《求婚嗰日，我發現我女朋友鍾意食屎》(2)

final boss

我都覺得痭關係，唔係無端端係主角搵萍姐前出班捉蠱人做乜？
可憐佢有兩個目的一是為愛人報仇二係來做生意
要知道生活鄕村無乜經濟來源於是就要做這生意了

我估係憑啲蠱先知敏敏住邊可以踩上門冇同佢講過敏敏住邊啩

正啊
你一晚追得咁快
所以停一停俾你抖下先

睇故都記得飲水啊年青人

多謝大波winky絲

一嘢衝入去抱實男主大叫：博博I love youuuuuuuuuu

星期一就係要扮工追返weekend份既更新
如果石仔係只係單純獵蠱人，咁榨左汁既血蠱蟲可能仲有好多用處。
但個問題就係要睇下石仔愛萍姐有幾深啦，而家係順理成章俾佢吊到尾，跟住佢地上黎搵到埋外父。跟住點呢？好緊張呀！！

一條友上人哋屋企
唔通要一個打六個

男豬角又重覆同樣錯誤
喺雲南隻紅色青蛙又係咁 自以為冇野就唔通知師傅

好好睇
支持樓主

今晚好快有得睇
聽日又有翻工嘅精神食糧

人類總是重複同樣的錯誤.jpg

多謝榴槤絲
記得上個post都見過你個名

樓主回家中 好快有文睇
順帶一提 故事進入結局篇
預料今年內完故
所以應該同大家仲有一星期左右會面時間

文呀

擔定凳等睇故

「唔好俾佢入嚟啊！」

我稍為驚訝咗一秒之後，即刻已經有翻反應，向住石養么大喝一聲。

敏敏俾我咁大反應嚇咗一嚇，有啲驚訝咁問：「做咩事啊？」

「你仲記唔記得，我曾經覺得向彩萍結婚日期同寫信日子有啲可疑？我今日查出咗，其實向彩萍放喺屋企封信係佢寫㗎，而且佢曾經仲瞞住向彩萍嚟過香港，目的係咩都唔知，但佢連老婆都瞞埋，一定唔慌好人啦！」我指住石養么，一口氣將佢嘅罪名數哂出嚟。

而石養么只係企喺度笑吟吟咁望住我，佢呢刻嘅眼神真係可以用《賭神3》入面嘅金句「他好似永遠對住你笑，笑到你個心都寒」嚟形容。

敏敏聽到我咁講似乎都有少少遲疑，所以佢就用普通話問石養么：「為什麼你今天會來呢？」

石養么笑咗一笑就答：「是阿萍叫我來的，那天她忘了給你們一個東西，所以特意叫我來香港找你們。我把禮物送完就會走了，不打擾你們太久。」

石養么一邊講，一邊拎咗一個盒仔遞俾敏敏，睇落幾精緻。

「千奇唔好掂個盒。」我第一時間拉開咗敏敏，擋喺佢同石養么之間，以免石養么唔知會用咩手段隨時會對敏敏不利。

正所謂「來者不善，善者不來」，我都幾相信石養么今次突然出現，絕對無可能係送禮咁簡單。

石養么見到我呢個反應，有啲無奈咁一笑，然後將個盒仔放咗喺門口側邊嘅鞋櫃頂，然後講：「沒關係，禮物晚一點開也可以，我見你們在吃飯，不打擾你們，我先走了。」

「別走，先把盒子拿走。」我語氣非常強硬咁講。

「阿博啊，過門都係客，你咪俾佢放低囉……」敏敏應該好少見我咁硬頸，所以亦都唔敢勸得我咁大聲。

而八仙果師父亦到喺呢個時候走到敏敏隔離，同佢講咗一聲：「今次聽阿博講，小心駛得萬年船。」

敏敏見連八仙果師父都咁講，唯有點一點頭唔再出聲。

「好吧，那我先把它拿去，你們想要的話再跟阿萍聯絡吧。」石養么攤開雙手表示無奈，然後將個盒拎起咗，轉身就走向門口。

就喺佢準備踏出門口嗰一步嘅時候，佢突然又停低咗，轉身微笑咁望向坐得最遠嘅世伯問咗一句：「你就是丘志傑嗎？」

世伯似係聽得明少少，用唔咸唔淡嘅普通話答：「是。」

「你今天有收到信件嗎？」石養么突然無厘頭咁問咗呢個問題。

「哦，有啊。」世伯好理所當然咁答。

「那就好。」石養么露齒一笑，表面上毫無惡意嘅笑容，偏偏令我更覺得有可疑。

就係因為呢份可疑，我不期然咁再諗咗一諗到底佢點解會無啦啦問起今日收唔收到信嘅問題。

唔諗由自可，一諗我就即刻發現咗唔妥嘅地方。

「點解……今日星期日會派信嘅？」我問咗一句。

就喺呢一刻，廳入面嘅大家終於都察覺咗唔對路嘅地方，成個客廳即刻瀰漫咗一股奇怪嘅氣氛。

「封信入面寫乜？」八仙果師父第一時間問。

「無乜特別，都係附近餐廳啲廣告嚟嘅啫，不過唔知做乜咁好心機入落信封，仲寫埋我個名！」世伯唔知係邊度拎咗封信出嚟揚咗一揚，果然係樓下餐廳嘅餐單。

八仙果師父一望，雙眼即刻瞪大咗，低聲講咗一句：「出事。」

「無出事，仲一帆風順添。」石養么突然大笑起嚟，唔單止係咁，佢仲突然由普通話轉翻做廣東話。

「點解，你啲廣東話咁流利嘅？」敏敏有啲意外。

「哈哈，雲南嘅時候，我只係扮唔識講啫。我為咗阿萍，我由細到大都係睇港產片自學廣東話㗎，點會唔流利啊！知我咩料啦！」石養么驕傲咁指一指自己。

佢嘅變化，令我哋幾個人都唔敢出聲，一齊望實咗佢。

石養么喺大笑緊嘅同時，慢慢舉高咗自己嘅右手，然後放近嘴邊，擘大口一下咬落去自己虎口位度。

一時之間，佢右手已經鮮血淋漓。

血，一滴滴咁滴落地下。

呢個畫面令敏敏同伯母兩位女士皺哂眉頭，但係反而受傷嘅石養么依然係不停大笑，任由自己嘅傷處血流不止。

呢個時候，八仙果師父攝咗埋我身邊，細細聲但係以命令式咁講咗一句：「阿博，即刻扑暈佢！」

雖然呢個命令嚟得突然，但係同八仙果師父相處咗耐，我當然信佢嘅判斷一定有原因。

所以我一眼望到身邊嘅櫃上面有一個花樽，即刻就擸起佢，衝過去一嘢瞄準石養么個頭就毆落去。

點知，我揮緊落去嘅手竟然俾一個人捉住咗。

而呢個人，竟然係世伯。

當我仲錯愕緊嘅時候，世伯捉住我嘅手突然加力。

我覺得自己嘅手臂簡直好似俾一個不斷收縮嘅金鋼箍勒住一樣，痛到忍唔住鬆手，成個花樽就咁「哐噹」一聲打爛咗。

世伯為咗避開地下嘅碎片所以走開一步，所以先放開咗隻手。

而我亦都即刻縮手一睇，發現頭先俾世伯捉住嘅地方竟然瘀哂，點解我從來都無覺得文弱書生型嘅世伯有咁大力嘅呢？

而且，點解佢要突然咁大力捉住我呢？

但係話口未完，世伯喺已經石養么身邊執起咗地下嘅花樽碎片。

「爹哋唔好傷害佢啊！」敏敏見勢色唔對，猜測佢爸爸係想攻擊石養么，所以即刻衝向世伯嗰邊。

與此同時，喺我身後嘅八仙果師父亦都跑出，向住敏敏大叫一聲：「唔好行埋你爸爸度啊！」

電光火石之間，鮮血再次喺半空之中濺出。

敏敏跌咗喺地下，身上無傷；石養么保持微笑，同樣無傷；世伯手上嘅碎片，已經唔見咗。

碎片，插入咗八仙果師父嘅膊頭度，所以頭先嘅血，亦都係佢嘅。

「到底發生咗咩事啊？」敏敏就係因為俾八仙果師父推開咗，如果唔係，碎片就已經插咗入佢身上，所以而家佢六神無主咁爬咗去八仙果師父身邊，好緊張咁問。

「石養么，佢用咗蠱術入面最狠毒嘅禁術『共生蠱』，施術者透過落蠱，可以用自己嘅心思完全控制住中蠱者嘅一舉一動。頭先佢口咬虎口位，就係啟動蠱術嘅方法，所以而家敏敏你爸爸已經再唔係你爸爸，而係石養么嘅扯線公仔。」八仙果師父嘆咗一口氣講。

「無錯，你果然識啲嘢喎！」石養么笑住咁講，「好彩我一早將蠱毒落咗喺今日封信上面，呢種蠱無色無味，但係必須要同另一種超級劇烈嘅蠱毒同時出現，先可以爆發毒性。所以我計好今日你哋要解蠱，你爸爸本身就要吸入血蠱蟲嘅毒氣去解蠱，啱啱好就可以俾我順便落埋『共生蠱』。你哋知唔知我等今日等咗好耐啦？我今日，就要你哋閂家富貴！」

作為一個雲南人，識得活用「閂家富貴」其實係非常令人敬佩嘅，但係我亦都知道，呢個唔係敬佩佢嘅時候，所以我都即刻爬咗去八仙果師父身邊，細聲問佢：「師父，今鋪又要靠你諗辦法喇，而家點拆啊？」

八仙果師父搖一搖頭，講：「唉，我之前喺雲南所受嘅傷太重，而家咩法力都用唔到。唯一可以做到最關鍵嘅事係……」

「……係？」我好期待八仙果師父會講埋下半句。

「係同你哋同生共死。」八仙果師父講完之後，自己都嘆咗口氣。

f5

「會唔會我哋可以合力捉住咗我爸爸先呢？咁咪唔驚佢再亂嚟囉！」敏敏喺側邊建議。

「中咗『共生蠱』嘅人會被迫傾盡全身力氣去做所有被控制嘅事，亦都即係可以發揮比平時大四至五倍嘅力，所以頭先你爸爸先可以咁大力捉住阿搏隻手。以我哋而家嘅人手，未必可以壓制得到你爸爸。」八仙果師父再一次否定咗一個可能性。

「咪住先。之前師父你話向彩萍用『血蠱』呢啲禁術會自傷身體，咁『共生蠱』呢啲完全係開哂外掛嘅蠱術唔通無咩副作用嘅咩？」我突然諗到。

「你講得啱，『共生蠱』當然有佢嘅限制。因為要強行控制他人身體，加上要驅動對方身體嘅所有潛能，變相就會對施術者嘅身體形成極大負荷。呢種蠱術用得愈耐，施術者要承受嘅內傷就會愈重，分分鐘可以死人。一般嚟講，呢種蠱術最多只可以支撐到三十分鐘，只要我哋捱得過三十分鐘就可以無事。」八仙果師父解釋。

「捱到三十分鐘？我怕你哋三分鐘都未到已經死哂喇！」石養么大笑幾聲，同時目露凶光望住八仙果師父，「你咁多嗲，第一個就收你皮先！」
當佢轉換眼神嘅一刻，世伯即刻向住八仙果師父衝過嚟。

世伯一下就舉起咗拳頭，只見佢手臂青筋暴現，似乎「精氣神」都處於頂峰嘅狀態，呢一拳打落嚟，真係唔死都一身傷。

可惜八仙果師父身上有傷，所以反應慢啲，我同敏敏唯有即刻擋喺佢前面，希望可以保護到佢。

就喺呢個時候，世伯喺半空嘅拳頭停咗。

因為有一隻手，拉住咗世伯嘅拳頭。

原來，係一直喺側邊靜觀其變嘅高醫生。

「根據我嘅觀察，佢只係中咗催眠啫，所以幫佢打支鎮定劑就無事㗎啦。」高醫生一邊講，一邊就喺褲袋攞咗支針出嚟。

先唔講點解高醫生會隨身帶住支針，呢一刻我只係希望佢呢一招可以成功。

「大家一齊見證下科學嘅重要啦！」高醫生手起針落，支針一下就拮咗入世伯大脾度。

世伯呆咗一呆，好似俾人點咗穴咁停哂手。

高醫生眼鏡閃過一陣驕傲嘅光芒，嘴角微微揚起咁講：「正常情況之下，呢支針大概二十秒就……」

點知話口未完，世伯隨手一拳就打咗落高醫生塊面度，高醫生一下就飛開咗，攤咗喺我哋隔離。

「呢單嘢，一啲都唔科學啊……」高醫生講完呢句之後，佢副眼鏡裂成兩邊，而佢亦都同時暈咗。

無咗高醫生嘅阻止，世伯再一次向我哋迫近。

眼見八仙果師父無力反抗，而敏敏亦都無可能向自己爸爸還擊，我知道，我係時候要挺身而出。

所以，我好細聲同敏敏講咗句：「我去拖延時間，你快啲打電話求救。」

未等敏敏回應，我就企咗起身，擋咗喺敏敏同八仙果師父前面。

我曾經話，「真愛是任何形狀，對付百孔千瘡」。

如果用翻呢首「銀河修理員」，咁我今日同敏敏真愛嘅狀態，應該就係「形勢壞透只好對抗，由我硬撐著使你心安」。

（故事待續）

＝ ＝ ＝
下一個加更位：400正皮
Penana加更位：2700 likes
Penana link：https://www.penana.com/story/90310

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」同「故事心得」，IG限定㗎
IG : windblowssilently

點解唔放過佢地

支針點會拮世伯 仲話醫生 講理性科學邏輯