[遊記]關西北陸15日避年之旅

800一餐真係有啲貴

夜晚一人先萬4左右？！

最平個course未連稅5500yen有交易
一樣有前菜有肉有飯有甜品
不過冇食過平set，答你唔到分別有幾大

中午最貴果個SET, 埋單都11000啵
果然都係一樣勁多菜果陣強行煮第2舊肉, 唔係太接受到

食完諗住行去大宮駅前搭巴士
途中經過7仔就入左去望下
點知入面乜柒都冇
話大雪導致供應出左問題


除左冇野賣之外
喺便利店仲獲得一個重要既資料
黑貓因為大雪
成個北陸地區既行李寄送服務都暫停

原本仲打算聽日寄走嗰堆笨重既行李先去浸溫泉
依家唔洗諗啦，一定要拖住周圍走

街邊無啦啦有部金券機
除左車飛之外仲有m記食劵


睇完之後搭巴士返酒店
京都市內既巴士一般10點左右就收車
好彩仲趕得切
如果冇巴士搭
要行十幾分鐘返四条先有車返京都駅



最後一晚喺京都啦
有少少唔捨得


終於唔係橫風橫雪


站入面明顯比前一日少人好多


酒店附近既雪人
邊個砌到你成個米芝蓮mix比薩斜塔咁


返到酒店附近
男朋友話要食宵夜
如果有細心留意既話
今日冇介紹過晚餐以外既正餐
代表住我地真係skip左午餐
所以食完大餐仲口痕都可以理解
行過なか卯望落d野食幾正咁
於是買左碗細既親子丼返酒店試下

滑蛋係半生熟狀態
雞肉都好嫩
不過加埋生蛋之後
碗飯太多液體，用筷子夾唔起
下次食起碼要叫並盛
多d飯吸下水感覺會良好d
外賣包裝既山藥泥有陣膠味
好彩見兜野已經好稀所以冇落

最後食多個新出既咖啡雪糕作結



Day 4 完

夜晚睇到肚餓添

Day 5


總結以上四日四夜既京都行程
可能係冬天冇乜景睇
又可能係未完全復常
又或者係大雪嚇走左一堆遊客
所到之處除左金閣寺之外
都好似冇疫情前咁多人
最少冇逼到人貼人咁款
連來回清水寺既巴士都罕有地載空氣
而且仲有難得一見既雪景欣賞

如果有take 2既話
一定會用多一兩日細味白色既京都
可惜呢個世界冇如果
唯有寄望之後再有機會去京都觀光
希望下次唔洗再等7年啦





話說前兩日撞正十年一遇既寒流
為大地帶來大雪
搞到關西大部分地區既JR都停駛左
算唔算係見證歷史

好彩嗰陣仲喺京都市區入面
可以避重就輕，揀d冇乜受影響既地方去
行程上都尚算順利

但係直到臨瞓之前
有部分區域都仲未恢復營運
而且唔見有復駛既跡象
內心就越黎越擔憂
事關本身plan左去加賀嘆溫泉食靚蟹
但係最關鍵既湖西線
偏偏一直都處於停駛狀態
意味住來往大阪同金澤既雷鳥號都收左皮

不過JR都提供左d另類方法
就係由關西搭新幹線去東京
再轉北陸新幹線去金澤
或者經名古屋去長野再轉北陸新幹線

咁搭法無論車程定車費都會大幅增加
好彩遊客有得買pass，車費可以封頂
大佬呀咪咁痴線得唔得
鐵膠都未必會咁搭啦

去到呢到
個人理解係即使琵琶湖一段未通車
喺加賀同金澤之間既路段不受影響既前提下
其實都會去到加賀
而且方法應該都類近
即係死都要去既話
就要硬食呢個濕鳩方案

於是今日一起身
就抱住戰戰兢兢既心情去check下
結果得到一個好消息同一個壞消息



好消息係湖西線終於開返
壞消息係因為信號問題會delay
好彩只係延誤20分鐘左右

咁就心諗：20分鐘輕鬆啦
預早一班車咪得囉
咁可以慢慢執行李check out再寄野啦

於是就好輕鬆咁嘆返擺左兩晚既生日蛋糕

擺左兩晚一樣好食，奶味香濃而不膩
食完就去check out了

臨走先咁好天，唔通連個天都唔鍾意我

check out左之後
就要拎埋前一晚pack好既箱去郵便局
將佢地寄返香港
點知去到見到有張紙
寫住國內郵遞服務暫停

在場既職員見有人拎住一箱二箱
都會特登上前問下要寄野去邊到
問完之後得知海外郵遞不受影響
咁就拿拿臨開始用膠紙封箱

郵便局有封箱膠紙連膠紙座提供
唔洗專登買/帶膠紙
不過就冇鉸剪或者𠝹刀嗰d
用起上黎有少少麻煩
真係要用都可以即場買返把
最平好似6xx yen有交易

自從2021年1月1號起
所有寄去海外既郵件
無論係空運定船運
都需要事前喺網上填寫表單作清關之用
詳情可以睇下
https://www.post.japanpost.jp/int/index.html

每一份郵件都要獨立填一張form
換句話講，郵件既數量越多
需要填表既時間同份數就越多
我地要寄兩箱野，就填左兩份
連埋研究既時間
前後用左接近一個鐘去完成呢件事
好彩呢d咁浪費時間既野
前一晚已經做好哂

而填呢份form最麻煩既位係
佢只有日文版提供
(雖然大部分都係漢字)
如果真係睇唔明既話
請善用google translate





本身諗住一早準備好哂，實好快寄完
點知見到counter個姐姐不停行黎行去
咁就一定係出事了
姐姐話俾我地知
份電子form有野填漏左
同埋寄出地址有問題
結果要喺counter重新填一次
浪費左超多時間

等待寄件期間
又屎窟痕睇下JR官網check下營運狀況
屌佢老味由朝早既延誤20分鐘
變左60-90分鐘不等
今翅真係仆街鳥


最後用左超過一個鐘先寄到嗰兩箱野
行出郵便局嗰下已經接近12點半
即刻狗衝去售票機買飛
再買支水同幾粒冬甩就衝落月台等車

兩箱嘢加埋1kg?

呢個郵局寄件教學好有用

加返個零就差唔多
真係得1kg既話拎多十日都唔怕

一講到搭長途少少既車
大家都好鍾意買pass
覺得抵買同容易回本
要去北陸地區既話
一般都會買高山北陸地區周遊卷
可以由大阪兜大圈玩到名古屋

不過張pass有效期得5日
cover唔哂未來6日既行程
無論點拉上補下都要蝕錢
今次就用唔著了

仲有張野叫北陸地區周遊卷
有效期4日
似乎可以套落D5-D8既大部分既行程

但係頭尾兩段都要補錢
玩法好似有d複雜
雖然賬面上用呢張野會平過就咁買飛
不過日本交通新手都係唔好搞咁多野

而且最近呢幾日仲因為大雪
經常發生延誤，甚至停駛
所以嗰陣JR大發慈悲
只要持有未經使用既指定日子同區間既車飛
可以喺一年內免費改飛或退飛
但係JR pass無論任何原因都不設退款
為左保留彈性
而且散買又唔係貴好多
一個人都係貴2000円左右
於是冇買到任何pass了

寄完野九秒九衝去售票機
買左下一班去加賀溫泉既車飛


但係去緊月台既時候發現
前面幾班特急都delay緊，仲未到京都


於是去左月台側邊既詢問處
問下可唔可以搭早一班車
得到既答覆係可以
不過只可以坐自由席
如果自由席不幸地冇位坐
就要企到有位為止
本身買左既指定席會作廢
其實個位就hold左俾你既
不過用唔著啫

既然人都黎到月台，就無謂浪費時間
而且睇個勢後面堆車只會越黎越遲
穩陣起見都係見車就上
咁就蝕左幾百円指定席費俾JR，屌

問完野之後見到隔離有便當賣
都餓餓地就諗住買返個上車食
準備買之際
有架雷鳥號埋站啦

而男朋友就一副唔撚驚既樣繼續買野食
好彩買完便當都未閂門
即刻拎埋行李衝上車

之前去東京有買過駅丼
但係搭住火車食都係第一次

入面有飯有菜有肉有蛋有漬物有甜品
樣樣都細細份咁幾得意
同埋都幾好味
印象最深係個鹹鹹地既飯
同埋嗰堆黑豆估唔到係甜既

一開始嗰段出面勁好天

過左琵琶湖之後又變返白雪雪

睇相唔覺，但係出面d雪係打橫吹既

坐左足足兩個鐘
終於到左加賀溫泉駅


好彩只係比事前計劃遲左幾分鐘達陣
趕得切搭事前book好既酒店迎送車

事後check返
本身買左嗰班車因為大雪延誤超過兩個半鐘
聽聞好似可以退返錢
不過張飛出閘嗰陣已經收左，退條毛咩

站內有個空間俾人等車


如果有book迎送服務
酒店職員會喺到叫名
聽到自己個名可以過去報到
我地行埋去嗰陣已經接近開車時間
確認左之後
個職員直接拎走左我個大喼
跟手帶埋我地同另外幾個客上車

你可以出閘嗰陣過人手通道
叫佢吸個印落去
事後再去退返指定席料金

記得仲係小學雞嗰陣
曾經跟團去過北海道既溫泉酒店
當時家母帶左我去大浴場
個浴場細到不得了
十幾廿人逼埋喺一個龍床盤size既風呂入面
成個場又嘈又逼，諗起都不了
反而風呂隔離有個一邊凍一邊熱既池仔
聲稱行一圈可以促進血液循環
眼見個溫泉人滿為患
我捉埋家母跳落個池行左幾個圈
個人覺得咁行法仲爽過齋浸熱水
當年既我雖然覺得浸溫泉呢件事係幾得意
但係完全感受唔到佢既美好之處
好似喺屋企開盤熱水浸下仲開心



話說今次係男朋友第一次住溫泉旅館
加埋本人生日
點都想有個好d既體驗
體驗唔好點推佢落坑
而且咁岩撞正食蟹既季節
所以揀旅館既時候有三大要求
1. 晚餐有蟹宴
2. 有房內私人風呂
3. 希望十萬円樓下解決

成個北陸地區入面有好多個溫泉
包括芦原溫泉、加賀溫泉、和倉溫泉、宇奈月溫泉等等
當中加賀溫泉可以再細分為山代、山中、栗津、片山津四個溫泉鄉
始終受budget同行程所限
能夠滿足以上要求既旅館其實唔算好多
篩下篩下就揀到呢間了

山代温泉　ゆのくに天祥
https://tensyo.yunokuni.jp/


旅館喺2023年度「日本旅館百選」當中
榮獲綜合第7位
當中酒店環境、服務、溫泉都位列頭十
最差既item - 食物都係二十名以內
整體質素應該有保證

加賀溫泉駅去山代溫泉一帶
大約需要15分鐘車程
可以選擇預約酒店既迎送服務
或者搭加賀周遊巴士既山まわり線
不過一日得三班
所以都係搭旅館迎送車實際d


去到溫泉酒店
一入門口已經有一排check in counter
不過拎住兩件大行李行得慢
所以都係要等
check in嗰陣要揀埋食飯時間
晚餐得5點半同7點揀
見岩岩先食完個便當
咁就揀左夜d個slot
早餐就揀左8點食
已經係最遲既時段
想再晏d起身都唔得

check in完有仲居拎住行李帶我地上房
黎緊兩日一夜全程都係同一個人serve我地
沿路都會用英文簡單介紹下酒店既設施
不外乎都係講下大堂有咩設施同服務
溫泉喺邊嗰d基本野
不過feel到仲居san要講英文好緊張

由大堂行左5分鐘先行到去間房
仲居擺好哂行李，再輕輕介紹下間房
同埋叫我地有咩問題就打落front desk
然後就離開左了
間房係和洋式
能夠體驗日式風情得黎
又唔怕瞓唔慣和式被鋪

一入房有條鋪左榻榻米既走廊


凹入去個位係馬桶
去完廁所冇得即刻洗手，要扣分


跟住有個好似係廚房既地方
有個鋅盆同沖茶既空間


欄柵入面有個雪櫃
入面裝左好多要俾錢既飲品
樽裝水，可樂，啤酒，清酒等等都有
只要你拎左枝野飲出黎
酒店就會自動結算

廚房仔(?)隔離個櫃放左被鋪
今次得兩條友住就用唔著


被鋪對面係浴室
有兩個洗手盤
刷牙洗面唔洗爭黎爭去


仲有個大浴缸
不過出面都有真溫泉，傻仔先浸呢個


走廊盡頭有對紙門
過左對門就係客廳
側邊有個衣櫃

除左可以掛起自己既大褸之外
亦擺左唔同size既浴衣喺到

今次兩個人住就有兩件
如果唔岩身可以叫仲居san換返

中間有張大枱同電視


枱面放左兩件紅豆餅
就咁食有d甜，應該要沖杯茶送餅


前面有個位俾人chill住睇風景
可惜今日天氣麻麻


再入就係房，有兩張單人床
房入面都有電視



客廳側邊有個位行出去室外平台

露天風呂就喺平台既一角
個風呂唔係一般既風呂
而係澤菇池

浸住溫泉水嘆jacuzzi
諗下都覺得正


溫泉側邊仲有張藤椅
其他季節黎到既話
浸完溫泉坐喺到吹下風應該幾爽
不過今日就棟左個危險牌喺到

一開波都唔知棟個牌做乜鳩
直到夜晚睇睇下電視聽到「嘭」一聲
先知嗰個位會有冰由頭頂跌落黎

由平台望出去仲有個被冰封既水上樂園
夏天黎既話可以睇囡囡玩水

參觀完間房之後落左大堂
睇下有咩特別野

有免費橙汁同綠茶任飲


有得試食免費溫泉饅頭
其實即係有紅豆饀既黑糖餅



仲有煎餅同啫喱食

煎餅係芝麻味，幾香口
個啫喱用紫蘇葉整既
聲稱能夠舒緩疲勞，增加食欲同美肌
食落似加左山楂，好撚酸
果然有益健康既野都唔好味......

呢到除左有得食仲有得玩下
可以自己烚隻溫泉蛋
仲有筆可以喺蛋上面畫公仔

不過想整嗰陣唔知個溫泉喺邊
之後搵到溫泉嗰陣時間又唔多夠
結果冇整到

大堂仲有幾間鋪頭賣下野食同手信



仲有得租靚款浴衣


大堂仲有間酒吧
見到唔少上左年紀既人浸完溫泉黎飲返杯


估唔到下午5點都仲有報紙拎


睇完個大堂之後出左酒店睇下
行出酒店門口之後終於發現到煮蛋既地方


門口仲可以借遮


果然係落開雪既地方
酒店門口地下有迷你灑水器防止積雪


酒店前面就有間lawson
萬一凌晨肚餓都可以買宵夜
不過門口有個牌寫住唔俾帶外來食品



入去兜左個圈
賣既野都係市區見到嗰堆
除左呢罐野菜味啤酒

可惜飲親啤酒個心口都好似俾野壓住咁
今次唯有放棄獵奇
行完就返上房嘆下溫泉

好似好正，一晚真係好難足夠，兩晚就 fit 晒

BTW 所以一晚幾錢

係油布院住嘅溫泉旅館馬桶都洗手盆都係分開

分開唔緊要，問題係距離有d遠
去完廁所要轉兩個彎先洗到手.....

溫泉旅館睇落好似好正

睇埋落去咪知

浸完係時候去食成個旅程最期待既一餐
雖然今次就冇叫到加能蟹越前蟹嗰d高級野
不過話哂都係溫泉酒店既料理
估計出品點都唔會差得去邊
終於可以報返幾年前嗰餐難食到飛起既蟹既仇

餐廳主要集中喺二樓
走廊兩邊全部都係餐廳


今晚又包起間房食飯
出面仲指名道姓，一定唔會入錯房


是日餐單


一坐低冇耐仲居會問我地想飲咩
開心既日子就梗係想飲下酒
不過我地平時就冇飲開
於是問下有咩推介
佢就推薦我地試下芋燒酎
可以溝水/溝梳打水/加冰/就咁飲

大家都係初嘗就溝水試下味先
芋燒酎係用蕃薯同米發酵而成既酒
好自然會有蕃薯味
加完水之後酒精味唔明顯 (係咪即係夠醇)
after taste有陣清爽既甜味
整體黎講幾易入口
完全唔覺佢係一枝25%酒精既酒
甜甜地既酒配埋海鮮真係幾正
臨返香港嗰陣忍唔住買左枝返屋企自己溝水飲


然而叫酒飲既時候
我既目光完全離唔開張枱
事關有成隻蟹喺枱面等緊我地

蟹身大約兩個拳頭咁大，唔算好大隻
不過一個人食岩岩好
同場仲有杯用黎開胃既梅汁，酸酸甜甜咁
同埋生既蟹鍋同甲羅燒



根據仲居既講法
枱面嗰堆食物就算擺多一陣
味道都唔會有乜野變化
所以直接放定喺枱面迎賓
其他既野食會陸續上菜

既然擺得隻蟹喺到
其他野食又尚在準備當中
我地就唔客氣啦

一打開個蟹蓋
都幾多蟹膏，好香好鮮好甜


之後開始食蟹腳
嗚呀好清好鮮甜好好食
完全係齋食隻蟹本身既味道
唔係香港嗰d用好多鹽水浸到好鹹嗰隻
好食到有少少唔捨得咁快食完
上既時候仲好細心咁喺蟹腳中間劏左一刀
等客人食既時候可以將個殼摵開兩半
直接挖蟹肉出黎食


食左少少蟹就黎左個刺身
有鰤魚同甜蝦

全部都好新鮮好甜好好食
喺到仲食左人生食過最甜既甜蝦
不過都係隻蟹最吸引
上刺身既同時
仲居會點著埋蟹煲個火，整熟d蟹肉同菜
等大約10分鐘左右就食得

再隔左一陣黎左個茶碗蒸

入面當然都有少少蟹肉
個蛋亦蒸得好滑好好食
冇記錯係全個旅行入面
覺得最好食既茶碗蒸
上茶碗蒸嗰陣會點著埋甲羅燒個火
又係要等幾分鐘先食得

個甲羅燒差唔多ok既時候會上埋天婦羅

hmm...
食完即刻明白點解食事既評分相對冇咁高
早兩日去食豆腐料理嗰份仲好食d
嗰間個炸漿薄身d同脆口d
呢到係勝在食材本身夠靚

食完天婦羅就襯熱食埋甲羅燒

甲羅燒好食過天婦羅多多聲
有好濃郁既蟹膏味
撈埋鮮甜既蟹肉落去一齊食
簡直冇得輸
食淨少少既時候
偷偷地倒左少少酒落去
酒既甜味帶起左蟹既甜味
食落更香更甜


用餐時間剩低15分鐘左右
會一次過上哂蟹壽司、漬物、味噌湯同甜品


全部都細細份咁
都係象徵式叫做有得食
等成個餐完滿d

呢個時候人地suppose已經食得八八九九
但我地各自都仲食淨最少三分一隻蟹
個蟹鍋亦未開封
仲居見到都再三提醒用餐時間就快完
暗示我地唔好再食得咁慢
一來d野食真心好味，個心好想食哂佢地
二來亦唔想浪費食物
於是僅餘既時間都係狼吞虎嚥mode

蟹鍋入面有半個蟹身同埋一堆蔬菜

個湯吸收哂所有食材既精華
十分之清甜
不過臨尾因為時間關係食得太急
食到個肚好漲，唔係幾飲得落
只係淺嘗幾啖就忍痛放棄左

鯨吞一輪之後
叫做勉強清到枱
不過就飽到上心口


其實本身冇諗過食得哂份晚餐
不過份量都真係幾多下
細食既人一定食唔哂
食完呢餐真係非常滿足
終於解到呢幾年以黎想食蟹既欲望

食完飯返房唞左陣
再浸多次房入面溫泉
點知浸完就口痕
於是食埋偷偷地喺便利店帶返房既野食

幾樣野都好濃味/鹹
應該全部都係下酒菜黎
但係我地手頭上得水同茶.....
因為晚飯真係食左好多野
食左三分二左右就唔想再食
食完宵夜，再睇多陣電視就上床瞓覺


Day 5完

Day 6


朝早7點左右就起左身
見距離食早餐都仲有d時間
就打算浸多次溫泉
旅館就聲稱有三湯十八湯
咁把炮既野冇理由唔參觀下掛

所謂既三湯即是有三個浴場
兩個喺地下，一個喺三樓
三個都會男女輪流替換
如果夜晚係男湯，第二朝就會轉做女湯
反之亦然


地下嗰兩個浴場喺走廊既一頭一尾



三樓既浴場
出面有按摩椅，浸完溫泉再用應該一流



而十八湯係講緊三個浴場入面
加埋有18個大細同風格各異既風呂
以下幾張風呂相都係官網圖片




由於房入面都有得浸就冇試哂咁多個
只係去左地下其中一個浴場浸下



一入去更衣室
見到有十幾個人赤裸裸地行黎行去/換緊衫
呀婆呀嬋同學生妹都齊哂，有少少嚇親
普遍身材都幾好，有d波路
不過都無阻要浸溫泉既決心
同埋個溫泉好夠大
就算咁多人都好鬆動
只係到我行去浸既時候
成個溫泉既人都開始散水
浸到最後得返自己同清潔姨姨喺入面
呀姨姨仲好親切咁同我打招呼


浸完去返前一晚嗰個個室食早餐
終於睇到出面既護眼景色


一入去已經見到一堆野食

同晚餐比較，早餐既份量正常得多
雖然都唔係少

早餐一樣有menu


要食既野基本上擺哂出黎
得個白飯後上



枱面有杯酸酸甜甜既果汁用黎開胃
藍色碟係兩片鯛魚刺身，魚味好濃
溫泉蛋正常野，流心既
個set仲有一堆漬物同明太子同山藥泥
全部似乎都係用黎撈落個飯到
有太多野可以送飯食
有少少唔知用邊樣撈好
除左個酸梅，個人覺得樣樣撈飯都好正
特別係帶少少辣既明太子


個煲係麵豉湯
入面有舊蟹肉同好多豆卜



蒸籠咁款嗰個係自家醃既蒸魚

底下有幾舊昆布
舊魚應該事前已經蒸好左
到食嗰陣再搵石灰粉加水(隔住個碗)整返熱
男朋友話條魚好多碎骨
但係自己嗰份又冇咁既問題
味道有少少似鹹魚
不過又比鹹魚淡口好多

自家製豆腐
係清淡既豆香，同埋真係有淡淡既薑味


一兜入面擺左幾個菜式

唔記得左邊樣打邊樣
淨係記得全部都好清
都係食返食材本身既味道

茶壺入面係加賀特有既棒茶
係焙茶既一種
雖然係茶但係冇乜茶既澀味
都係飲香氣為主



開心既時間過得特別快
食完返房已經差唔多9點
10點正就要check out
男朋友話食完野有d眼瞓
要把握最後機會瞓下張靚床
我就爭取時間再浸下房個溫泉
食飽野就唔浸全身
淨係浸下對腳


住左一晚，有幾個位印象都幾深刻
首先房出面有個木欄柵

萬一唔記得閂門都有野擋一擋
掉返轉員工喺入面執野嗰陣
都唔會話閂埋門做咩都冇人知咁

第二係所有鞋都係鞋頭向外

除左玄關之外
洗手間同室外平台既拖鞋都一樣係咁
呢d細節位真係日本人先會留意

同埋估唔到旅館有得揼骨同做facial
價錢比香港貴少少
不過冇幫襯就唔知質素如何



不過間房個廁所同洗手盆既距離真係有d遠
要轉兩個彎先到 (10步左右)
至於房內私人風呂(即係個jacuzzi)
個人評價係好壞參半
好處係個風呂夠大
就算浸4個人都應該鬆動
而想享受澤菇池既按摩效果
方法就係加溫泉水
令到本身已經存在既液體(?)翻滾
但係d溫泉水好鬼熱
熱到唔溝凍水會淥熟咁款
每次開按摩功能既時候
身體都唔係太適應到嗰種突然熱左好多既感覺
大浴場既水溫相對之下舒服好多
不過應該係我地年紀未夠大先覺得熱
同埋天氣凍，個人又凍
要衝出去室外嗰下都需要幾大勇氣
不過鍾意點浸就點浸係爽既

冇乜比較之下
覺得呢間酒店都幾好
整體體驗係正既
淨係住一晚覺得唔係幾夠喉

bye bye啦靚房
我會掛住你架



住溫泉旅館同住一般商務酒店最唔同既地方係
商務酒店check in嗰陣就會收錢
而溫泉旅館係check out先計數
連埋琴晚食飯嗰兩杯酒
呢兩日一夜總共用左接近95000円


去嗰陣係yen最貴既時間 (兌緊6.1算)
換返港紙即係差唔多6000蚊
雖然有份bonus補貼
但係荷包都痛到入肉

我細細個睇你遊記大