[遊記]關西北陸15日避年之旅

一行出1up factory門口
就見到星星爆谷桶

不過條龍長到癲
目測要排一個鐘以上
雖然心郁郁想買
但係排咁耐隊都係不了

玩緊庫巴先醒起可以買power up band
抱住成世流流長
總有機會再去USJ既心態
一人買左一條黎戴


買完手帶本身諗住行下成個園區
玩下mini game同儲下金幣

不過個天陰到不得了
仲落左幾滴雨粉
於是打算食lunch避雨

出發前睇過隔籬USJ po
想食Kinopio's Café既話
要去門口攞整理卷
不過我地去到嗰陣就冇整理卷呢回事
淨係可以排隊入去


就係咁我地又跌入排隊地獄


排左接近9個字
終於可以買野食


叫完野食之後有個號碼牌
跟住就可以坐低等食


入面裝修到成間快餐店咁

雖然個樣係快餐店
但係服務就超級好
沖野飲個妹妹無啦啦聊我地吹水
又有專人搵埋位俾我地坐
仲有靚女黎上菜同幫手影相

難得黎到又排左咁耐隊
梗係乜野狗屎垃圾都叫黎打卡

又湯又飯又漢堡包又pizza又甜品
再加兩杯野飲
份量多到俾家母問係咪發左達
又睇死我地會食唔哂做大哂鬼

紅色kinopio係磨菇湯
飲落同金寶罐頭湯冇乜分別


照燒汁雞扒飯

飯係炒飯底，就咁食幾香米味
個汁偏向小朋友口味，甜味比較重
自己就接受得到
但係未必個個都岩食

個burger望落都靚仔
而且都幾足料


漢堡扒咬落去雖然未去到爆汁咁正
但係都唔會死實實乾爭爭
調味亦正正常常
食完個包仲可以帶埋mario頂帽返去做手信

個包既真身係pizza


入面有磨菇、煙肉、蕃茄、芝士等等
芝士份量都幾多，食得多有d膩

甜品係tiramisu


個mousse整得幾滑
不過味道比較甜
size亦唔細，有大半個拳頭咁大
兩個人share一份甜品已經夠哂皮

柚子檸檬水同檸檬梳打

呢兩杯野都勁igable
尤其係左邊嗰杯
不過柚子水係熱飲黎
依家天時暑熱似乎就未必岩飲

食完呢餐大家都飽到上心口
如果以主題cafe既standard黎計
食物質素可以話係中上水平
造型有特色之餘亦擺得入口
餐廳氣氛亦好歡樂
港女表示食得好開心
唯獨係野食比較貴
一份主食要收成舊水
連埋飲品同甜品
今餐埋單食左9000円
不過呢個價錢俾得心甘命抵

9000 yen 真係頗貴

叫野食嗰陣完全喪失理智
完全冇考慮過價錢

醫飽肚就繼續玩
跟住輪到yoshi's adventure

其實同迪迪尼既小小世界差唔多
都係坐喺到睇下風景
如果閣下係貪圖刺激既話
可以慳返呢50分鐘去玩其他野
不過一場黎到，我地就咩都玩下

今次冇fp，要排足50分鐘

排隊area冇另一個遊戲咁多野睇
除左可以拍下power band之外就冇乜搞作
於是一路排一路恰眼瞓

當時入園仲需要戴口罩
不過呢隻game(?)基本上唔會同陌生人接觸
有足夠既社交距離
所以成為極少數遊玩期間可以除罩既設施




坐左五分鐘，遊左個花園就完左
玩完又行下紀念品店


玩完出黎已經開始天黑
成個園區都著哂燈
咁又再周圍影下相



頭先就係坐喺上面比人影


仲諗住冇人排隊咁著數
行埋去望先發現爆谷桶已經賣哂


行到5點左右就離開Nintendo World
把握最後兩個鐘玩下其他遊戲



點解個湖可以靚到咁



點解條路可以咁好feel



由於時間關係
spider man同minion只可以二揀一
結果minion贏左
點知早排宣佈蜘蛛俠做埋今年就收皮
睇黎應該都冇機會玩




用fass pass要排10分鐘
但係唔用都只需要等20分鐘
雖然都有快少少，但係感覺蝕左


玩完覺得似迪士尼入面既iron man
稱唔上刺激但係幾過癮

玩完minion個天完全黑哂


見時間差唔多就玩埋哈利波特禁忌之旅
雖然有fp喺手
但係臨收工前唔洗排隊可以直入
用黎都冇乜意思

玩後感係感覺自己終於玩到個似樣既遊戲
但係唔鍾意玩機動遊戲既男朋友
就話有少少頂唔順
仲鬧我做乜水鳩佢玩埋d咁既野

玩完禁忌之旅
本身想自己排埋據聞廢廢地既過山車
但係就快收工截左龍冇得玩
咁就影下夜景啦

夜晚既harry porter區帶左幾分神秘
都幾match成套電影既氛圍




跟住就返去入口附近睇下公仔




玩左7個鐘
遊戲收哂工，又冇乜興趣買野
係時候離開樂園




色彩繽紛既夜燈
唔知點解會聯想起以前既霓虹燈


等男朋友去廁所嗰陣
入左去商場兜左個圈
入面有都d餐廳同小食
不過就好多好多人，而且都偏貴


跟住就搭車返去難波



男朋友本身極少去主題公園/遊樂場玩
除左岩岩拍拖嗰陣去過海馬公園之外
就冇再踏足過類近既地方
佢仲未去過香港迪士尼
連當年有親戚話要去東京迪士尼
佢都話冇興趣兼人流太多而拒絕同行

詳情可以睇下呢篇既day 2
[遊記]帶住親戚遊東京
https://lih.kg/1094931

所以聽到佢話全個trip入面最鍾意USJ嗰陣
我係有少少意外
話入面既機動遊戲唔太激岩佢玩
而且好懷念入面歡樂既氣氛
唔怪得成日都話每個男人都係大細路
而自己就未玩夠入面既遊戲
本身好想好想襯仲後生挑戰下翼龍
但係去到最後先發現
得幾個鐘係唔夠時間玩咁多野
有少少後悔咁遲先入園
唯有希望兩三年內再plan到去關西
到時再入去玩啦

星期二既高山真係咩都冇開？

星期一都多正常營業？

星期二大約得六七成有打開門
星期一就絕大部分都正常營業

諗緊stay唔stay多晚高山

本身：
Mon: 名古屋＞白川鄉＞高山
Tues: 高山＞下呂
Wed: 下呂＞名古屋

定係
Sun: 名古屋＞白川鄉＞高山
Mon: 高山
Tues: 高山＞下呂
Wed: 下呂＞名古屋

但是唯一一日係名古屋都冇埋

返到難波之後去左道頓堀一帶搵野食



話說七年前去道頓堀正值晚餐時間
當年因為花多眼亂唔知食咩好
於是喺條街到發左一陣脾氣
搞到男朋友不知所措
最後用左個幾鐘先解決到問題
所以今次出發之前都有提自己唔好重蹈覆轍

七年後又喺相同時段重臨道頓堀
但係正所謂本性難移
由於去完USJ之後個人好鬼攰
結果死港女又因為諗唔到食咩而發老脾
有過上一次既經驗
今次佢就識做
九秒九買左d街頭小食黎氹我


又攰又餓既時候
就算幾平凡既野食
都會覺得好食到天上有地下無

食左小小野之後
個人有返少少精神
就跟住男朋友行去食野

間鋪距離道頓堀大約5分鐘路程
但係越行得近食飯既地方
條街就越黎越暗，亦越黎越少人
附近既人都向我地投射奇異既目光
直至行到間野既前一個路口
見到有間無料案內所
先發覺原來行左入紅燈區
不過大家實在又攰又餓
而且時候都唔早
唔想再行黎行去
於是都係頂硬上

間鋪既門面唔太起眼
行入橫巷之後
再行入某棟大廈先到


一打開拉麵鋪隻趟門
已經見到有一男一女坐埋bar枱既一角
一路食煙一路同店員高談闊論
男既似係牛郎，女既似媽媽生
從對話內容推測，兩條友應該都係管理階層
我地就好似grad din毒撚一樣
同個場面完全格格不入

但係對腳已經入左間鋪入面
就等於行左一條不歸路
坐低之後快快手叫左個鯛魚湯拉麵
希望快d食完然後快d離開

雖然間鋪既氣氛對我黎講係非常奇怪
不過碗麵望落就正常既

碗拉麵臨上枱之前
睇住師傅拎住個打泡機喺碗湯到攪下攪下
所以面頭有好多泡泡
湯底用魚肉煲到奶白色
飲落口鯛魚味極濃之餘亦完全冇腥味
而且飲落都幾滑
不過就唔知關唔關個打泡機事

事隔咁耐對麵身已經冇乜印象
叉燒係雞肉叉燒，應該經過慢煮
入口唔柴，都幾好食
不過隻蛋睇樣都知道係極之普通
整體黎講就係一個偏清淡既拉麵
依家諗返轉頭
似乎係一份幾適合操勞過後
去補充體力既食物(?)

當初男朋友係用google map搵到呢間拉麵店
事後睇返tabelog
先知間野都算幾高分
老實講個湯底的確係幾好味
不過唔係幾建議走入紅燈區搵食

真鯛らーめん まるき
https://tabelog.com/osaka/A2701/A270201/27097242/

見過鬼就怕黑
食完野九秒九衝返去心齋橋商店街
見返d人氣，個心先安定落黎


然後就慢慢行返酒店
結束疲累既一日

Day 11 完

名古屋本身係唔存在嘢玩

都係 諗住都留返日行下 水族館 名古屋城 熱田神宮

名古屋只係個行街買野同食野既地方
不過高山市半日都行得完
好睇下你鍾唔鍾意喺鄉下地方hea

想hea+溫泉

名古屋市再睇下拎唔拎到多一兩日假玩埋

Day 12

琴晚冇食宵夜
結果朝早9點幾就餓醒左
於是去松屋啪返個生蛋撈飯


食完個早餐仲有張conpon送
可惜之後冇機會再食


食完野之後就去心齋橋行一陣



順手拎返早幾日online買既眼鏡

最近發覺度數唔岩想換鏡片
有冇人知香港owndays既鏡片同日本一唔一樣

行完返酒店執好兩日一夜既衫
再搭車去梅田食lunch


呢日心思思想食壽司
但係嗰陣岩岩爆左壽司郎抖音條片出黎
不過諗緊返到香港之後
好難食到出色既壽司
最後都係戰戰兢兢走左入一間迴轉壽司店
入到去發現人影都唔多個

三文魚子、吞拿魚蓉、蟹膏軍艦

正常質素，冇乜驚喜

火炙吞拿魚、三文魚、左口魚壽司

燒完之後幾件都好重油香

沙甸魚壽司同吞拿魚壽司盛合

沙甸魚幾腥，吞拿魚就好食既

炸薯條、明太子壽司同牡丹蝦壽司

薯條標榜係用北海道產薯仔
食落去好香薯仔味
明太子壽司純粹係未食過先叫黎試伏
味道比想像中淡口，不過又幾岩我胃口
牡丹蝦壽司都係冇乜驚喜

廢炎之前喺東京食過北海道既連鎖迴轉壽司店
當時覺得味道唔錯
諗住北海道壽司鋪會有保證d
但係食落又似乎唔係嗰回事
質素雖然比壽司郎好
但係同金澤既もりもり寿し完全冇得比
而且價錢亦偏貴
應該唔會有下次



函太郎 大阪店
https://tabelog.com/osaka/A2701/A270101/27072610/

食完野行去阪急三番街巴士站
搭尾班巴士去有馬溫泉


去有馬溫泉既高速巴士站喺ジャンカラ附近
千其唔好去錯yodobashi對面既空港線車站


行到去巴士站
先記得自己七年前有黎過行街

依稀記得當年既阪急三番街
裝修有幾分似20年前既公屋商場
周圍都啡啡黃黃灰灰暗暗
雖然唔係太鍾意個環境
但係覺得幾懷舊同獨特
事隔多年已經變成倒模既靚場

高速巴士站入面有候車室


去到即場磅水買飛

如果怕冇位可以事前預約
不過我地去嗰陣架車只係半滿

巴士15:20準備開出


梅田係一個好大既迷宮
車站同商廈林立，兼且四通八達
就算睇住Google map
都未必知道自己身在何方
如果本身唔係咁熟路既話
建議預早30分鐘去探路

開車之後會一路向北
幾分鐘後會經過淀川


越向北行，住宅就越多


望左幾分鐘街景之後就瞓著左
咁岩後面個位冇人坐
可以全程挨後張櫈黎瞓
瞓到差d唔識落車


大約一個鐘後就去到有馬溫泉


落車之後即刻行去酒店

有馬温泉　兵衛向陽閣
https://www.hyoe.co.jp/


今晚住既呢一間
都算係有馬眾多溫泉旅館入面
最近車站既一間
不過近極都要行一段仔斜路先去得到
我地呢日選擇輕裝上陣
行下斜路都冇乜所謂
但係拖住行李既話
都係搵定迎送服務會比較好

除左酒店既迎送服務之外
車站亦有部機可以call的士



上到酒店大堂
見到有好多水晶燈

第一下覺得十分有氣派
但係望多幾眼就覺得好有年代感
好似返左去九十年代

側邊有賣土產既鋪頭
主要賣神戶同兵庫縣特產


check in完就上房
今次只係book左最basic既房
一入門口有個大玄關


行入去就係起居空間


枱上有少少點心迎賓


起居室一角有提供浴衣同毛巾


窗邊有個陽台
得閒無事坐喺到飲下野吹下水
簡直係人生一大樂事


陽台後面收埋左個衣櫃同雪櫃


浴室同洗手盆
望落都有d歲月痕跡了


間房望山景，景觀都幾開揚
如果紅葉季黎就住
漫天紅葉實靚到飛起


房入面有部tablet睇下天氣同觀光資訊

不過撳黎撳去都冇反應
懷疑已經俾人玩壞左

好文推一推

樓主真係識嘆，係咁住靚酒店

比我更識嘆既大有人在
而且去得兩日一夜咁少，唔覺得係嘆緊

晚飯前去左大浴場浸溫泉



有個mon寫哂每個風呂多唔多人用


旅館其實都有三個貸切風呂
不過要事前預約兼額外俾錢
而且得一個可以浸哂金泉銀泉
相反三個大浴場都有齊兩種溫泉
反正之前都享受過私人風呂
今次就冇特登book了

浴場出面有得斟野飲
有果汁有茶有炭酸水
不過只係供應到夜晚11點


仲有位可以坐低休息


浸完就去餐廳食晚飯
本身會去一間叫「木蘭」既餐廳食飯
不過嗰段時間餐廳進行緊內部維修
所以改左去個室食飯

是日餐單


前菜都係小食為主，開下胃咁
同埋右邊有杯酸酸甜甜既提子汁醒胃


之後到刺身
有中拖羅、帶子、鯛魚同油甘魚

當中小二特別推薦非常新鮮既帶子
入口亦的確十分清甜
好耐都冇食過如此鮮甜既帶子
中拖表現都唔錯
咬兩下就爆哂魚油既香氣出黎
其餘兩款就正常

牛油味噌湯

入面放左豆腐、金菇、大頭菜同馬鮫魚
一入口首先係味噌淡淡既鹹味同菜既甘甜
吞左啖湯落肚之後
牛油既香味會慢慢喺口中散發
襯熱飲既話好飲到不得了
不過攤凍左之後就覺得牛油好膩
而且會越飲越甜

黑毛和牛壽喜燒

比起壽喜燒
個人覺得比較似用甜醬油做湯底既邊爐
味道亦只係普通
無論係牛肉定係底下既蔬菜
食材本身既味道都被濃濃既醬汁掩蓋
作為成個晚餐既主菜有少少失色

主菜之後有幾味清淡既小菜清清味蕾

右邊嗰碗全部都係軟綿綿既野
有芋頭、炸穴子、腐皮同菜
男朋友唔食得芋頭
所以佢將自己嗰份都俾埋我食

左邊係煙燻河豚
咬落非常爽脆
加埋少少醋食落去勁開胃
係全晚最鍾意既一道菜

食完小食之後就黎個炊飯埋尾

個飯落左瑤柱同菇落去一齊蒸
雖然好簡單但係鮮味十足
好食到停唔到口

除左飯，仲有漬物、熱茶同赤麵豉湯


最最最後就上甜品
一開始都提到本身個plan係去餐廳食飯
餐廳入面有個corner可以俾人任拎飲品同甜品
搬左去個室食之後
就冇左呢個環節

不過日本人又點會令你失望而回呢
冇左自助甜品區
取而代之既係包羅萬有既甜品盤
再加每人一份生果

盤上面有各種唔同味道同款式既蛋糕
仲有布甸同啫喱
叫兩個已經食到七八成飽既人情何以堪

我諗安排甜品盤既人都預左客人唔會食得哂
但係就硬係想挑戰下清盤
結果食下食下又真係清得哂咁多甜品

不過所有蛋糕都麻麻地
唔係太甜就係太濕
覺得浪費左個甜品胃
反而布甸蛋香幾濃
同埋啫喱應該係用果汁整
味道濃到好似食緊真既生果咁，勁好食
而生果就不出所料地清爽香甜

食完飯返上房
見到本身既起居室已經鋪好床鋪


休息一陣決定出去散步消化下
由升降機大堂望樓景又幾靚


落到大堂成個死城咁
有一瞬間覺得自己玩緊生化危機


夜晚條街得小貓三幾隻

見到有人得一兩度仲著住件浴衣行出街
著住羽絨既我表示深感佩服

便利店就好似漆黑中既螢火蟲咁
呼喚我地入去幫襯消夜


返到去再去浸多次溫泉暖下身
行去溫泉條走廊幾有庭園feel


浸完第二次先發現旅館入面養左好多錦鯉
不過夜晚似乎要休息，冇乜動靜


最後飲返罐asahi結束呢一日
粉紅色櫻花罐好靚



Day 12 完

Day 13

瞓到朝早6點左右
唔小心被去廁所既男朋友整醒左
點知一醒發覺對腳痕到仆街
兩隻腳加埋有十幾粒又紅又腫既風癩
極度懷疑係床鋪唔乾淨俾野咬
d風癩最後隔左兩個星期先散

半夢半醒之下都堅持瞓到9點左右
一行出房門
見到門口掛起左份報紙

呢個舉動再一次提醒左我
呢到係一間好傳統既日式旅館
雖然個人覺得咁既做法好old school

跟手落去食和洋式既自助早餐
因為周圍好多人望住就冇乜影相


拎左一堆豆腐同菜補充下纖維
另外上次去加賀覺得條一夜干好好食
於是又夾返黎食
不過呢條好乾身而且超多骨

睇返相發覺男朋友似乎好鍾意食西式早餐
幾次早餐都會拎煙肉腸仔薯餅嗰類快餐野食


食完早餐就check out行下溫泉街
有馬溫泉街入口喺巴士站後面




溫泉街位於半山
為左行得舒服d
決定一口氣行上盡頭
再慢慢行返落去



行左十幾分鐘就到去炭酸泉源公園
故名思義就係銀泉既源頭



公園有個水喉可以試飲溫泉水
不過因為廢炎暫停供應


應該淨係得銀泉浸既銀之湯

最大既好處應該係近泉源
包保泉水夠熱
不過真係有人願意行上黎幫襯咩

之後沿路慢慢行返落去



行到一半見到有Gelato
有股神秘力量吸左我埋去試味


叫左牛奶、蜜柑同芝士甘酒味

牛奶味用左六甲山牛乳製造
入口香滑而且幾濃奶味，不過偏甜
蜜柑味就酸酸甜甜，加埋奶香幾醒胃
唔怪得成為人氣no. 2

芝士甘酒呢個組合聽落好奇怪
不過甘酒係一種味道好溫和好甜
而且酒精含量極低既酒
酒精濃度同一罐jolly shandy相若
加埋mascarpone芝士
嗰種鹹甜交替既味道令人一試難忘
不愧係得獎之作

食完又繼續行
不過一路上都係風格相似既古樸建築
好似冇乜野好睇




山腳有個足湯可以浸腳
不過又係因為廢炎要隔住坐

足湯後面就係金之湯
如果嫌足湯唔夠喉
可以稍移玉步浸埋全身

行返落車站附近既物產店
買左枝聲稱用炭酸泉泉水製成既炭酸水

飲落去超夠氣得黎又有陣清爽既甜味
有少少似多氣版既波子汽水
見到周圍d鬼仔同泡仔都一人一枝當啤酒吹
如果去開幾推薦大家買返枝黎試下

聲稱賞味期限得5秒既炭酸煎餅

去到既時候
負責整煎餅既師傅應該放左飯
冇得品嚐新鮮既煎餅
唯有開盲盒咁買少少返香港做手信試味
試完一輪既結論係
唔好貪得意買埋d奇怪味
薑味梅味嗰d全部難食到飛起
不過最原始嗰隻味道唔錯，食得過


有馬溫泉作為一個有悠長歷史既溫泉區
而且一個地方有兩種唔同既溫泉係相當少見
令佢成為左日本三大名泉之一
再加上交通相對方便
自然吸引唔少國內外旅客慕名而來
導致溫泉旅館既價格長期踞高不下

今次入住既兵衛向陽閣
都稱得上係數一數二地古老既旅館
從旅館既大堂、餐廳、溫泉同房間
都感受到濃濃既年代感
亦充滿傳統日式味道
不過服務感覺上冇加賀嗰間咁周到
食物方面亦有少少失色
而且半夜仲要俾野咬
要俾成60000円住一晚
條氣實在唔係太順
不過無可否認個金泉係有料到
喺消除疲勞方面比加賀既單純泉強勁得多

另外有馬溫泉街比想像中少野睇
成條街既景色都差唔多
而物產店亦唔算好多
更多既係價格偏高既食肆
(交通方便極都係山區
物價偏貴都係意料之內)
如果早知道係咁既話
就會plan day trip過黎浸下溫泉就算
唔會考慮過夜
寧願慳返舊錢食下好西
或者留返下次旅行用好過

個人認為如果唔係對泉質有特別追求既話
可以考慮去下其他地區玩一泊兩食
用相同既價錢或者會有更多既享受
例如早幾日住既加賀溫泉
用同等既價錢已經食到全蟹宴

行完有馬溫泉街之後打算去姬路
根據乘換案內
無論點搭都係要返去神戶市區再轉鐵
可以選擇既
就只有搭巴士或者鐵路出去
於是揀左搭快少少既神戶電鐵

車站遠望毫不起眼
就算近距離觀察
都望左兩秒先留意到係一個車站


一點左右由有馬溫泉駅出發



中途要轉兩次車
首先搭一個站到有馬口落車


再搭五個站到谷上轉第二次
轉車時間好短，比大家感受下有幾趕



沿路都係望下樹同民居


雖然兩次轉車時間都只得一分鐘
不過兩次都只需要過對面線就上到車
對於兩手空空既人黎講都尚算方便
不過拎住一抽二掕既人就可能要爭分奪秒啦
神戶電鐵平均15分鐘一班
miss左都死唔去既，係浪費時間啫

大約半個鐘左右就去到新神戶


之後轉新幹線落姬路


如果想慳錢亦可以搭多個站
去到三ノ宮駅轉JR新快速
車費係新幹線既三分一
但係比新幹線只係慢20分鐘左右
不過樓豬同男朋友都唔再係十八廿二
需要用錢買返d時間
搵間餐廳舒舒服服坐低食個晏

短短20分鐘車程就坐自由席算

咁就搭左舊幾水
駛錢真係易到呢

山陽段周圍全部唔係工廠同隧道
就係未開發咁款


兩點左右成功達陣

年尾去關西都諗緊去唔去有馬
定係住天橋立好

去得天橋立不如去城崎食蟹

一出車站已經見到遠方既姬路城
恨不得快d行過去好好參觀

不過行左半朝山
個早餐已經落左格
所以呢刻要醫左個肚先

車站對面既商店街聽聞好似好多野食

入地下商店街行左一陣
見到有間蕃茄御好燒幾得意咁
就走左入去食

餐廳有張bar枱
見到廚師有時會喺到整鐵板燒野食


叫左一份蕃茄豚肉御好燒
同埋一份正常豚肉御好燒
兩者最大分別就係個汁

唔知係咪蕃茄唔夠靚
嗰幾舊茄好鬼酸
連帶御好燒個汁都有陣蕃茄既酸味
成為左成道菜既一大敗筆
如果個調味上整返甜少少應該會好好多
不過正常嗰個就真係好正常既

反而另外追加嗰幾隻蒸蠔就好撚好食

隻蠔標榜由瀬戶內海沿岸出產
而且係即日由海鮮市場買入
蒸完都大大隻脹卜卜，冇乜縮水
入口好滑又啖啖肉，仲勁鮮勁甜
淡淡既海水鹹味
配合埋少少檸檬汁同辣汁
簡直係天作之合
如果唔係時間有限
真心想叫多幾隻



京ちゃばな 姫路店
https://tabelog.com/hyogo/A2805/A280501/28037324/