3 Like
6 Dislike
白卡佬A.K.A叛龍
2023-01-09 12:14:41
十五
過咗一陣,啊心閂咗枝紋身槍,紋身完成。
「我Send咗個小冊子比啊晴架喇,你哋記得睇下有咩唔做得。」佢撳咗撳電話:「冇咩嘢就快啲走啦,我想收工。」
「我想問…」啊晴講啲唔講啲咁。
「有嘢講好快啲講喇。」佢準備收埋枝紋身槍:「你唔講就唔知等幾時先有得講架喇。」
聽到佢咁講,啊晴就捉住佢拎紋身槍嗰隻手:「我兩個想紋多個,你介唔介意?」
啊心黑人問號:「你有圖咩?」
「有。」
「我想收工喎,不如下次先啦?」
「唔複雜架,同埋…唔知有冇下次。」
真係唔知有冇下次,我哋嘅下次。
「下次下次 下次大概可以」
下次得大概,咁就今次搞埋佢啦。
啊心托住下巴,沉思咗陣就扤咗頭。
「咁好啦,你比我睇下先。」
啊晴搖咗搖頭:「張圖你有架喇,就係我哋手腕上面呢兩個。」
啊心對眉皺到可以夾死烏蠅:「紋多次同一個圖?」
「唔係,今次交換紋。」啊晴指咗指我,又指咗指自己:「我紋西瓜,佢紋核。」
「唔難嘅,咁你男朋友同唔同意先?」啊心望住我。
「我可以嘅。」我望住啊晴:「係咪紋喺另一邊手腕?」
佢扤咗扤頭,啊心即刻開始準備圖紙。
…
..
.
可能係因為啱啱先紋過同一幅圖,啊心好快就搞掂我哋嘅另一對紋身。
「冇嘢啦嘛?」啊心問佢。
「冇喇,條數一間過比你。」啊晴爬咗落床。
「你冇嘢問我,但我有嘢問你。」
「嗯?」
「你做咩講話唔知有冇下次?」啊心一邊收嘢一邊問:「同埋呢對紋身邊忽情侶?仲有交換紋又係咩事?」
我嘅疑問,同佢一樣。
「係囉,我都想知。」我摸咗下我個西瓜同核:「雖然幾得意,但都唔知有咩關聯。」
啊晴自己行咗去門口,擰轉頭整古做怪:「唔話你哋知喎,慢慢估下啦。」
呢條友真係,又喺到勾起我搵真相嘅慾望。
不過我真係未驚過,我就唔信一齊咗咁多年都摸唔透佢。
白卡佬A.K.A叛龍
2023-01-09 12:15:26
十六
我哋去樓下上咗返屋企嘅巴士,都係嗰個熟悉嘅座位。
我將隻手晾喺窗框上面,一直望住手腕上面嘅西瓜。
我個腦可能同個人一樣退化緊,冇好似中學嗰陣成個柯南咁。
我可以諗到嘅就得核係西瓜嘅一部分,但係呢樣嘢到底情侶咗去邊?
再講吖,就算我諗通咗呢兩樣嘢點情侶法,但係我同佢又唔係偷情,光明正大咁拍拖唔洗咁隱晦啊嘛?
雖然我摸唔透紋西瓜同核嘅原因,但係我諗到啲新嘅Idea。
「晴晴公主?」我依然望住窗外。
「做咩啊?」佢問應。
「不如我同你表白,同埋求多次婚好冇?」
「做咩咁突然嘅?」
「冇啊。」我轉身面向佢,輕輕咁摸住佢啲頭髮:「一齊嘅時候冇比你享受過表白嗰下浪漫,求婚嗰陣又喺街。」
「你知我唔鍾意韓劇嗰啲懶浪漫嘅濕鳩情節架。」
比起浮誇又唔實際嘅浪漫,我哋鍾意現實嘅浪漫多啲。
唔洗上山下海、飛天遁地,淨係要你陪我過埋呢一世,就算有幾平凡,都好似上咗粉紅色Filter咁。
淨係要你陪我過埋呢一世,邊忽浪漫?換個角度諗啦。
兩個人嘅呢一世,都淨係屬於對方。
仲唔夠浪漫咩?
「咁又係,不過我想啫。」
「你知唔知呢啲嘢最緊要係驚喜?」佢用手敲咗我額頭一嘢:「你而家講咗比我聽咪無曬驚喜囉!」
「好似又係。」我苦笑。
講完,我就轉返去望住窗外。
「叮!」
電話響,係我啊媽。
佢Send咗個日期過嚟,應該就係佢搵人算出嚟嘅日子。
個日期係三十二日後,唔算係好耐,但到時啊晴可能已經唔記得我。
不過就算佢仲記得我,我都說服唔到佢。
話曬一個「陌生人」突然變咗做老公,呢單嘢仲難接受過男人有咗。
香江第一淫棍
2023-01-10 02:35:10
白卡佬A.K.A叛龍
2023-01-10 12:28:38
十七.
「你媽子係咪Send咗個日期嚟啦?」佢問我。
「係啊。」我遞部電話比佢。
佢望咗望,然後又拎自己嗰部出嚟撳咗撳:「Mark低咗,啱啱同老細講埋。」
我望住窗外,擰轉頭想講嘢,但係句嘢去到喉嚨,又比我吞返落去,擰返去望住窗外。
我諗佢應該留意到,因為佢睇穿曬我。
「你係咪有嘢想講?」佢問我。
果然。
我組織好要講嘅嘢,但係唔夠膽講出口,更加唔夠膽面對住佢嚟講。
「你真係想知?」我問佢。
我都只不過係喺到搏緊嗰少少嘅機率,話曬我同佢一齊咗成十年,佢多多少少都開始有啲似我。
「我理得你講好嘢定講衰嘢,總之我要知。」佢齕個頭埋嚟:「跟你學架!」
「打爛沙盆問到篤」係最能夠形容我嘅一句說話,睇嚟而家都係最能夠形容佢嘅一句說話。
「好似又係。」我苦笑:「咁你唔好嬲喎。」
「唔會嬲啊。」
我吸咗大大啖氣:「到時你好大機會已經唔記得我。」
「好大機會,即係唔係一定啦。」佢挨住我膊頭:「當年你封信都唔係百分百成功啦,你又咪係做咗。」
「咁又係,都係搏一搏啫。」我摸住佢個頭:「唔搏你依家就唔會坐喺我隔離啦。」
「你知唔知點解你會搏?」
我知佢有嘢想講,但我估唔到佢想講咩。
「因為我想。」
「咁點解你會想?」
想就係想,可以有咩原因?
「想呢啲嘢,邊有原因架。」
「因為一會比感性影響。」佢撳咗撳電話:「如果人唔感性,就有好多嘢都唔會做,就唔會有咁多奇蹟。」
講完,佢就開咗個新聞比我睇。
個新聞係講緊有個植物人喺父母陪伴十年之後醒返,仲行得走得。
我冇講嘢,淨係扤咗扤頭表示睇完,等佢繼續講落去。
「因為感性,佢父母先會一直陪住,因為佢哋一直陪住,先會有奇蹟。」佢用嘴唇點咗我塊面一下:「感性咗一日,就一直感性落去啦。」
「所以…」
我想講嘢,但佢就將食指擺喺嘴唇前面叫我收聲。
「有病嗰個都未講放棄,你唔準講放棄。」佢笑咗笑:「「冇人話我唔可以係奇蹟嘅主角。」
除非佢自己走咗去,如果唔係其實我冇放棄嘅原因。
既然感性引導我去同佢一齊,咁點解要用理性嚟思考發生喺佢身上嘅呢件事?
香江第一淫棍
2023-01-11 03:16:04
最後,點解失憶又回復記憶, 全部都係非理性,不可深究。
白卡佬A.K.A叛龍
2023-01-11 12:02:51
十八.
因為已經過咗繁忙時間,巴士除咗會因為紅燈而停低之外,其餘時間都暢通無阻,所以我哋都好快就返到屋企。
返到去嗰陣已經好夜,我哋沖咗沖身就即刻上床。
佢嘅上床係包埋瞓教,但我嘅上床就淨係得字面意思。
今日行咗好耐,佢攰到一攤上床就即刻扯曬鼻鼾。
我對腳好攰,好似人哋做完Gym咁識自己震,但個腦就仲好活躍,點都瞓唔著。
我爬咗落床,喺屋裡面慢慢咁行嚟行去。
佢好快就會唔記得我,就好似我從來冇喺佢生命入面出現過一樣。
佢記憶中嘅呢十年冇咗我嘅存在,但我冇辦法當呢十年嘅佢唔存在。
以前我成日都會同班friend講笑話自己比啊晴困咗成十年,好似Freeze咗嘅projector咁,唔識跳去下一個畫面。
但去到而家我先發現,原來愛就好似埋藏喺地底嘅炸彈一樣。
你睇唔到佢,亦都唔會特登挖佢出嚟,但當你係無意中發現咗佢、引爆咗佢,你先發現原來佢仲係咁爆得。
或者咁講,其實佢一直都好爆得,只不過冇嘢去觸發佢、冇人去發現佢。
呢個世界有好多細節嘅嘢會比人忽略,但當你仔細去觀察,你就會發現好多嘢。
呢間平平無奇嘅屋裡面比人忽略嘅細節,正正就係我同啊晴一齊生活過嘅證據。
一把黐住唔同顏色頭髮嘅梳、有半邊坐到梅晒嘅梳化、左鹹濕Figure右得意公仔嘅電腦枱。
呢啲全部都係佢係呢間屋存在過嘅證據、佢同我一齊生活過嘅證據。
我以前都唔會去留意呢啲嘢,因為啊晴就喺我身邊,所以我唔需要證明佢存在。
香江第一淫棍
2023-01-12 02:49:25
白卡佬A.K.A叛龍
2023-01-12 12:10:41
十九.
或者人就好似香港政府一樣,從來唔會在意啲焦點以外嘅嘢,去到佢就嚟消失嗰陣先話可惜、先去保育,但可惜為時已晚,做咩都係徒勞無功,只能夠睇住佢消失。
「閻王要人三更死,誰敢留人到五更?」
有啲嘢就好似人死咁,你做咩都阻止唔到,就好似啊晴要失憶同埋⋯
要離開。
…
..
.
因為琴晚我唔想爬上床嗰陣嘈醒啊晴,所以直接攤喺梳化到瞓着咗。
可能係因為隔離少咗個人碌嚟碌去,得閒又踢我幾腳咁,我今日瞓到好晏先起身,個鬧鐘響到鬼打咁嘈都叫我唔醒,而啊晴就係見我瞓到咁爽所以冇叫醒我。
雖然我咁講,但其實我都係鍾意啊晴瞓係我隔離多啲。
半夜無啦啦比人整醒的確係幾辛苦,但因為我愛嘅人喺隔離,所以我會將呢啲辛苦稱為「幸福嘅重量」,類似嘅例子包括搞太多次野搞到碌鳩痛。
另外一樣嘢就係…
我今日要見客啊屌!
我即刻彈起身,求其執咗執、刷個牙就即刻衝咗出門口。
佢約咗我喺黃大仙,我依家搭巴士絕對趕唔切,一定要搭紅的。
我唔係基督徒,但我搭𨋢嗰陣都係好誠心咁祈求耶穌打救我,因為等急症仲快過等我屋企樓下有紅的到,而家仲要係交更時間,想Call都未必Call到。
唔知係我成日扶啊婆過馬路所以好人有好報,定係耶穌見到我咁誠心所以出手打救我。
一架紅的就好似沙漠中嘅綠洲咁停泊喺馬路對面嘅的士站,而我就好似一個喺無飲水情況下喺沙漠行咗成日嘅人咁向住架紅的衝過去。
我好成功咁上到車,跑咗幾步嘅我有少少喘,冇辦法即刻講到比佢聽我要去邊。
「靚仔唔洗咁急喎,唞順條氣先啦。」司機對住倒後鏡同我講。
香江第一淫棍
2023-01-13 02:47:11
白卡佬A.K.A叛龍
2023-01-13 12:01:39
二十.
我睄咗佢一眼,見到佢成頭白曬,個樣仲好慈祥,應該都係退咗休嚟打發時間嗰種人。
我唞順條氣之後就同佢講咗要去邊,佢開車之後就一直撩我講嘢。
我以為佢純粹係想有人同佢傾下計,唔覺得佢有咩陰謀,所以我都冇抗拒同佢傾計。
但原來佢嘅目的冇咁單純,佢真正嘅目的係想分散我注意力。
因為我掛住同佢傾計,根本就冇留意過車窗外面嘅環境,亦都冇睇過時間。
我望咗望電話先發現,原來由我上車起計已經過咗八個字。
明明搭的士半個鐘點都到,點解而家八個字都仲未到?
明明都唔係繁忙時間,就算個個紅燈都停都唔洗咁耐。
我望向窗外,梗係覺得有啲陌生。
再望多眼,點解喺山上面嘅?
我腦中閃過一個山名…
「慈雲山」
我屌,佢趁我掛住同佢傾計,兜撚咗上慈雲山!
而且我肯定佢唔止兜咗上慈雲山,因為兜上慈雲山都唔洗咁耐。
真係古語有云:「人不可貌相。」
見佢個樣咁慈祥,點知原來都係DC9。
如夢初醒嘅我,對眼著曬火咁望住佢。
「我屌你啊!」我直接鬧佢。
佢笑而不語,氣定神閒咁繼續揸車,而我都吹佢唔脹。
過咗一陣,佢終於落咗山,而我都終於可以落車。
雖然的士錢比預期貴咗好多,但我已經冇時間去同佢拗,揼低齊頭四百蚊之後就連散紙都唔要就衝咗落車。
我急急腳咁行上去我同個客約好咗嗰間餐廳,好彩佢冇走。
但同時唔好彩嘅嘢係…
佢塊面黑過包青天。
我坐低之前嚟咗個九十度鞠躬,坐低之後又雙手合十咁不斷耍冧。
希望佢會受落啦,因為呢個客都幾重要下。
香江第一淫棍
2023-01-14 02:54:57
白卡佬A.K.A叛龍
2023-01-14 12:06:24
二十一.
佢微笑住咁向我表示理解呢啲無辦法避免嘅情況,仲話自己都遇過唔少DC9,所以…
佢起身走咗。
表示理解唔代表唔嬲,就好似法官會認同被告身世好慘,但唔會因為咁就判佢無罪。
雖然又走咗個大客,但係我已經無曬Feel,因為走大客呢啲嘢…
包埋呢次,今年已經發生咗三次。
我認今次係我錯,但另外兩次真係唔關我事。
一次就地鐵出軌,一次就炒車塞死曬。
做嘢唔順利都算,連啊晴都出事。
唉,今年個運真係衰到貼地。
我行過黃大仙廟宇廣場,停落嚟望住個簽品哲理中心。
雖然我唔係好信算命諸如此類嘅嘢,但係衰到咁,去聽下都好。
我入去行咗一陣,基本上坐低都要幾舊水,出名啲嘅師傅甚至要四位數字。
「知天易,逆天難。」
對於我呢個窮撚嚟講,連知天都好難。
喺我心灰意冷、諗住走嗰陣,眼尾睄到一間別樹一格嘅鋪頭。
人哋用白燈,佢就用粉紫色燈,成個雞竇咁款。
人哋幾樣衰都比你見到個樣,佢就立牌板喺到阻住曬,好似佢個樣唔見得光咁。
人哋就貼一大堆嘢喺門口吸客,佢就咩都唔貼,懷疑係唔憂做。
有啲同我一樣咁怪嘅嘢,梗係要去睇下啦!
我行過去,到門口先見到佢鋪頭裡面嘅一個牌匾。
「向水登」
雖然讀起嚟好怪,但我相信呢個就係呢間鋪嘅師傅個名。
「Hello啊。」我禮貌咁打咗個招呼:「想問有冇人喺到?」
「係,請講。」
立牌後面傳嚟一把聲,一把女聲。
我有啲驚訝,正諗住問佢點解入到行,但佢就好似估到我想講咩咁。
「你想問我點解入到行?」佢繼續講:「而家冇性別定型架喇,同埋上網咩都有,洗鬼求人教咩。」
香江第一淫棍
2023-01-15 03:10:36
白卡佬A.K.A叛龍
2023-01-15 14:43:56
二十二.
所以佢係自學嘅,咁我又有下一個問題喇。
信唔信得過架?
「掂唔掂架?」我問佢。
「唔掂我都唔會咁夠膽死開鋪啦。」
咁講都啱,暫且信你有啲料到。
「咁我想問,淨係算今年要收幾錢?」我問佢。
「基本版定連埋DLC?」
而家算命仲有DLC,都幾跟得上潮流。
但係…佢個DLC係啲咩嚟?
「我想問個DLC係咩嚟?」
「我做算命架嘛,基本版淨係包算。」佢繼續講:「DLC咪教埋你點趨吉避兇囉。」
「咁要住個基本版先,想問幾錢?」
都唔知你準唔準,咁快就想賺到盡?你都痴線架!
「一百,聽完再加DLC都得嘅,還掂DLC都係一百。」佢繼續講:「自己八字知唔知?唔知就講年月日時分。」
「二零零四年二月廿一日夜晚十一點五十九分。」我回應。
「收到你。」
講完,我就聽到撳原子筆嘅聲,應該係佢準備寫嘢。
我坐喺到靜靜咁等佢,而立牌後面就得返原子筆喺紙上面寫嘢嘅「嚓」聲。
過咗好耐,我終於聽到佢擺低筆。
「你想聽邊方面先?事業、愛情定係你有其他嘢想知?」佢問我。
講真,我覺得我今年飯飯都一鑊泡咁,聽邊個先都冇咩分別。
「你喜啦,講邊個先都一樣。」我回應。
「咁講事業先啦,我驚其他你接受唔到。」
「你都好貼心吓喎。」我苦笑。
「咁梗係,我哋呢啲服務業嚟架嘛。」佢繼續講:「事業方面唔太掂喎,成日都比啲突發事件阻住。」
第一句就中咗,好似真係有啲料到。
「地鐵出軌算唔算係突發事件?」
「你自行判斷啦,不過今年淨低嘅日子你都應該係冇咩心機做嘢,因為比情緒影響。」
第二句又中,有冇啊?
「咁愛情呢?」
「基本上,你所有不順都係由愛情引起。」
「某程度上嚟講係。」
自從啊晴出咗事,我真係負面咗好多。
香江第一淫棍
2023-01-16 01:42:26
算命會同劇情有關。
白卡佬A.K.A叛龍
2023-01-16 12:09:55
二十三.
「你另一半好似比啲怪病纏身喎。」
「你又算到咩?」我苦笑:「佢有咩事?」
「同記憶有關,我估係失憶。」
「其實係老人痴呆。」我扮曬認真咁講。
「咪撚啦,廿幾歲同我講老人癡呆,你食煙食壞腦啊?」
「都係。」
得廿幾歲,想老人癡呆都難。
等陣先,佢點知我食煙架?
「你點知我有食煙?」我索咗索自己手袖:「唔係好重味咋喎。」
「我屌你啦,你啲煙味飄到我成間鋪都係啊!」
「有冇咁誇啊?」
我唔係好信,但都係道咗個歉。
「咁我想問有乜解救?」我問佢:「洗唔洗搞啲咩法事或者戴啲咩咁?」
事實上我都只係問下,因為通常搞呢啲嘢都好貴。
「買埋個DLC話你知。」
佢擺到明想呃錢,不過我都洗咗左邊頭,冇理由唔洗埋右邊,還掂我又唔係窮到比唔起一舊水。
「得,你講啦。」
「好,你呢個窮作家記得唔好走數。」
「我幾時講過?」
我明明咩都冇講過,點解佢又知?
「我把炮囉,咩啊?」
算啦,唔問落去。
可能啲算命嘅人真係咁勁,如果唔係算命呢樣嘢都唔會流傳幾千年。
「咁你可以講點搞返掂佢未啊?」
「發生喺佢身上嘅事一啲都唔自然。」
「呢個我都知。」我有啲無奈。
頂你啊,呃錢都唔係咁呃啩,你呢句嘢同堆填區啲垃圾一樣架喎。
「應該係比人落蠱或者落咒。」
雖然我本身唔信呢啲嘢,但係更荒謬嘅事都發生咗,真係唔到我唔信。
「咁你有冇辦法搞掂先?」
「解鈴還須繫鈴人。」
如果我知邊個搞就一早搵咗佢出嚟啦,仲洗搵你咩?
「即係冇辦法?」
「我冇,但你有。」
「多謝曬喎。」我暗串佢。
「冇嘢問啦嘛?」佢喺立牌上面伸隻手出嚟:「冇就比錢走,唔好阻住我做生意。」
我將兩舊水塞落佢隻手到,之後就起身想走。
「送多句比你。」
「又點啊?」
「嗰條友你哋都識架。」
「多謝。」
又講廢話,真係成行比你搞軭曬。
香江第一淫棍
2023-01-17 01:29:02
呢個解釋唔錯
白卡佬A.K.A叛龍
2023-01-17 02:26:10
但佢同邊個有仇口,又係未知。
香江第一淫棍
2023-01-18 02:34:29
等你揭秘,一路製造懸疑,一路解迷追蹤。
讀者有一齊追住睇嘅感覺。
白卡佬A.K.A叛龍
2023-01-18 12:25:41
二十五.
「你條女係咪失憶?」佢問我。
「你點知架?」
知道呢件事嘅得我、啊晴、「向水登」,仲有…
醫生!
「你係醫生?」我問佢。
唔知點解,我對佢個樣完全冇印象。
「我係邊個同點解我知都唔重要,總之你要信我。」佢搭住我膊頭。
喂,唔好攬頭攬頸好喎,我唔識你架喎。
「我點解要信你?」
未識你就叫我信你,你當我好似小朋友咁易呃啊?
「你條女係向晴,你哋今年廿八,你哋第一次扑嘢喺商場天台,你條嘢…」
佢想繼續講落去,但比我打斷咗:「得,我信。」
你都講咗咁多啦,我都冇得唔信,關於我條嘢就…
有苦自己知。
「你都知佢係比人落咗嘢架嘛?」
「我知啊,你又知啲咩?」
我已經覺得佢知係唔出奇,淨係想知佢有冇更多嘅資訊。
「原諒我唔可以直接幫你,因為我唔可以犯行規。」
「咩行規?」
「行規講明,唔可以用所學嘅嘢嚟做壞事,但就算係壞事,同行都唔可以對佢做嘅嘢或者佢本人落手,更加唔可以再對佢個目標做嘢。」
呢個係邊行嘅行規?
唔比做壞事,但做咗其他人又唔可以阻止佢。
「咁佢會有啲咩懲罰?同埋點解行規會咁Set?」我問佢。
「佢拜師嗰陣發過嘅毒誓會生效同埋失去運用所學嘅能力,而行規會咁Set嘅原因係要尊重每一個人運用所學嘅權利。」
照咁講,即係搞啊晴嗰個已經出咗事?
「等陣先,咁咩算係壞事?」
法律存在灰色地帶,因為所有嘢都冇絕對嘅好同壞、啱同錯,甚至好同時可以係壞、啱同時可以係錯。
破壞即是創造,失去即是得到。
破壞一段友誼,創造一段戀情。
失去一個戀人,得到一個教訓。
「冇人知。」
「都合理,咁做嘢嗰個點啊而家?」
「佢冇事。」
「即係話我同啊晴一齊係壞事,所以拆散我哋係好事?」
白卡佬A.K.A叛龍
2023-01-19 12:04:01
二十六.
佢沉默咗一陣,嘆咗啖氣:「恕我冒犯,某程度上係。」
「其實都唔冒犯嘅,講事實嗜。」我苦笑。
佢講得好隱晦,畢竟有啲嘢我自己知就得。
畫公仔唔洗畫出腸,因為冇人想知成日食煙嘅米奇老鼠個肺係黑色。
「咁你嚟搵我係想?」我問佢。
「我想幫你,因為我覺得你同佢一齊唔係壞事。」佢拍咗拍我膊頭:「你係一個好男人,只不過你冇車冇樓冇錢啫。」
唔洗講到咁直啊嘛?
「多謝你,雖然後面嗰堆有啲難聽。」我苦笑:「咁你仲可以點幫我?你都唔可以出手。」
「我唔可以出手啫,但你可以啊嘛。」
「我咩都唔識,點出手?」
「我會比樣嘢你用。」
講完,佢就伸手入大褸嘅內袋。
有咩嘢需要擺落內袋?成件事好唔對路。
我撳住佢隻手:「喂咪呀,呢啲嘢我做唔出。」
「咩做唔出?」
「你唔係要比嘢我隊冧嗰條友咩?」
「大佬啊,呢到香港嚟架,搵枝槍比你好難架。」佢反咗反白眼:「更何況我哋呢行啲人冇咁暴力。」
「咁你要拎啲咩?」
我鬆手,佢喺內袋拎咗一枝用紅線織成嘅棍出嚟。
「呢個你拎去。」佢將枝棍遞比我。
我接住枝棍,上上下下都望咗一輪:「呢枝嘢有咩特別?」
「呢枝係用九百九十九條紅線織埋一齊嘅棍。」佢解釋:「月老用一條紅線連住兩個人,既然一條比人剪咗,咁我就幫你用九百九十九條連返佢。」
「咁枝嘢點用?」
「你哋到時一人摸住一邊,成功嘅話佢就會記得返曬啲嘢,另外就係做嘢嗰條友同我都一定要在場。」
「點解做嘢嗰條友同你要在場,同埋失敗嘅話會點?」
「解鈴還須系鈴人,所以做嘢嗰個要在場,但你哋唔洗佢解,因為枝棍會幫你哋炸開個結,而我要在場就係因為枝棍係我整嘅,只要我唔在場佢就咩用都冇。」
香江第一淫棍
2023-01-19 23:15:20
雙花大紅棍。
個醫生識玄學嘢。
白卡佬A.K.A叛龍
2023-01-20 03:53:48
Mix 咗好多中國奇怪元素
白卡佬A.K.A叛龍
2023-01-20 18:46:32
二十七.
「如果失敗嘅話…」佢清咗清喉嚨:「你哋再努力都冇辦法喺返埋一齊,而你哋呢一世都唔會再有愛情。」
「如果係咁…」我將枝棍遞比佢:「我唔需要喇。」
呢個睹注太大,就算啊晴承受得起,我都唔想佢承受。
「我比咗出去嘅嘢,同潑咗出去嘅水一樣,用唔用係你嘅事。」
「咁…」我將枝棍收落褲袋:「多謝。」
「唔洗多謝,路見不平,拔刀相助啫。」
「咁我到時點搵到你同做嘢嗰個?」
「我自己會嚟,做嘢嗰個就要靠你自己喇,我唔可以透露自己或者同行嘅身份。」
「明白,咁我仲有咩要做?」
「你自己知。」
或者,我真係知,但我唔知點樣去做…
喺知道最壞結果係點嗰陣去做。
「後會。」佢摸咗摸我個頭。
佢摸完我個頭之後,我睇嘢開始變得好朦、眼皮變得好重,最後就咁瞓著咗。
過咗唔知幾耐,我終於醒返。
我望出窗,見差唔多到就起身衝落去。
我一落車,就聽到烏鴉叫。
喺到住咗咁耐,真係第一次聽到烏鴉叫。
我顎高頭轉咗個圈,終於搵到隻烏鴉喺邊。
佢企咗喺我幾個身位外嘅一碌燈柱頂,面向住我。
我唔知佢望緊邊,但我感覺佢同我對緊眼。
同佢對望咗幾秒之後,佢扤咗下頭再叫多聲就飛走咗。
唔知點解,我覺得佢好似比人控制緊咁。
或者,係我諗太多。
電話響,係啊晴。
「你到未啊,等咗你好耐喇!」
我一聽,佢就即刻開波。
「唔好嬲啦晴晴公主,一間加多碗雲吞比你。」
「哼!你敷衍我啊?」
「咁加埋可樂同雪條呢?」
「咁就差唔多,Muah!」
「好啦,咁你等我一陣啦。」
「快啲啊!」
講完,佢就收咗線,而我就去買雪條。
好快我就拎住雪條嚟到魚蛋粉鋪,而我哋嘅魚蛋粉同佢嘅雲吞仲有可樂已經擺咗喺枱面。