《求婚嗰日，我發現我女朋友鍾意食屎》(2)

609 回覆

378 Like 2 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁

廢柴小毒毒 2021-12-14 22:28:51

支持啊

等緊出文嘅時候，已經睇左跳海同睇緊分手和頭酒

離一離題

其中Kelly要飛去美國話飛機失事個段真實係我同我男朋友對話發生過

樓主啲故，就算係依家呢個，都好令我反思自己嘅感情

黑犬風易 2021-12-14 23:43:16

聽完向彩萍講完佢嘅故事之後，成片草原上變到粒聲都無。

無論係我、敏敏、八仙果師父同高醫生，大家都一時間唔識得點回應佢。

對我嚟講，呢刻我有兩種心情。

第一，我有啲意外，向彩萍竟然會對陌生嘅我哋講出咁深情同傷痛嘅過去。

第二，我對向彩萍多咗一份同情心。

一直以來，我都相信向彩萍就係故事入面嘅世紀大反派，否則邊有可能會害人又害己咁都要用毒蠱傷人？

但係聽完佢嘅故事之後，我終於明白咗點解佢會咁痛恨我外父。

即使我曾經聽過我外父嘅版本，亦都明白佢有苦衷同埋如今已經痛定思痛，但係我同樣可以理解向彩萍嘅恨意。

估唔到，就好似敏敏最初所講一樣，可憐之人，必定有可恨之處，反之亦然。

將敏敏害到蒙受咗十幾年食屎陰影嘅向彩萍，背後故事原來真係非常可憐。

只不過，以上兩種心情都唔係我從向彩萍嘅故事入面聽到最重要嘅得著。

我記得曾經上網睇過，如果要解開蠱毒，搵出蠱蟲絕對係重要步驟之一。

而喺向彩萍頭先分享嘅內容入面，我聽到，佢話佢每日都會嚟到後山用血餵蠱蟲。

咁即係話，其實可以救到敏敏嘅蠱蟲可能就喺呢一片草原附近。

所以而家我需要做嘅，就係諗辦法向向彩萍Chok料。

到底我應承旁敲側擊？拋磚引玉？定係用我半年前睇嗰本《FBI不會告訴你的三十二種有效問話術》入面嘅套料方法呢？

為咗保障我嘅方法有效，我將我嘅發現同考慮話咗俾八仙果師父知，睇下佢有咩意見。

點知八仙果師父一聽完，諗都唔諗就答我：「洗乜用咩問話術咁鬼麻煩啫？直接問佢條蟲喺邊咪得囉！」

聽到呢個答案，我忍唔住反咗吓白眼講：「師父啊，而家係向敵人chok料，唔係同師奶吹水喎，佢點會肯咁順攤話你知啊？」

八仙果師父無視咗我嘅質疑，氣若懸絲咁問向彩萍：「向彩萍，話我哋知，你害丘志傑嗰條血蠱蟲收埋喺邊？」

Oh Shit！

八仙果師父真係直截了當咁問咗出嚟。

咁樣就會俾向彩萍發現咗我留意到佢說話之中漏咗口風，咁跟住落嚟佢只會更加小心講嘢，而我要chok料就更加難啦。

估唔到，向來神機妙算嘅八仙果師父今次竟然會咁失策。

但係更加估唔到嘅，係向彩萍嘅答案。

「條血蠱蟲，就係喺直行過去第三棵樹嘅樹底，我劃咗一個屎形嘅記號喺樹幹上面。」

咩話？向彩萍竟然直接將個答案講咗出嚟？

黑犬風易 2021-12-14 23:43:48

我聽到嗰一刻，即刻出現咗一個「黑人問號」嘅表情，完住唔明白到底發生緊咩事。

但係下一秒，我好快又諗，會唔會向彩萍係故弄玄虛，將我哋引過去樹度，其實嗰度只係一個陷阱。

「阿博，你過去棵樹度睇下！」八仙果師父對我發出咗命令。

「師父，棵樹可能只係向彩萍嘅陷阱嚟㗎。」我向八仙果師父表示一下我嘅細心。

「唔洗擔心喎，佢講嘅肯定係真話。」八仙果師父雖然身受重傷，但呢一刻嘅眼神卻閃過一剎那嘅光芒。

「師父你......」我開始意識到，八仙果師父呢刻咁有信心，背後一定有啲我未發現嘅原因。

「好啦，我都知你唔聽解釋係唔肯行動㗎喇。」八仙果師父用手示意我豎起耳仔行近啲，「而家嘅向彩萍，已經俾我控制咗。頭先佢打傷我嘅時候，我及時用咗『八仙法』之中最強嘅道術，『張果老：死而不僵』。張果老係八仙之中最長壽，亦係扮死翻生嘅人，所以喺『八仙法』之中，張果老嘅道術係專門俾人喺重傷之下，置之死地而後生嘅。首先，施術者需要將從肺腑噴出嘅血噴到敵人身上，咁樣就可以將敵人鎖喺原地動彈不得。另外，張果老故事入面，佢轉身騎驢，象徵住佢看透世事。所以，張果老嘅道術亦都有另一個效果，就係令中術者口吐真言，完全被人看透。」

「哦......咁唔怪得頭先向彩萍問乜答乜，就連人生故事都講埋出嚟啦。」喺旁邊聽到嘅敏敏點一點頭。

「咁佢而家咪即係食咗『誠實豆沙包』咁囉！好彩師父你及時出手咋，師父好嘢！」聽完八仙果師父解釋，我終於恍然大悟，亦都終於發現向彩萍確實從俾師父噴血之後就再無向我哋移近一步。

「唓，咪即係精神醫學科上會用到嘅催眠術！」高醫生及時攝一句入嚟想反對一下我哋咁欣賞八仙果師父，但當然我同敏敏都無理佢。

「所以，而家無論你問佢乜嘢，佢都只會講真話。」八仙果師父微微一笑，似乎對於又贏高醫生一次感到滿意，「只不過，若然我留喺佢臉上嘅血一乾，佢就會清醒同有翻行動能力，所以我哋都要盡快行動啦。」

八仙果師父交代完呢一句之後，即刻將頭轉過去向彩萍嗰邊問：「我哋要做啲咩先可以解除到血蠱嘅蠱咒？」

「首先要將血蠱蟲攞出嚟，然後將血蠱蟲磨成汁，然後將蟲汁搽喺另一個人嘅手上。另一個人只需要用手放喺中蠱嘅人口前，只要佢願意大力吸入蟲汁嘅氣體大約三十秒，就可以將蠱蟲從中蠱人嘅口度引出嚟。一旦清除蠱蟲，身上嘅蠱毒自然解除。」向彩萍好自然咁答。

聽咗向彩萍咁答，我好似見到光芒一樣，因為幾經辛苦，敏敏嘅食屎怪病終於搵到解決方法啦！

黑犬風易 2021-12-14 23:45:27

「我嘅『八仙法』應該支持得唔係幾耐，趁佢呢刻仲俾我控制住，你順便問定佢點樣將血蠱蟲引出嚟。因為血蠱蟲比一般昆蟲更加靈敏，一旦察覺有危險，隨時就會一走了之，咁到時候我哋就永世都救唔到敏敏。」八仙果師父喺我身邊細聲講。

我明白之後，當然打算馬上開口問向彩萍啦。

點知就喺呢個時候，喺我身邊嘅敏敏突然出咗聲：「向彩萍，我想問你，我爸爸又唔係咩靚仔，當年又只係一個初出社會嘅窮酸打工仔，你其實到底愛我爸爸啲咩啊？」

我有啲意外敏敏突然問咗一個咁嘅問題，心裡面唔係太明白敏敏嘅用意，但係忍唔住細聲同敏敏講：「你唔好問埋啲無聊嘢先啦，師父嘅『八仙法』就快夠鐘，到時候佢就唔會有問必答㗎喇，你快啲俾我問埋佢點搞條蟲先啦！」

「我就係知道『八仙法』就快失效，所以我先要趁而家同佢三口六面咁講清楚！」比起我，敏敏嘅反應似乎更加肉緊。

「有咩傾一定要趕住而家傾啫？」我估唔到一向對人言聽計從嘅敏敏竟然會喺呢個時候硬頸，令我有少少措手不及。

「阿博，向彩萍之所以變成今日嘅佢，好大責任係因為我爸爸而起。我作為一個社工，我好明白傾計嘅力量。但係我又知，換轉係平時嘅佢，佢一定唔會肯對我呢個作為仇人嘅女去傾心吐意。所以我唯有靠而家佢被人控制住一定要講真話嘅時候，我先可以同到佢傾計同埋解開佢嘅心結。」敏敏眼光非常堅定咁望住我講。

「我明你想幫佢啊，但係如果而家再唔清楚血蠱蟲嘅事，以後都幫唔到你㗎喇！」印象之中，我從來都無咁大聲對住敏敏講過嘢，但係呢一刻，為咗敏敏往後嘅人生，我已經唔顧得咁多。

「阿博，」敏敏無因為我嘅大聲而嬲，佢反而轉翻用平日溫柔嘅聲線，望實我雙眼咁問：「如果我一世都解除唔到呢個食屎嘅蠱，你會唔會唔要我？」

「唔會，我一定會繼續愛你。」我呢刻嘅答案，就同我向佢求婚嗰日佢問我嗰一刻一樣咁肯定。

「既然連你都會接受我，而我亦都習慣咗自己有食屎呢個怪病，咁食屎又有咩所謂呢？但係如果因為我一世食屎而可以挽救翻向彩萍嘅人生，咁唔係更加值得咩？」敏敏望住我，展露咗一個由心而發嘅微笑。

睇住佢呢個笑容，我就已經知道，我無可能再拗得贏佢。

因為，當初我都係因為佢呢個充滿愛心同溫柔嘅笑容而愛上佢。

所以，我又邊可能否定佢因為愛心而發嘅一意孤行呢？

就喺我同敏敏呢幾句嘅交流之間，向彩萍就答咗敏敏嘅問題：「因為當初佢成日嚟關心我、體諒我、又完全唔介意我嘅出身。」

向彩萍雖然不自覺咁俾八仙果師父控制住，但係一提到丘志傑當初嘅好，臉上依然流露出一絲甜蜜嘅笑容。

「如果你真係因為被人關心、被人體諒、而且被人接納而愛上我爸爸。咁我想問你，點解你又唔會愛上為你照顧家庭、默默付出多年、對你近乎無微不至嘅石養么呢？」敏敏用探問嘅語氣追問一句。

「因為你爸爸攞走咗我愛人嘅感覺囉！而家嘅我，已經唔再有愛嘅感覺！」向彩萍又近乎嗌出嚟嘅語氣講。

「其實到底係我爸爸攞走咗你愛嘅感覺，定抑或只係你自己為咗保護自己唔好再受傷，所以一直否定緊你自己去愛人嘅機會？」

我見到，當敏敏問完呢個問題，佢向來溫柔嘅表情上面竟然好難得出現咗一個銳利嘅眼神。

感覺，就好似頭先八仙果師父使出咗秘技嘅自信表情一樣。

正當我以為敏敏呢個咁尖銳嘅問題會令向彩萍焫焫焫焫焫焫著嘅時候，意想不到，情愛竟然無似燃油炸藥激嬲佢。

向彩萍咩都無講，仲出現咗一個猶豫又欲言又止嘅表情。

今次，真係鋼鐵剎那變脆弱。

（故事待續）

＝＝＝
下一個加更位：300正皮
Penana加更位：2700 likes
Penana link：https://www.penana.com/story/90310

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」同「故事心得」，IG限定㗎