[警世] 長文慎入!Apple delete左我萬幾張相!

[借朋友ac🙏]

大家好， 想講返幾個月前Apple IFC Store 點樣將我iPhone 入面萬幾張相delete左， 又不負責任地將個波射黎射去， 想提醒各位唔好咁相信”Genius” Bar。

事緣我本身有兩部iPhone， 想將舊機放喺iCloud既萬幾張相(大概18,000張)轉去新機度。 由於女仔唔係太識IT野， 心諗去Genius Bar 去搵專業人士幫手實冇死， 所以就約左時間去Apple IFC Store。 我同個staff清楚解釋左我既情況， 佢就氣定神閒地咁㩒我部機， 而佢㩒完之後， 啲相就立即開始減少。 我好驚但係佢同我講sync相要時間， 返到屋企叉電開wifi就會有返d相。

第二朝我瞓醒啲相就完全消失曬， 我即刻打去Apple Care求助， Apple Care 幫我restore 過部機但係失敗左。 於是我就即刻衝去第二間最近嘅Apple Store 求救， 但係佢地話門市淨係做硬件， 我啲相喺曬iCloud都係要問返Apple Care。 於是我再打去Apple Care， 佢地都係話救唔返。 我就返去IFC Store， 又book 左genius bar， 幫我既係另一個 staff， 佢同我講佢地救唔到d相， 仲叫我打去英文既Apple Care， 佢話中文果d係外判俾廣州做， 佢地人工低冇咁叻， 英文果啲係新加坡人工高啲勁啲。 於是我打去英文Apple Care， 但結果都係一樣。

Apple Care 話由於係IFC Store 整唔見我啲相， 所以就轉介左我個case 俾IFC Store 既經理K 先生 (Title 係Lead) 去處理呢件事。 K先生話佢地救唔返啲相， 叫我試下去搵佢地既合作伙伴On Txxxx， 仲叫我自己去攞報價， 救相既費用要我自己負擔。 我係好嬲但係覺得救相緊要， 所以就聯絡左On Txxxx 解釋左個情況。 On Txxxx 話: Apple 㩒錯左掣令到啲相冇曬， Apple 根本唔應該咁樣㩒！之後我將件事話返俾K先生知， 佢話由佢再打去問一問。 跟住佢又同我講會放一個禮拜假， 我問佢有冇人會代替佢follow up 呢件事， 佢話冇， 叫我每一次都打去Apple IFC 門市自然有人會幫我。

而上面所講既經歷已經過左差唔多一個月。

後來我係電話搵到IFC Store 一位G先生，想問返K先生同On Txxxx 既討論結果， 佢處理呢件事都係冷漠應對， 但係承認Apple 係魯莽同草率左， 咁樣幫我㩒部機唔係最safe既方法。 但當我要求同負責人直接討論， G先生一口拒絕左。 我唯有再一次親身去IFC Store跟進。 係門市除左G先生仲有一位A小姐(Title 係Senior Manager)， 佢地兩個就不斷鬼打牆遊花園， 淨係話佢地唔會處分相關員工同埋作出任何賠償。 我心諗我幾時提過涉事員工同埋要求賠償??? 我一路都係想佢地幫我搵返啲相。 然後佢地兩個一路迫我諗我要乜， 我話我淨係要返啲相， 佢地話除左相搵唔返之外， 叫我諗下Apple有啲乜野可以幫到我。 我極度無助， 忍唔住係舖頭度喊左出黎， 點解佢地可以做錯事都係完全不負責任，冇試過幫我搵返啲相，而需要我呢一個月黎不斷求佢地去救返佢地delete左既相。

幾日後我再打俾G先生要求跟進， 講出我呢一個月黎受到既漠視同無禮對待， 佢就答應寫低我所有既投訴， 匯報俾上司聽。 第二日A小姐就打左俾我， 話要送部iPhone俾我。 佢話公司高層好驚訝點解呢件事拖左成個月，所以要送部iPhone俾我。 我覺得勁莫名其妙， 點解冇人去用下方法去救啲相， 俾部iPhone我做乜??? 我相信大家都覺得自己影既相係無價好珍貴， 任何人俾十部iPhone換你啲相你都唔會要。 iPhone長期sell鏡頭功能， 一個鏡頭變三個， 我用左iPhone接近十年黎影落過咁多相， 咁多珍貴既回憶， 一夜之間全部整唔見， 然後得到一部iPhone???

我唔肯接受部iPhone， 要求同Apple 既高層見面， 睇下有冇方法救返啲相。 A小姐就安排左我係IFC Store 見一位P小姐 (Title 係Leader，佢係外國人，自稱係成間IFC Mall最高負責人)。 雖然P小姐話佢代表Apple公司就我呢個幾月黎既遭遇道歉， 但係佢話唔comment 啲相消失既事。 我問可唔可寄部電話去總部整? 同埋當時㩒掣既時候有冇任何warning? 佢一路淨係話部iPhone係我唯一可以得到既野。

我冇辦法之下寫左封好長既email 俾Tim Cook， 第二日好快收到Tim Cook office既電話， 佢地話呢件事已經由Tim Cook office 全權處理， 並且明白我既訴求， 會全面調查IFC Store 同埋搵幾個senior engineers 睇下我啲相有冇得救。 佢地既態度誠懇負責， 我開心到以為終於有希望。 一個禮拜後佢再打俾我， 但係佢所講既野，無論內容同語氣竟然變得同P小姐一模一樣。 佢勸我要左部iPhone， 仲同我講部iPhone唔會永久保留， 叫我盡快收左佢。 而我希望佢同我交帶我兩個訴求， 1)究竟果個員工有冇㩒錯掣? 佢話多謝我既意見， 佢地會加強內部培訓同埋改善涉事員工既服務態度同效率， 但係唔會話個結果俾我知， 2) 究竟有冇搵engineer 睇過我部機? 佢話總之啲相就係冇左 (即係㩒左掣冇左又唔認啦)。

最後我係無可奈何之下收左部iPhone。 我堅持左幾個月既訴求都係冇用。 希望各位好好保護自己既相， 唔好信曬Apple， 當佢地㩒你部機既時候， 一定要望清楚佢㩒緊乜。 原來攞部iPhone去Apple過相都會俾佢地整唔見！！！

已上傳至貴州

講咗一億次擺電話嘅嘢唔可以係孤本

平心而論樓主又幾撚慘

首先祝你可以搵返Backup

香港啲Genius 坦白講真係半桶水
千祈唔好盡信
其實只要去setting，開你部電話嘅iCloud Backup就已經可以做到
根本就唔需要搞咁多嘢
條友擺明就係亂鳩咁嚟玩鳩你

蘋果啲野真係麻9煩

前設係樓主要有開到backup

另外其實icloud photo其實真係好化學，
我覺得icloud backup / 直接backup落電腦仲安全同實際

認真 拎返大陸可能有救

Apple野只會係用家問題
apple永遠唔會錯

嗰班所謂Genius隨時mk求其搵條𡃁妹都識野多過佢啦

唔係啦 睇個樣係冇
就算有都可能比個傻鳩洗咗

基本上而家都好難搞有冇
因為原則上 就算Apple都唔會拎得返iCloud冇咗嘅資料

android用家又贏咗

反而想知你點樣搵到Tim Cook office
好勁

係，懶方便反而出事

之後要定期save返啲相落電話到

其實㩒咗咩掣會冇晒全部相？

明明book genius bar 個website 都叫你backup 左部機先好拎去整

而家就走去怪9人

麻煩到我都TLDR
Android 始終可以自己backup返 唔駛求人

Google tim cook email

嗰班「天才」就算鳩數啦 隨時係街執個用家仲識得多過佢哋
你本身有無做全機backup?（icloud或者itune) 如果有可能都仲有得救

其實蘋果都有

過左一日都基本救唔返咁濟
過左一個月渣都無啦

冇backup? 唔可以restore to 未刪相之前既iCloud/ backup?

我都好想知我問咗佢哋好多好多次，佢哋一路唔肯答我

慘


幫你推下