[中六續集][愛情][懸疑？]擁抱，失憶(重修版)

二十八.
我未行到埋去，佢已經起身衝咗埋嚟。

佢想伸手搶雪條，而我都即刻舉高手。

「喂呀！」佢皺曬眉、扁曬嘴，成個嬲嬲豬樣出曬嚟：「我要食雪條！」

「唔準啊，食完正餐先可以食甜品啊！」我趷高腳。

呢個時候，老闆娘已經喺側邊潛行咗去我後面。

「接住！」我將雪條拋比老闆娘。

佢接住條雪條：「收到，幫你擺落冰格。」

講完，佢就拎住條雪條行返入廚房。

「你又幫住佢呢個傻佬！激死我啦！」啊晴叉住腰。

「乖啦晴晴，下次幫你。」老闆娘單咗單眼：「我最錫你架嘛。」

「哼，你下次再唔幫我就上網唱衰你！」

佢呢句嘢應該講過不下十次，但我仲未見到佢行動，而我都肯定佢唔會行動。

人情味嘅嘢，淨係得把口硬。

你今日同老闆娘嘈到反曬枱，對上十八代都鬧過曬，但你聽日返嚟，佢都係會整多幾粒魚蛋比你。

「打是情，罵是愛。」

佢把口就咒你死，但其實最唔想你死、最想你好嗰個就係佢。

你唔止係客，佢都唔止係主，所以佢先唔會對你客氣，因為熟嘅人唔會對你客氣。

我跟住啊晴返去坐低，而老闆娘就𢳂咗兩粒魚蛋落佢碗粉到。

「唔好嬲喇。」老闆娘用膊頭輕輕咁撞咗撞佢。

啊晴好似小朋友比人請食糖咁笑咗起嚟：「多謝老闆娘！」

「得喇，有邊次唔送多兩粒比你。」老闆娘拎咗包魚皮過嚟擺喺枱面：「送多包魚皮比你啦。」

「做咩送到好似唔洗錢咁嘅？」我問佢。

「唔通留嚟揼咩？」佢嘆咗啖氣：「做埋呢半個月就唔做喇。」

我有啲意外，但又唔係好意外，因為老闆娘都幾廿歲人，係時候休息下。

「咁突然嘅，都冇聽你講過，門口又冇貼通告。」​​​​​​​

二十九.
「唔啦，一貼完就好多人嚟，到時我做到隻積咁，未退休就過勞死。」
「比人知道下都好啊。」
你唔做咁大件事都唔講，好對唔住啲熟客啫。
「個個知我就嚟唔做，傷心到喊曬口咁點食條毛咩！」
有啲嘢，望住佢慢慢消失，伸痛苦過佢突然消失。
「好啦好啦，你係老闆娘，你揸旗啦。」
「你哋快啲食啦，啲嘢凍曬喇！」
「收到你。」
講完，佢就行返入廚房坐低休息，而我同啊晴都開始食嘢。
過咗一陣我哋就食完碗粉同雲吞，老闆娘都拎咗條雪條比啊晴，魚皮就留比我一邊食一邊等啊晴。
佢食食下雪條，突然好似諗到啲咩咁「啊」咗聲。
「做咩啊？」我問佢。
「我想問呢…」佢伸手入件衫到拎條鍊出嚟：「呢條鍊係邊個送架？」
條鍊上面有一個珍珠奶茶造型嘅吊墜，之前個吊墜出嗰陣佢已經覺得好得意，成日行過見到都昅到實一實，但問佢要唔要，佢又會話舊嘢好怪，叫我唔好嘥錢。
講真，傻嘅都知佢有幾想要啦。
見佢咁想要，我後尾就喺某個節日偷偷地咁買咗嚟送比佢。
「我送架。」我回應。
「幾時嘅事？」
「我唔記得喎。」我開電話：「你等我一陣。」
突然咁問我真係唔記得，如果知道條鍊係幾時送，我就可以知道佢每一日會忘記幾多嘢。
因為佢條鍊連埋個吊墜都唔平，所以張單應該就喺銀包，因為所有貴嘢嘅單我都會收曬落銀包暗格。
我拎疊單出嚟，好快就搵到佢條鍊張單，因為事實上我冇錢買貴嘢，疊單其實得幾張。
因為大多數嘅單都係好易甩色嘅熱感紙，而呢張都唔例外。
基本上成張單有九成嘅字都已經甩到睇唔到，但好彩日期嗰個位嘅日同月都仲隱約見到。
我瞇埋眼睇咗陣：「半年前。」

新年快樂！

三十.
「嗯，半年。」佢嘆咗啖氣：「三十二日後就會忘記足足十六年嘅嘢。」
「十六年即係你十二歲之後嘅嘢都唔記得。」我補充：「即係到時你甚至連我個名都唔記得。」
十二歲先啱啱升中一，佢嗰陣可能都冇留意我個名。
「唔係嘅，可能我會記得呢，升中學嗰陣有睇過張班別名單架嘛。」佢苦笑。
「希望啦。」
「行啦，食枝煙返屋企。」
我哋點著枝煙行出去，喺鋪頭對出嘅石壆坐低。
食食下，佢突然叫我。
「做咩啊？」我問佢。
「你望下後面。」
我擰轉身望去後面個草叢，搵咗一陣終於見到草叢裡面有隻蝙蝠，佢一比我見到就即刻飛走。
雖然而家成日都有人話喺市區見到蝙蝠，但我哋住緊呢區暫時未有人見過。
「我淨係見到一隻。」
「我都係。」
咁就仲奇怪，因為蝙蝠通常都係一堆咁出沒。
啱啱見到烏鴉，而家見到蝙蝠。
唔知點解，我覺得呢件事好唔尋常。
一個光明正大咁企喺燈柱上面，一個匿埋喺草叢裡面。
一個係對住我扤頭，一個係見到我就走。
佢哋嘅行為好奇怪，做啲嘢同平時好唔同，仲好似有意識咁想同我交流。
我絞盡腦汁，但都係得唔到一個答案。
啊晴返到屋企之後就開始煲劇，而我呢個好男人就梗係陪佢一齊煲啦。
雖然我個人就坐咗喺佢隔離，但我係一邊做嘢一邊睇，基本上淨係知個劇情大概係點。
睇睇下，啊晴突然狂拍我膊頭：「個男主角好型啊！佢識控制動物架！」
我擰個頭過去睇咗陣，見到個男主角用意識嚟控制隻老虎。
我睇咗陣，就諗返起今日嘅蝙蝠同烏鴉，仲有喺巴士上面比人摸暈咗。

由第一部愛情故變奇幻故。

三十一.
佢唔似係用某啲嘢嚟整暈我，因為我起身之後冇任何唔舒服嘅感覺。
巴士個啊伯可以徒手摸暈我，咁可以控制埋動物都唔出奇。
唔通嗰隻蝙蝠同烏鴉都係比人控制咗？
一個同我對望，一個見到我就走；一個在明，一個在暗。
如果真係有人可以控制動物，啊伯有可能就係控制烏鴉嘅人。
因為啊伯係想幫我，所以佢唔怕比我見到。
如果呢個推論冇錯，控制蝙蝠嗰個就係喺背後搞鬼嘅人。
但係我知道呢啲嘢都冇用，因為控制隻嘢嘅人都唔知係邊，啊伯應該都唔會答我，因為聽佢咁講，佢應該都幾睇重行規。
「嗰條友我識」
呢個係我唯一嘅線索，但我身邊根本冇人似係識啲咁怪嘅嘢。
等陣先，好似有啲問題。
「我識」
我識，唔代表係我身邊嘅朋友或者諸如此類。
「叮！」
電話響，係我以前中六嘅班主任。
「想搵你班友聚下，跟手燒個靚烤，你嚟唔嚟？」
「可以啊，幾時？」我回覆。
「聽晚七點去到十二點啊，我哋連埋隔離班一齊搞。」
「隔離班？」
「D班啊，你個舊情人向澄嗰班。」佢暗地抽緊我水。
「講呢啲，聽日見啦。」
「帶埋女朋友嚟都冇所謂架！」
「做咩啊？」啊晴問我。
「聽日中同聚會，你跟唔跟埋我去？」我回應。
「夜晚？」
「七至十二。」
「可以啊。」
「咁今晚早啲瞓喇喎，聽晚仲要玩到咁夜。」我拎走佢部電話。
「好啦好啦。」佢瞓好、冚好被。
我拎完佢部電話去叉電之後，我突然諗到一樣嘢。
「我識」係包括咗我啲中同，雖然我唔係成日聯絡佢哋，但佢哋始終都算係我識嘅人。
如果係咁嘅話，聽日我要比啲心機留意先得。
話唔定…
嗰個人就係我嘅中同。

中國特色嘅奇幻

三十二.
第二日我哋好早就收咗工，返去換件衫就一齊去咗我中學到。
因為嚟之前我同班主任，亦即係今次嘅搞手講咗聲，所以好多人都好似接明星機咁喺門口排開迎接我哋。
講真嗰句，尷到傻。
我哋快步咁穿過人群，行到去大堂嘅接待處，而佢哋都終於散開。
班主任同幾位熟少少嘅舊同學過嚟同我寒喧咗幾句，之後就行返去球場繼續燒嘢食，而我哋填完訪客名單之後都跟埋上去。
雖然話係熟少少，但都只係叫得出個名。
因為人數眾多，所以我哋都要分開幾個爐嚟燒，一個爐大概可以坐四至五個人。
唔知班友係想做鳩我定原本就係咁，我哋行到過去嗰陣已經得返啊澄個爐有位。
啊澄隔離坐咗個著住成套黑色西裝嘅男人，應該就係佢男朋友。
雖然我係鍾意女人，但佢男朋友真係型到差啲整彎埋我。
「你介唔介意？」我問啊晴：「你介意嘅話，我可以去起個新爐。」
畢竟我哋三個以前都有啲嘢，啊晴可能會唔歡喜。
「唔洗啦，我好肚餓，淨係想快啲有嘢食。」佢答我。
「介唔介意？」我問啊澄。
啊澄望向身邊個男人，男人即刻擰咗擰頭。
啊澄扤咗扤頭：「請。」
「唔該。」我同啊晴坐低。
因為個爐係長方形，所以我哋坐嘅時候係對正啊澄佢哋。
我對住啊澄嘅男朋友，而啊晴就對住啊澄。
我坐低之後一隻字都冇講，嗱嗱臨開始燒嘢食。
除咗係因為想啊晴快啲填飽個肚先，都係因為我驚講錯嘢，搞到個場面好尷。
我哋四個粒聲唔出咁燒嘢食，外人睇落好怪，但我覺得咁樣係最舒服嘅狀態。

三十三.
過咗冇耐，我聽到後面傳嚟烏鴉叫。
我轉身望過去，呢隻烏鴉同上次嗰隻一樣，企咗喺燈柱頂。
又或者…係同一隻。
佢比我望到之後，就即刻起飛。
我視線一直緊隨住佢，直到佢降落喺籃球框上面，亦即係啊澄後面。
「啊晴你睇下。」我指住隻烏鴉。
啊晴望過去，烏鴉就隨即向我哋點頭示好。
啊澄見我哋望過去佢後面，佢都跟住望過去。
而隻烏鴉都好似意識到呢樣嘢，飛咗去籃球架後面。
佢見後面冇嘢，就擰返過嚟繼續燒嘢食。
佢擰返過嚟之後，籃球架後面露咗半個人出嚟。
佢著住黑色嘅大褸、西褲、恤衫，頭上面戴住紳士帽，加上佢嗰個位好暗，如果唔係因為頭先隻烏鴉，我都唔知嗰到有人。
同佢對到眼之後，佢一手除低紳士帽，露出蒼白嘅頭髮同眉毛。
佢戴咗個黑色嘅口罩，我淨係睇到佢對眼，但感覺好熟悉，好似喺邊到見過咁。
佢將紳士帽擺喺胸前向我鞠躬打咗個招呼，之後就一手掟咗頂帽出去。
頂帽飛過籃球架嚟到啊澄頭頂上空，之後就喺一瞬間變咗做烏鴉飛走。
佢喺變換嘅過程中甩咗一條黑色嘅羽毛出嚟，羽毛喺空中飄浮，慢慢咁下降，最後降落喺啊澄頭頂。
啊澄想伸手去摸，但未掂到，羽毛就已經化成黑色嘅顆粒。
啊澄都顎高頭望，直到黑色顆粒喺空中散開，最後喺空氣之中飄散。
我望住佢，佢放返個頭落嚟嗰陣同我對到眼之後就好刻意咁避開我嘅視線，仲企咗起身。
「我去廁所。」啊澄同身邊個男人講。
「嗯。」男人回應。
好似…有人想講啲嘢比我聽。

三十四.
「你係啊澄男朋友？」我問個男人。
佢唔知係真聽唔到定假聽唔到，繼續專注咁燒嘢食。
見佢冇答，我都冇好似冤魂咁追問落去。
過咗陣，啊澄返咗嚟，班主任都擔咗張凳過嚟坐低。
「搞咩啊你哋，咁靜嘅？」班主任問。
隔離喺我嘅晴晴公主，前面係佢以前嘅情敵，你話呢？
「冇啊，我哋都啱啱收工，攰到懶得講嘢。」我回應。
「哦，咁啊武你近排點啊？」
我唔諗住講我同啊晴準備結婚嘅事，畢竟呢件事都係未定。
「冇啊，都係寫下嘢。」
「撈得掂唔掂先？」
「大富大貴就冇，夠食夠用咁囉。」
「我哋準備結婚喇。」啊晴加入對話。
「好消息喎，祝你哋新婚快樂！」班主任撞咗撞我：「你又係嘅，娶老婆咁開心都唔講。」
既然佢都講咗出嚟，我唯有硬接。
「準備講架喇，不過比佢講咗先咋嘛。」我苦笑。
「恭喜曬。」啊澄都加入對話。
雖然係恭賀嘅說話，但佢嘅語氣略帶不屑。
「係喎啊澄，你畢業之後去咗搞咩啊？」班主任問啊澄。
「冇啊，去咗做神棍咋嘛。」啊澄自嘲：「幫人算下命、占下卜咁。」
「唔好咁講，呢啲嘢都有知識含量架。」班主任拍咗拍我膊頭：「不如幫佢兩個算下？」
「佢哋唔介意嘅話都得嘅。」啊澄望住我同啊晴：「因為要有時辰八字先得。」
「可以啊，當聽下囉。」啊晴回應。
既然啊晴同意咗，加上算命呢啲嘢喺出面收得好貴，我都冇理由拒絕。
啊澄拎電話出嚟：「咁你兩個講個時辰八字比我聽。」
我同啊晴相繼講完時辰八字，啊澄就開始喺電話到撳。
唔知係佢熟手定點，佢好快就入好曬我哋嘅時辰八字。
「就合盤結果嚟睇，你兩個一啲都唔夾。」啊澄好嚴肅咁講。

三十五.
聽到佢咁講，啊晴好似做川劇咁極速變面。

塊面上一秒仲冇咩表情，下一秒就黑到同煤炭屎鬼有得揮。

「我同佢唔夾，唔通你同佢夾啊？」聽得出啊晴嬲嬲地。

「可能真係喎。」啊澄應該講緊笑。

啊澄對我哋露出不明所以嘅微笑，除咗啊晴維持黑面之外，我同班主任都用尷尬嘅笑嚟回應佢。

「冇嘢係完全好或者完全壞嘅，不如試下講啲好嘅嚟聽下？」班主任嘗試比咗位佢落。

佢再睇多一眼個Mon，托住下巴沉默咗一陣。

我估正常人喺呢個位無論點都會落台，費事搞串個Party。

「我睇到嘅係…」啊澄搲咗搲下巴。

啱喇，講出嚟啦！

「冇任何嘢好。」啊澄收埋電話：「我純粹實話實說。」

睇嚟佢冇諗住落台，反而仲諗住同啊晴開戰。

班主任都自知搞唔掂呢單嘢，企起身微笑住咁對我哋講：「我要上去覆啲學生Whatsapp，你哋慢慢燒。」

咪撚啦，以前我搵你都唔見你有覆。

講完，佢就急步離開籃球場。

我想走，不過我知走咗嘅話，返到去一定會比啊晴當叉燒咁斬開一片片。

正因為咁，雖然我個靈魂飄走咗，但鞋底就好似搽咗AA膠咁扯極都扯唔起。

咪撚啦，以前我搵你都唔見你有覆。

「咁你又有咩高見？」啊晴決定應戰。

「我覺得你兩個喺埋一齊根本就係夾硬嚟。」啊澄直接放核彈。

啊晴望住我，等緊我發表意見。

「我覺得感情呢家嘢喺正常情況下一齊得就冇話夾硬嚟架啦。」我搭住啊晴：「乜我有揸枝槍指住你咩？」

「兩情相悅架嘛我哋，講呢啲。」啊晴發自內心咁微笑。

「希望係啦。」啊澄冷笑：「人嘅演技可以好勁，仲好識隱藏啲唔想比人知嘅嘢。」

做戲？

到底，邊個做緊戲？
定係純粹啊澄挑撥離間？

三十六.
「你想講咩啊？」啊晴得戚咁講：「你奇怪還你奇怪，唔好拉埋其他人落水。」

啊澄挨前咗少少，注視住啊晴：「你知我講咩。」

我知佢講緊咩，但都已經過咗去。

真正愛一個人唔係淨係受佢嘅好，而係愛曬佢嘅所有嘢，包括佢嘅過去。

「我唔介意。」我搶答。

啊澄將目光轉向我：「係咩？」

佢再挨前，我可以見到由佢瞳孔散發出嚟嘅邪惡氣息。

恐懼雪凍咗我全身嘅血液，成個人震到好似去咗北極咁。

我想避開佢嘅眼神，但條頸好似比人鎖住咗咁，一丁丁都郁唔到。

我吞咗啖口水，抑制住準備填滿我嘅恐懼：「我唔介意。」

「咁咪好囉。」佢意味深長咁笑咗下。

佢挨返後，我個人都跟住解鎖，但就開始有啲暈暈地。

啊晴都察覺到我有啲唔妥，伸手過嚟搭住我膊頭。

「冇事啊嘛？」佢喺我耳邊輕聲問。

我揈咗揈頭：「冇事，應該攰得滯啫，我去個廁所先。」

講完，我就起身擺嚟擺去咁行去廁所。

我喺廁所洗完面之後就好咗好多，但都仲係有少少暈。

我諗住放埋個水就出去，點知放放下就聽到拍翼聲，應該係有嘢飛咗入嚟。

我轉身一望，就見到有隻烏鴉企咗喺天花板嘅水管上面。

「搞咩啊？」我問隻烏鴉。

講完，佢就向我飛埋嚟，喺我後面變咗做紳士帽啊伯。

「介唔介意放完水先同我講嘢？」佢問我。

「咁你又喺我放緊水嗰陣飛入嚟？」我有啲無奈。

「我鬼知你去緊咩？」佢拉高手袖：「是但啦，你咪郁。」

講完，佢就摸咗下我個頭，而我都冇再暈。

「我想問…」

我都係想問佢係咪醫生，但比佢打斷咗：「你知我唔會答。」

佢執咗執件衫：「放完水快啲走。」​​​​​​​

搞到咁日漫。有能力者

日漫🤣
個腦一忍唔住就黐線（不過會有合理解釋）

三十七.
「吓，點解啊？」

「嗰個人就喺你附近。」

頭先羽毛跌落去嗰下我已經估緊，而家總算Confirm咗。

但…

「點解係佢？」

雖然就呢件事嚟講，知係邊個係最重要。

但對我嚟講，我更想知點解係佢。

「佢已經走火入魔，不顧一切咁想所有嘢都跟住佢寫嘅劇本嚟行。」

「明白。」

講完，佢就變返做烏鴉飛走。

我洗手出返去，拎住部電話扮傾緊嘢。

「失陪一下，有嘢要傾。」我拉走啊晴。

啊晴未嚟得切問我咩事，就已經比我拉咗出學校。

「喂！」佢拉停我：「搞咩啊？」

「搞鳩你嗰個係啊澄，我哋唔可以再坐喺嗰到。」我望住校門：「行遠啲先。」

講完，我就拉咗佢去天橋對面。

「點解你會知？」

「你記唔記得啱啱隻烏鴉？」

「隻烏鴉比人控制緊？」

「可以咁講，但實際一定唔止控制咁簡單，我唔知點解釋，總之佢可以變做人。」

「所以係佢話比你聽？」

「冇錯。」

「咁我有兩個問題。」佢皺眉：「第一，嗰條友可唔可信？第二，點解係啊澄？」

「佢一定可信，但點解係啊晴…我都唔知。」

「你話有冇辦法引到佢出嚟講？」

「有，紅棍，不過係屋企。」

佢話用枝棍嗰陣佢就會自動出現。

「咁行啦。」

…

..

.

啊晴就喺樓下等我，而我就拎枝棍落嚟。

「話時話點解要喺樓下？」我問佢。

「我點知舊嘢會唔會爆？」佢遞手：「點用架？」

我伸枝棍出嚟：「假動作好喇，唔好掂到，因為佢話枝嘢其實簽紙嗰日先用得。」

「好。」

講完，佢就作勢要揸住枝棍。

喺佢準備掂落枝棍到嗰陣，頭頂傳嚟拍翼聲。

我哋一齊望上去，但咩都見唔到。

再耷返落嚟，枝棍已經比一隻烏鴉撞走咗，然後就有人一把車咗落我到。

我望過去，車我嘅人正正就係英倫啊伯。

全部人都覺得人變烏鴉係好平常嘅事