會取消booking
好彩趕得切去

行到去見到好多人排緊隊
應該係等緊11點半開賣既蟹肉包同蟹肉雪糕

好好彩安排左個窗邊位俾我地


4點前入座既話有lunch set
比晚市平一大截

叫左兩個唔同既set一齊食
一個係平d既「るり」
一個係貴d既「すみれ」
咁就可以食到最多既款式

前菜
有沙律同蟹腳


蟹肉刺身
d肉勁鮮甜，好食到想加碼


紙火鍋
有兩條蟹腳，其餘都係菜同豆腐


好多湯既茶碗蒸


蟹肉白汁焗長通粉

覺得係全個set入面最鳩流流既一道菜
雖然個汁幾好食
不過完全食唔到有蟹肉既存在

天婦羅

一睇就知係普通貨色
但係又不致於厚到淨係食緊炸漿

另外加既甲羅燒

燒過既蟹膏嗰陣香濃既味道久久不散
所有野撈左蟹膏之後都即刻好食左

蟹肉燒賣


蟹肉壽司


蟹肉炊飯


個飯有陣淡淡既鹹鮮味
好容易就食清光

麵豉湯
入面仲有粒蟹肉丸


最後係綠茶加牛奶雪糕

雪到硬既雪糕
加埋熱辣辣又帶微甘既綠茶
一甜一苦，一冷一熱既組合
成為左是日vip

埋單嗰陣個姨姨無啦啦塞左袋野埋黎
話係送既
打開一睇，係枝有氣既清酒


可能適逢係蟹當造既季節
個人覺得冇出面講到咁差
食到既蟹肉都正正常常
不過就冇去北陸食既咁出色
如果想平平地食蟹既話都可以一戰

かに道楽 本店
https://tabelog.com/osaka/A2701/A270202/27001516/

食完野去返心齋橋作最後衝刺


不過假期既心齋橋實在太多人
買完屋企人想要既野就走左

見仲未夠鐘
行左去黑門市場到此一遊
之前未去過，今次純粹見識一下



最右邊嗰包蠔只係十幾蚊

雖然唔可以生食
但係十幾蚊食到咁多蠔
我又唔介意佢係生定熟啊

兜完個圈就坐車入機場了


就唔到時間搭一個鐘一班既rapi:t
唯有搭返空港急行



45分鐘左右就去到關西機場

比起35分鐘車程既rapi:t
其實唔係慢好多
唔太追求舒適度既話
唔需要特登就時間坐佢

行返去國際線嗰邊

跟手搵左個角落執行李
塞返最後既戰利品入去行李箱
主要都係想塞返枝清酒落去

hk express個counter冇乜人

買左u first既我地
5分鐘都唔洗就check in完

安檢超多人
排左20分鐘以上先過到關


免稅店又係多人到癲


過完關再搭shuttle先去到登機閘口



上到機有個靚靚黃昏迎接我地返屋企


中途食下機場買既m記

盒麥樂雞最後拎左返屋企
當手信俾左兩老

眨下眼就返到hell kong



拎到行李之後
發覺撞爆左個殼
個碌反而乜事都冇，仲推得好順暢

拎住個爛喼走去詢問處
職員話一係開張form claim保險
一係直接賠300蚊現金
間間航空公司做法唔同
以上做法只適用搭UO老母既人
個喼係N年前既淘寶貨，完全唔值錢
而且無單無據都幾難claim保險
問過屋企人同相熟保險經紀之後決定折現


因為個爛喼
搞到趕唔切搭一個鐘一班既A車
結果拎住嗰三舊水飛的返屋企

Day 15 完

全篇完







由初春到盛夏
單機左咁耐
終於打哂呢篇似乎冇乜人睇既遊記
中間除左工作繁忙之外
屋企人最近亦舊病復發
入左廠一段時間
情況仲一度十分危急
完全冇時間亦冇心機兼顧呢到
拖左文咁耐真係唔好意思

北陸以下邊個地方比較好住/值得留一晚？

金澤
高山
白川鄉
富山
高岡