《求婚嗰日，我發現我女朋友鍾意食屎》(2)

石養么曾經打算搵出丘志傑嘅屋企留低一個引佢上向彩萍屋企嘅訊息，但係可惜最後無功而還，所以最後唯有改為去向彩萍之前工作過嘅「譚仔」，希望可以留低封信，咁假如丘志傑他日出現，就可以將佢引導上向彩萍屋企。

於是，石養么扮成郵差，將偽造嘅向彩萍信交咗俾娟姐，亦都係石養么喺日記入面睇到，向彩萍最信任嘅人。

順帶一提，石養么記得向彩萍曾經分享過，做「譚仔」嘅時候都有唔少男客人想追求佢，仲有唔少都會死纏爛打添。

所以石養么刻意用蠱將一條毒蟲召喚咗入去向彩萍舊日嘅儲物櫃，並且喺信上面亦都加咗呢一項，希望喺有咩麻煩嘅時候，都可以幫到舖頭嘅人多一分保護。

石養么又根據老婆婆嘅指示，翻到雲南之後聯絡咗嗰一帶嘅「獵蠱人」，表示如果有人可以搵出身上有「血蠱蟲」嘅人，就會贈以重金作為回報。

打點好一切之後，石養么終於可以翻到鄉下。

萬事俱備，唯一欠嘅只係唔知丘志傑幾時會上當。

但係石養么亦都深信天意，「善惡到頭終有報，若然未報，時辰未到」，所以石養么就將丘志傑嘅生死大權交俾上天，而自己就喺家鄉等待丘志傑嘅出現。

丘志傑到底幾時會出現，呢一點無人會知。

但如果佢出現，石養么就會用「共生蠱」去對付佢，令佢親手殺死自己嘅老婆，後悔一生。

當然，用完「共生蠱」，石養么亦唔知道自己到底只係會折壽，定係就此一命嗚呼。

所以趁丘志傑未正式出現之前，石養么好清楚自己仲有一件事喺死之前一定要完成。

呢件事就係，擁抱向彩萍傷痕累累嘅身驅，並且令佢可以完全痊癒。

一旦失敗，至少佢都相信自己將來可以同向彩萍一齊落地獄。

而對石養么嚟講，有向彩萍嘅地獄，其實就係天堂。

＝ ＝ ＝
下一個加更位：400正皮
Penana加更位：3500 likes
Penana link：https://www.penana.com/story/90310

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」同「故事心得」，IG限定㗎
IG : windblowssilently

一個月就學識咁快

因為佢學嘅只係「共生蠱」

覺得今晚呢一章好襯呢首歌，大家聽住睇會更有Feel

https://www.youtube.com/watch?v=IveFJsWfHbk&ab_channel=TimelessMusicHongKong%E5%A4%A9%E7%A2%9F

共生 同死
何以獨善其身

細力推

一旦失敗，至少佢都相信自己將來可以同向彩萍一齊落地獄。

而對石養么嚟講，有向彩萍嘅地獄，其實就係天堂。

人生自是有情癡，此恨不關風與月。

推一推

Push

唔係高級嘢嚟咩？

同時用埋自己條命
應該係偏野, 唔係高級野
用自己條命換30分鐘

你當好似啲明星為咗做戲去學琴,
首歌雖然好勁,
但其實佢係用一個月死記硬背一首歌
所以出到嚟只需要一個月,
但係用嘅蠱都勁

平安夜快樂
今晚大家盡情玩啦，夜少少先出文

平安夜快樂

樓主同埋各位一齊追故嘅巴絲聖誕快樂啊

等緊

聖誕快樂

石養么從雲南來回一次香港，其實旅程只不過一星期，但係佢嘅心境已經完全唔同哂。

即使每日嘅生活依然係簡單咁幫向彩萍開舖、煮米線，但係石養么內心已經不如以前咁平靜。

因為石養么一直以嚟都只係見到佢幻想中堅強、硬朗嘅向彩萍，而而家佢睇到嘅卻係一個背負傷痕累累、歷史難以啟齒嘅向彩萍。

雖然石養么有無數次希望可以引向彩萍講出佢呢啲事，等石養么可以光明正大咁關心佢。

但係可惜，向彩萍對於自己喺香港嘅過去都係輕輕帶過，完全無俾到石養么任何機會。

所以，石養么唯有繼續等，等一個適合嘅機會。

轉眼之間，向彩萍喺雲南嘅生活就已經過咗兩年。

表面上，佢同一般人無任何分別，喺舖頭可以同唔同村民講笑傾計，似乎已經放低咗曾經有嘅過去。

但唯獨石養么知道，向彩萍每一晚依然會摸黑上山養蠱，代表佢對過去依然上心。

呢兩年以來，丘志傑一直都無出現喺雲南。

換言之，石養么嘅計劃一直都無機會生效，同時佢嘅死期亦都未到。

所以喺呢段時間入面，佢諗咗好多關於佢同向彩萍嘅事。

石養么最初諗過，從前向彩萍之所以無考慮自己，係因為佢同自己有一段長時間分別住喺香港同雲南，所以關係變得生疏咗。

石養么曾經以為，靠自己每一日嘅陪伴，終有一日可以替代到丘志傑喺向彩萍心入面嘅位置，到時候向彩萍就可以放低過去。

但係隨住時間過去，石養么發現，原來要將一個人搬出另一個人嘅心，可能比起愚公要移山更難。

移山，可以靠日子有功；移人，如果對方死都要握緊過去，根本就無可能做到。

所以，石養么慢慢察覺，就算佢幾努力，都無可能令到向彩萍放低丘志傑，而佢唯一可以做嘅，就係繼續喺生活入面無微不至咁照顧向彩萍。

至於同向彩萍結婚，石養么已經無再刻意去諗。

愛與被愛，唔一定要成正比嘅，對石養么嚟講，能夠每日面對面咁照顧自己重視嘅人，令佢可以擁有一日嘅快樂，已經係最平凡嘅幸福。

只不過，命運永遠都係難以猜測嘅。

就喺呢一年，石養么爸爸突然病危。

對於向彩萍主動提出可以幫石養么照顧佢爸爸，石養么當然好開心啦。

但係亦都因為見到向彩萍，令石養么爸爸再一次諗起自己個仔仲未成家立室嘅遺憾，所以亦都忍唔住喺病床上亦都要向石養么訓話幾句。

聽到爸爸嘅責備，石養么當然又內疚，又無奈。

佢表面上斬釘截鐵咁同佢爸爸講：「這世上，除了阿萍之外，我不會娶其他女人。所以請你放心，終有一天，我會讓她想要跟我結婚的。」

但其實喺佢心裡面所諗嘅係，「對唔住爸爸，除咗阿萍，我已經無可能再愛上另一個女人。即使我知道，佢唔會想同我結婚。」

而就喺同一晚，向彩萍趁住石養么陪佢行路翻屋企嘅時候，毫無先兆咁講咗一句：「我們結婚吧。」

石養么聽到，一時間俾唔到任何反應。

佢嘅內心一方面當然係開心咁覺得不可思議，但另一方面又因為隱隱明白點解向彩萍係為咗償還自己嘅恩情所以揀呢個時候提出呢個要求，因此難免有一種戚然嘅感覺。

唔明白石養么內心諗咗咁多嘢嘅向彩萍睇到佢呢個反應，以為石養么只係開心到呆咗，所以向彩萍笑住講咗一句：「反正，這是我們出生之前已經注定了吧。」

呢句說話，好似點醒咗石養么。

無錯，早喺佢哋出世之前，其實命運已經注定咗而家嘅一切。

而佢，石養么，注定要成為向彩萍身邊最親近卻唔親密嘅一個人。

如果係咁，就算結唔結婚、乜嘢過去、向彩萍出於咩原因願意同自己結婚，其實又有咩關係呢？

最重要嘅，就係自己可以繼續照顧向彩萍。

於是，石養么同向彩萍正式喺呢一年成婚。

雖然石養么同向彩萍本身打算低調處理，但係話哂兩個人都係從小到大喺村到長大，所以結婚嘅嗰一日，村入面家家戶戶張燈結彩，睇落就同農曆新年一樣咁熱鬧。

既然村入面氣氛咁好，石養么亦都順應大家意思，露天擺咗十幾圍，當係意思意思，與眾同樂。

當晚，向彩萍亦都比平時笑得更多，甚至有一刻，石養么完全忘記咗向彩萍心裡面有丘志傑呢一個人，而係全心全意咁同自己結婚。

熱鬧過後，石養么作為男家需要留到最後打點一切，然後先翻到已經佈置成新房嘅屋企。

企喺新房嘅門口外面，雖然明明係自己屋企，但係一諗到著住裙掛嘅向彩萍就喺入面，石養么就覺得有多少緊張。

但係佢又好快說服自己，向彩萍嫁俾自己只係為咗報恩，唔需要諗咁多，所以慢慢就將心情平靜翻落嚟，然後輕輕敲咗兩下房門。

「進來吧。」

聽到向彩萍低聲嘅許可，石養么將房門推開咗。

向彩萍呢一刻坐咗喺鋪上咗紅色床單嘅床上面，身上嘅裙掛並未換走，喺一對「囍」字火燭嘅映照之下，睇落特別明豔照人。

但亦都係因為火燭嘅光線，令石養么發現向彩萍嘅臉上竟然有兩行淚痕。

「還好嗎？」石養么走近向彩萍，本來想溫柔咁捉起佢嘅手去問，但係又好快下意識咁停住咗自己嘅動作。

「沒事，只是想到今天大日子但媽不在了，有點可惜。」向彩萍微微一笑咁答，目光不經意咁注視喺床邊枱上。

石養么順住佢嘅眼神望去，發現枱上面放咗唔少賓客送嚟嘅禮物。

而其中一份禮物，係由向彩萍妹妹所送嘅一對椰子。

呢對椰子唔似平時咁單純咁貼上「囍」字，反而係用粗毛筆字分別寫咗「天長」同「地久」四個字。

一望到「天長地久」，石養么腦入面第一時間出現嘅，係「天長地久有時盡 此恨綿綿無絕期」。

所以，佢明白咗，點解向彩萍會望住呢一對椰子而流淚。

「不早了，一起休息吧。」向彩萍喺呢個時候講。

「嗯，你好好睡，我到外面睡。」石養么其實一早已經諗好咗呢個安排，畢竟佢同向彩萍一直相敬如賓，而且佢又相信向彩萍只係為咗報恩而同自己
結婚，佢唔想喺呢個時候借夫妻之名嚟討向彩萍便宜。

「不用，你先把蠟燭吹掉，」向彩萍似乎明白石養么嘅用意，「一起在這兒睡吧。」

講完呢句之後，向彩萍將自己嘅頭飾除咗落嚟，瞓咗喺床偏向入啲嘅位置，留咗一個人嘅空間俾石養么。

石養么小心翼翼咁坐咗上床，然後再慢慢背對住向彩萍咁瞓低咗。

昏黑而沉靜嘅環境，兩個人身上所著住嘅裙掛馬掛，仲有兩個人背脊與背脊之間嘅距離，都令到呢個房間入面充斥住唔協調嘅氣氛。

石養么當然感受到呢股氣氛為人帶嚟嘅不自在感，但係佢無刻意想做啲咩嚟對抗呢種感覺。

佢只係做佢最擅長嘅嘢，等。

佢等到向彩萍嘅呼吸變得悠長，亦都即係代表向彩萍已經瞓著咗嘅時候，佢先慢慢轉身過去。

佢望到向彩萍近在咫尺嘅後頸，仲有鼻入面充滿住向彩萍身上嘅香氣。

佢好小心咁慢慢伸出一隻手，然後將手放咗喺向彩萍嘅手臂上面。

然後佢慢慢將自己嘅身體移近向彩萍，直至到自己嘅胸口貼近到向彩萍嘅背脊。

呢一次，係石養么第一次認真咁感受到向彩萍嘅體溫。

從向彩萍嘅肌膚之上，石養么甚至好似感受到佢嘅心跳。

呢一啲真實嘅觸感，好似俾咗石養么一個肯定，佢畢生之中最愛嘅人，終於成為咗佢嘅枕邊人。

但係喺人生目標解鎖嘅呢一刻，石養么嘅感覺，偏偏係前所未有嘅悲哀。

因為佢知道，而家呢一個就係佢同向彩萍最極限嘅距離。

佢可以擁抱到向彩萍，但佢唔會擁有到向彩萍嘅心。

佢可以聽到向彩萍嘅心跳，但佢唔可以聽到向彩萍嘅心聲。

即使佢哋已經成為夫妻，但佢知道，佢哋其實喺對方心入面嘅角色根本無變。

「反正，這是我們出生之前已經注定了吧。」

對有緣人嚟講，呢句說話係一種祝福。

對於向彩萍同石養么嚟講，呢句說話偏偏係佢哋之間嘅囚牢。

或者係因為命中注定，石養么永遠都難以再向向彩萍踏前一步。

或者係因為命中注定，石養么永遠都只可以係向彩萍嘅守護者。

諗到呢度，石養么笑咗一笑。

如果上天注定佢只能夠默默守護向彩萍嘅話，咁好似而家可以同到向彩萍結婚已經算係佢賺多咗？

喺呢個樂觀得有啲過份嘅想法之下，石養么帶住苦澀嘅笑容，慢慢就瞓著咗。

結婚之後，日子其實無咩唔同。

最大分別，係向彩萍將餵養蠱蟲嘅時間改咗做中午時份，相信係為免夜晚離開屋企俾石養么懷疑。

當然，石養么其實對一切心知肚明，但係亦都無刻意說穿，就當係為咗維持表面生活嘅美好。

呢段婚姻，貶眼就係三年。

雖然稱不上幸福甜蜜，但至少歲月靜好，生活滿足。

向彩萍同石養么亦都習慣咗同居生活，日常彼此照顧，打理各種雜項閒事，就同一般夫婦無疑。

對石養么嚟講，或者，呢一個就係喺佢能力之內，可以為向彩萍帶嚟最多幸福嘅方法。

所以到底佢哋之間有冇「愛情」，早已經唔係石養么會再考慮嘅嘢。

因為只要向彩萍可以經常笑容滿面，平安生活，石養么就感到心滿意足。

安穩，係令人不願意改變嘅原因。

而對石養么嚟講，佢亦都開始有啲動搖，到底仲應唔應該希望丘志傑嚟到雲南好呢？

如果丘志傑嚟到，石養么就會先扮作好心為丘志傑解蠱，再用「共生蠱」令佢殺死自己老婆，實現報仇大計，亦令向彩萍可以唔需要再養蠱，減少對身體甚至性命嘅影響。

但係咁樣做，亦都會令而家平靜美好嘅生活節奏被破壞，甚至連而家呢個有名無實嘅婚姻關係亦都會被打破。

只不過，石養么忽略咗一樣嘢。

命運，從來都唔係掌握喺人嘅手中。

相隔五年，正當石養么以為自己嘅計劃已經無可能成功嘅時候，某一晚，佢突然收到一個電話。

一個來自「獵蠱人」嘅電話。

「老兄，你等了這麼多年，你終於等到了！身上有『血蠱蟲』的人終於出現在雲南了。不過你小心，他們很會打！」

聽到呢個消息嘅石養么，並知道自己應該俾咩反應好。

佢望住喺廚房度一邊抹汗，一邊笑住煮米線湯嘅向彩萍，突然覺得眼前嘅一切都開始變得朦朧。

原本，復仇大計就係一個石養么想為向彩萍好而設計嘅佈局。

但係到頭來，為咗而家呢一段好似夢一樣美好而虛幻嘅婚姻，石養么竟然開始猶豫。

到底點樣做先係最好呢？石養么真係唔知道。

佢當然想為向彩萍了結前事，但同時間，佢亦都唔捨得呢幾年嚟咁簡單幸福嘅生活。

到底，點先可以得到真正嘅幸福呢？

「反正，這是我們出生之前已經注定了吧。」

= = =
祝所有巴打絲打讀者們聖誕快樂
大家都可以好似八仙果師父一樣搵到識得愛你嘅另一半

早晨呀巴打

早啊不過我要瞓了
如果唔係聽日聖誕會變喪屍

gchi瞓全日

聖誕快樂