《求婚嗰日，我發現我女朋友鍾意食屎》(2)

「聽晚呢，我嘅蠱毒就會解開，而到時候爸爸媽媽、八仙果師父又會在場……」敏敏講到呢度，突然有啲吞吞吐吐。

我一下子就明白咗佢嘅意思，忍唔住大嗌咗出嚟：「你係咪暗示緊我聽晚求婚？」

「喂呀！夜已深啊，細聲啲啦。」敏敏輕力拍咗我一下，但係從夜晚嘅微光之中都可以睇得出佢呢一刻表情係怕羞嘅。

「明白，收到，聽晚我會識做㗎啦！」我望住敏敏呢個咁可愛嘅女朋友，忍唔住將佢一下攬咗埋身，仲要攬到實一實，令佢不斷笑住咁大叫「救命」。

喺呢一份幸福嘅氛圍入面，我哋兩個最後都係甜笑住咁瞓著咗，同時喺心入面期待將蠱毒解開嘅第二日。

或者喺雲南嘅日子真係太chur，第二日一瞓醒，已經係下晝十二點。

呢個時候，我同敏敏就商量好今日各自嘅行程，佢就會負責買定餸今晚煮飯俾佢父母同埋八仙果師父夫婦食，而我就會出發先上向彩萍屋企拎書，然後去旺角「譚仔」，將向彩萍交托俾我嘅嘢拎俾娟姐。

於是我哋定好行程就分道揚鑣，約定今晚去外父外母屋企再見。

第一站，我去到向彩萍香港嘅舊居。

同上次唔同，今次我光明正大咁用向彩萍俾我嘅鑰匙將門打開，然後堂堂正正咁走咗入去。

由於有咗上次經驗，所以今次我走入向彩萍間房再見到牆上面大大個「蠱」字，已經無之前咁驚，只不過，一樣係有嘔心嘅感覺。

所以，我快快手走到去書櫃前面，好快就搵到要拎嘅書，然後就打算急急腳走。

就喺呢個時候，我留意到床上面放咗嘅一樣嘢。

呢樣嘢，就係上次我哋曾經睇過嘅信。

亦都係向彩萍離奇地一直都否認有寫過嘅信。

我忍唔住拎起咗呢封信，想喺佢身上再搵出一啲可能我之前睇漏咗嘅線索，話唔定，就可以解答到我內心嘅疑問。

「與君一別匆匆十餘載，舊情早已一去不復再。
昔日卿投以斷腸之痛，我報之以蠱毒。
今日既然各有依歸，不妨一笑泯恩仇。
見此信時，我已返鄉雲南。
盼君携眷而來一聚，我亦可引見我夫君，豈不是美事一樁？」

信上面嘅文字，無論橫睇掂睇都無咩可疑之處，唯一值得留意嘅係，其實向彩萍手字都幾唔錯。

望住呢封信，我不期然係度諗，到底會唔會敏敏嘅講法係啱嘅，而我真係諗得太多呢？

事實上，經過我喺雲南見證敏敏同向彩萍傾計之後，我都有自我反省到，其實有時候我哋一般人睇人，都好容易俾自己嘅感受影響咗。

可能因為我內心一直有「向彩萍係壞人」呢個印象，所以即使只係少少事，但係都會無限想像FF落去。

咁講真，話哂呢封信都係五年前寫落嘅，當時即將離開香港嘅向彩萍，又點同而家向彩萍嘅心境一樣呢？

咁所以，向彩萍而家唔想承認當年自己寫過呢啲嘢或者都係正常嘅。

我好唔容易咁終於說服咗自己，決定唔好再諗咁多。

於是，我放低封信，拎起啲書出發去「譚仔」。

講到呢度，突然想問大家一個問題。

唔知大家有冇試過俾一件事困擾咗好耐，而當你決定唔諗嘅時候，大腦就喺你放鬆嗰一刻好似打通咗任督二脈咁，然後一瞬間你就諗通哂之前Kick住嘅位。

簡單嚟講，有啲嘢你唔搵，佢就會自己走翻出嚟，無錯，就係咁乸出奇。

如果你有經歷過，你就會明白我而家呢一刻嘅感受。

因為就喺我準備行出房門嘅一刻，突然間，我個腦好似有一道電光閃過。

而我把握到機會，捉住咗呢一剎那間閃過嘅靈感。

呢一刻嘅靈感，係嚟自我頭先嘅自我說服。

「五年前」，向彩萍呢一封信，理論上係佢五年前離開香港前寫落嘅。

但係信上面其中一句咁寫：「盼君携眷而來一聚，我亦可引見我夫君。」

根據向彩萍所講，直到三年前，佢先下定決心想同石養么結婚。

如果係咁，五年前向彩萍又點會有可能喺信上面寫自己有「夫君」呢？

一諗到呢度，我本身想放低封信嘅手即刻將封信捉翻實。

無諗過，原來疑點一直都已經近在眼前，只係我從來都無留意到。

（故事待續）

＝ ＝ ＝
下一個加更位：400正皮
Penana加更位：2700 likes
Penana link：https://www.penana.com/story/90310

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」同「故事心得」，IG限定㗎
IG : windblowssilently

Big boss係敏敏老母，我琴晚喺樓豬床下底望到

大力一推

又停係呢啲位

等死我啦

點算呀
一波未平

我寫甜好差
所以一向啲故都走甜

一口氣追到live

好緊張，大佬要出場啦

勁啊 高潮前追到live最開心

終於考完試，一口氣追到live好好笑，但係又好緊張

花生友巴welcome back

既然呢個疑點合理，咁跟住落嚟，我要考慮嘅可能性就多咗好多。

第一個可能性，會唔會呢封信其實唔係向彩萍喺五年前寫落呢？如果係三年前寫落，咁件事就合理咗。

但係，根據佢自己嘅自述，佢喺呢五年嚟都無翻過香港。

可能佢刻意隱瞞佢翻過香港呢件事？

如果係咁，背後又有咩目的呢？

但係如果要認真諗，呢個可能性其實唔大。

一來向彩萍講佢嘅歷史嘅時候，佢係俾八仙果師父用「八仙法」控制咗，照計無可能會講到大話。

所以，向彩萍三年前曾經翻過香港呢一個可能性基本上係無可能嘅。

而第二個可能性，係向彩萍五年前故意講大話，係信上面寫自己有夫君，目的係令丘志傑降低戒心，然後願意同佢見面。

感覺上，呢個可能性比較大。

但係又諗深一層，點解向彩萍會覺得寫咗「夫君」呢個理由就足以令丘志傑遠赴雲南呢？

而且，一旦丘志傑真係去咗雲南，但係石養么根本唔知情，佢亦唔識配合向彩萍，咁向彩萍咪會穿煲？

而最大嘅問題係，向彩萍如果想同丘志傑見面，點解要搞咁大壇嘢呢？

當時嘅佢都未離開香港，佢要見面，其實直接過去搵丘志傑咪得囉？

講下講下，似乎連第二個可能性嘅機會都唔大。

望住呢一封充滿咗疑點嘅信，我將佢小心收好咗。

因為我有一種直覺，一日未解決呢封信所帶嚟嘅疑點，呢件事都唔會真正咁結束。

雖然疑團並未解開，但係行程都需要繼續。

所以轉眼之間，我就到咗旺角嘅「譚仔」。

「嘩！博仔，『近』好翻嚟『嘆禾』哋啊？食唔食碗mi線啊？」

我一踏入「譚仔」，有一個姐姐即刻四萬咁口同我打招呼。

我一望，原來就係之前中咗毒入院嘅翠姐。

我一見佢而家生猛翻哂，個心都舒服翻好多，即刻笑住同佢打招呼同關心下佢。

傾下傾下，正當一吹水就吹唔斷氣嘅翠姐又準備同我分享佢唐朝嘅祖宗曾經都中過毒大難不死嘅故事，娟姐就出現咗喺樓面。

佢見到我，似乎都有啲意外，而我就向佢揮一揮手，表示有啲嘢想同佢講。

「呢一張紙，係向彩萍托我拎俾你嘅。」我將寫咗湯底嘅信拎俾娟姐睇。

「呢兩款湯底，用料確實好有萍姐嘅風格，我相信一定可以大賣。」娟姐打開封信，望住紙上面嘅內，雙眼首先發光，但係好快又變得眼濕濕，「係呢，萍姐佢而家點啊？」

我分享咗向彩萍而家喺家鄉落地生根，又開翻一間小餐館嘅事俾娟姐聽，娟姐聽到向彩萍而家生活安好，都露出咗安慰嘅笑容。

而我心入面記掛住要解開疑團嘅事，加上見事情都交代得七七八八，於是就打算離開。

「你『蛋』一陣，唔好走住。」娟姐叫一叫停咗我，然後入咗員工室。

隔咗無耐佢再走翻出嚟，手上面拎住咗一張紙，然後對我講：「之前你喺度翻工嘅時候，我見有一兩次廚房太忙，你入咗去幫手而且煮嘢食嘅手勢仲好過我哋班姐姐，我估你應該都係揸慣鑊鏟嘅人。呢張紙係佢嗰兩款湯底嘅影印，你鍾意都可以攞翻屋企煮下嘅，當係多謝你從雲南拎咗萍姐嘅湯底俾我哋啦。」

娟姐雖然平日為人嚴格，估唔到份人原來都幾均真。

我講咗聲「多謝」，就將呢張紙接咗過嚟，順手望下上面嘅內容。

的而且確，兩款湯底都好有雲南風味，加上喺香港從來都未見過，睇嚟向彩萍喺研發湯底方面真係幾有天份。

我諗到敏敏本身都幾鍾意食辣，如果可以喺屋企煮到「譚仔」嘅味道俾佢食，佢應該都會幾開心，所以我就滿心歡喜咁收好咗張湯底。

喺一班姐姐落力咁挽留之下，我就留低咗喺「譚仔」度食咗個下午茶，再同大家吹下水，氹下啲姐姐開心，不知不覺就到咗日落嘅時間。

眼見時間都差唔多，我就起程離開，準備去世伯外母屋企食飯。

出到「譚仔」，我好快就上到小巴。

話哂車程都有成二十分鐘，我個心好自然又想研究下嗰封奇怪嘅信。

於是，我就從背囊度摸下摸下拎咗封紙出嚟。

點知我一打開嚟睇，先發現自己原來拎錯咗向彩萍嗰張湯底紙出嚟。

於是我喺心入面笑一笑自己，然後又再伸手入袋摸過，今次就真係拎啱咗喇。

再次打開呢封信，望住嗰啲我就快可以背得出嘅內容，唔知點解，我今次有一啲唔同嘅感覺。

信入面，有一份之前一直都無嘅熟悉感。

好奇怪，明明今次我都唔係第一次睇呢封信，點解反而今次會覺得呢封信有呢種咁特別嘅感覺呢？

但係下一秒，當我望到我自己另一隻拎住嗰張湯底紙嘅時候，我即刻倒抽咗一口涼氣。

我慢慢打開咗張湯底紙，然後即刻驗證咗自己嘅諗法。

我終於明白，點解我望住向彩萍屋企封信嘅時候會有一份熟悉嘅感覺。

因為當我而家打開咗張湯底紙嘅時候，我發現佢上面嘅字跡，係同向彩萍屋企封信嘅字跡一模一樣嘅。

而重點係，當日，負責寫呢一張湯底俾我哋嘅人並唔係向彩萍。

係石養么。

一時之間，我覺得自己好似俾人點咗穴咁，成個人驚訝到郁唔到。

但係，我個腦就已經不斷快速咁轉緊。

一直以嚟，我對石養么嘅印象都係停留喺一個唔多識嘢嘅熱心、大隻、同埋好似黃德斌嘅鄉下佬。

我從來無諗過，成件事竟然會牽連到佢身上。

但係，若然將目前所有疑點轉到去石養么身上諗，事情反而就開始有啲眉目。

首先，因為信係石養么寫嘅，所以向彩萍一直否認自己有寫過信呢件事就變得好合理。

第二，石養么一直都認定自己係向彩萍指腹為婚嘅老公，所以自命「夫君」寫上封信度，似乎比起係向彩萍所寫嘅更容易解得通。

雖然，事情好似有咗突破性發展，但係更多嘅問題又開始出現喇。

到底點解石養么要冒向彩萍名去寫呢封信叫世伯去雲南呢？

可能性有好多，但係暫時無一個係可以肯定嘅。

而自從發現件事入面有石養么嘅參與之後，目前最解釋唔到嘅地方就係，當年向彩萍離開香港之後半年，娟姐收到一封嚟自向彩萍嘅信，信入面叫娟姐遇到世伯嘅時候，就叫佢上去向彩萍屋企。

而喺佢屋企，我哋就發現咗有石養么冒認係向彩萍所寫嘅信。

問題係，到底向彩萍叫世伯上佢屋企同石養么寫冒認信呢兩件事到底係巧合定係佢哋夾埋呢？

嚟到呢一刻，成件事又似乎陷入咗一個瓶頸位。

但係當我已經覺得石養么唔係一個普通人物嘅時候，我好快就有咗一個出其不意嘅諗法。

我第一時間拎出手機，Signal搵敏敏同埋叫佢send嗰張影低咗向彩萍同石養么同我哋講拜拜嗰張相俾我。

我收到相之後，即刻將相轉發咗俾娟姐，然後打咗個電話俾佢。

「喂，娟姐！」

「做咩啊？我見你Send咗萍姐張相俾我喎。」

「重點唔係向彩萍，而係我想問你，你有冇見過相入面揮緊手嗰個男人？」

我之所以咁樣問娟姐，其實背後有一個我大膽嘅推測。

話說我頭先諗到，到底向彩萍叫世伯上佢屋企同石養么寫冒認信呢兩件事係巧合定係佢哋夾埋呢？

話係巧合嘅話，嗯，實在好難令人相信，因為如果無呢個巧合，石養么寫信嘅心機就會完全白費，所以石養么無理由大費周章去做一件靠巧合成功嘅事。

話係夾埋，嗯，亦都一樣奇怪。因為如果向彩萍要引世伯去搵佢，點解佢唔親自寫封信俾世伯，甚至直接寄去佢屋企，而係要用一個咁轉折嘅方法？

所以我最後諗到一個大膽嘅可能性，會唔會其實連娟姐收到嘅嗰一封向彩萍信其實都係石養么偽造嘅呢？

如果係咁，成件事又可以變得合理得多。

因為娟姐嘅信係石養么寫嘅，所以入面先有叫娟姐叫世伯去佢屋企嘅信息，目的就係引世伯去向彩萍屋企，然後睇到牆上面嘅「蠱」字同埋叫佢去雲南嘅信。

既然我有呢個假設，我就嘗試大膽求證，睇下娟姐會唔會曾經見過石養么。

如果有，咁我嘅推論成立嘅機會就大大增加。

娟姐喺電話嘅另一邊靜咗一陣，似乎好認真咁睇緊相。

大概過咗幾秒，娟姐終於答：「有啊！」

呢個答案真係不得了，睇嚟我嘅推理真係無錯！

我好激動又興奮咁追問一句：「你真係見過佢？！」

娟姐好肯定咁「嗯」咗一聲，答：「有，黃德斌啊嘛！我有睇《大叔的愛》啊。但係點解佢會同萍姐影相嘅？」

我反咗720度白眼之後，嘆咗一口氣，似乎喺娟姐身上問唔出咩新線索。

而喺呢個時候，我聽到電話傳嚟咗翠姐把聲：「咦？講黃德斌啊？我都好鍾意佢㗎，佢係我男神嚟㗎！」

聽埋呢句，我相信呢通電話都唔多會有意義，所以我就打算收線。

點知就喺我收線前一刻，我聽到翠姐講咗一聲：「喂！呢個點會係黃德斌啊，佢塊面尖啲喎！啊……不過唔知點解我又好似係邊度見過佢咁嘅……」

「翠姐你見過佢？係邊度？係咪五年前？係咪同封信有關？」我一知道翠姐可能見過石養么，即刻一口氣問出幾條問題。

「啊！你一講信我就有啲印象啦！係咪五年前我就唔太肯定，不過呢，都真係幾年前嘅事啦。我對佢有印象，係因為嗰日佢無啦啦嚟舖頭頭耷耷放低封信就走，我見佢走得咁快就梗係叫停佢啦，你知啦，郵差送信都要講聲㗎嘛！

咁佢停低咗，我望見佢個樣有少少似我男神黃德斌，加上我又鍾意同人吹水，所以就更加有興趣問下佢嘢。點知佢好似唔識講嘢咁，但我見佢個樣有啲似我哋國內嘅同志，咪試下用普通話同佢傾囉，點知又得喎！我仲聽出咗佢口音係雲南人添，但係當我一問佢鄉下嘅嘢，佢就走都走唔切，搞到我都好好奇點解會有個咁古怪嘅郵差。

所以呢，如果唔係你提起信，我就真係唔記得佢喇，不過你一講呢，佢個樣、個把聲，同埋佢啲奇怪嘢我都多多少少有翻印象。」翠姐一輪嘴咁答我。

估唔到，曾經令我覺得佢好長氣嘅翠姐，展示到原來長氣同鍾意吹水都有佢嘅優點。

而家，所有迷團已經解開。

當年，送俾娟姐封信原來真係石養么偽造嘅，所以信入面叫世伯上向彩萍屋企，然後目的就係令世伯拎到邀請佢去雲南嘅信就非常合理。

當一切嘅疑點逐一揭開嘅時候，幕後一直操控呢件事嘅黑手終於現身。

石養么，就係所有問題背後嘅答案。

但係到底佢嘅動機係咩？佢又想達到咩目的呢？

一切，依然係未知之數。

（故事待續）

＝ ＝ ＝
下一個加更位：400正皮
Penana加更位：2700 likes
Penana link：https://www.penana.com/story/90310

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」同「故事心得」，IG限定㗎
IG : windblowssilently

一路以為大Boss係娟姐

睇嚟石養么呢個男人 唔聲唔聲 為咗自己愛嘅女人做咩都可以喎

想殺左敏敏老豆？

似了