本人非移民顧問/專業人士，以下都係個人經驗，唔擔保資訊嘅正確性，如果有錯歡迎糾正。
什麼是EE？
EE全名為express entry，為加拿大移民局（IRCC）於2015年引入的移民計分系統，定時選取高分的申請人，被選中可直接獲得PR invitation。
主要分為FSW (技術類移民)、CEC (經驗類移民)、FST (技工類移民) 及PNP (省提名計劃)。簡單嚟講，FSW係俾冇加拿大本地工作經驗嘅人申請，而CEC嘅對象就係有本地工作經驗嘅人。大部分人都會行呢兩個pathway。PNP比較複雜，遲啲再講。
所以理論上你冇去過加拿大讀書/做嘢，都可以以FSW遙距攞到PR，當然要求會好高。
EE的計分方法
上網有好多calculator，可以自己計下。講幾個關鍵位。先講非加拿大經驗相關。
年齡
20-29歲攞滿年齡分100分，30歲起逐年扣5-10分，扣到45歲得返0分。
學歷
學歷越高自然分數越高。要留意返嘅係專科學歷，例如Medic，即使係Bachelor畢業，都係計Master分數。
海外工作經驗（即係香港）
夠3年經驗分數封頂。
呢度可以見到三項要求其實有少少衝突。如果想攞到高分，唔可以太大年紀，但又要有master/phd，又要3年工作經驗。Master畢業都起碼廿三四，再返三年工，黃金年齡得返27-29左右。
語言能力
可以考英文/法文，效果差唔多。英文要考IELTS General或CELPIP-G。語言能力佢哋係用CLB嚟計，CLB10以上分數封頂。
呢度要留意一個magic number，就係CLB9，或者換算IELTS成績為8777 (Listening 8，其他7)。因為語言成績除咗正常加分之外，仲有個combo分，全CLB9加三年工作經驗就有50分，全CLB9加專上學歷又加多25/50分。呢類combo分，加拿大本地工作經驗都有，呢個亦係OWP嘅價值。
（全CLB7都有類似combo，但得25分，要用加拿大本地經驗補足）
例如：
允行單人申請EE，29歲，Master畢業，三年海外工作經驗。IELTS Listening 7.5，其他全7嘅情況下，總分為411。但如果佢Listening hit到8分(CLB全9)，總分即刻上升為469分。
就算允行IELTS全9 (CLB10+ )，個分都只會上升到481 (每細項加3分，共12分）。可見CLB9/8777對EE計分嘅重要性。
CLB同IELTS分數對照表
伴侶因素
EE可以雙人申請，影響分數嘅因素得伴侶學歷、語言能力同加拿大工作經驗。大部分情況雙人申請都會令總分降低。另外伴侶語言分冇CLB7/9嘅combo效果。
又係以CLB9嘅允行為例子，佢嘅另一半要有3年學士學歷加語言分3個CLB9+1個CLB7先至可以令總分打和（469分）。
其他加分因素包括法文成績，喺加拿大讀過專上課程，有直系親屬有加拿大PR/citizenship，同埋LMIA (勞動力市場評估，可以自己google)。
所以理論上，你冇任何加拿大經歷，甚至冇去過加拿大，都有機會拎到PR invitation，但對年齡、學歷同語言能力要求高，29歲以下、碩士以上學歷、3年工作經驗、CLB9+基本上缺一不可。
OWP的價值
如果上面四個條件無法同時達到，除咗靠較難嘅LMIA同PNP以外，就係儲加拿大本地工作經驗。加拿大工作經驗除咗會有基本分，仲會產生大量combo分。
今次舉個貼地啲嘅例子。一心IELTS成績4條6，為CLB7嘅下限，香港學士學歷，3年海外工作經驗，分數為336分，遠遠唔夠分攞PR。如果一心儲到一年加拿大工作經驗，個分就會跳到414分，兩年就係439分，有個Master就變成466分，IELTS有CLB9就變成522分。
不過都要留意，喺你儲工作經驗嘅同時，都會扣年齡分。
幾多分先叫高分/夠分？
Post個pre-covid嘅分數圖出嚟先
以covid為界，可以見到個分一路上緊，如果要大機會收到邀請，470+分走唔甩。covid期間由於IRCC停擺同埋移民政策改變，個分數變得好奇怪同埋冇乜參考性，最低試過75分，都試過因為只收PNP，維持咗好長一段時間600+分。2022年7月EE停咗大半年後開始收返FSW同CEC，分數由557跌至最近嘅489分。
可以預期之後嘅分數會一路下跌，但速度會放緩，短期內都好難跌過pre-covid level。
其實IRCC官網有公佈每年嘅移民target，2023年會依照2024年嘅target派invitation，可以見到2024年嘅high skilled work目標為9至12萬內，但要留意呢個數唔係EE invitation總數，而係人數。每份EE申請可以包兩人或多人，所以個數要起碼除2。
官網都可以睇到每個range嘅分數breakdown。不過要留意個分數係dynamic，會持續有人入pool出pool，暫時每兩個禮拜會有約1200-2000名高過cut off score嘅申請，如果以呢個趨勢持續，估計2023年年底前分數唔會收得低過470，當然呢個只係一個極度粗淺嘅估計。不過有時IRCC會有特定組別抽籤（FSW/CEC-specific draw)，有機會令某一draw分數降低。
如何改善分數？
進修、OWP、改善英文呢啲廢話唔講，有錢嘅可以試LMIA，或者行PNP。
如果好有心移民加拿大，可以考慮的起心肝學法文。法文本身係加拿大官方語言，學識對當地搵工都好有幫助。法文成績除咗有基本加分之外，四個細項全CLB7+/B2+可以額外有30分，另外法文CLB7+對PNP有極大幫助。法文B2約需600小時學習時數。
另外講起考試，一般CELPIP比IELTS更容易攞高分，尤其係writing部分。
EE的不確定性及近年的政策轉變
搞咗一年EE/PNP，成個過程俾我最大嘅感覺係：千祈唔好相信IRCC。尤其covid後移民政策多變，又欠缺透明度，令人無所適從，呢個亦係stream A/B寶貴嘅地方。
幾個例子：2021至22年期間長期停收CEC/FSW，拖咗好耐先宣布重開，此時已積存大量申請；7月開返初期，invitation數量極小，令分數居高不下；去到11-12月突然停收兩個月，冇公佈原因，後期先知係個計分系統出咗bug，修復咗成兩個月（好兒嬉嘅原因），所以1月個分又上返去。
另外冇乜人提到嘅一點，係舊年年中通過嘅Bill C-19，賦予移民局長唔淨係以分數為標準，而係以加拿大本國嘅需求去發出invitation，可以係職業、學歷、語言能力（多數係法語能力），或任何其他因素，實施時間係2023年春季後。具體實施時間？唔知。邊啲人會受影響？唔知，所以話成個system透明度低。但個bill會令EE分數唔再係惟一指標。所以想以OWP申請EE嘅各位，建議睇咗新政策係咩環境先做決定。
最後講一句，呢兩三年嘅EE唔係咁易行，上網篤下calculator，起碼以470分以上為指標，睇下自己meet唔meet到，同埋要預咗呢兩年移民政策都未必咁穩定。
當然，如果你行到FSW，不妨一試，除咗考試費都冇乜成本，不過揀OWP行CEC嘅話，如果到時個分數唔夠，OWP又就過期，就會好尷尬。
打咗好長篇文，PNP想知再講。
