[遊記]關西北陸15日避年之旅

食完野繼續回本之旅
等等下車見到出面有部機賣刺身
應該屎忽痕到極點先會幫襯


搭左10分鐘巴士去橋場町


附近既東茶屋街、西茶屋街同主計町
因為周圍有一堆古老既建築
所以又被稱為小京都
日本好似有幾十個小京都
而呢到同京都既共通之處
就係好耐好耐以前都係男人娛樂既地方
現時同京都既祇園
一齊被指定為藝妓區域
如果好彩既話會見到藝妓行過

一落車就見到一堆古色古香既建築


望住咁既環境，又飄住幾粒雪花
好似幾浪漫

行幾分鐘就去到東茶屋街
沿路有哂指示牌，唔怕盪失路



金澤作為金箔既主要生產地
當然會有以金箔做招徠既鋪頭
而行入東茶屋街範圍嗰下
第一眼就俾金箔雪糕吸引左視線


山長水遠黎到梗係要打下卡

不過金箔本身係冇味既
而個牛奶雪糕亦都十分普通
所以一切都係gimmick

箔一 東山店
https://tabelog.com/ishikawa/A1701/A170101/17008262/

食完雪糕就沿路行下
d舊建築真係好靚





竟然有細路喺到玩雪


行左十幾分鐘轉左個大運
又返左去原點
見時間尚早，個人又有少少凍
於是行左入間cafe食個靚tea
好好彩坐到窗邊位，影出黎效果唔錯





叫左個紅豆湯同抹茶affogato

紅豆湯比平時食開既紅豆沙稀
入面有d小丸子同完整既紅豆粒
飲落紅豆味幾香但係都幾甜下
好彩個set跟左杯茶，可以中和返d甜味


平時食affogato都係配咖啡
估唔到跟抹茶都一樣夾
抹茶係好濃稠嗰種
就咁飲唔係幾頂得順
加落牛奶雪糕之後，甘苦味變得柔和
食落就好似飲緊超濃既抹茶牛奶飲品
少少甜少少奶香多多茶既甘香
加埋朱古力碎食又變左抹茶朱古力味
一個甜品多重味道
一個字，正！

波結
https://tabelog.com/ishikawa/A1701/A170101/17010252/

一坐就坐到人地閂門
同時個天都開始黑



以為入夜就會冇乜遊客
點知又幾多人影夜景


走嗰陣見到有間整戒指既鋪頭
最平兩舊水有交易
好似幾抵玩咁


夜晚既茶屋街一樣靚


成條茶屋街都幾好feel
幾推薦大家去行下食下hea返兩三個鐘
再唔係租件和服去影下相都唔錯
雖然冇京都咁多打卡位
但係相對之下冇咁多人
同埋平地居多，行起上黎冇咁辛苦

行完茶屋街大約六點
係時候去睇兼六園冬季點燈
點燈每年都係一月尾到二月中舉行

除左冬天之外
櫻花季同紅葉季都一樣有點燈活動

今次好好彩就得岩時間
咁就冇理由錯過
於是又跳上巴士坐兩個站

一落車首先見到對面既金澤城公園


行前少少有條斜路行上去兼六園



點左燈既金澤城公園又幾靚




雖然金澤城都係近年重建既天守
但係重建嗰陣專登用返舊時既技術起出黎
係不折不扣既木建築黎
可惜今次時間唔夠，只可以遠觀




覺得佢好似呢個 -->


遊完花園
終於要夜遊兼六園


晚間點燈只會開放部分園區
不時都見到有雪糕筒欄路


周圍都有著左燈既樹



為左喺落雪嗰陣唔好被雪壓斷樹枝
冬天會拉開繩索去防止積雪
於是就形成呢d好似把遮咁既雪吊


行左幾分鐘就見到遠處有一堆金黃色物體



要過橋先埋到堆金樹到
夜晚周圍都黑蚊蚊，條橋又窄
加埋有積雪
總係覺得會有人差錯腳失平衡跌落水


應該係成個點燈活動既重點



金黃色既雪吊望落幾靚仔
不過當時好撚大雪
睇返相有d位唔知影緊咩


雪啊雪，可摸耳細返少少?



用燈照到綠綠藍藍既河
多左幾分神秘既感覺



又要過橋
不過呢條闊好多，兩側又有矮欄杆
唔洗怕跌落水



睇完準備行返出去


一離開左點燈範圍即刻人影都唔多隻



除左有燈嗰d位之外
周圍都係黑蚊蚊
路都睇唔到咁濟
唔怪得晚間入場唔洗磅水
另外就係去嗰陣真係好大雪
即時對兼六園既好感度大大降低

d積雪厚到


真係好撚大雪


行左一兩分鐘見到路邊有架的士
實在大雪到唔想再行
電話又就快冇電
雖然知搭的士唔平
但係都決定豪一次
飛的返酒店再算

返到酒店執返好個人之後
諗住再出去食晚飯
呢個時候男朋友忽發奇想
想試下用外賣app叫外賣
不過整黎整去都過唔到電話認證嗰關
搞左成個鐘都唔work先肯收手

結果都係要行出去食飯
於是搭巴士去返JR站
路過鼓門又影下


雖然已經8點幾
都預左餐廳選擇唔多
但係諗住咁大個站點都有野食下
點知間間唔係已經閂左門就係準備閂門
最後喺僅有既選擇之下揀左shabu shabu
反正又未食過，試下佢咩料都好


行左入去都未坐低
已經聽到熟悉既廣東話......
講開又講，喺金澤嗰幾日
基本上聽唔到日文同廣東話以外既語言

坐低之後店員會問食放題定揀course
一來朝早喺近江町買左宵夜
二來時間比較夜
食唔盡放題個時間
所以每人叫返個set就算

每人有三碟肉同一大兜菜
再另外叫左碟雞，廢事齋食牛咁寡



天寒地凍打邊爐真係冇得輸


除左肉同菜之外仲有主食揀
揀左一個烏冬一個飯


碗飯既份量直頭多到可以一開二


食完飽到痴左線


兩條友兩個set加一碟雞加兩杯野飲
加埋一埋單都只係5000yen左右
咁既價錢都預左唔會有靚野食
但係一定唔會餓親
同埋有好多出面好難搵既纖維

しゃぶしゃぶ温野菜 金沢駅ビル店
https://tabelog.com/ishikawa/A1701/ A170101/17000742/


食完飯就睇下點搭車返去
點知發現尾班巴士仲有3分鐘就開
但係食野嗰到同巴士站有d距離
食飽野又唔想跑
於是都係放棄

行返出去巴士站
果然已經收哂皮


反正都要飛的
決定襯JR仲未收皮
買埋聽日去高山既車飛


除左大風、大雪、信號問題同冧竹
仲會有幾多種延誤/取消既理由


還掂都要飛的
再去鼓門打下卡先


影完相諗住走嗰陣
見到前面張櫈有d奇怪
望真d發現櫈上面有張信用卡
當時因為周圍都閂哂門，人又少
決定當咩都睇唔到
由佢靜靜地躺平

平時由金澤站搭巴士要6-8分鐘先到酒店
有的士加持下
兩分鐘就返到去了
速度之快令我諗起以前既亡命小巴



去旅行就係食飽左都要繼續食
今晚有鰤魚+吞拿魚刺身
醬油漬三文魚子同鹽辛甜蝦
士多啤梨最後變左第二朝早餐


刺身係正常貨色
不過隨盒得wasabi冇豉油
另外嗰兩盒都係搵野醃過黎
一開始咬落去係有陣鹹鮮味之餘
仲有少少海鮮既甜味
但係食到咁上下覺得鹹到癲
同埋d三文魚子唔知係咪醃完黎
食落硬係覺得有層黏黏地既野咁
最後各自食左三分二左右就棄權

Day 7 完

嗰兩碗醃製海鮮如果配啤酒有冇得諗？

落雪真係幾靚但係現場會好狼狽
利申淨係係日本見過落雪粉

嗰兩碗醃製海鮮如果配啤酒有冇得諗？

已經開左罐asahi，都係搞唔掂

覺得落雨更加狼狽，肯定由頭濕到落腳
雪花掃幾下就冇哂
係行雪地辛苦d

追下先

你金澤間酒店好似好正wor
我本身book 咗駅西口嗰邊嘅酒店
有啲想轉你嗰間

留名

酒店本身係幾正
不過附近少野食
同埋出入JR都要駁腳
如果趕時間起上黎會搭巴士搭到憫

諗緊住你嗰間定住返西口定住香林坊好

朝早一起身勁好天
點解又係要準備走嗰陣先好天



為左唔浪費難得既好天氣
就算要skip左個靚早餐
就算得返個幾鐘就要出發去高山
就算明知走馬看花都行唔完
都想遊覽日頭既兼六園
睇下可唔可以一洗前一晚既頹勢
睇下係咪真係配得起三名園既稱號

計過數會搭三程巴士
於是又買左張一日劵


又去返同樣既起點


行返同樣既斜路


又望返金澤城公園個入口


仲去返同一個入口


不過今次要買飛入場


頭頂有太大個太陽照住
周圍又積哂雪
覺得好似入左仙境咁


行左兩三分鐘，就見返琴日個池
依家先留意到個池原來結哂冰


徽軫石燈籠


估唔到呢粒野係兼六園必睇景點之一

雖然位置一樣
但係有陽光照耀真係靚n倍



積雪就好似味精咁
無論配d咩都會覺得正左勁多
就算樹枝都即刻變得有睇頭



唐崎松


呢幾棵松樹作為兼六園入面其中一個重點
前面長期都勁多人

由兼六園望出去都幾壯觀


應該係琴晚嗰條帶點神秘色彩既河
日光日白靚仔好多



花見橋

原來琴日條橋係有名既，欽敬欽敬

霞ヶ池





作為兼六園入面最大既造景
基本上係零死角
無論行到邊都有野睇
不過時間關係只係兜左四分一個池

快速行左二十分鐘之後見到有個出口

不過好似仲有少少少少時間
決定再兜下先......

嚴寒中開左兩三棵花既梅林


近睇發覺岩岩開始開花

如果過多個幾兩星期
再開多d花既話應該幾靚

行完梅林發覺已經夠鐘離開
於是急急腳行去另一邊出口
由於行得太急唔知影緊咩





今次真係要走了


再見啦兼六園


真弓坂口既斜對面係二十一世紀美術館

最出名應該係嗰個行得入去既泳池
本身黎得金澤都想參觀下
不過時間關係就無緣入去
唯有當俾個藉口自己搵機會再去過

純粹覺得影得幾好睇所以擺上黎


今次由最多人去既桂坂口入
經過霞ヶ池，兜過梅林
再由真弓坂口離開
叫做行左半個兼六園
但係兼六園本身係一個佔地廣闊既迴廊式庭園
冇特定既遊覽路線，點行都得
如果想仔細觀賞整個庭園
冇返兩三個鐘都行唔完
而且即使係同一個景
由唔同角度望過去都會有唔同既面貌
只有短短大半個鐘係絕對唔可能睇得哂
不過已經足夠洗走前一晚大雪帶黎既壞印象
雖然好趕好chur但係總算係值得

睇你本身行程係點
如果只係行金澤市內
住邊都冇乜所謂
但係如果會玩埋富山嗰d就不如住返JR站
方便出入

快閃完兼六園之後要搭巴士返酒店
拎返行李之後再跳上另一架巴士返JR站
準備開始大長征
但係拎完行李之後
眼見要搭嗰班新幹線得返20分鐘左右就開車
趕唔到既話分分鐘會打亂埋之後既行程
個人就開始心急
只不過越心急就越容易做錯決定
見到架去金澤西口既巴士就衝左上車
上左車之後先發覺架車要兜大圈
等佢兜得黎就會趕唔到新幹線
結果搭左一個站之後
又要搵過第二架直接去金澤駅既巴士

不停走上走落之後
總算趕得切到金澤駅
即刻狗衝上新幹線



不過今朝要趕住執喼
去到兼六園又係趕鴨仔咁行
走嗰陣再不停趕巴士趕新幹線
全個朝早都係不斷追schedule
chur到盡一盡
上車擺行李嗰陣個喼仲要卡住左
結果男朋友終於忍唔住發脾氣
好彩過左啖氣就冇事

新幹線每個位都有個兩腳插頭

平時執野實會放哂d插座入喼
但係朝早趕時間
於是就咁連埋叉電線一齊塞左入背囊
估唔到呢個時候竟然大派用場
可以急救下部得返一半電既電話

沿路都算係幾好天


搭到去富山就落車



又得返一堆烏雲迎接我地



擰轉面反而有藍天
睇黎今個旅行同藍天白雲既緣分唔多


襯住有40分鐘左右既轉車空檔
買定便當一陣上車食
順便參觀下富山駅個電鐵站



有人話個電鐵站有幾分似大西北既輕鐵站
富山電鐵




輕鐵站


自己就覺得輕鐵站感覺寬闊得多
不過輕鐵站都起左幾十年，整體比較舊
同埋冇乜修飾過，好raw好粗獷
而且幾個有蓋總站都係連接住巴士總站
一到夏天就會儲住一堆廢氣，又熱又焗

而富山電鐵感覺就年輕得多
而且有明顯對流，感覺通爽d
(應該同月台長短有關)
同埋地方夠大可以自成一角
月台又唔多，一眼可以睇哂
唔怕盪失路
從規劃同外觀上，富山電鐵的確係比較出色
但係情感上會鍾意輕鐵多dddddd

睇完富山駅之後繼續搭車


黎緊要搭二號月台既特急飛驒號


二號月台喺一號月台後面
要預多少少時間行過去



去到嗰陣其實得返兩三分鐘就開車
但係仲掛起左個清潔牌，未上得車


再等左幾分鐘先上到車


早幾日搭雷鳥號因為坐自由席
只可以坐到走廊位
頭先搭新幹線又心情麻麻
呢一程終於可以全心全意望住車窗外既風景
終於覺得真係去緊長途旅行



開左車係時候開餐
又買左個乜都有既便當

隔左咁耐已經唔記得咩味
淨係記得個盒會漏汁

仲有思鄉病發作而買既燒賣同煎堆


估唔到煎堆入面有紅豆饀

當時以為係遷就日本人口味
所以製作左有紅豆饀既煎堆
點知屋企人話傳統煎堆真係有紅豆
只係製作成本高同過程繁複
漸漸變成依家常見既淨煎堆

仲有兩粒拳頭咁大既大福做甜品

一粒係栗子，一粒係蜜柑
由於太大粒，食到成張枱都係粉

沿路既景色十分冰冷，但係又好優美




成個山頭都係雪，當下睇覺得好震撼
深深感受到咩係神聖不可侵犯




可能係因為從來未見過雪山景
個人覺得由富山去猪谷嗰段真係好撚靚
係靚到有少少窒息嗰種
絕對係暫時人生睇過既景色當中既top 3

見到飛驒古川駅
就代表住差唔多要落車


搭左兩個幾鐘車
終於黎到高山駅

一落車見到有一堆人企左喺月台中段
好似係要睇列車合併
不過我地有d趕時間
冇等到呢個環節就走左

富山電車嘅歷史遠耐過香港嘅輕鐵 不過可能因為係2015年起新幹線順便翻新埋所以感覺特別新
https://zh.m.wikipedia.org/zh-hk/富山港線

請問你加賀間天祥係經咩訂?

用jalan訂
訂溫泉酒店一律建議用日本酒店網站
即係jalan，樂天嗰d

我今日都經JALAN 訂咗, thanks!!

擺好行李之後
就行去高山濃飛巴士中心


攞返一早已經買左既車飛

買飛嗰陣只會知道坐邊架車
冇得指定座位
要等巴士公司分配
我地有兩個人，就編左一齊坐

排隊嗰個位有張國家list
統計下d遊客由邊到黎

估唔到竟然係台狗同泡菜跑出
馬拉同泰國緊隨其後
自稱日本係鄉下既香港人
佔既比例反而唔算高
最意想不到係連北韓都有貼紙

現場見到仲有即日既點燈車飛賣
不過就唔包上展望台

如果點燈日咁岩喺高山既話
可以去碰下運氣
不過睇完點燈之後應該冇車去名古屋/富山
無可避免要喺高山留宿一宵

攞完飛就直接上車

日本既巴士係唔會等人
一到左預定開車時間就頭也不回
穩陣起見要提早10-15分鐘到車站

開車之後會有領隊姨姨(?)企喺車頭不停講野
同時會派埋遊客須知、白川鄉地圖


同埋最最最重要既展望台入場券

展望台券唔見左不設補發
不設補發
不設補發
好重要所以要講三次

點燈由17:30至19:30期間進行
當然越早上去就越好
咁就可以睇哂日與夜既白川鄉
不過為左避免人群過分集中
展望台分左三輪入場時間
分別係17:00、17:50同18:40

不過唔知佢地係點分配唔同既入場時間
自己就坐頭幾行
派下派下就拎到最早嗰輪
如果分到最尾嗰輪
扣埋來回山頂既路程
應該得返20分鐘可以睇點燈
都唔知上唔上去好

由高山去白川鄉要經過一條超長既隧道


一出隧道嗰下
仆街啦乜都睇唔清既


完全分唔到係落緊大雪定係大霧
抑或係玻璃有倒汗水

落車既時候終於發覺
係落雪落到有層霧咁款



落車之後沿住車路慢慢行入去



行兩三分鐘就會見到和田家
係白川鄉入面最大既合掌屋

見到不時都有鴨仔團入去參觀
就廢事入去同人逼

由落車到上展望台中間
只有大約40分鐘左右空檔
就廢事行得太遠
求其喺附近搵左個角落玩下雪
用左十幾分鐘整左兩個雪人bb

夜晚返轉頭嗰陣諗住睇下個雪人
但係搵極都唔見
睇黎已經俾雪淹沒左

再喺展望台附近兜個圈影下相

同你同一日夜遊兼六園
不過仲夜過你
成8點先去
大雪到on9
夜晚又無乜巴士
行左半個鐘先返到金澤站隔離間酒店
好彩無凍親兩老

BTW 麵屋大河係好正
啲女職員都好正