[遊記]關西北陸15日避年之旅

啱啱開關果時真心咁平
海外遊客未開始多，日本政府又未推國內旅遊優惠

一月酒店價錢已經正常返
除番開四千¥晚
一個人都唔得啦
仲要京都站隔離...

唔覺意又買左兩大袋
要返酒店放低左堆戰利品先
之後再行10分鐘左右搵拉麵食

去到拉麵鋪其實已經8點幾
諗住應該過左最繁忙嗰d時間
點知一行到去都係見到勁多人排緊隊


排到咁上下會有人隊張menu出黎
等d有選擇因難症既人例如我諗定食咩


等左半個鐘終於入得去
我地叫左一個正常拉麵
一個特製拉麵同一份餃子
近d嗰個係正常版

以為特製拉麵有咩咁特別
原來只係個碗份量大左同埋多幾塊叉燒
湯底同麵底都同正常版一樣

湯底飲落有陣好香甜既肉味
伴隨住醬油既鹹香
加埋蔥花既香氣
令人食指大動
但係個麵印象就唔太深

叉燒係比較瘦嗰種
簡唔中有一兩舊肥少少
應該係因為舊肉瘦
咬落去覺得有少少偏乾


餃子都係正常冇驚喜但亦唔會伏


個人覺得個湯底係幾正
不過因為佢開到凌晨一點
而且有迷你版拉麵
如果有機會再食
應該會拎黎做宵夜

食完條龍好似仲長左


其實隔離仲有另一間拉麵百名店
不過今次就無緣試啦


本家 第一旭 本店
https://tabelog.com/kyoto/A2601/A260101/26000873/


食完野未夠十點
周圍已經好冷清
連地下街都已經閂得八八九九



冇野行就去行下donki
唔知係咪廢炎影響
只係開到半夜12點


間野唔太大
行左半個鐘左右就行完
淨係買左個兩腳插
同埋少量旅行會用到既野就收皮
藥劑師收左工，所有藥品類都冇得賣


隨影x2



去lawson買完雪糕就返酒店休息

薄荷朱古力雪糕係我既all time favourite
薄荷陣味好爽，仲超多朱古力碎
芒果雪糕都好香甜，同牛奶味好夾

另外仲有喺aeon買既生果

士多啤梨酸酸甜甜幾正
提子有花香味，不過有幾粒熟到準備爛



Day 2 完

Day 3

買左兩日終於叫做買完野
今日終於正式開始玩

hea左咁耐係要還既
今日要早起身追返d行程
8點半就出左門口

第一站去左伏見稻荷大社
都有唔少人一齊落車


建議大家搭JR去稻荷駅
一落車對面已經係神社入口



襯住時間尚早，人未算太多
決定行上山睇左鼎鼎大名既千本鳥居先



朝早天天陰冇太陽
仲有d日久失修(?)既鳥居甩油
跌落地「啪」一聲，仲有回音
感覺都幾陰涼

不過時間咁早既好處係
只要肯行上山腰既話
都唔難影到冇人既相



咁岩見到得一個月貨仔既鳥居
顏色明顯比附近既sharp醒


行左大半個鐘左右
開始有返陽光


行到一個位
覺得睇極都差唔多就落返山
話哂都黎到神社，就參拜埋同抽返枝籤




見個繪馬好靚就買左個黎寫
成千羊一個好貴


許左兩個看似簡單
但當刻又好重要既願望

旅途就有驚無險地完成左
至於身體健康呢...
一返香港冇耐就腸胃炎咁囉

寫完繪馬大約10點多d
遊客大軍即將來襲
係時候準備去下一站

臨走前襯晴天影多幾張相先



JR稻荷駅
車站個樣都有特登襯返神社


跟住行去伏見稻荷駅搭去祇園四条
由神社行過去大約要6-7分鐘



伏見稻荷駅一樣有神社元素



去到四條諗住食飯
點知去到商店街都唔係太多鋪頭開門
係咪我地太早到




經過花見小路
本身有諗過著住和服嗰陣去
但係直到最後都冇返黎


一陣會去既八坂神社


喺大街兜左個圈都冇乜野食
最後求其搵間野食碗麵
係好正常好普通既腐皮烏冬同蕎麥麵


喺香港食到嗰d都係咁上下
咁就食左2000 yen


ぎおん家
https://tabelog.com/kyoto/A2601/A260301/26006298/

連你男朋友都肯比你返屋企拎返枝針
果然天生一對
樓豬住好近機場？

岩岩開關真係平到痴線

一開始以為好近，但見到坐的士就笑左

依家book一晚都16000yen

佢話拎左感覺安心d
巴士2x分鐘可以到機場
應該唔算遠？

食完野突然凍左勁多，仲落大雨



前一晚睇天氣預測
話今日日間唔會點落雨/雪
先膽粗粗試下租和服著
家陣落狗屎算係點先
但係唔租都租左
落雨都唯有頂硬上

不過點都要去便利店買返把遮先
以前喺lawson買過把自動伸縮縮骨遮
覺得佢好駛好用
於是喺family mart又買返同一樣野

買完見時間都差唔多就直接上去和服鋪

由揀衫到換衫再set頭再化埋妝
用左接近個半鐘先行返出去
雨就一早停左，仲曾經出過太陽
不過踏出門口嗰陣又開始天陰陰


其實京都d街道好靚好有feel
對上嗰次由花見小路一路慢慢行上去
我地都覺得好舒服
本身今次都有諗過再行一次
不過著住和服行動不便就不了
直接搭幾個站巴士好過

落車之後要行上山
因為打算行完清水寺再慢慢行二年坂三年坂
於是一口氣衝左上清水寺先




去到清水寺門口要買飛


買完飛就入去周圍影下相





冇開放既地主神社
不過我地唔洗求姻緣咁就是旦啦


行到去最signature既觀景台嗰陣
個天突然多左一粒粒白色野


不過幾分鐘就冇左，之後仲出太陽
藍天白雲真係靚好多



不過冇幾耐個天又陰返


之後慢慢行落山
想話著住對人字拖咁款既木屐
真係好難落斜
每行一步腳趾隙都肋住痛
唔怪得三年坂間和服鋪咁貴都咁多人去

經過音羽之滝


落山落到一半又開始落雪
本身有雪落好撚開心係咁影相
點知落多幾分鐘變左暴風雪


衣衫單薄既我地feel到再咁吹法會凍病
於是勁狼狽咁衝落山
再求其搵間鋪頭取暖
望返出面大雪到


而我部電話呢個時候都應該凍親
短短十幾分鐘由50% > 15%
再過多陣直頭熄埋機
所以直到還和服之前都少圖

喺鋪頭食完野嗰下驚會繼續落大雪
條路跣到仆街行唔返落山
襯住細雪就急急腳衝返落去

上次去清水寺就因為大舞台維修
所以淨係行左二年坂三年坂
今次就倒轉，淨係睇左清水寺
唔多唔少都有d唔甘心
希望不久既將來可以一氣過行哂兩樣野

行到落山即刻衝左入7仔買熱飲取暖
一行返出去
頂佢個肺個天竟然開始出太陽



但係落左山就唔再行上山了
於是諗住近近地去八坂神社兜個圈
萬一天氣再有變化都可以選擇直接還和服

又搭返巴士返黎
天氣好到呢
唔係塊地濕左都唔知曾經落過雨同雪



入去八坂神社既第一件事係咬返條串燒
之後先再入去參拜求籤同影下相




影左20分鐘左右又開始落雪
見時候都唔早
為免夜長夢多
今次就真係去還和服了

留名武肺前最後一次旅行就係去京阪

好有回憶

不過係同ex去

屌你
去7仔問佢借都有啦萬字夾


利申：借過

落雪真係好麻煩，雖然雪景係幾靚

波鞋都怕冼，外套/頭都怕濕。
和服真係不敢想像

BTW 樓主介唔介意 post 張遮樣和服圖？

還完和服出返黎
仲大風雪過之前喺清水寺嗰陣
就算著返哂自己衫都唔太夠暖
如果依家仲喺山上面都唔知點算


返返去商店街
已經開始有d積雪
就算喺有上蓋既地方都一樣會吹到成身雪


鴨川都變左白濛濛一片


只係影左十幾秒
嗰把岩岩新買既遮已經吹反埋
跟住都唔敢再拎住電話影相了

之後行左入先斗町搵野食

喺tabelog搵左間鋪食豆腐料理
諗住碰下運氣睇下有冇得walk in
點知又俾我地搏到

叫左2個course share黎食
頭盤係蘋果配豆腐醬
個豆腐整到好似沙律醬咁，幾得意


豆腐兩食
一件普通豆腐，一件黑芝麻豆腐
兩件都有濃濃既豆香/芝麻香


右邊: 牛蒡&蕃薯
蕃薯甜甜地咁，食落幾舒服
牛蒡就幾清新
左邊: 四種唔同味道同質感既豆腐
印象最深係左邊舊cream cheese豆腐
滑得黎又出奇地唔膩


豆乳豆腐鍋
隔離有枝柚子醋
倒落煲豆乳之後，豆乳會凝結成豆腐
食到最後以為淨低既係上湯
點知試完發現係醋味既水


豆乳見佢用左marusan無調整豆乳，無糖嗰隻
如果大家有柚子醋可以喺屋企試整，幾好玩架

芝士豆腐
個質感有d似薯蓉
食落有d膩


味噌豆腐三食
分別係白味噌，赤味噌同黃味噌
除左味道，連質感都有唔同
個人覺得白味噌最得我歡心


蔬菜天婦羅
炸漿上得幾薄，菜同豆腐都炸得好嫩滑


有脆米同花生粒既豆腐
味道比較清淡


一份雞扒一份西京燒連白飯
兩個比較既話西京燒好味d


最後一人一份甜品
店員建議先食焦糖布丁，再食蕨餅
利用焦糖既苦味去突出蕨餅既甜


食完飯門口多左個雪人


同埋門口寫住已經滿席

食緊飯嗰陣聽到店員講因為落大雪
有一部分人臨時取消左booking
可能因為咁我地先執到死雞食今餐

京都豆八
https://tabelog.com/kyoto/A2601/A260201/26021180/

比著我身邊有人咁樣去到機場仲沖番屋企我都真係會屌獲金

豆乳見佢用左marusan無調整豆乳，無糖嗰隻

收咁貴居然唔係自家製豆漿

用marusan咁搞笑

食完去左四條附近行一陣
周圍都白雪雪



望落係就係幾靚
但係條路都幾跣下
好彩第一日去outlet買左對雪鞋
今日大派用場啦

雖然依家比食飯前細雪左ddddd
不過都依然幾大雪
於是又走返落地底
順便行下百貨公司地庫搵下有冇蛋糕買
但係搵過發覺唔係收左鋪
就係唔岩心水
最後去左最熟悉既harbs買左2件蛋糕
買完就搭車返酒店



返到京都駅諗住直接返酒店
途中經過JR個閘口
見到周圍勁多人企哂喺到
就走埋去八下發生咩事
點知見到個顯示牌有超多紅字


唔好意思影得比較柒

嗰堆紅字全部都係延誤
視乎唔同目的地
大約延誤20-120分鐘不等
等於成個京都周邊既JR都收收地皮
最右邊嗰堆地方直頭連車都唔撚開
就連新幹線都因為大雪而delay
好彩今日唔洗搭去第二度

後尾睇新聞仲話嗰晚有一堆人
喺冇水冇野食，車箱爆滿既情況下
被困火車超過8個鐘
聽到都覺得慘


之前甚少見到雪既我地
見到十年一遇既大雪
梗係要好好紀錄下
眼見無論遊客定日本人
都不停影相拍片
睇黎京都真係好少遇到咁既雪量

連京都駅入面都充滿雪







今晚又買左m記做宵夜
日本既麥樂雞真係好好味
尤其係黑椒雞
有個唔知黑椒定蒜香既醬又係勁惹味



睇睇下電視
見到連京都大阪來回都停駛埋

雖然今日的確唔係細雪
但應該未至於連市區要停駛咁誇張掛

臨瞓前望出去好似停左雪
唔知聽日交通會點呢


Day 3 完

京都旅行居然有雪 都唔知算好彩定唔好彩