3 Like
6 Dislike
香江第一淫棍
2023-02-10 02:32:19
係唔係打錯咗? 係另一篇同的士佬對話
白卡佬A.K.A龍叔
2023-02-10 09:12:49
is real
白卡佬A.K.A龍叔
2023-02-10 09:13:18
Real四十七.
返去之後我哋煲煲下劇就瞓著咗,起身嘅時候啊晴已經去咗返工,不過就幫我買咗早餐擺喺枱面,當然仲有我最愛嘅凍奶茶。
一個美好嘅朝早就由早餐開始,正啊!
食完早餐我就出去準備搞掂埋啲公事,今日要見嘅係一個熟客。
我諗佢應該係我咁多客之中最…又唔可以話係奇怪,只能講佢係與別不同,話曬佢都係我熟客。
咁多年嚟,我都唔知佢呢個六十幾歲嘅啊伯以前係做咩。
我淨係知佢出手好闊綽,但就衣衫襤褸,隻手仲成日拎住個殘殘舊舊嘅煙斗,燒緊嘅煙草一聞就知變曬味,唔講仲以為佢流浪咗幾廿年。
雖然佢表面上睇落奇奇怪怪,但我可以從佢嘅談吐舉止睇得出佢係一個有內涵嘅人,懷疑係隱世高人兼富豪。
不過與其話佢係我個客,不如話佢係我老師。
因為我每次見佢,佢都會講到好多有用嘅嘢比我聽,而我有時都會將最近發生嘅棘手嘢講比佢聽。
我可能諗咗好耐都諗唔到應該點做,但佢就可以一言驚醒夢中人。
如果可以嘅話我都想得閒搵佢傾下計,因為每次同佢傾完都獲益良多。
然而佢就係奇怪到一個點,奇怪到係我好難搵到佢。
作為一個現代人,就算唔係時時刻刻黐住部電話都好,你要去遠距離溝通的話就一定會用電話,好少話會寄信,但佢就好似停留咗係古代咁。
佢搵我係寄信嚟,而我覆佢都係要寄信。
點解?因為佢完全唔用電話同電腦。
唔識用而唔用同識用但唔用係唔同層次嘅嘢,而佢係後者。
白卡佬A.K.A龍叔
2023-02-10 12:03:13
四十八.
我會知佢識用係因為佢之前有一次想睇書但唔記我帶書,所以就借咗我部電話嚟睇書,而且操作都好流利下。
我都唔知佢參透咗啲咩先決定咁做,但我就一定去唔到佢嗰個境界。
老老豆豆,我真係唔知點解佢唔用電話同電腦都可以喺現代社會生活到。
不過佢咁聰明,我估佢有佢嘅辦法,話曬以前啲人冇用電話同電腦都可以正常咁生活到。
講咗咁多,總之就係我唔會透過網絡去聯絡到佢,要搵佢嘅話就要寄信。
但其實最大問題都唔係寄信,因為寄信最麻煩嘅點都係幾日後先收到回覆啫。
最大問題係佢啲回覆…
係文言文嚟架!
先唔講我睇唔睇得明文言文,因為文言文存在唔同嘅解讀。
所以就算我識睇都好,解讀出嚟嘅嘢都未必係佢想講嘅嘢,甚至有可能解錯曬,更何況我都唔識睇文言文,結果都係要下次見嗰陣等佢親口解釋。
正因為寄完都得唔到一個我睇得明嘅回覆,所以後來我都放棄咗寄信比佢。
…
..
.
我嚟到信中約好嘅一間書店,一行入去就見到佢坐喺一張長木凳上面睇緊書。
我踎低睄咗下個書面,一見到個書名就即刻打咗個冷陣。
佢手上嘅係中國四大名著之中最難睇得明嘅紅樓夢,同時都係我曾經嘅惡夢。
以前中學個中文老師強逼我哋睇曬佢,之後仲要我哋寫閱讀報告,真係慘過食屎。
我輕輕敲咗敲個書櫃:「我嚟咗喇。」
「唔好敲,會爛架。」佢吸咗啖煙:「過嚟坐低啦。」
我雙手合十,輕輕咁扤頭道咗個歉之後就嚟到佢身邊坐低。
「我覺得。」佢放低本書。
香江第一淫棍
2023-02-11 03:04:12
突然又出個阿伯,做智者角色。
白卡佬A.K.A龍叔
2023-02-11 13:14:41
智者伯伯
白卡佬A.K.A龍叔
2023-02-11 14:49:40
又或者佢唔係一個新角色
白卡佬A.K.A龍叔
2023-02-12 02:53:54
香江第一淫棍
2023-02-12 02:59:54
舊角色? 平行世界?
白卡佬A.K.A龍叔
2023-02-12 03:00:31
唔講
白卡佬A.K.A龍叔
2023-02-12 12:33:50
香江第一淫棍
2023-02-13 02:07:32
白卡佬A.K.A龍叔
2023-02-13 12:17:00
香江第一淫棍
2023-02-14 01:55:27
以後都要上呢個站睇?
貼埋原文,否則呢度會員跟唔到落去。
白卡佬A.K.A龍叔
2023-02-14 03:00:45
我想導多少少人返去,
所以呢七日係拎嚟做返差別嗰七日。
香江第一淫棍
2023-02-15 03:15:58
白卡佬A.K.A龍叔
2023-02-19 16:38:26
四十九.
一聽到呢句,我就知佢要長篇大論,而我要做嘅就係喺適當時候扤頭。
兩個鐘後…
「係喎,你今日嚟搵我做咩?」佢問我。
佢不嬲都係咁唔記得嘢,應該係因為年紀大所以個腦有啲唔等使。
「你唔係話要搵我幫你寫篇嘢咩?」我望咗周圍:「今次都係抄嘢?」
佢每一次都係搵我嚟抄嘢,我估今次都唔例外。
「冇錯,你等我一陣。」佢擺低本書。
佢行到去一架書車前面,拎咗本書同筆記簿出嚟。
我見佢冇落書籤就即刻打咗個冷震,淆到不得了,因為佢通常會喺要抄嘅位到落書籤。
我吞咗啖口水:「唔係抄曬啊嘛?」
你唔好癲啦好冇?
呢本書坐底都幾萬字,抄到斷手都唔掂。
「你睇曬佢先。」佢將本書遞比我。
我有啲詫異,因為佢好似係第一次叫我睇書。
我接住本書:「但係應該都要幾耐下。」
我睇咗睇個書封,呢本係張愛玲寫嘅《惘然記》
佢係一本散文集,但厚度就同一本小說差唔多,冇返六、七個鐘一定睇唔曬。
「唔緊要啦。」佢笑得好慈祥:「你一間有嘢做?」
其實你每一次約我都預咗全日比曬你,只不過冇諗過今次真係全日比曬你啫。
「冇啊。」
不過你支持咗我咁耐,出手又咁闊佬,仲教我咁多嘢,我都冇理由托你手踭。
「咁你坐啦。」佢起身:「要唔要杯茶?」
都好啫,可以睇下佢沖茶。
「要啊唔該你。」我微笑點頭。
跟住佢就去咗沖茶,而我就開始睇書。
我耷低頭一直睇,直到條頸頂唔順先顎高頭拉咗下。
而喺呢個時候我先發現一樣嘢…
佢沖茶沖咁耐嘅?
煲埋水都唔洗咁耐啩?
佢都六張幾,會唔會係有咩事?
白卡佬A.K.A龍叔
2023-02-19 16:38:41
五十.
出於關心,我決定起身去搵下佢。
因為佢次次約我都喺唔同地方,所以我都係第一次嚟呢間書店。
我行咗一陣,終於喺角落頭一個類似茶水間嘅地方搵到佢。
佢彎低腰、縮埋一舊咁唔知喺到搞緊啲咩。
我行到嚟佢身邊:「你搞緊咩啊?」
佢拉返直個人,啲骨頭連續「咯」咗幾聲。
佢個人起返身之後,我先見到佢面前嘅枱面有個好殘舊嘅木托盤,而且已經從中間裂開咗。
「你要唔要幫我搵嘢黐返埋佢?」佢好誠懇咁問我。
舊嘢咁舊,有必要咩?
「個盤咁舊不如買過個啦,定係佢係啲咩貴價嘢嚟?」
如果係貴價嘢的話又真係唔捨得就咁掉。
「唔係咩貴價嘢,不過我想用返呢個盤。」
既然你講到,我冇理由托你手踭。
「咁你等我一陣啦。」
佢苦笑:「我手揗腳震真係搞唔掂,要麻煩到你真係唔好意思。」
「唔緊要啦,我出去買嘢先。」
舉手之勞,不足拆齒。
講完,我就出咗去買間尺同AA膠返嚟。
佢行埋一邊:「唔該曬你。」
我首先用AA膠黐返埋兩個部分,之後再將把間尺黐喺底,負責連接住兩個部分。
雖然搞到個盤底多咗條嘢,但至少可以用得返。
我幫佢將啲茶具擺上托盤,順便拎埋:「行啦。」
「嗯,行啦。」
我返到嚟長木凳將托盤擺低,而佢都喺我對面坐低。
「你小心啲,佢好容易反。」
因為中間多咗把間尺,所以個底有大部分都係凌空。
佢冇理我,淨係繼續手上面嘅動作。
睇嚟我嘅擔心係多餘,因為佢隻手仲定過我。
佢好講究流程,而動作都好幽雅,甚至可以話睇佢沖係正過睇網上嘅沖茶片。
但我真係好好奇一樣嘢…
香江第一淫棍
2023-02-20 02:04:59
呢七日測驗成點樣,有咩發現?
白卡佬A.K.A龍叔
2023-02-20 02:57:47
有Feel到集中咗少少
PNN終於上到熱門
白卡佬A.K.A龍叔
2023-02-20 12:03:17
五十一.
佢微笑住咁講:「你睇完本書同你講。」
雖然我好好奇,但我冇可能逼你講。
「嗯。」
講完,我就拎返起本書繼續睇,而佢就喺隔離飲茶同埋食煙。
我斟咗杯茶,飲完差啲想噴返出嚟。
「做咩咁怪嘅浸味?」我問佢。
佢唔係苦咁簡單,而係怪。
「係咩?我幾鍾意呢隻味。」
都話佢奇怪架啦。
「但會唔會係包茶葉變咗味?」
我比較擔心呢個。
「唔會,唔信你咪去睇下囉,包嘢喺茶水間。」
我驚佢老人家記性差加味覺退化,飲咗變咗味嘅茶葉都唔知,所以就擺低本書行咗去茶水間。
我搵咗陣先喺角落頭到搵到個紙袋,裡面應該就係啱啱嘅茶葉。
我打開聞咗下,浸味的確一樣。
再睇下個生產日期,都只不過係一個月前嘅事。
加上佢擺個位都好乾爽、冇陽光直照,而個紙袋都係密封。
變味嘅機率好低,應該真係原本就係咁嘅味。
我行返去坐低繼續睇,但都係好好奇佢點解會鍾意呢隻咁怪嘅味。
「你鍾意呢隻味?」
因為真係好怪。
「係啊,做咩?」
但佢睇落飲到好開心。
「點解嘅?」
到底有咩咁吸引?
「呢啲嘢冇得解架,就好似有人鍾意食臭豆腐咁。」
又係,最貼身嘅例子就係我老母好鍾意食榴槤,但我就聞到浸味都想死。
「我睇書先喇,你去做下自己嘢啦。」
雖然係佢要求我睇曬,但要佢坐喺到等好似唔係咁好。
「你睇啦,我要打坐。」
講完,佢就盤起對腳、合埋雙眼同埋雙手手掌向天咁擺喺膝頭上面。
嗯,都話佢好怪架啦。
見佢打坐緊,我都冇再出聲,靜靜地咁睇書。
過咗陣,佢突然開聲:「你睇到邊?」
第開聲嗰下我有少少嚇親,因為佢都靜咗好耐下。
「唔係睇咗好多咋喎,做咩?」
唔係要睇曬咩?
「睇完之後抄低一句嘢。」
佢成個姿勢都冇郁過,真係有打坐開。
香江第一淫棍
2023-02-21 01:40:34
白卡佬A.K.A龍叔
2023-02-23 16:49:52
五十五.
「所以呢?即係你食軟飯嘅?」
咁我又冇咁衰。
「啫係佢好我好多,我唔值得佢將下半世交比我。」
將下半世交比一舊垃圾,一啲都唔好。
「所以你就因為你覺得自己唔值得佢將下半世交比你同埋唔值得佢付出咁大代價而想選擇努力咁去放低?」
正確。
「我覺得呢個唔係一個考驗,而係個天比緊位我落台。」
雖然我知道呢單嘢係人為。
「你有冇諗過一樣嘢?」
咩?
「你想講?」
咩道理?
「愛就是不問值不值得。」
呢啲嘢只存在喺小說裡面。
「現實就要有現實嘅考量。」
冇可能好似小說咁理想。
「咁你係咪真係愛佢?」
答案係一定架。
「愛。」
如果唔係點會一齊咁耐?
「愛嘅話,咁就唔好問值唔值得。」
我都想。
「但…真係可以唔問咩?」
真係可以咁理想咩?
「當你開始去問,就所有嘢都係唔值得。」
所以我唔好去問?
「你意思係…」
想我點?
「你自己決定啦。」佢打斷咗我:「我去拎啲嘢先,你坐喺到等我。」
講完,佢就行開咗。
過咗陣佢就拎住頂紳士帽行返嚟坐喺我身邊:「呢頂帽同埋個煙斗都送比你。」
講完,佢就將頂紳士帽同裝住少少煙絲嘅煙斗遞比我。
吓?
「做咩無啦啦送嘢比我?」
收又唔係咁好意思,唔收又好似好冇禮貌。
「我都嗰頭近啦,想分配下啲遺物啫。」佢苦笑:「你絕對有資格拎走呢兩樣嘢。」
你都講到咁啦,我仲有咩理由推搪?
我接過紳士帽同煙斗:「多謝你。」
我望住頂紳士帽,個感覺好熟悉。
「下次再搵你啦。」佢嘆咗啖氣:「我搞埋啲嘢都要返去唞下。」
一定有下次嘅。
「咁我行先啦。」
下次見。
「掰掰!」
我離開書店之後就將個煙斗裡面嘅煙絲點著,好奇咁吸咗一啖。
「咳!」
白卡佬A.K.A龍叔
2023-02-23 16:50:40
五十六.
「咳!」
好難食啊!
「會唔會係我唔識食?」我咁同自己講。
我順返條氣,之後再吸一啖。
唔知係已經食順咗定點,第二啖開始好咗好多,至少唔會咳先。
然後我再吸一啖,將啲煙擺喺個口裡面一陣先吸落肺。
強烈嘅苦澀味殘留喺口腔,但唔知點解我覺得呢隻苦味好正。
仲有就係我覺得應該就算係普通煙絲,只要放咗入煙斗到燒都會好食好多。
我放空個人繼續吸,而啲煙絲就喺不知不覺間燒曬。
煙絲明明已經燒曬,但我仲持續緊吸嘅動作。
「喂。」有隻手拍咗落我膊頭。
我嚇到成個人彈咗一嘢,之後就見到有個戴住Cap帽嘅啊叔企咗喺我身邊。
「𡃁仔你啲煙絲煙曬喇。」啊叔遞咗枝煙比我:「拎去啦。」
我清空個煙斗:「唔洗喇唔該。」
「拎住啦武仔。」佢將枝煙硬塞落我到。
既然係咁,我都唔好意思唔收。
我接咗枝煙就直接點著咗佢。
等陣先…
你點知我叫咩名架?
「你係?」
佢聽到我咁講就除低咗頂Cap帽。
我望住佢個樣猶疑咗一陣:「龍…龍哥?」
佢微笑住咁講:「唔係龍哥喇,今次真係龍叔喇。」
佢個樣真係老咗好多,真係歲月不留人。
我哋就好似電影裡面啲老朋友重逢嘅橋段咁忍唔住攬咗攬、拍咗拍背脊。
「好耐冇見喇,你去咗邊啊?」我問佢。
可能係因為我哋大家都忙,所以我哋好耐都冇搵過對方。
佢苦笑一聲:「醫病啊,不過醫唔到喇。」
我好似問咗一個錯嘅問題。
「對唔住。」
希望你唔好介意。
「冇嘢啊,你都唔知。」佢拍咗拍我背脊:「食枝煙先啦。」
講完,佢就點起咗一枝煙。
「係喎,咁你嚟呢到搞咩啊?」我問佢。
呢到工業區嚟。
「冇啊,去玩室內War game咋嘛。」
吓,你去玩室內War game?
白卡佬A.K.A龍叔
2023-02-23 16:50:57