[遊記]關西北陸15日避年之旅

麵屋大河，OK

雪景真係好靚

呢間一定要食

又有得飛
真開心

呢刻想有得瞓多過有得飛

你指女職員定麵？

屌呀?! 京都有雪都比你撞到?!

等到夠鐘就準備上去展望台
入口棟哂牌寫到明禁止進入
仲有左右門神負責收入場券


展望台喺點燈開始前會清場
似乎希望完全杜絕偷睇點燈既可能


成功憑券入場
展望台我黎啦


一開始都有d野睇下



之後就係無盡既斜路



直至上到展望台之前
望出去都係樹、樹同樹


咁既天氣同路況要行上山真心攞命
自問雖然平時冇行開山
但係都有做下運動
都一樣行到扯哂蝦
半路中途仲見到有個日本家庭
一邊拖住個目測得歲幾兩歲既小朋友
一邊推住架bb車上山
真心佩服佢地有咁既毅力帶住個細路行雪地

行左大約10分鐘
終於上到山頂既展望台
可惜黎遲左半步
所有靚位一早已經逼滿哂人



未上到去展望台之前
一直都諗住會睇到咁既風景


但係現實是咁的

到底我係黎睇景定睇樹

更高更靚既位一早被龍友佔據左
次一級既位已經有樹擋住
舉高部機都搞唔掂

而且今日太大雪
只可以霧裡看燈

本身以為一夠鐘就會全部屋仔自動著燈
但係現實係用人手逐間去開燈
大約20分鐘後先見到完全體

呢個時候個天都開始慢慢變暗
點燈既光漸漸變得明顯

望住堆樹實在頂唔緊
行左去另一個位影相

雖然仲有少少樹擋住
不過總算似似地平時網上圖片既畫面

慢慢又slip下位
終於搵岩角度


再放大同埋推光少少
就似樣好多了


再重申一次
現場望落去大約係咁的


比起經過處理既相片
現實環境係暗好多
合掌屋望落亦細粒好多
好似一個個盒仔咁，非常的骰
色水亦冇人地影出黎嗰d咁藍咁白
而且點燈靚唔靚有一部分係取決於天氣因素
好似我去呢日就大雪到on9
搞到遠方完全沒入煙霞之中
所以一日未去到都唔好抱太大期望
否則只會期望越大，失望越大

同埋若果大家他朝有機會上展望台睇點燈
強烈建議要帶返部數碼相機去
因為夜晚真係好暗
齋用電話係超難對焦
自己就係上到山頂
影左幾張相覺得唔對路
先後悔冇抬部靚機影靚相
所有相都影到鬆郁濛
較到勁暗先勉強見得下人

喺無遮無掩既山頂淋左接近成粒鐘雪
個人開始越黎越凍
加上覺得影極都係柒
而且現場一直都有廣播
叫人讓返個位出黎俾下一輪入場既人
咁就慢慢行返落山

沿路一直都有人行緊上去展望台


有光照住就睇到d雪落到好似落狗屎咁款


行左十分鐘左右就落返去入口位置



經過和田家背面


落到山大約18:00
即係大約有一個鐘頭多少少遊覽白川鄉



周圍咁鬼暗又落緊大雪
都廢事拎份地圖出黎睇
總之向住有光既地方行實冇死錯人



路上都係賣手信同食物既鋪頭



口痕買左條五平餅食

係日本中部地區既名物之一
其實即係壓扁左既醬油煎米餅
不過天寒地凍食返舊熱辣辣既野係幾c服

食完又繼續行


點解d雪可以堆到成舊米芝蓮咁款


兜下兜下去左明善寺

唔知點解淨係影左個牌
冇影到個寺真身


呢頭應該係白川鄉入面最光既部分
好多人都企哂喺到打卡
我地都唔例外
仲好好彩有個日本伯伯主動幫手影合照

白川鄉一樣有雪吊去防止積雪壓壞棵樹


某間點左燈既合掌屋


有幾分似三小屋既神田家 (同佢既隔籬左右)



由於時間比較緊張
實在冇辦法再抽多20分鐘來回自成一角既三小屋
唯有睇完呢個就當去左
成為左點燈小小既遺憾

偽三小屋對開仲整左幾個雪人俾人打卡


時間都差唔多
就慢慢行返去上車既地方


又經過和田屋


唔知遠方既綠光
係咪就係頭先上過既展望台呢


行到返巴士站
個個唔係入左去候車室
就係已經上左車



上車前入左去候車室望下


入面有少量coin locker
1000円locker應該夠放一個28吋行李


拎埋手信就上車返歸
分別係咖哩同羊羹

嗰兩盒野擺到依家都仲未食
盒羊羹仲唔知去左邊
可能係知道好甜唔岩食，特登收埋左

本來未去到之前係有一絲期待
晚間既童話國度係咪真係咁夢幻
但係親身睇過之後
又冇想像中咁吸引
完全冇置身世外桃源既感覺
而且夜晚點燈範圍之外既地方
基本上係冇照明
變相好多細節都睇唔到
覺得日頭既白川鄉反而更加引人入勝

不過可以肯定既係
自從點燈日限制左入村人數之後
行得舒服左好多
冇以前咁烏煙瘴氣
所到之處除左展望台之外
感覺都尚算鬆動
似未開關之前既尖沙咀咁
人多得黎又唔會覺得逼

所謂人一世物一世
如果有幸抽到/搶到點燈日既qouta
都可以去一去感受下
不過值唔值得就見人見智
自己就覺得吹大左少少咁囉

坐左一個鐘巴士
又返到去高山


攞返行李之後即刻行去酒店check in


飛騨花里の湯 高山桜庵
https://www.hotespa.net/hotels/takayama/

除左由門口行入去counter嗰段路之外
全間酒店都鋪哂榻榻米



有榻榻米既地方就唔著得鞋
所以地下有一大排鞋櫃


一個鞋櫃有三格
長靴以外既鞋應該都放得落


所有鞋櫃都用日文五十音命名
唔識五十音既話
搵鞋嗰陣可能會辛苦少少.....
利申 記唔哂，所以將個波交左俾男朋友
然後佢就指住個櫃，讀哂咁多個字逼我記住

放好對鞋就上房
一入到去有條昏暗既走廊


洗手盆、水煲同雪櫃都喺呢個區域


下面仲有兩個竹籃
方便拎個人用品去浸溫泉


有一張大床同梳化
不過張床褥直接放左落榻榻米到，有d矮


有電視同衣櫃

電視下面個櫃放左兩件浴衣
鍾意既話可以著去大浴場

馬桶同淋浴間

因為樓上有溫泉
正常人應該都會有大用大
所以房入面冇浴缸

睇完間房之後
即刻衝左落地下餐廳食免費宵夜
冇錯，晚餐都未食就宵夜

酒店每晚9點半到10點半都有夜鳴拉麵
拉麵無限量供應，鍾意食幾多都得
喺一個缺少深夜食堂既地方
足不出戶就有免費野食呢點真係勁吸引

一人叫左一碗醬油拉麵

可能因為太肚餓
食咩都覺得好味

話說間餐廳就叫染井

個腦第一下唔知點解load左做深井
心諗都黎到咁遠
竟然仲可以見到熟悉既名字
後來先發覺原來自己睇錯

大堂仲有好難飲既免費咖啡斟


仲有個area賣土產


食完拉麵之後去左便利店買野食
夜晚既高山站又幾靚


不過真係好冷清
喺條街行左十幾分鐘，人影都唔多個



是靚晚 - 便利店便當同小食ssss

1. 明太子長通粉
芝士仲多過明太子
可惜份量有d少，食完唔夠喉

2. 漢堡扒便當
大件夾抵食之選
不過就冇乜過人之處

3. 豬耳
切得偏薄，但係咬落出乎意料地爽口
同埋應該有醃過，食落鹹鹹地
拎黎送酒一流

4. 辣魷魚
陣味同食泡菜差唔多
體驗到咩係換湯不換藥

食完飯休息左一陣
就上左頂樓浸溫泉

有兩個大浴場同三個唔洗預約既貸切風呂
側邊有幾張櫈仔比人坐住排隊



貸切風呂每次限時30分鐘
雖然冇人企喺到計時
不過人多既時候就醒水啦

如果見到個寫住「空」字既牌就可以直入
有人用緊既話，個牌會寫住「使用中」
同埋頭頂會著燈


有次行過見到有人用緊
但係盞燈冇著到
懷疑條友冇鎖門


上到去嗰陣臨近收工時間
三個風呂都唔洗排隊，可以直入
咁就梗係揀個聽講最正既黎浸
即係中間嗰間白雪

每個風呂入面有梳洗空間


打開趟門就係露天風呂

所謂既露天風呂其實都係有蓋
無論出面落雪落成點都唔關你事

呢間風呂既特色係個用石砌出黎既浴池
感覺raw d自然d
影張相出黎都靚d
不過可能今日吹左成日風，吹乾哂d皮膚
坐落去有小小唔自在
成日覺得好易會被舊石𠝹傷

由溫泉望出去既風景

不愧係全個高山市最高既展望風呂
個view勁開揚
一邊浸住溫泉，一邊居高臨下睇風景
簡直心曠神怡


頂樓有張大枱
浸完溫泉之後可以坐低飲下野吹下水


有免費雪條同益力多
不過益力多一早就俾人飲哂


同一層仲有洗衣機同乾衣機

不過其中一部乾衣機壞左

頭先去便利店買野食嗰陣唔記得買牛奶
唯有喺汽水機撳罐乳酪飲品代替

本身諗住同男朋友一人一罐
點知撳完第一次就售罄
然後佢就揀左罐能量飲品

最低嗰行左三，橙色嗰罐

飲左一啖發覺勁甜勁難飲，即刻嬲左
大家千奇千奇千奇唔好中伏

Day 8 完

好撚靚

lm

弱能....

間酒店好正

Day 9

本身酒店plan冇包到早餐
但係心血來潮想試下鄉土料理
於是每人俾左1800yen食個和洋式自助早餐

早餐時間係6:30-9:30
於是瞓到差唔多9點先落去食野
又去返琴晚食宵夜間餐廳


有沙律同cold cut


漬物煎蛋同玉子燒


煎魚、炒菜同飛驒地區獨有既朴葉味噌牛肉


早餐都有少量甜品


仲有自稱French toast既麵包


行完一圈決定乜都拎黎食下


大部分野食都正正常常
係有幾樣野比較深刻
1. 煎三文魚齋食有d鹹
2. 朴葉味噌牛肉比較濃味
要送飯食先好食
3. 牛肉咖喱勁香口，兼帶一絲牛肉既甜味
比起味噌更加適合撈飯食
不過應該好多人唔鍾意朝早食咖哩
4. 乳酪係無糖乳酪
想要甜味可以加蜜糖或者生果
5. 冇影相既麵包仔十分香脆
6. 飛驒牛奶冇想像中好飲，奶香唔夠

日式同洋式食物比例大約係60/40
食物款式都幾大路
仲有飛驒地區獨有既菜式
相信適合絕大多數人既口味
如果本身有包早餐既話都食得過
但係未好食到值得每人額外俾成舊水既地步

食完野返上酒店房
望出去又係白濛濛一片

諗左一陣決定留返喺房hea下
直到lunch time先再踏出門口搵野食

中午依然好大雪

只係行左短短幾分鐘
帽呀頭髮呀頸巾呀大褸呀全部都變哂白色
總之任何外露既部分(除左塊面)
都有層薄薄既積雪

黎得高山就梗係要食飛驒牛
所以午餐去左食燒肉


午餐有便當，亦有燒肉set

不過唔岩食既話都可以單嗌

叫左個切り落とし燒物御膳
即係切剩左既頭頭尾尾
除左有幾塊飛驒牛之外
仲有飯有菜有漬物同麵豉湯


幫飛驒牛牛黎個close up

講到明係餸頭餸尾
質素當然唔係最頂級
不過油花分佈望落都幾平均
其實已經好夠做
係有一兩舊比較肥

d肉燒完好靚仔好肥美


最肥嗰塊燒完依然爆哂油

牛油係幾香既
但係成舊都係肥膏真係吃不消
咬左一啖之後決定棄權

雖然話係切剩左既肉
但係唔影響味道
食落亦好嫰口，唔會韌
一樣充滿牛味同油香
不過舊牛肥定瘦就好睇運
一個唔好彩就會有舊肥到唔想吞既肉
個人覺得如果budget唔多
但係又想試飛驒牛既話
lunch set會係一個唔錯既選擇
但係有充足銀彈既話
都係乖乖地叫返靚肉啦

丸明 飛騨高山店
https://tabelog.com/gifu/A2104/A210401/21000041/

食完野之後行下隔離既精肉店
所有肉既油花都好靚


仲發現到逢星期二都有特價

原本都唔覺得貴
做埋特價之後直頭抵到非買不可
最衰唔可以帶生肉返屋企
唔係一定會掃一堆走

再行下附近既物產店

不過冇乜野岩買
反而係買左個飛驒牛漢堡包返酒店

行完又返酒店浸下溫泉
冇記錯浸左距離門口最遠既東錦

展望風呂既景色同前一晚睇既一樣
不過個缸就用木同磚砌成
終於唔洗怕𠝹親

唞到5點鬆d又落左樓
對腳不自覺地停左喺酒店隔離既燒肉鋪到

早年老母食過呢間，話d牛牛好撚好食
為左追隨佢既步伐
結果晚餐又食燒肉

入去見到已經有一堆人黎左留名


燒肉店入面有個corner賣手信
可以一路等位，一路睇下有咩岩買


等左45分鐘左右就有位
每張枱都有屏風隔一隔


不過3個鐘前先食完燒肉
實在食唔落太多野
叫左個飛驒牛盛合，少少牛內臟同小食就算



不停燒啊燒


牛肉超多油花，個火燒到勁旺


燒到舊牛焦焦地脆卜卜
但係食落口都仲係軟淋淋


食完應該8點左右
門口棟左個牌寫住唔再收walk-in客

真係有心想黎食晚餐既話
建議6點前黎到留名
識日文既話可以考慮打電話book定枱

論好食就一定係夜晚呢餐既肉靚d好食d
不過可能係兩餐燒肉相隔既時間太短
加埋飛驒牛本身油脂都比較豐富
食到後期覺得有d肥膩
好彩有叫d辣野去中和下
同埋個人極度推介佢地既桃汁
飲落超滑又夠甜，勁好飲

味蔵天国
https://tabelog.com/gifu/A2104/A210401/21021146/

個細路將座雪山仔當瀡滑梯咁玩
好似好正咁


食完野喺附近散下步消化下



行行下經過巴士車場
竟然見到架冇閂門既巴士
好似完全唔怕吹到成車雪咁


返到酒店又浸溫泉
今次去左大浴場

有位可以瞓住浸都幾舒服
不過室內溫泉就反哂光冇景望
都係浸貸切風呂最開心

浸完溫泉諗住返房食埋個burger
但係行返入房嗰陣隻腳突然好痛
發現係有條類似木刺既野插左入腳板底
仲要用鉗都夾唔返出黎
結果隻腳成晚都隱隱作痛

整都要繼續食宵夜

因為攤到凍哂
所以臨食之前拎左去叮一叮
可惜叮完之後舊牛熟左少少
同埋咬落都幾多油定汁爆出黎
食到有少少「呢hea」
不過係幾好味

Day 9 完

Day 10

經過漫長既等待
終於恨到大晴天
呢兩星期既旅途入面
能夠喺陽光下觀光既日子
一隻手都數得完
而呢日可以話係當中最好天既一日

無論係酒店外既馬路


定係JR高山駅


有藍天白雲襯托下
求其影都好鬼靚


由酒店慢慢行去宮川朝市




行左十分鐘左終於到



宮川朝市係日本三大朝市之一
諗住會擺好多攤位好多野睇
但係去到既時候感覺有d冷清
攤位少之餘，連鋪頭都唔係間間開門



有開檔既主要都係賣下農作物同飾物為主


既然個朝市冇乜野睇
於是行左落河邊影相同玩雪



玩左十幾分鐘
應該係因為白雪反光既原故
而我又冇戴太陽眼鏡
對眼開始不停流眼水
但係男朋友戴住調光眼鏡就乜事都冇
直覺話我知再keep住望雪既話應該會傷眼
於是就行返上去
搵間鋪頭避開陽光，回一回魂

由河邊行返上去之後
見到有人鏟緊地下d冰
鏟起之後直接一下掉落河
好彩走得快好世界


行完冇乜野睇既朝市之後
就去左附近既三筋町




除左朝市有d冷清之外
連舊町都好靜
見到好多鋪頭都冇開門

最多人幫襯嗰間飛驒牛壽司唔開

好幾間麵鋪又寫住係定休日

連茶室都唔做生意

極度懷疑星期二係高山市商戶集體休息既日子

好彩都仲有手信鋪同酒館開門做生意


由於高山天氣夠凍
同埋有清澈既山水
高山造既清酒聽聞都幾出色
每年冬季仲可以試好多好多新造既清酒
可惜我同男朋友都仲未識欣賞
而且唔係幾想日光日白就飲酒
所以一間酒館都冇入過
諗返起有少少後悔

除左酒館
仲有呢間miffy專門店(?)打開門做生意

之前喺京都河原町同嵐山都有入去兜過
行到第3間先驚覺呢條line全日本得8間

咁岩附近仲有隻溶緊既miffy


鮮紅色既筏橋
聽聞係高山市其中一個打卡熱點




無聊求其影

正

影完橋行埋上二之町


雖然最出名嗰間壽司冇開門
但係都仲有得食佢既姊妹店


其實三件壽司都好食
不過真係要排既話
個人喜好係左>右>中
左邊嗰舊最原汁原味
最食到飛驒牛本身既肉味同香氣
右邊就多隻蛋黃，食落去滑身d
中間嗰件就多左醬油調味，冇咁純粹

喺日本邊行邊食係好冇禮貌既行為
所以隔離有位俾人坐低食野


除左飛驒牛壽司
仲食左飛驒牛包


覺得係個正正常常既肉包
牛肉好味，不過個包有唐記feel

高山市博物館
主要介紹高山城下町既歷史同文化


不過對我黎講只係一個借廁所既地方

好欣賞三筋町一帶既鋪頭
特登將個招牌做到好低調
去配合返周圍既景觀同氣氛



行得七七八八
就求其搵個地方坐底食碗麵
但係坐低睇左張menu就知中中地伏
間鋪除左拉麵之外
仲賣埋飛驒牛手卷同肉串
一睇就知係專做遊客生意
同場除左我地之外
就得返一個來自東南亞既大家庭

好彩碗拉麵望落都正常

麵質似係彈牙版既幼麵
有少少攣攣曲曲
個湯底比較淡口
淡淡既醬油湯中又帶陣甜味
陣甜味應該係煲左好耐既肉味
但係陣味太突出，個人唔太鍾意
塊叉燒似乎係慢煮，但係有d鞋
總結就係一碗普通到不得了既醬油拉麵
分分鐘係香港都會出現既味道
相信以同樣既價錢 (800yen)
喺高山可以有更好既選擇


飛騨あっぽ
https://tabelog.com/gifu/A2104/A210401/21015045/

食完野行左去高山陣屋

陣屋一開始係高山城主既屋企
直到江戶時代被改建成官廳
(類似依家既政府辦公室)
即使中間經歷改朝換代
都一直保持住類近既用途
直到1969年搬遷為止
係古時同類用途既建築物當中
唯一有被保存落黎
依家主要都係展示返同陣屋相關既歷史資料

原來陣屋前面都會擺下朝市
好成功地錯過左


陣屋入面唔俾影相
連影下個門口都俾人指住


唔記得左係因為冇得影相
定係覺得d職員好嚴厲嚇怕左
總之最後冇入到去陣屋入面參觀
但係諗返轉頭其實應該點都要入去睇下
認識一下陣屋既歷史
依家唯有睇下陣屋既大致佈局


之後就慢慢行返去酒店拎行李



行到返酒店附近
發覺已經趕唔到一個鐘一班既JR
唯有目送佢離開


最後襯住好天影下酒店既外貌




喺高山住左兩晚
終於有種遠離繁囂既感覺
未去之前曾經有擔心過
會唔會住唔慣呢d相對鄉下既地方
會唔會好容易覺得悶
但係咁樣浸下溫泉食下飯就一日既模式
原來都幾舒服幾relax
附近又可以觀光，又有好野食
比起之前住加賀溫泉更加開心
不過奉勸大家一定要避免星期二去高山
真係個個都唔開工
冇野好睇兼冇啖好食

下一班車要等成個鐘
於是喺酒店大堂hea左陣
先行返去JR站準備搭車


去綠色窗口買飛嗰陣
見到時刻表上面寫哂邊班車用邊款車
當時睇過隔離鐵道post
知道有款車即將退役
等有心人可以睇住黎搭呢下真係勁細心

唔覺意送左佢殯


話說呢班係每日唯一由高山去大阪既班次
對於要去大阪既我地本來係天衣無縫
不過因為某樣野
最後都係選擇兜落名古屋


一諗到要離開雪地不禁有少少難過
雖然行雪地成日都好驚會仆街
有大風雪既時候會非常狼狽
遇着好天出大太陽會怕曬傷眼
又怕溶雪既時候俾簷篷頂既積雪/冰扑中
但係白濛濛既雪景真係好靚好吸引
總係覺得淒美又冷酷得黎
間中又帶些小浪漫
不過連續睇左8日雪景
都開始有少少審美疲勞
似乎係時候要回歸冇雪既國度

再見啦高山
再見啦令人又愛又恨既雪




搭到出名古屋已經天黑


相比富山出發嗰程
今轉坐得有少少辛苦
除左車程相對長之外
仲因為行李架嚴重不足
只可以將個行李放喺座位前面
或者放上頭頂既置物架
要抬個20kg既大喼上頭頂真係有d吃力
而且部引擎好撚嘈
雖然仲瞓得著
但係有時會聽唔到隔離位講野

同埋呢一級真係好陰濕
落車嗰陣一時唔為意，唔小心仆左一仆


再幫佢影多張遺照



最初plan行程既時候
由於唔想一次過搭太耐車
曾經打算喺名古屋住一晚做個緩衝
但係名古屋既景點實在太唔吸引
所以最後寧願辛苦少少，直接殺落大阪
不過做功課嗰陣
男朋友被鰻魚飯三食深深吸引住左
直到最後一刻都好堅持要食
就算要轉車都在所不惜
咁就唯有成全佢啦
雖然梅田都有鰻魚飯三食
但係發源地既野永遠都係好味d，應該係

食野之前先搵coin locker擺低笨重既行李
到底係邊個天才搵個咁既地方放locker


不過願意搬上搬落既我地同樣on9


名古屋有好幾間出名既鰻魚飯三食餐廳
當中備長同まるや喺名古屋駅周邊都有分店
一來まるや比較近JR嗰邊
二來佢喺tabelog既分數高少少
所以就決定去食佢

去到まるや大約6點半
已經排隊排到轉角位


大約排左30分鐘左右先有得坐低
餐廳係用平板電腦落單
有得揀少飯呢下幾好
岩我呢d想瘋狂食鰻魚但係眼闊肚窄既人


各自叫左個上ひつまぶし (吸物付)
有一條鰻魚、鰻魚肉臟煲既湯同埋漬物

一打開個蓋
就聞到醬油同鰻魚既香味

話明係鰻魚飯三食
故名思義有三種食法

第一種係乜都唔加就咁食

一食落口就不得了
鰻魚表面燒到帶少少焦脆
咁岩條鰻魚又夠肥美
鰻魚既油香同柔軟既魚肉
加埋吸哂醬油既飯
當下覺得自己好幸福

第二種係撈埋蔥、紫蘇葉同wasabi

撈完之後口感變化不大
不過多左陣清爽既味道
正好中和下魚油帶黎既油膩感

第三種係加湯整成茶漬飯


即使叫左少飯
食到中後段都開始有些少飽濟感
個湯稍稍沖淡左醬油既味道
入口冇咁重味之餘
亦帶出鰻魚既鮮甜
胃口即刻返哂黎
不過同時亦將本身燒到脆卜卜既鰻魚浸淋左
口感相對之下冇頭兩種冇咁好

三種食法入面
個人最鍾意第二種
既食到鰻魚本身既質感同味道
又可以解除鰻魚帶黎既油膩感
所以最後都有留少少鰻魚飯
再encore一次呢種食法

男朋友食左正常飯量既鰻魚飯
食到最後佢話唔夠鰻魚肉送飯食
而叫左少飯既我就覺得份量岩岩好
再多就會食濟

食哂個飯之後
店員會送上一小杯熱既綠茶埋尾
消除一下鰻魚飯帶黎既飽濟感


食完之後見到仲有唔少人排緊隊
果然係人氣店之一


まるや本店 JR名古屋駅店
https://tabelog.com/aichi/A2301/A230101/23058358/

食完野見到隔離有間水靜鵝飛既松本清
入面雖然唔算多野揀
不過大路野都齊哂
而且又有得退稅
於是順手執下親戚sss既藥單
佢地要既全部都係超熱門既藥
好彩當時有買定
去到大阪行左六七間藥妝店都冇貨

買完野之後行左出站附近睇下街景


再望下名古屋駅入面既地標 - 金時計


之後就拎返行李搭新幹線



一個鐘頭都唔洗就去到新大阪
仲快過平時返工



新幹線站入面竟然擺部真車賣廣告
真係大開眼界


搭完新幹線
再轉御堂筋線去心齋橋



由心齋橋站行兩三分鐘
終於去到酒店

ヴィアイン心斎橋
https://www.viainn.com/shinsaibashi/


每次上酒店
都要先搭𨋢上三樓既酒店大堂
再轉另一部𨋢上房

酒店大堂嗰層擺左一堆衛生用品


今次住既係deluxe double
一入房就見到張四呎半雙人床


床隔離有張枱同梳化


有部正正常常既電視同空氣清新機


走廊位有衣架掛下衫褲同外套


廁所都係正常野
有洗pat pat馬桶同浴缸
不過竟然唔記得影相

話說每次洗手嗰陣
都留意到浴缸去水口有水浪下浪下
好似想湧上黎咁
之前住過既酒店都未見過咁既情況
懷疑係去水口既氣壓有d問題

酒店11樓有間洗衣房
入面有兩部洗衣連乾衣機同製冰機


以連稅大約5500 yen一晚既酒店黎講
都冇乜野可以挑剔
尤其佢既地理位置真係冇得輸
除左近地鐵站之外
仲鄰近美國村一帶，靜中帶旺
落樓行幾分鐘仲有成條心齋橋商店街可以行
而且樓下已經有間7仔
過兩個街口亦有另外兩間便利店

不過酒店始終已經起左超過十年
間房望落都偏舊
同埋check out時間比較早
10:00am就趕人走
係今次旅行住過咁多間商務酒店入面
最早退房既一間

雖然呢間酒店夠哂平
但係因為廁所去水既問題
同埋check out時間對我黎講早左少少
下次再去大阪未必會再揀呢間住



settle down之後又係宵夜時間
由於個鰻魚飯真係好好食
食到半路忍唔住叫多個飯帶返酒店


雖然係外賣
不過一樣有得自製鰻魚飯三食
飯盒本身就跟左包蔥、wasabi
仲有紫菜同山椒粉
加多150yen仲有埋茶漬飯既高湯


除左鰻魚飯三食
名古屋既手羽先 (即係雞翼) 聽聞都唔錯
於是喺名鐵站附近既世界の山ちゃん
買左盒幻の手羽先黎試試



食落口即刻屌左聲
其實即係落左孜然粉既雞翼
仲要燒(定炸)到乾爭爭
可能係日本冇乜地方有食雞翼既習慣
先顯得佢特別
最後只係食左一隻試下味
其餘交哂俾男朋友解決

Day 10 完

架 K car 真係抵買

Day 11

出發前一個月喺kkday買左飛去環球影城
仲買埋fp4玩mario
不過遊左咁多日
又搭左幾程長途車
個人都開始攰
本身都想做下農夫
早d入USJ玩盡佢
但係實在冇咁既精力
最後就住fast pass生效時間入場算數
無謂攞苦黎辛

今日天氣似乎唔錯


未入場之前先喺酒店附近咬返個老麥早餐
早餐全餐同香港既一樣
不過望落就靚仔好多

屋企人之前成日幫襯大西北某間m記
炒蛋似係擺左好耐，有少少燻黑左
食落口又乾柴柴
咁既質素真心狗也不屌

係朝思暮想既豬柳強mc griddles啊

個pancake包真係好撚好食
每次食完都會後悔成日唔識起身
錯失左朝早食好西既機會

食完野搭地鐵去梅田
轉大阪環狀線到西九条


再轉ゆめ咲線去環球影城


就算到左中午
依然都係一車車人衝入去USJ



去到門口都仲要排隊
大約等左5分鐘過安檢



入口位置好有LA同hollywood既vibe



入場嗰陣其實已經夠鐘玩庫巴
所以即刻狗衝去Nintendo World
途中會經過侏羅紀公園

一邊聽住輕快既pop music
一邊聽住人地尖叫
個人自自然就勁hyper

去到mario門口都仲要排隊睇整理卷
於是又等左幾分鐘


終於黎到打卡位

不過勁多人排隊影相
而且趕住去玩就冇理到

mario 我要進來了


一望到嗰下真係勁心心眼
個backdrop靚到癲


不過真正進入mario世界嗰陣
張fp其實已經過左鐘
但係又唔想就咁放棄
於是照衝去庫巴門口搏下


明明嘟fp既時候見到大大個交叉
但係可能嗰日人唔算多掛
又可能唔係遲左好多去到掛
職員好好人照放左我地入去
不過就算有fp都唔係即刻有得玩
入到去都係要排隊

好彩沿路都有好多影相位
可以邊排邊影冇咁悶






大約排左15分鐘就拎到mario頂帽


拎完帽冇耐有個位俾人睇遊戲既instruction


聽完遊戲玩法之後諗住有得玩
點知打開門之後仲要繼續排


由行入koopa's challenge門口起計
過左30分鐘以上先見到架車

比起冇fast pass既人要排90分鐘以上
等30分鐘似乎唔算太差
不過就同想像中有差別

玩既過程入面
唔知係咪頂帽既映像有問題
睇到既畫面係散開哂
好似有幾百度散光咁
全程都要咪住對眼黎睇野
唔係好知射唔射得中target
加埋架車會360度扭黎扭去
玩完之後有少少頭痛

玩完就睇下公仔

好多帽同頭飾同公仔同零食同擺設
不過屋企完全冇位放，乜都冇買到