[中六續集][愛情][懸疑？]擁抱，失憶(重修版)

九十.
「可能會有啲考驗咁？」我縮咗縮膊：「我都唔知。」

我又唔係月老，點知月老會點做？

「我覺得愛情係…」佢托住下巴：「選擇？」

你咁講一講，我諗起之前睇嗰啲愛情語錄。

「愛情就係一次又一次咁愛上同一個人，一次又一次咁選擇同一個人。」我搲咗搲下巴：「可能係要我哋重新做一次所有選擇啩。」

重新嚟多次都係揀佢嘅話，咁就係真愛。

「如果我比機會你再揀多次，你會唔會同我一齊？」佢好認真咁望住我：「你諗起我嗰陣會唔會諗起第二個？」

雖然我唔知點解你咁問，但我照答啦。

「梗係會啦，至於諗起你嗰陣會唔會諗起第二個呢…」我搣住佢面珠墩：「梗係唔會啦。」

你估我係嗰啲個個都放唔低嘅仆街啊？

「你知我信你架。」佢露出意味深長嘅微笑：「你知點做架喇。」

其實我唔知。

「知架喇。」我苦笑：「食嘢啦。」

但我知佢都唔知，所以就無謂徒添幾分慨嘆啦。

我哋食完飯就漫步返屋企，沿路好似少咗嘢講咁。

佢除鞋入屋，而我就行去後樓梯。

佢趷個頭出嚟嗌停我：「你食煙啊？」

你又食啊？

「一齊？」我睇一睇煙盒：「最後兩枝。」

啱啱好。

「唔係啊。」佢微笑：「入嚟食啦。」

吓？

「你唔係話鍾意喺屋企食架咩？」佢著拖鞋行出嚟：「行啦。」

我鍾意浸味殘存喺間屋到架。

「但你唔鍾意啊嘛。」我摸咗摸佢個頭：「費事啦。」

無謂搞到你唔開心啦。

「而家鍾意喇。」佢拉住我隻手：「行啦。」

如果係咁嘅話…

我跟住佢行：「好啦。」

既然你唔介意，我冇理由介意返轉頭架嘛。

佢拎個飲完嘅汽水罐過嚟：「煙灰缸。」

唔該。

我點煙：「你唔係話啲味留得耐會好難頂架咩？」

做咩而家又得嘅？

「人會變架嘛。」佢點煙：「同埋氣味好重要。」

吓？

幾時回復記憶

個timeline會直踩32
重要橋段已完

九十三.
幾日又過，距離簽紙仲有十日。

早過佢起身嘅我托住頭咁望住佢瞓教個豬樣，而佢過咗冇耐都起身。

「林晉武？」佢好疑惑咁望住我：「點解你會喺到嘅？」

我都知你會咁問架喇。

「呢到係你屋企，都係我屋企。」我隨手摷咗套衫比佢：「你就遲到喇，今晚返嚟再講。」

一講就講好耐架喇。

「Er…」佢皺眉：「咁好啦。」

佢講就跳咗落床，而我就行去廳嘅梳化攤低。

住咗咁耐，睡房門都真係第一次閂。

過咗陣，換好衫嘅佢從睡房行出嚟。

佢經過我面前，行到去鐵閘前面。

鐵閘同木門被打開，佢都檻咗半隻腳出去。

「向晴。」我坐起身：「掰掰。」

佢停咗喺到，幾秒後又將隻腳收返嚟。

「掰掰。」佢微笑：「今晚見。」

多謝你。

時間一轉就嚟到夜晚，而我都買咗外賣返屋企等啊晴。

「咔！」

門鎖打開。

「你返嚟喇？」我喺外賣袋到拎碗魚蛋粉出嚟：「食嘢先啦。」

佢行過嚟坐喺我身邊，之後就默默咁開始食。

我哋好似搭枱咁，成程一句嘢都冇講過。

食完嘅佢想將個兜收返落外賣袋，而我就捉住佢隻手。

佢呆咗咁望住我：「做咩啊？」

冇咩特別。

我用另一隻手將佢個兜擺入外賣袋：「呢啲嘢唔洗你做架嘛。」

你傻咗啊？

佢微笑：「唔該。」

我哋食完飯就坐上梳化，而佢都終於開聲問。

佢望住我：「到底中六開學之後發生咗咩事，你而家先會喺到？」

呢單嘢真係成匹布咁長。

「嚟啦。」我斟杯水比佢：「拎住啦，有排你聽啊。」

我將過去呢十年發生嘅事由頭到尾講咗一次，長度堪比Avengers 4。

「估唔到我同你之間發生咗咁多嘢。」佢微笑：「更估唔到我哋仲一齊緊。」

咁如果…

我清咗清喉嚨：「比你再揀多次呢？」

九十四.
「我應該唔會傻到比啊澄呃到。」佢將個頭擺上我膊頭：「咁你呢？」

突然比佢問返我轉頭，我個腦即刻亂到亂葬崗咁款。

「喂。」佢用食指篤住我塊面：「試下唔好諗。」

咁啊⋯

我摸住佢個頭：「梗係會啦。」

你係我最愛嘅人嚟架嘛。

「係啊？」佢挨返後：「嗯。」

佢好似唔信。

我搭住佢：「我講真架。」

珍珠都冇咁真。

「我知啊。」佢企起身：「眼瞓，瞓先。」

佢講完就行返睡房，得返我坐喺梳化。

「如果我再揀多次⋯」我喺到自言自語：「係咪真係唔會揀佢？」

林晉武你係咪傻架？

「佢咁好。」我自摑一巴：「梗係會揀佢啦。」

我講完就行入睡房，一嚟就見到佢面向床邊、冚好被咁瞓喺到。

我瞓上床：「晴晴公主，今晚唔攬我啊？」

平時都攬架，今晚做咩咁特別嘅？

佢冇應我，唔通瞓著咗？

我再嗌多次：「晴晴公主？」

佢都係冇應我，睇嚟真係瞓著咗。

唔緊要啦，我自己嚟。

我從後攬住佢，點知佢一嘢推開咗我。

「做咩啊？」我嚇到褪後咗：「整到你啊？」

定係嚇親你？

「好熱啊。」佢拎開張被：「唔好黐埋嚟。」吓？

「而家秋天喎。」我苦笑：「你躁底啊？」

躁底就要煲返啲中藥補補佢喇。

「沒有秋天的童話聽過未啊？」佢冷笑一聲：「新界唔係凍到仆街就係熱到仆街㗎啦。」

咁又係。

我起身：「咁開冷氣好冇？」

咁樣一定唔熱啦掛？

「唔好。」佢撳住我：「電費貴。」

咁又係。

「你話點就點啦。」我瞓返低：「早唞。」

我講完就轉身面向另一邊床邊，同佢背對背。

佢冇再應我，而我都冇再追問。

或者呢個都算係一種默契，但我唔鍾意。

第二朝起身，佢已經唔喺我身邊。

我以為佢係去咗返工，直到我見到電腦枱上面嘅紙條。

紙條上面係佢用鉛筆寫嘅字，我睇完感覺同佢都就「完畢」

九十五.
我哋聽日就要去簽紙，如無意外佢聽日都會完全唔記得我。

佢同之前一樣自己走咗去瞓，留返我喺梳化。

「到底點先可以令佢聽日嚟呢？」我諗咗陣，之後就拎嚟紙同筆：「應該就咁寫一句就夠。」

我講完就喺紙上面寫咗一句，之後就將佢黐喺廁所塊鏡上面。

第二朝早過佢起身嘅我換上萬年冇著過嘅西裝，帶埋英倫啊伯比我嘅紅色棍就嚟到門口。

我望住熟客送比我嘅紳士帽自言自語：「拎嚟襯西裝好似唔錯。」

我戴咗頂帽之後就去廁所照咗下鏡，肯定佢真係fit先出門口。

好快就嚟到婚姻登記處嘅我諗住打電話比老母，但我下一秒就知冇呢個必要。

佢皺住眉咁跑嚟我面前：「做咩得你嘅？」

我依舊都係唔知點答你好。

「佢臨時有嘢要搞。」我即場作咗個善意嘅謊言：「好快到架喇。」

我驚佢知道事實會爆血管。

「咩叫好快？」我後面傳嚟啊晴把聲：「係已經到咗。」

我啊媽見到啊晴就即刻笑到四萬咁口，好似小朋友見到習主席咁款。

我啊媽搭住我兩個：「快啲行啦。」

仲未得住。

「仲有嚟未做。」我拉停我啊媽：「仲有人未到。」

佢成頭問號咁望住我，眼神中睇得出係懷疑緊我係咪傻咗。

「到喇。」

「等你講咋嘛。」

我身後傳嚟一把男聲、一把女聲。

「一個嚟睇戲。」我轉身：「一個嚟做嘢。」

喺我面前嘅就係啊澄同冇戴帽嘅英倫啊伯。

英倫啊伯清咗清喉嚨：「你知我係邊個未啊？」

雖然好唔合理，但我唔排除呢個可能性。

我微笑：「你就係熟客。」

另一個唔太肯定就唔講喇。

「我同時都係醫生。」佢扤咗下頭：「可以開始架喇，有冇帶舊嘢出嚟？」

證明我冇估錯。

「梗係有啦。」我微笑：「你精心打造架喎。」

九十六.
我嘆氣：「有冇咩溫馨提示？」

話曬第一次用，試下唔好咁Harsh？

「一間會有無數次嘅抉擇出現，但你嘅選擇只有一個。」英倫啊伯微笑：「你知要點揀。」

好似講咗啲咩，但又好似冇。

「咁就廢話少講。」我拎枝紅色棍出嚟：「嚟啦。」

啊晴微笑點頭，深呼吸之後就捉住枝紅色棍嘅另一邊。

喺佢手指掂落去嘅一瞬間，耀眼嘅白光從紅棍衝出嚟。

我合上雙眼，用手臂擋住強光。

強光喺幾秒之後消失，之後周圍就變得好暗。
我慢慢咁打開雙眼，發現自己嚟到一間電影院裡面。

出面播緊嘅唔係啲咩電影，而係我同啊晴嘅經歷。

條片用緊嘅視角，就係我嘅視角。

佢冇將每件事完整咁播曬出嚟，而係最重點、最深刻嗰part。

話口未完，條片已經播完。

畫面一轉就得返黑底白字，分別係左邊嘅「啊晴」同右邊嘅「啊澄」

如無意外，呢個係我第一個要做嘅選擇。

我望咗下周圍發現咩制都冇，正諗住開聲問嘅時候…

「已讀取答案。」

喇叭傳出好似Siri咁嘅女仔聲，之後畫面上就得返啊晴呢個名。

睇嚟係高科技嘢，我淨係諗就得。

知道點搞嘅我好快就搞掂咗一堆題目，嚟到最後一題。

最後一題播緊嘅畫面…

就係呢三十二日發生嘅事。

唔知點解，我覺得呢一段播得特別耐。

過咗好一段時間，條片終於播完。

前幾題唔洗三秒就搞掂嘅我卡咗喺到，佢一直都讀取唔到我嘅答案。

一定係壞咗啦，頭先唔明明讀取得咁快。

我清咗清喉嚨：「晴晴公主！」

嗌埋出嚟應該會好啲。

「已讀取答案。」

Siri聲再次傳出，之後畫面上就得返啊澄呢個名。

吓？

我皺眉：「點…」

未嚟得切問，我已經返咗去婚姻註冊處出面。

九十七.
啊澄好得戚咁望住英倫啊伯：「都話咗架啦。」

都係因為你喺到搞事。

我想一拳鍋落去，但英倫啊伯嘅眼神話比我聽唔好。

「冇用架。」英倫啊伯嘆氣：「就當係我睇錯咗你。」

咁但係…

我苦笑：「而家即係點啊？」

感覺好似冇咩分別喎。

「你試下行埋啊晴到。」英倫啊伯清咗清喉嚨：「之後就知咩事架喇。」

吓？

我行過去啊晴到，點知行到咁上下就比一幅隱形牆擋住咗。

「你講緊嘅就係呢個？」我苦笑：「結界啊？」

佢冇講嘢，淨係扤咗下頭。

「任務完成。」啊澄伸咗個懶腰：「我走先喇。」

佢講完就轉身走咗，得返我哋幾個尷尷尬尬咁棟喺到。

「你擺得低架。」英倫啊伯拍咗拍我膊頭：「有緣再會。」

佢講完就轉身走咗，而啊晴都轉咗身。

「啊晴！」我嘆氣：「你去邊？」

佢冇轉身，淨係嘆咗啖氣。

「多謝你。」聽得出佢喊緊：「有緣再見。」

想做啲嘢，但又咩都做唔到。

唔繼續？

完了
又一次玩爛系列

結局咗