70年代,廣播道又叫做五台山,因為嗰陣有三間電視台(麗的電視 [麗的; RTV]、無綫電視 [香港電視/港視; HKTV]、佳藝電視 [佳視; CTV])同兩間廣播電台(香港電台、商業電台)個總部都係喺廣播道。今時今日,呢五台入面得返兩間電台重喺廣播道,其中佳視特別短命
香港佳藝電視(英語:Commercial Television),簡稱佳視、CTV,香港第三間免費商營電視台,1975年9月7日下午6時正啟播,1978年8月22日結業停播。
佳視開台造就咗香港第一次三個私營電視台鼎立嘅局面,呢三台都有出自家原創劇,同埋各自捧到啲人出嚟。佳視以當年70年代嚟講個勢係幾勁,鋪天蓋地宣傳不特止,又搶住拍一堆金庸劇同埋節目出嚟打另外兩個大臺。而家睇返其實佳視背後其中一部分大水可以話係親國民黨勢力,因為當年六大股東(即係佳視六角形Logo嗰六隻角)分別係:商業電台; 華僑日報; 工商日報;星島日報(三大親國民黨大報); 林炳炎、林秀峰(即係恆生); 同埋怡和洋行。嗰陣重要高薪挖角,撬咗兩個大臺啲猛人走,就係所謂佳視六君子:
TVB: 周梁淑怡, 賜官劉天賜, 葉潔馨, 林旭華, 歡樂今宵PA石少鳴
RTV: 盧國沾