[遊記]關西北陸15日避年之旅

LM 2月底先去完白川鄉

高級溫泉旅館呢啲嘢人一世物一世
試下唔心痛

白鳩痴港孩

個心唔痛，係荷包痛啫

有金澤篇未, 準備去

京都donki 一向開到12點，唔係通宵

check out左之後就等車返去加賀溫泉駅
總共有三班車

我地呢d last minute check out既人
自然就係等10點半嗰班

日頭既大堂好似光猛d


喺大堂等緊既時候又發現有野食
琴日擺溫泉饅頭嗰個位
今日就放左用溫泉水蒸既薯仔


隔離有d鹽可以點下
個薯仔幾香薯仔味
係平時香港食唔到既味道
唔係夠鐘上車既會話想食埋男朋友嗰份


食完薯仔就搭返酒店車去加賀溫泉駅


JR站對面有個商場
今次就冇行過


原本應該要等半個鐘先有車去金澤
點知佢又delay
變左唔洗點等就有車坐


加賀溫泉我地有緣再會




大半個鐘之後就到左金澤

因為酒店同金澤駅有一段距離
唔想係咁來來回回
於是去左隔離商場locker擺低件行李
擺底之後見隔離有廁所
男朋友就俾個廁所吸左埋去
一去就去左大半個鐘
等到我唔小心瞓著埋

等到佢出黎嗰陣
個早餐都開始落格
於是又打開tabelog睇下有咩食
搵左一輪決定又食拉麵
由金澤駅行過去大約6-8分鐘

金澤駅出面既鼓門



途中經過既地下連絡橋
成個建築都係白色，勁靚


連登仔經過一定會影既水魚


唔知係咪天氣唔好
竟然可以直入


一叫完野食就俾左杯橙色既野

飲落似係甘旬汁
酸酸甜甜幾開胃
仲聲稱可以減低血糖上升既速度
等個人冇咁易肥

今次叫左最普通既味噌拉麵

麵豉味好香，又唔會死鹹
個麵都幾彈牙
叉瘦亦夠淋
食左幾啖撈埋d柚子皮同薑蓉落去個湯到
柚子皮本身有少少澀
但係擺埋一齊又幾fresh
食到味覺疲勞既時候
會有種換然一新既感覺
夾薑蓉既話就帶微辛
唔會好辣好嗆咁
食一碗麵有三種味覺呢下好正

味玉都靚靚仔仔又夠入味


金澤呢間拉麵
絕對係今次旅行食過最好食既拉麵
亦因為呢餐
令到淨低既行程都想心思思想搵下拉麵食

麺屋大河
https://tabelog.com/ishikawa/A1701/A170101/17007507/


食完野又去返金澤駅




之後去左隔離商場睇下眼鏡


3年前有配過Jins既眼鏡
用落覺得都ok
於是諗住襯yen低水買多副
點知今次睇極都唔岩心水
加上都係得普通鏡
最後自己就冇幫襯
反而係男朋友買左一副
一樣都係等半個鐘就拎得



同場仲有貼紙相鋪

本身想重拾下童年回憶既
不過男朋友見到就灑手擰頭

等到夠鐘check in就行返去巴士站
JR今日又delay
不過睇落好過早幾日既


巴士站前面有水牌



睇水牌有好多架巴士都會經過酒店嗰個站
但係等緊車嗰陣
見到唔少人上車嗰陣想拍ic卡
然後個司機好勞氣咁講左一堆野
再一個個被趕左落車
先意識到營運最多路線既北鐵巴士
係唔收西瓜卡同ICCOA
淨係可以用自家既儲值卡Ica俾錢
如果唔用Ica又想搭北鐵巴士既話
一係買一日卷
一係去售票處買單程票

除左北鐵巴士之外
同場仲有西日本JR巴士同金澤周遊巴士
兩者班次雖然冇北鐵咁多
但係就可以收IC卡

由於預計去到酒店之後都唔會再搭巴士
於是決定等架有得拍卡既車算數

搭兩個站就到左南町・尾山神社駅
黎緊要住既酒店就喺巴士站對面


東急ステイ金沢
https://www.tokyustay.co.jp/hotel/KZ/

酒店喺2020年2月新開
應該本身諗住食東奧條水
不過世事既野就不如人意
少人住咪keep住新囉

由酒店出發
無論去近江町市場、兼六園定二十一世紀美術館
都只需要行十分鐘以內就去到
叫做係幾方便
不過落雪另計

呢間酒店同京都嗰間唔同
要靠人手check in
front desk個靚仔哥哥全程用流利英文交流
幾分鐘就搞掂哂

大堂有好多位可以坐
入面仲有個開到6點既Cafe

唔知係咪附近冇乜野食
附近一帶既酒店都有間cafe

地下有一堆衛生用品同茶包拎
呢到既茶包係伊藤園，落重本喎


電梯大堂


去嗰陣搞緊象棋比賽
如果揀中象棋選手食乜野
有機會獲得相同既食劵


走廊


一入房就見到張大床
同埋一張大枱


床邊有個鐘同埋燈掣同埋usb插頭


張枱側邊都有兩腳插頭


床既對面係電視機同小廚房
走廊有幾個衣架掛衫



如果想煮野食
可以落樓下借廚具同電磁爐

小廚房下面有個櫃桶
入面有杯有碟有餐具


雪櫃都係收埋喺小廚房下面



成間房最重要既野
亦都係間酒店最吸引之處
就係每間房都有部洗衣連乾衣機
微波爐同燙褲機

今次去足兩個星期旅行
無可避免要洗衫
去到旅行中段有部私家洗衣機真係好重要
淨係想洗就洗嗰下已經值回票價
如果要慢慢排隊既話可以準備洗到天昏地暗
洗衣連乾衣機既通病係乾衣時間好長
半個鐘洗好既衫要fing四五個鐘先乾得透
但係平時嗰d投幣洗衣機每次只可以乾半個鐘
就算fing足兩三轉，拎出黎都仲係濕既

廁所都係一體式嗰款
不過望落比平時住開嗰d新淨



今次間房冇京都嗰間咁平
兩晚加埋大約15000 yen
勝在比較新同埋間房再大間d
擺兩個大gap絕對不成問題
比較可惜既地方係距離金澤駅有段距離
同埋附近冇乜野食
想食野既話
下下都要去返香林坊或者金澤駅嗰邊


唔知係咪浸完溫泉
個人感覺比平時攰
喺張床攤攤下唔小心瞓著左
一瞓就瞓左幾個鐘

一晚7500 yen 唔算貴啊

金澤呢間酒店幾靚呢個價錢唔貴啦

嗰陣覺得係正常價位
點知依家全部都要double以上
即刻覺得抵左

睇緊10月東京酒店，大部分都千千聲

你 book 酒店係點 book？
我暫時覺得係 Google Map 去 Agoda 最平

投幣乾衣機每次只可以乾半個鐘

可以一次過入幾個 100 円乾耐啲...

除左溫泉酒店同金澤嗰間用樂天book之外
其他都係google map去agoda訂
有時仲有special deal

瞓醒已經差唔多8點
諗住睇下酒店附近有咩餐廳
點知大部分都要行500米以上
如果冇雪其實就冇乜所謂
不過落緊大雪就唔同講法........
喺tabelog搵左一輪
終於揀左一間喺香林坊附近既串燒鋪

本來由酒店出發
沿住大馬路行到第三個路口轉右就到
點知俾google map老點
行左條又少街燈又多積雪又要上落樓梯既小路
甚至連路牌都睇唔清

中間行到懷疑人生
原本5分鐘既路程
最後行左接近15分鐘
中間仲差d仆街

未入門口已經見到有張紙
寫住唔俾影食物以外既相


一坐低店小二就擺低幾碟醬汁
由左到右分別係醬油，黃芥辣同醋


餐廳有兩張menu
一張日文一張中英韓文
雖然排版唔同，但係食物價錢一樣
同埋如果menu張相有5條串燒
上菜嗰陣真係會有5條
唔會多亦唔會少


原個蕃茄&燒蔥
蕃茄勁爽口又夠甜


豚肉同牛舌


肉串全部都會放落條bar到
可以稍稍保溫得黎又可以洗少d碟
又幾有諗頭

應該係燒雞肉同牛肉
正正常常咁啦


煎飯團
脆卜卜既飯焦加醬油既鹹香味
然後入面又軟綿綿，勁正


燒冬菇
望落好乾爭爭，但係食落會爆汁


好似係五花腩
食落有d肥膩
不過送下酒都唔錯既


豬大腸同encore既牛舌
豬大腸燒到個面脆脆地
咬落去幾juicy，幾出色


食左一堆鹹野
梗係要食個雪米糍埋尾
本身想叫布甸，但係賣哂


枱面有個桶專係放食完既竹籤
岩岩數返原來自己起碼食左20串串燒


成晚總共食左50幾串串燒
加埋飯團同甜品同酒水
埋單七千幾円


揀野食嗰陣都係貪佢就手得黎又唔貴
完全冇諗過竟然係炭燒
仲有得坐喺bar枱前面睇住師傅燒串燒
串燒上枱既時候店小二仲會幫手分埋份量
成日都分大份俾男朋友
同埋杯high ball勁好飲
個feel就好似飲可樂咁，好「gur」
超夠氣得黎超清爽
好飲到忍唔住追酒飲
今次證明左喺日本
求其行入連鎖店食野都已經好夠做



秋吉 香林坊店
https://tabelog.com/ishikawa/A1701/A170101/17011321/


食完野慢慢行返酒店
今次識行大路啦



途中經過lawson又入去行左個圈
東京大阪好似唔覺有呢種壽司賣
不過今日唔想食海鮮，冇買到


酒店門口唔知幾時多左堆星星同雪人


成個corner被搶劫一空



因為食飯嗰陣比平時飲多左酒
所以呢晚skip左是靚宵環節
直接收左皮


Day 6 完

都係睇下邊個plan岩/抵d

人肉比較

屍敗 業半Air

琴晚飲多左少少
結果瞓到差唔多中午先出門口
正式開始行程之前
首先要買返張巴士一日卷

只要俾600円
就可以任搭單程200円既金澤市內巴士
即係搭三程已經可以回本
淨係來回酒店已經用左兩程
所以基本上都好難蝕錢


一出門口勁好天
雖然好想即刻衝去行景點
不過點都要醫肚先


既然有一日卷
咁梗係要瘋狂搭巴士
不過有部分路線既服務範圍
會超過一日卷可用範圍
所以上車都要攞整理卷


搭一個站就去到近江町市場

日本既市場即係香港既街市
一樣有肉有菜有生果有花賣



不過近江町市場距離港口只係二十分鐘車程
所以有好多新鮮既海產賣
亦因為咁吸引左唔少遊客幫襯

一去到即刻衝去壽司鋪攞飛
午餐時間要等成50張飛


有排都未有得食
咁就周圍掃下街先
首先一人啪返兩隻即開生蠔
又大隻又鮮甜
如果開中隻細既仲會送多隻



聽講好正既加能蟹
不過貴到仆街
要再賺多d先返黎搵你


各式各樣既刺身


買左隻海膽試下味
完全唔腥，仲好鮮甜


如果一兩日內就返香港既話
應該會買堆菜孝敬老母


牛肉可樂餅同蝦可樂餅

牛肉冇乜特別
隻蝦又幾甜，可惜得3-4隻

能登牛火灸壽司
牛味好濃，同埋都幾肥


行過精肉店
d牛牛全部都好撚正式



等左成個半鐘，終於有得食壽司
有得用ipad落單，可以揀中文


吞拿魚五點盛
件件都恰如其分，大拖勁肥美


北陸五點盛
我係衝住白蝦同螢光魷魚而叫既


鰹魚、平目魚同帶子壽司


海膽軍艦冇頭先即開嗰舊咁正
叫做不過不失咁啦
咁點都比香港食到嗰d好既


唔記得左係咩壽司


是日推介之一既真鯛魚壽司
反而冇前一日喺溫泉酒店食既咁濃魚味


本身想叫白子，點知賣哂


兩碗麵豉湯
一碗用喉黑魚煲，一碗用甜蝦煲

魚嗰碗將d甜味同香味煲哂出黎
仲有啖啖魚肉食
蝦嗰碗飲落似普通麵豉湯，毫無特色

加埋食左十幾碟壽司，埋單9000円



呢間迴轉壽司喺金澤都幾出名
稱唔上平但係整體都新鮮
如果去開係食得過既
不過個人建議早少少去食會更好
一來壽司再新鮮d
二來唔洗擔心會賣哂
我地2點左右入座
大部分熱門食物都賣得七七八八
再遲d應該渣都冇

另外呢間迴轉壽司全國各地都有分店
不過就唔知keep唔keep到質素
如果喺金澤以外食過不妨comment下

もりもり寿し 近江町店
https://tabelog.com/ishikawa/A1701/A170101/17000911/

end?

樓主唔好走住啊

絕對唔會容許爛尾呢件事發生