《求婚嗰日，我發現我女朋友鍾意食屎》(2)

好難接受同世伯打車輪

唱山歌 笑死

留意返世伯係食開屎

續集

咁敏敏都係

bl之餘，仲要間接食屎

好痴線，但係我鍾意

呢個車輪既勇氣

吻下來豁出去

錫外父都算係B L ？

數漏亂倫

今晚有冇文？

有
十二點左右見

呢段歌聲，聽清楚之後，有一種山歌嘅感覺。

音調起伏明顯，但係又唔似有特定旋律。

而歌詞，來嚟來去都係嗰一句，而且聽落仲要似係雲南方言，再聽多幾次，已經覺得有啲厭煩。

但係，石養么就好似著咗魔一樣，將所有手上嘅動作都停咗落嚟，目瞪口呆咁聽住呢首歌。

「點解，你仲會記得呢首歌？」石養么唔知呆咗幾耐之後，用一個難以置信嘅語氣去問出呢個問題。

「有啲嘢，一直無提起，唔代表唔記得咗。」向彩萍喺手機入面，用好理所當然嘅聲音咁答，「阿么，唔係你講，我都唔知自己原來令你默默咁辛苦咗好多年。或者，其實我都欠你一句對唔住，因為咁多年嚟，我知你對我好好，亦知道你嘅心意，但係因為我一直都肯定唔對自己對你嘅感覺，但係又唔想失去你，所以先拖拖拉拉咗咁多年。我無諗過，原來自己從前嘅恨同埋喺愛情裡面遺留落嚟嘅傷口，到頭來會傷害埋你。」

「無，你無傷害我。可以喺你身邊，我已經好開心。」聽到向彩萍嘅自白，石養么嘅情緒好快已經冷靜翻落嚟，無哂頭先嘅殺意。

「兩日前我同敏敏傾完計之後，你就離開咗雲南，當我一個人留喺屋企嘅時候，我明白咗一樣嘢。

過去，就好似一點喺牆上面永遠都抹唔走嘅墨水跡。

過往，我就係聚焦喺呢一點嘅墨水跡上面，然後就覺得呢一幅牆都好污穢。

但係，如果我願意移開目光，去望清楚牆上面其他地方嘅時候，或者我會發現，其實呢一點墨水跡根本微不足道。

丘志傑對我嚟講，係一枝插咗喺心入面嘅針，一個永遠嘅傷口。

你話，你希望可以幫我殺咗丘志傑，幫我擺脫過去嘅糾纏。

但係其實，過去就係過去，無論我哋而家做咩，都無可能可以填補到過去嘅傷口。

而我哋可以做嘅，就只有承認呢一點墨水跡係存在嘅，然後去留意呢幅牆其他靚嘅地方，而且努力令到幅牆其他嘅空白唔好再染上墨跡。

過去呢二十年，雖然我好努力放低丘志傑，但係我一直都擺脫唔到嗰種突然俾一個愛自己嘅人遺棄嘅感覺。

所以，我唔敢再相信愛情，亦都將自己嘅目光集中喺報仇上面。

每一日當我餵血俾血蠱蟲嘅時候，我都會諗起丘志傑食屎嘅狼狽不堪同醜態，無錯，係有一刻快感，但其實我亦都不斷令自己重溫自己俾人厭棄嘅事實。

直到我將血蠱蟲交咗俾敏敏之後，因為習慣，我今朝都有好自然咁走上後山。

當我走到上去，我先記得血蠱蟲已經交走咗，所以我唯有百無聊賴咁由山上面行翻落嚟。

一路上，我突然先留意到原來後山已經開花、原來春天已經到咗、原來後山可以眺望到我哋條村。

明明呢啲嘢一直都存在，但我一直都因為上落山都只係諗住報仇嘅事，所以一直都留意唔到咁多美好嘅風景。

阿么，你嘅好，其實我一直都知道。

但係因為我只係諗住自己嘅傷、諗住過去，所以一直都唔可以將目光放喺你身上。我好多謝你，從來都無離開我。

『可以喺你身邊，我已經好開心。』呢句說話唔應該係由你講，而係應該由我講，可以有你喺身邊，我真係好開心。」

石養么一路聽，一路都忍唔住喊，但係佢又刻意無喊出聲，可能就係唔想俾電話另一邊嘅向彩萍發現。

「阿么，我哋過去都係受咗傷嘅人。

可惜嘅係，過去係無可能放得低嘅，因為所有事情都係真實咁存在過。

只不過，我哋仲有選擇，可以將眼光轉開，唔再去注視過去，而去凝望將來。

聽敏敏所講，丘志傑已經洗心革面，同佢老婆有一段美滿嘅婚姻。

所以喺兩日入面，我所諗通嘅係，既然傷害我嘅人都已經邁步向前，我又何必一個留喺原地回味傷痕呢？

『愛』呢個字，經過咗咁多年，我都未摸得清佢嘅真正意思，我甚至覺得自己無咗愛嘅能力。

但係直至到頭先我一直聽你講你嘅故事，我先發現，其實我喺自己嘅人生裡面，一直都有你陪伴喺身邊。

而亦都因為好多片段之中都有你，我先可以得到好多人生之中嘅美好。

其實呢啲美好一直都存在，只係我一直都無機會重視佢。

我知道，你由細個開始已經係一個好有愛心，樂天知命嘅人。

今日你會搞到對人出現殺心，其實都係因我而起。

你過去對我嘅好，我知道自己無以為報。

我真係唔知咩嘢係愛，但係我好清楚，我希望自己可以繼續同你一齊，度過埋剩低嘅人生。

因為唯有你，先可以俾到嗰一份安穩嘅感覺我。

而同樣地，因為而家嘅我已經開始學習放低過去，我都希望自己可以俾翻一份安穩嘅感覺你。

阿么，你願唔願意翻嚟雲南教我點樣可以令人放心同安穩啊？」

向彩萍嘅一字一句，好清楚咁傳咗入我同敏敏嘅耳中。

作為兩個都聽過向彩萍分享自己故事嘅人，呢一刻聽到佢講出自己對石養么嘅真實感覺，難免都有多少感動。

向彩萍之前一直都沉醉喺從前嘅傷痕之中，好執著自己已經失去咗「愛情」嘅感覺。

但係聽到佢而家呢一番說話，好明顯佢已經唔再執著於咩係「愛」，反而多咗一種聽從自己內心嘅感覺。

「真愛是任何形狀」。

確實，無論係我同敏敏互相扶持嘅愛、世伯伯母原諒與成長嘅愛、八仙果師父同高醫生道不同但一樣可以相愛相親嘅愛、向彩萍糾纏不清嘅愛、石養么恆久忍耐默默付出嘅愛，所有形式、所有形狀嘅愛，都係愛。

即使而家嚟到連向彩萍自己都唔清楚到底對於石養么嘅係咪愛，其實，愛嘅定義又係咪真係咁重要呢？

或者，最重要，其實係「心意」。

向彩萍一直以嚟都俾恨意同失落感填滿自己嘅人生，從來都無機會去聽清楚自己嘅心意。

但係直到佢放棄血蠱蟲、放棄報仇，佢反而有機會俾自己靜翻落嚟去聆聽自己嘅心到底最需要啲咩。

所以，當向彩萍能夠講出佢希望自己可以同石養么共度餘生嘅心意，或者，呢份肯定已經比起「係唔係愛」呢個問題更加重要。

石養么呢一刻握實咗部手機，眼淚不斷滴落部手機度，連一句嘢都講唔出口，或者呢個情景就係成語所講嘅「泣不成聲」。

而喺呢個時候，敏敏從地下爬起咗，走到去石養么面前，溫柔咁講：「我明白，你心入面或多或少都會恨我爸爸以前糟蹋咗你最愛嘅人，令佢受咗咁多年苦，同時亦都令你付出嘅愛好似徒勞無功咁。但係，去為人哋增加傷痕，唔代表你自己嘅傷痕可以痊癒。而家，喺你眼前就有一個可以真正幫到你，幫到向彩萍嘅痊癒機會。選擇，就喺你手上。」

敏敏講完，指一指部手機。

石養么抬起咗頭，一手抹走臉上所有嘅眼淚。

佢呼出咗一口氣，然後慢慢將手機拎近嘴邊。

「阿萍，我教唔到你，不過，我哋可以一齊學習點去療傷。」

聽到呢句話，我見到敏敏都感動到流出咗眼淚。

向彩萍同石養么，兩個都係心靈受傷嘅人。

佢哋都各自默默用過好多唔同方法，希望可以醫到自己內心嘅傷。

向彩萍嘗試逃避同復仇，但係偏偏心入面依然擺脫唔到受傷嘅陰影；石養么試過繼續不斷咁付出同說服自己唔介意得唔到向彩萍嘅愛，但其實內心難免有填補唔到嘅失望同恨意。

但係直到而家，佢哋先真正搵到令大家都可以得到治療嘅方法。

方法就係，明白對方嘅故事，了解對方嘅傷處，最後，一齊療傷。

就喺呢個咁感動嘅時候，客廳之中突然出現一陣「砵砵砵砵砵砵砵砵」嘅聲音。

同時間，一股惡臭亦都隨之而來。

正當我以為有生化襲擊嘅時候，我望到世伯企咗起身。

但係佢今次雙眼有神，同頭先俾人用「共生蠱」控制嘅迷糊樣完全唔同。

「得咗喇！果然一幫佢排走體內嘅毒氣，佢就唔俾人控制到，都話科學有用㗎啦。」高醫生喺呢個時候彈咗起身，聽佢解釋我先明白原來真係靠住頭先同世伯打茄輪，世伯已經脫離咗石養么嘅控制。

即使係咁，呢個時候嘅石養么已經無心情再去理世伯。

又或者話，佢已經再無需要報仇嘅理由。

手機嘅另一邊，傳出咗向彩萍一聲笑聲。

「嗯，咁今次，就到我同你講，我等你。」

呢一聲來自向彩萍嘅「我等你」，就好似呼應緊當年石養么喺向彩萍去香港之前嘅嗰一聲「我等你」一樣。

只不過，兩句「我等你」其實又有唔同。

當年，石養么嘅一句「我等你」，係無了期、單向嘅等；而今日向彩萍嘅「我等你」，卻係大家都帶住渴望重逢嘅心而出現嘅等待。

呢一句語帶雙關嘅「我等你」，再加上世伯放到好似燒炮杖一樣又頻密又響嘅屁聲，似乎為今晚呢一場大龍鳳畫上咗一個幾特別嘅句號。

喺石養么離開之前，佢將手機還翻俾敏敏。

敏敏拎翻手機之後，望咗一眼，然後將佢放咗喺世伯手上。

世伯望到部手機，再望到敏敏意義深遠嘅笑容，加上伯母喺佢身邊點一點頭，世伯都明白大家嘅意思。

佢拎起咗部手機，好小心咁叫咗一聲：「阿萍。」

「傑？」向彩萍應咗一聲。

「嗯。」世伯吐出咗一口氣，「當年不辭而別，真係好對唔住。當年嘅我，根本就未識得處理關係，所以先會造成對你同埋阿芳嘅傷害。我呢句『對唔住』，真係爭咗你好多年。」

「算啦，都過咗去喇。」向彩萍呢句答得風淡雲輕，但無人知道佢呢一刻嘅內心又係咪真係咁心如止水。

「祝你，之後幸福平安。」世伯講完呢句說話之後，五官都好似放鬆咗。

「生活安好。」向彩萍答完呢一句之後，通話就斷咗線。

或者，呢一段對話喺無「再見」嘅情況之下完結，對雙方都係最好嗁結局。

而聽完呢一段對話之後，我哋發現石養么都已經不辭而別咗。

經過咗呢一晚，成個客廳都亂七八糟，世伯仍然繼續不斷咁放緊屁，而且八仙果師父亦都仲未醒翻。

一切雖然好亂，但係我同敏敏望住呢一片狼藉，唔知點解，心入面反而係感受到近幾個月以嚟最平安嘅感覺。

（故事待續）

（明日．終章．見）

婚禮食朱古力味結婚蛋糕
然後敏敏突然喺附近搵唔到男主角 喺後台見到佢同自己老豆錫緊

呢一篤來自丘志傑嘅「炮仗屁」，就好似呼應緊當年向彩萍對丘志傑落蠱之後嘅嗰一篤「婚禮屎」一樣。

只不過，兩種臭味其實又有唔同。

當年，丘志傑食嘅一篤「婚禮屎」，係無了期、會遺傳嘅臭味；而今日丘志傑嘅「炮仗屁」，卻係大家都帶住渴望新生嘅心而出現嘅響屁。

一睇巴打嘅分析都感受到你有深厚嘅文學基礎

又話「真愛是任何形狀」
咁阿博同世伯嘅愛呢
最重要嗰對忽略咗點得

睇到有d 想喊

終章留明