[中六續集][愛情][懸疑？]擁抱，失憶(重修版)

自介
癡線佬一個，想睇癡線野可以嚟睇下。
故事簡介
P.S.這是《中六嗰年，我鍾意咗叫我起身個女仔》(廣東話)/《中六那年，我喜歡了叫我起來那個女孩》(書面語)的延伸故事(續集)，沒有看過的可以先去看看(以上作品PNN2023年開始收費，其他平台依舊免費)。
當然，沒看過的也可以照樣看。
上集：https://amp.lihkg.com/thread/3155884/page/1
------------------------------------------
大家好，我係林晉武，都係向晴嘅未婚夫。

雖然我冇車冇樓冇錢，但我同佢嘅感情冇因為咁樣而變差。

但係自從嗰次攬完之後，所有嘢都唔同曬。

一個屈尾十就寫返全口語

一.
自從我哋嚟到談婚論嫁嘅階段，就開始咗屬於我哋兩個嘅同居生活，畢竟相處好，同住難，感情再好都唔代表可以接受對方嘅生活習慣。

雖然我哋兩個人工都唔多，租返嚟間屋都係得三百零呎，屋裡面啲嘢又舊又剩咁，但係都無阻我哋適應多咗一個人嘅生活。

有啲人同居之後就會懶得出門口拍拖，寧願兩個人一齊攤喺屋企，但係我哋就冇呢個情況。

我哋兩個放假嘅時候都係會出去行下街，而今日都唔例外。

我今日好早就起咗身，原本諗住叫醒佢同我一齊去行山，不過見佢瞓得咁稔，我都唔好意思夾硬叫醒佢，自己一個行咗去廳開電腦寫文。

寫下寫下，我聽到床嗰邊嘶嘶沙沙咁，應該係佢醒咗郁嚟郁去。

我起身行返床，坐喺床邊。

我溫柔咁摸住佢塊面：「晴晴公主醒喇？」

佢坐起身打咗個喊路，捽咗捽眼：「醒咗喇，咁要做咩啊？」

講完，佢就擘開雙手，好似小朋友咁扭下扭下。

呢個係我對佢嘅承諾…

「只要我喺屋企，佢一瞓醒我就會即刻攬攬佢。」

我攬住佢，隻手上下來回咁掃佢背脊：「知道喇，點會唔記得。」

過咗一陣，我拍咗拍佢背脊就鬆手。

「快啲去沖涼換衫啦，我哋今日去行山啊。」我摸咗摸佢個頭。

點知佢冇應我，都冇開始去準備出門口，反而好疑惑咁望住我。

我覺得有啲唔對路，就開聲問佢：「你做咩仲唔起身啊？」

「你…係邊個？」佢問我。

我夠膽肯定，佢一定又係喺到整蠱我。

「唔好玩啦，起身喇。」我拉住佢隻手。

點知，佢竟然將我隻手揈開。

「你係邊個？」佢再問一次。

「整蠱啫，唔洗玩咁多嘢嘅。」

我伸手想攬佢，但係就比佢推開。

「我唔知你係邊個。」

件事去到呢個位，我真係開始怯。

啊晴突然話唔識我呢個同佢一齊咗十年嘅人，到底係咩事。

二.
「我係你未婚夫啊！」我舉起手指咗指手上面隻戒指：「你隻手都有架！」

佢望咗望自己隻手：「真係有喎。」

「咁咪係囉，我係你未婚夫啊。」我捉住佢隻手：「我係啊武啊。」

「咩啊，你同我隻手都有戒指，唔代表你就係我未婚夫架喎。」

平時你都戇戇鳩鳩咁，點解今日咁醒嘅？

「Er…咁又係？」

點算啊大佬？連呢個盲點都比佢捉咗出嚟。

等陣先，我諗到啲更加重要嘅嘢。

「你認唔認得呢到係咩地方？」我問佢。

「呢到係…」佢耷低頭諗咗陣：「我屋企囉。」

「係我哋屋企。」我補充。

「咩啊，你講緊咩啊？」佢成個人捐入被竇：「我好亂啊！」

「點算啊？」我嘆咗啖氣。

雖然我依家好驚，但係都好比心機咁記返起啲劇係點令啲失憶嘅人記返起啲嘢。

除咗舊地重遊，重提舊事，仲有…

比相佢睇。

係啊，比相佢睇！

因為我唔知佢有咩係唔記得，所以我決定拎我哋嘅第一張合照比佢睇，即係中六嗰陣時嘅班相。

「你拎去睇下啦。」我將部電話擺喺床上面。

佢冇講嘢，一直郁都唔郁咁匿喺被竇裡面。

過咗一陣，佢終於小心咁伸隻手出嚟，一摸到部電話就即刻拎起佢縮返隻手入去。

過咗冇耐，佢揭開張被，皺曬眉咁望住我。

「點啊，諗返起未啊？」我問佢：「未諗到嘅話我要轉另一張相。」

「咩啊，諗返起啲咩啊？」佢反問我：「你做咩無啦啦比中六嗰張班相我睇？」

「比你睇下，等你諗返起我係你未婚夫囉。」

「你講乜撚嘢啊？」

睇嚟，佢諗返起啲嘢喇。

「冇嘢喇。」

「咁今日去邊啊？」佢問我。

我搲咗搲下巴：「今年好似未做過Body Check，一間一齊去做啦。」

「今日星期日喎。」佢扁曬嘴，好失望咁望住我：「同埋都唔洗咁早做，我想去玩啊！」

我撳入Booking App睇咗睇：「今日仲有位。」

「都話我今日要去玩！」佢好似小朋友扭計咁喺到踢腳拍床。

「早做遲做都係要做，更何況及早發現、及早治療啊。」

「唔要！」

「最多一間做完請你食日本嘢。」

佢好期待咁望住我：「真係架？」

我冇講嘢，淨係扤咗扤頭。

「行啦行啦。」佢開心到直接跳咗落床。

好彩張床唔係好高，如果唔係佢斷腳都似。

劇情會唔同之前？ 定係會有雙結局？

寫完口語再plan
有機會係一個陰謀論版
一個正常版

呢邊會少少劇情係隔離冇

三.
我沖完涼，就輪到佢。

雖然我同佢都大個咗好多，但係佢喺份童真都不經意咁喺生活到滲出嚟。

就好似佢沖涼特別耐，因為佢除咗會喺沖涼房到做歌星之外，伸會拎啲沐浴露嚟吹泡泡。

佢沖涼嘅呢段時間，我坐喺梳化到用電話睇咗好多同失憶有關嘅資料，但係所有可能性都同頭先個情況扯唔埋欄。

頭先佢係攬完之後就失憶，發生得好突然。

雖然有啲病嘅病發都係嚟得好突然，但係多多少少都一定會有啲徵狀，但係頭先佢除咗失憶之外，就冇咩特別嘢。

唔會係啲咩極罕見又奇奇怪怪嘅病啩？

喺我諗緊嘅時候，佢大力打開沖涼房門，嚇到我連電話都掟埋出去。

佢就好似啲Model咁企喺門口到擺Pose，仲當咗我係觀眾咁Say hi。

沖完涼嘅佢著咗黑色短裙同埋超簿嘅白色短袖恤衫，黑色嘅Bra若隱若現，同AV啲極上誘惑差唔多，但係我個腦而家亂到睇多一眼嘅心機都冇。

即刻冇曬Mood嘅佢「哼」咗聲，之後就執起咗比我掟落地下嘅電話。

「做咩我一出嚟就嚇到掟電話啊？睇AV啊？」佢睇咗睇電話，之後就皺曬眉：「做咩無啦啦查失憶？」

「冇啊…」

我未講完，佢就打斷咗我。

「你失憶啊？」佢問我。

「唔係啊，做緊資料搜集咋嘛。」我眼神不自覺咁避開佢。

「咪玩啦，同你一齊咁多年，睇透你啦。」

個頭又濕又亂嘅佢一嘢坐落我隔離：「快啲講咩事。」

「啊公佢…」我諗住作故仔。

佢直接打斷我：「講真話。」

睇嚟我都係呃唔到佢，唯有講真話。

我嘆咗啖氣：「係你，你啱啱失憶。」

「吓，我失憶？幾時嘅事？」佢成塊面都係問號。

五.
啊晴推開防火門，拎住枝煙坐喺我隔離。

「食煙枝煙行喇。」佢點煙。

我冇講嘢，只係默默咁扤頭，繼續坐喺佢隔離。

佢呼出灰色嘅煙圈，係慢而且唔集中架。

佢一啲都唔緊張，反而仲好放鬆。

「佢完全唔信我講嘅嘢。」

我係咁諗。

枝煙燒曬，啊晴將煙頭彈落下層，之後就打側身面對住我。

「喂，啊武！」佢拍咗拍我膊頭。

我勁驚佢會突然攬埋嚟，當咗佢係肺炎患者咁向側邊褪咗幾下。

「做咩啊？」我問佢。

「唔洗坐咁遠喎。」佢都跟住褪咗過嚟：「雖然聽落好荒謬，但你知我不嬲都信你。」

「咁以後起身點算？」

「唔攬啫，可以錫架嘛。」

「好似又啱。」

我哋望住大家，只能苦笑。

「唔好諗咁多先啦。」佢企起身：「Check咗先講啦，而家講咩都係自己嚇自己。」

「都啱，行啦。」

講完，我哋就拖住手嚟到醫院。

…

..

.

唔洗好耐，我哋就檢查完。

已經有報告嘅會見咗醫生先，而淨低嗰啲要報告要等樣本化驗結果出咗嚟先有。

而咁多嘢裡面最重要嘅，就係腦科。

喺我哋對面嘅係一個成頭白曬嘅男醫生，應該都好有經驗。

「兩個都冇問題啊。」醫生同我哋講。

咩話？冇問題？

「真係冇問題？」我問佢。

「咩都冇喎，做咩咁問？」

「我失憶。」啊晴幫我講咗。

「點失憶法？」

佢比咗個眼色我，要我將今朝發生嘅事講出嚟。

我將今朝發生嘅事和盤托出，醫生聽到皺曬眉。

佢粒聲唔出咁翹埋雙手，好似喺到諗緊啲嘢咁。

過咗冇耐，佢終於開聲。

「想問小姐你介唔介意出去等？」佢問啊晴。

啊晴扤咗扤頭，之後醫生就即刻起身過去幫佢開門。

啊晴行咗出去之後，佢就閂門行返去坐低。

我郁咗郁張櫈，坐正喺佢對面。

「醫生，想問咁樣係咩事？」

佢嘆咗啖氣：「我同老婆當年結婚之前都係咁。」

六.
聽到呢到，我條脷好似打咗結咁，一隻字都講唔出。

「你係咪想知點解決？」佢問我。

我吞咗啖口水，係咁用力點頭。

佢挨前郁咗郁手指，要我挨埋啲。

我挨前到耳仔都就嚟貼落佢個嘴到，而家淨係等佢開口。

「其實。」佢嘆咗啖氣：「我唔知。」

佢呢條友搞咁多花臣嚟襯句廢話，我真係差啲就開聲問候佢媽媽，好彩佢趕得切喺我開聲之前指住牆上面張Warning，我先冇講出口。

我就滿心期待咁等佢開聲，點知原來佢係嚟混吉嘅。

「咁你叫我挨埋嚟做咩啫？」我不滿咁講。

「我講緊嘅係醫學上。」

「咁即係有唔係醫學上嘅解決方法？」我問佢。

「咁你想唔想知先？」

「梗係想啦。」我對眼發曬光。

「用心愛，伸有無名指。」

「你講緊啲咩啊？」我完全唔知佢講緊咩。

「自己諗下啦，呢啲講白咗你就唔識做，同埋我同你個Case都唔同。」

「喂，講…」

我想叫佢講多啲，點知佢直接起身過去開門。

「仲有下個要睇啊。」

「你…」我都係唔肯放棄。

佢打斷我：「走啦。」

我起身嚟到門口：「真係冇其他提示？」

佢嘆咗啖氣：「真係怕咗你。」

「有啊？」

佢摺起白色醫生袍嘅手袖，露出右手手臂上面嘅紋身，張圖應該係一個海灘之類嘅嘢。

佢指住個紋身：「回憶，仲有佢會慢慢唔記得你哋近排做過咩，最後連你都唔記得。」

「所以我要快』」

「係，仲有喺你有把握之前唔好攬佢。」

「收到你。」我行咗出去。

「唔得嘅話就分手啦。」

講完，佢就閂埋房門。

我嚟到啊晴面前，但係專心咁碌緊電話嘅佢完全冇為意。

我望住佢，個心一鑊泡咁。

佢會係我老婆，定係咩都唔係？

我唔知，都唔想去諗。

過咗一陣，佢終於岳高頭。

「做咩搞掂都唔叫我嘅？」佢問我。

「冇啊，你撳電話個樣好靚。」

「把口咁甜做咩啊，想走數啊？」佢掹住我件衫，扁曬嘴咁、可憐咁望住我：「我唔制啊，我要食日本嘢！」

我用手搣咗搣佢面珠墩：「知喇，行啦。」

我望住佢，個心一鑊泡咁。

好句。 呢種語序幾特別， 幾有特色。

七.
我哋拖住手離開醫院，好快就嚟到附近嘅一間日本餐廳。

啱啱拎到Menu嘅佢好似癲咗就揭嚟揭去，而我就坐喺對面繼續搵同失憶有關嘅資料。

佢好鍾意食日本嘢，但係我就除咗蛋包飯叫做OK接受到之外，其他全部都唔鍾意。

呢個係我唔洗睇Menu嘅其中一個原因，更重要嘅係…

我冇心情睇。

「失憶症分為順行性失憶症同逆行性失憶症，順行性失憶症係會唔記得發病之後發生嘅事，而逆行性失憶症就相反。」

呢個係嚟自Wiki嘅資料，但係資料冇講「擁抱失憶症」會引發以上邊一種失憶症，因為呢個病應該罕見到得啊晴同頭先個醫生嘅老婆有。

係喇，「擁抱失憶症」呢個名係我改架，因為個病根本就連名都冇。

「佢會慢慢唔記得你哋近排做過咩，最後連你都唔記得。」

如果真係好似醫生咁講，佢應該會有逆行性失憶嘅情況。

但係每一日會唔記得幾多，我唔知，都冇勇氣去估。

「我有好多嘢想嗌，但我驚食唔曬。」她扁住嘴，比咗個眼色我。

相信咁多位有拍過拖嘅男士都知呢個眼神嘅意思，就係「我每碟食一啖，淨低全部你嘅。」

用嘅係句號，而唔係問號。

因為佢唔係問緊你，而係命令緊你。

你可以嘗試去振夫綱，但係無論成功定失敗都好，你都係輸。

振到，佢黑面發老脾；振唔到，你比佢鬧鑊金。

所以我已經習慣咗順應佢嘅命令，雖然我唔鍾意食日本嘢。

「我包底，你想嗌咩就嗌咩啦。」我答佢。

佢搣咗搣我面珠墩，然後就叫咗個侍應過嚟。

佢指住個Menu好似Rapper上身咁即場嚟咗段我半粒字都聽唔到嘅快嘴，懷疑已經破咗世界紀錄。

我見到侍應個額頭標曬汗，應該喺到懷疑緊人生。

「大概係咁多。」佢合埋本Menu。

之後佢要求個侍應覆咗幾次單，肯定冇漏單先安心咁擺低本Menu。

搞完一輪，佢終於諗返起我嘅存在。

「係喎，啱啱醫生同你講咩？」佢問我。

「冇咩特別，只係未來有一段日子唔可以攬你。」我嘆咗啖氣：「我唔係唔愛你，我都知呢件事聽落好荒謬，但你要信我。」

「愛唔愛我要Feel下先喎。」佢伸出左手，趷起隻無名指：「拎你嗰隻嚟，掂住佢。」

我唔知咩事，但都照做咗。

呢個姿勢Hold咗一陣之後，佢就收咗隻手返去，而我都跟住收咗返去。

「咁有咩特別？」我問佢。

「Feel到喇。」佢挨前錫落我塊面到：「無名指連住個心，兩隻無名指連埋一齊即係連埋個心，所以咪Feel到。」

八.
過咗冇耐，嘢食已經擺滿曬成張枱，我見到都覺得飽，但係佢就食得好開心。

我Feel到個銀包比人重擊咗一下，而家情況危殆。

不過我反而冇咩所謂，因為佢同我一齊咁耐都就住我銀包，唔係食魚蛋粉就係買啲平平地嘅嘢返嚟自己煮，出入呢啲高級餐廳嘅次數基本上十隻手指數得曬。

講真嗰句，我覺得自己欠咗佢。

誇張啲嚟講就係我覺得自己配唔上佢，而佢揀我做佢男朋友呢個決定可以話係錯撚曬。

佢從來都冇嫌棄同抱怨過，但係我成日都會自己諗好多嘢。

佢唔介意同我一齊捱，但係我就成日都因為佢要捱而自責。

佢將自己嘅終生幸福交比我，但係我冇令到佢變得好幸福。

或者係因為咁樣，個天先要呢件事發生喺佢身上，等我可以喺佢記憶裡面不知不覺咁消失，最後嚟一個完美嘅退場。

因為我好愛你，而你都好愛我，加埋我哋一齊經歷過嘅好事、壞事、柒事、尷事，呢啲回憶就好似電腦Mon上面嗰條捽極都捽唔甩嘅頭髮咁卡喺個腦到，令我們兩個都冇講「分手」呢兩隻字嘅勇氣。

無論係邊個開口，我哋都會心痛到想死，因為回憶唔係個個都擺得低，更何況係成十年嘅回憶。

但係如果佢冇咗回憶，咁心痛嘅就只有我。

只要佢呢十年嘅回憶好似粉筆字咁被擦走，佢就可以咩都唔洗諗，開開心心咁去搵下一個最愛。

你陪我捱咗十年喇，已經夠曬喇。

你係時候去搵一個更加好嘅人，分開嘅痛苦就留比我啦。

「咯！」

我個額頭比人用力彈咗一嘢，痛嘅感覺將我由思考中扯返出嚟。

「叫極你都唔應嘅，諗緊咩啊？」佢問我。

「冇啊，發吽逗咋嘛。」我答佢。

「實係啦。」佢睥住我：「快啲講。」

我猶疑咗一陣，最終都係將嗰條假設性嘅問題講咗出嚟。

「如果我同你講分手，你會點？」

話唔定佢都忍咗我好耐，只不過唔想我傷心，所以先冇出聲。

佢摸住我個額頭：「你發燒啊？」

「但係我比唔到啲咩嘢你架喎。」

「同你個傻佬都一齊咗咁多年啦，要走一早走咗啦。」佢谷起個腮：「但我冇講過你可以本怶架，你都要努力架！」

「知喇傻婆。」我拎開佢隻手：「食嘢啦，啲嘢凍曬喇。」

「啲刺身原本就係凍架。」

我哋望住大家…

笑撚到傻。

「傻婆。」

「傻佬。」

九.
過咗冇耐佢就食飽，而我都將佢食淨嘅嘢搞掂曬。
「搞掂喇！」我擺低餐具，摸咗摸個肚：「成日都留咁多嘢比我食，食到個肚都漲曬。」
我個肚大到好似比人灌咗幾打啤酒咁，漲到就嚟掂到地下。
「明明就係你自己本身就肥。」佢串我：「肥到成隻米芝蓮咁。」
「你就肥，你全家都肥！」我駁佢。
「聽講我全家，某程度上係包埋你架喎。」佢奸笑：「埋咗張單佢去行街啦傻佬。」
「哼！」我翹埋雙手：「唔請你食喇。」
把口就話唔請，但係個人就拎住張單行咗去收銀台。
「口不對心，心不對身嘅傻佬。」佢喺我後面細聲咁講。
「我聽到架傻婆。」我擰轉頭望佢。
「知你聽力好喇，好啲去埋單啦傻佬！」佢伸咗伸脷。
埋咗張單之後，我就返到佢對面坐低。
「點啊，想去邊到行街街啊晴晴公主？」我問佢。
佢嘟起個嘴，沉思咗一陣：「我想去西九龍中心。」
「行格仔鋪？」
「係啊，我鍾意嗰個插畫家出咗新貼紙，順便睇下有冇其他得意嘢都好。」
「我冇意見，你話事啦。」
「咁行啦。」
講完，佢就成個小朋友咁扎扎跳，彈下彈下咁彈咗出門口。
我喺佢後面慢條斯理咁跟住，還掂佢行得再快都係要等埋我。
「有巴士到啊！」佢大嗌：「行快啲啦！」
我望出去，見到有架巴士喺鋪頭對出個巴士站停咗落嚟。
原本佗佻嘅我即刻急起上嚟，因為佢已經上咗車，仲拍埋卡。
另外一樣嘢就係呢架車走咗，下架車就係半個鐘之後嘅事。
我急急腳行過去，好彩司機有睇到我追緊車所以開住門等埋我。
我衝上車，第一時間同個司機講返聲「唔該」
「你個傻佬，行咁慢呀嗱！」佢串我。
「咩叫我行得慢，明明就係你個傻婆行得快。」我伸咗伸脷：「下次再行咁快我就唔理你，望住你搭車走！」
佢摙住我隻耳仔：「你講咩話？」
「我話…」
我仲未講到多一次，佢就已經將我隻耳仔扭咗一圈，痛到我嗌救命。
「仲講唔講？」佢問我。
「唔講喇。」我雙手合十求佢放過我。
「算你啦。」佢鬆手。
「你兩個咪撚玩啦！」車長怒屌：「嘈住我揸車！」
我哋同車長耍咗個冧，之後就嚟到上層最後排左邊嘅位置。
我坐喺靠窗位，而佢就坐喺靠走廓位，就同以往一樣。

十.
一切同以往一樣，但係又無辦法用過去推測到未來。
佢深愛我，呢個係一直以嚟嘅事。
佢忘記我，呢個係終有一日會發生嘅事。
我唔係一個樂觀嘅人，反而係一個悲觀嘅人，仲要係咳一下就以為自己有肺癌嗰種。
唔知結果嘅話會向衰嗰邊諗，而家知道結果係衰嘅，所以就諗得仲衰。
「如果係都要為呢份愛加上一個期限，我希望係一萬年。」
「如果」、「希望」
現實冇咁多如果，希望都只係希望。
我哋兩個喺不久將來嘅離別，唔到我哋兩個話事。
「知天易，逆天難。」
孔明洞悉一切都係無辦法扭轉命運，更何況我呢個平凡人邊一方面都唔可以拎嚟同孔明呢個天才相提並論。
諗到失咗神嘅我望咗望身邊嘅佢，佢挨住前面個椅背瞓到好似冇咗靈魂咁。
巴士就嚟到站，我拍咗拍佢膊頭。
佢坐直個身，伸咗個懶腰，捽咗捽眼，撥咗撥亂咗嘅頭髮。
「到喇？」佢問我。
「嗯，落車喇。」我充滿愛咁摸住佢長到掂到膊頭嘅頭髮。
「咁行落去先啦。」
瞓到懵下懵下嘅佢企咗起身，捉住兩邊嘅扶手左搖右擺咁慢慢向前行。
我喺後面緊貼住佢、保護住佢。
行得雖然有啲慢，但係佢都係平安咁落咗車。
呢件事好平常，但係就令我諗到啲嘢。
其實每個人都有單獨生活嘅能力，或者佢唔需要我。
我哋搭𨋢嚟到五樓嘅蘋果商場周圍行，見到得意嘅嘢就拎佢上手撚下。
嚟到一間扭蛋鋪出面嗰陣，我電話響，係我啊媽。
「企喺到聽咗先啦，我睇下啲扭蛋。」佢行入扭蛋鋪。
「喂，做咩啊？」我問佢。
「冇呀，幫你哋搵人算咗個好日簽紙。」
我屌，佢又嚟催我哋去簽紙。
「都話唔好急。」我有啲激動。
「啊公啊婆就嚟唔掂。」佢好平淡咁講。
「咁…」
喺我猶疑嘅時候，啊晴行咗返嚟我面前。

十一.
「簽。」佢同我講。

我拎開電話，唔比我啊媽聽到我哋嘅對話。

「但係…」

其他嘢唔講，失憶已經好大問題。

佢將手指擺咗我個嘴前面，要我收聲：「我話簽，你係咪有意見？」

「唔係啊。」

佢行到一部寫住「解答之卡」嘅抽卡機前面：「抽到好嘅就簽。」

我從來都唔信解答之書呢啲咁流嘅嘢，覺得佢比出嚟嘅答案唔係九唔搭八就係模稜兩可。

我拎咗個五蚊銀塞比佢：「抽。」

佢將個五蚊銀入咗落部機到，之後個出卡位就彈咗張黑色嘅卡出嚟。

佢拎起張卡睇咗睇，之後就塞咗比我。

我睇咗睇，個答案冇離題，都有好明顯嘅立場。

「這是一件好事。」

「咁好啦。」我拎返部電話埋嚟：「啊媽你一間Send個日期比我。」

講完，我就收咗線。

「講嘢要算數架。」佢蜻蜓點水咁點咗我個嘴一下。

「知道喇，唔通我逃婚咩。」我摸咗摸佢個頭。

我唔會逃婚，但係你就唔知喇。

「但如果到時你唔記得我呢？」我問佢。

「咁就就你責任喇。」佢谷起個腮，皺曬眉。

「吓，點解會係咁嘅？」

明明係你失憶，點解又會係我問題嘅？

「無論點你都要愛我、珍惜我同埋對我忠誠架嘛，你有冇聽過愛的宣言架？」

「知道喇晴晴公主。」我反駁唔到。

「行啦傻佬，成日諗咁多。」佢拖住我隻手。

發生啲咁嘅嘢，我可以唔諗咩？

嚟到七樓嘅一間格仔鋪，佢終於搵到佢鍾意嗰個插畫家租嘅格仔。

佢買咗一堆有大有細嘅貼紙，仲有一個透明嘅電話殼。

佢將啲貼紙逐個貼落電話殼到，原本單調嘅電話殼都因為咁樣而變得豐富。

佢望住個電話殼滿足咁笑咗笑，之後又嘟起咗個嘴。

「做咩嘟曬嘴啊？」我問佢。

「硬係覺得差緊啲嘢咁。」佢托住下巴諗咗諗：「我知差咩喇，跟我喇！」

我冇過問佢，就咁喺後面跟住佢上地鐵，好快就嚟到旺角。

十二.
我同佢嚟到T.O.P商場嘅底層，去到呢個時候我都終於知佢想做咩。

喺我哋面前嘅係一間自拍館，裡面有好多部可以影完即刻印嘅自拍機，仲可以喺張相到加啲濕鳩Effect同Filter。

「你特登拉我過嚟就係想影張相擺去電話後面？」我問佢。

「係啊。」佢拖起我隻手。

講完，我就跟住佢行咗入去。

過咗冇耐，我哋啲相就印咗出嚟。

我哋總共影咗四張唔同Pose嘅相，但係印出嚟嗰陣係打直連埋一齊。

佢拎住張相睇咗陣，之後就問人借咗把較剪。

「你係咪想剪開佢？」我問佢。

「係啊，你幫我？」佢將把較剪同相遞比我。

我冇答佢，淨係接咗把較剪同相，好小心咁將四張相剪返開。

過咗一陣，我終於將四張相剪返開。

我將啲相交返比佢，自己就去還較剪。

喺我轉身嘅時候，佢拉住我件衫。

「做咩啊？」

「把較唔好還住。」佢伸手。

可能係我頭先剪得唔夠細心，佢想修下個邊。

我塞咗把較剪比佢，以為佢淨係修個邊，點知…

佢直接將啲相疊埋，之後對半剪開。

「你搞咩啊？」

佢將其中一半塞落電話殼到，另外一半就塞咗比我。

「袋好佢，應該合埋一齊嘅時候就會合埋一齊。」

雖然我唔知佢咁做有咩含意，但都係將呢一半嘅相塞咗落銀包暗格。

「好啦，差唔多返去喇晴晴公主。」

「未返去住，仲有嘢要做。」

「仲有咩未做？」

「你之前咪話想紋返個情侶紋身嘅，我約咗我個紋身師中同，佢近排出師自己開鋪，冇理由唔撐場。」

事發突然，但係我都冇抗拒，因為呢單嘢我哋本來就Plan緊。

「但係個圖咩樣？」

呢個係我而家唯一想知嘅嘢，因為冇可能去到紋嗰陣先知個圖咩樣架嘛。

「去到你咪知囉，總之唔核突。」

「真係？」我都係有啲怯怯地。

「同你一齊十年，唔通紋身咁大件事都水你咩？」佢反問我。

啲濕星嘢佢可能會撚下我，但係大茶飯應該就唔會嘅。

「好似又係，咁行啦。」

講完，佢就拖起我隻手開始行。

要結婚了。
最後用愛令佢有翻記憶。

十三
我哋嚟到一個工廈單位，瞓咗喺紋身床上面玩電話嘅應該就係啊晴所講嘅中同紋身師。

呢到個裝修好簡潔，基本上係冇任何多餘同花巧嘅嘢。

單位裡面得一張紋身床、一張擺工具嘅木枱、幾個箱仔，同埋佢張木櫈，牆上面掛住嘅相應該就係啊晴個紋身師朋友嘅作品。

佢啲作品基本上全部都係得意嘅卡通人物，而且佢嘅客大多數都係女仔。

講真，佢啲作品唔算係差，甚至可以話係好優秀，但係我無辦法想像呢啲咁得意嘅嘢紋喺我個身到。

「我想問今日個紋身係咪都係行可愛風？」我問佢。

紋身師托著下巴，望咗望牆上面嘅相：「某程度上都係嘅。」

「咩叫某程度上？」我唔明佢咩意思。

「因為張圖基本上係啊晴畫，不過我改咗少少咁解。」佢企起身：「可以開始架喇，你哋想邊個先？」

「等陣先，我都未睇圖。」

「啊晴冇比你睇咩？」

「冇啊。」

「咁你過嚟啦。」

我嚟到佢隔離，終於見到我要紋嘅圖。

圖中係一個西瓜嘅劃切面，但係一粒核都冇，成個都係紅色嘅。

「一個…冇核嘅西瓜？」我黑人問號：「咁啊晴嗰個咩嚟？」

佢碌去下一張，而我就開始懷疑人生。

「你肯定冇開錯？」我問佢：「呢個真係情侶紋身嚟？」

我會咁問，係因為圖中得幾個好似瓜子咁嘅黑點。

「無開錯啊，張圖啊晴Send比我架。」

「Okay…咁要紋喺邊？」

「手腕把脈嗰個位。」

「啊晴，你認真架？」我嚟到啊晴身邊細聲咁問佢。

佢冇講嘢，淨係扤咗扤頭。

「你唔想紋？」佢問我。

我諗返起我張圖，其實都唔差。

「唔係啊，但係你嗰張。」

相比之下，佢嗰張真係唔知搞緊乜鳩。

「我知啊，我特登架。」

「咁你紋先啦，你張圖應該好快搞掂。」

十四.
啊晴瞓喺紋身床上面，而紋身師就坐喺隔離準備緊工具。

「啊晴。」紋身師突然開聲：「不如改改張圖佢？你而家嗰張真係唔掂。」

「啊心你話事啦，識你咁多年。」啊晴拍咗拍佢膊頭。

「咁我加返少少反光位落去？」啊心喺電話到畫咗幾下：「咁樣會好睇啲，但係要用白色。」

「白色有咩問題？」

「要紋好耐先上到色所以好痛，你驚唔驚？」

啊晴苦笑：「呢個紋身咁重要，可以整靚啲嘅，痛下又有咩所謂。」

啊心喺隔離整好咗張圖紙，之後消毒咗啊晴個手腕就貼咗張圖紙上去，一條條嘅藍色線就咁印咗落啊晴到。

「咁嚟喇喎。」啊心拎起紋身槍：「痛就嗌停，唔好郁，如果唔係會整親你。」

「收到你。」

我超驚佢會痛到搵嘢揸手，就喺啊心開始之前擔咗張櫈過去啊晴隔離坐低。

「洗唔洗啊？接生啊？」啊心嘲笑：「不過都好嘅，費事佢一間捉住我。」

好彩我哋都係坐喺啊晴隔離，如果有人坐喺佢前面，咁就真係同接生現場冇咩分別。

喺啊心準備落手嘅時候，啊晴突然開聲。

「如果我捉住你會點？」啊晴問佢。

「又唔會有咩意外嘅，不過我會打柒你囉。」

「咁都係算啦，我捉返我男朋友。」啊晴苦笑。

「你點話點好啦。」啊心開著枝紋身槍：「總之依家就開始喇，唔係嘅話我都唔知幾點先有得收工。」

過咗一陣，啊心閂咗枝紋身槍。

紋身終於完成，啊晴除咗上白色嗰陣用力揸咗我手臂一陣，其他時間都好淡定。

啊心幫佢個紋身包咗保鮮紙，之後就拍咗拍佢膊頭，要佢落床。

啊晴爬咗落床，同我換位。

「到你喇，咁我照加反光位？」啊心問我。

「可以啊。」我回應。

啊心重複咗一次貼圖紙嘅流程，之後就開始咗紋身。