《求婚嗰日，我發現我女朋友鍾意食屎》(2)

希望你唔會心up住瞓

究竟點解佢識用共心蠱

睇到嗰時咁啱播到銀河修理員，即刻喊咗出嚟

可能睇tvb學嘅

見到樓主出左個前後呼應既對比

超博發現未婚女朋友食屎大
Vs
石生睇住指復未婚妻養蠱蟲

忽然好好奇，如果大家身邊最愛既人係以上兩個女人其中一種，唔知大家會覺得另一半食屎大定係養蠱蟲易接受啲

我自己就覺得養蠱蟲易接受過食屎大

我都覺係養蠱 甚至我會跟佢學埋養蠱
只係技能嘅一種 冇乜大不了 只要唔係用嚟傷害人 而係用嚟保護自己就得啦

Btw 雲英未嫁令我諗起雪姨

我尋晚又發夢見到蜈蚣

咁搞法，譚仔店條蟲可能係最大boss養？

我最笨我最钝但我肯 伴你到终站

黃德斌應該就係一個知道阿萍養蠱都仲係佢身邊既人

可惜阿萍一直都唔知

咁我情願佢養中蠱好過食屎喇！
最小都唔會有維生問題......

我之前都有留言過呢個疑問，似係伏筆
鄉下條蟲都要日日吸血，係locker條蟲完全無野食5年應該唔會生存到？
養蠱可以控制啲蟲姐，應該唔代表啲蟲可以違反生物原則生存到

假死可以減低消耗
咁就木虱都可以成年唔郁唔食野
同埋locker條蟲未必係佢地放既

紅蛙到底會唔會出現呢

感覺紅蛙唔係過場就完

其實翠姐先係大BOSS
翠翠一定係大佬黎

木虱呢個真係長知識
睇樓主之前啲舊故好多伏筆同細節都收得好靚，
對養蠱人同紅蛙呢part既鋪排充滿信心

文？

獵蠱人？

多謝你果然舊讀者好了解我

希望唔會令你失望

石養么唯一可以做嘅，就只有用力掩住自己個口，唔好俾向彩萍發現自己呢一刻嘅激動。

等咗一陣，向彩萍將泥土埋好，然後就慢慢離開咗。

而石養么終於可以鬆一口氣，頹然咁坐咗喺地下度。

當佢一諗到自己所愛嘅人竟然係一個惡毒嘅養蠱人，佢心入面又難過又失望，但係即使係咁，佢內心都無半分憎恨向彩萍一直隱瞞自己嘅感覺。

「我保護她就是天經地義的事情。」呢一句說話再次喺石養么心入面響起。

呢一個承諾係佢俾向彩萍嘅，亦係佢對自己最重視嘅人嘅一份決心。

呢一句說話好似當頭棒喝一樣，將本來個腦好混亂嘅石養么打翻清醒。

無論向彩萍係一個咩人，石養么都想保護佢。

所以，石養么嘅第一個諗法係，佢唔可以俾人知道向彩萍係一個養蠱人，而且養蠱一定對自己身體唔好，所以石養么嘅目標係打算直接殺死向彩萍所養嘅蠱蟲，令佢可以唔洗再繼續身受其害。

於是，石養么走到頭先嘅地洞前面，小心翼翼咁嘗試掘開地洞。

可惜嘅係因為頭先燈光太暗，石養么並唔係太睇得清到底地洞嘅正確位置係邊，所以唯有盡量試下附近相鄰嘅位置。

點知就喺佢掘咗幾下之後，佢真係掘出咗一個中空嘅地洞。

但係呢個地洞並無蠱蟲，反而放咗一啲嘢。

石養么拎起燈一照明，發現地洞入面有一本簿、一張相同埋一個睇落幾高貴精美嘅盒仔。

石養么首先拎起咗張相，因為喺張相上面，佢見到向彩萍。

相入面嘅向彩萍相當年輕，似乎仲係當年二十出頭嘅佢。

向彩萍著住一條顏色斑斕嘅短裙，加上胸前刻意嘅「Ｖ」字設計，令佢睇落性感得嚟又多添咗一份誘惑感。

而令石養么在意嘅係，向彩萍身邊仲有另一個男人存在。

呢個男人同樣睇落幾年輕，只係因為佢身著西裝所以稍為有啲成熟嘅感覺。

而呢個男人同向彩萍喺相入面顯得相當親密，男人將手放喺向彩萍嘅膊頭上面，而向彩萍就挨住咗呢個男人嘅胸口。

望住呢張相，石養么不由自主咁湧起咗一陣妒忌。

「唔通阿萍已經喺香港有咗家室？」呢個係石養么第一個諗法。

但係，當石養么將張相反轉一睇，佢又發現咗兩個重要嘅線索。

首先，相後面兩種筆跡，第一種筆跡寫咗「天長地久」四個字，但係緊隨住就有第二種筆跡喺後面寫多咗幾個字，令成句句字變咗做「天長地久有盡時，此恨綿綿無盡期」。

而石養么認得，第二種筆跡嘅字體係向彩萍嘅，換言之，似乎向彩萍係對寫「天長地久」嘅呢一個人心懷怨恨。

而石養么發現嘅另一個線索，就係相上面仲有一個名，丘志傑。

根據筆跡，「丘志傑」就係寫低「天長地久」嘅人。

到底向彩萍同丘志傑之間發生咗咩事呢？

為咗了解事情嘅真相，石養么拎出咗地洞入面第三樣嘢，亦都即係一本簿。

呢本簿睇落相當厚同陳舊，一打開，原來係向彩萍喺香港最初逗留嘅第一年嘅日記。

為免俾向彩萍之後發現，石養么決定即刻喺森林入面挑燈夜讀，一口氣就睇哂成本日記。

睇完之後，石養么不知不覺間已經流到一臉都係眼淚。

呢一刻，佢只可以用「心痛」去形容自己嘅感受。

佢諗翻起從前向彩萍每一封寄翻鄉下嘅信都係大報喜訊，但係喺日記之中，佢先真正見到向彩萍每日生活對夜總會工作嘅厭惡同掙扎、仲有對住丘志傑嘅苦戀同被拋棄。

而呢啲所有嘅痛苦，向彩萍原來一直以來都係一個人默默承受哂。

從字裡行間，石養么好似感同身受一樣，體會到向彩萍嘅一切辛酸。

當然，另一種嘅心痛，係當向彩萍面對種種辛酸嘅時候，佢完全無諗過要搵自己。

石養么一直以嚟都相信，自己係向彩萍嘅保護同後盾。

但係當佢睇完成本日記之後，佢先發現，原來向彩萍從來都唔需要自己去保護。

向彩萍要嘅，係一個識得愛佢、吸引到佢嘅人。

而呢一個人，並唔係只係識得默默等待、幫佢打理日常細務嘅自己。

樂意付出愛，並唔代表對方樂意接受。

呢一份嘅領悟，為石養么帶嚟更大嘅心痛，就好似將佢成個人嘅靈魂都抽空咗一樣。

晨曦初現嘅時候，石養么將日記、錶同相都收翻入地洞之中。

而家嘅佢，已經明白哂點解向彩萍要養蠱。

而出於自己內心嘅心痛，以及對向彩萍嘅關心，石養么有一個新嘅打算。

喺天光之後，石養么上咗一座非常隱秘嘅深山去搵一個人。

呢個人係一位婆婆，係佢哋族內最令人敬而遠之，但係亦都係實力最強大嘅養蠱人。

「粗如食指，身赤如血，那準是血蠱蟲。使用『血蠱』，既可控制目標行為，但自身也會身受其害，難免減壽。」老婆婆拎住拐杖企喺山崖邊，望住遠方講。

石養么見到老婆婆身上有幾條蟲不斷爬來爬去，感覺相當詭異，但係佢又知道目前只有老婆婆先可以幫到自己，所以唯有頂硬上繼續問：「那……我有什麼可以阻止她嗎？譬如說把蠱蟲殺掉？」

「蠱蟲是有靈之物，才沒那麼容易被你殺掉。而且殺了一條，還能找另一條。那時候要重新養好一條蠱蟲，元氣可是更傷了。」老婆婆搖一搖頭。

「難道……只能把人殺了嗎？」石養么知道自己呢個想法好瘋狂，但係為咗向彩萍，本性善良嘅佢竟然都已經諗到去呢一步。

「殺人，到頭來事情有可能會牽扯到向彩萍的頭上，那會為她惹來麻煩的。」老婆婆繼續望向遠方，令石養么無機會察覺老婆婆喺呢一刻露出咗一絲詭詐嘅笑容。

「那我該如何是好？」石養么忍唔住問。

「在蠱術裡頭，有一種名為『共生蠱』的術法，施術者可以完全控制中蠱者一舉一動。如果你學會了『共生蠱』，那時候你只要讓丘志傑自殺就可以了。」老婆婆發出令人心寒嘅笑聲。

而石養么當然明白老婆婆發笑嘅原因，因為雲南人至小相傳，養蠱者動用邪法，死後會淪落無間地獄受苦。

為咗令更多人陪伴自己沉淪地獄苦海，唔少養蠱人都會引誘更多人學蠱，等自己死後喺地獄唔洗孤單。

所以作為一生用蠱極多嘅老婆婆，佢自然亦都有呢個引人用蠱嘅想法。

只不過，即使石養么明白呢一點，佢都係非常爽快咁就同老婆婆講：「好，你就教我這種蠱吧。」

「『共生蠱』效力厲害，但同樣對自身傷害極大。而且你們族人不是說用蠱人都要下地獄嗎？你不用考慮一下嗎？」老婆婆將頭擰轉過嚟，佢臉上其中一隻眼睛只得眼白，睇嚟已經完全盲咗，令佢笑起上嚟嘅表情更加吊詭。

「不用了。」石養么肯定咁講。

呢個時候石養么心目中所諗嘅係，反正已經用蠱嘅向彩萍都會落地獄，咁佢自己又點可以獨善其身唔去地獄保護佢呢？

不惜一切嘅愛情，通常喺外人眼中最愚蠢，亦係當局者覺得最浪漫嘅。

石養么用咗一個月時間，從老婆婆身上學習咗「共生蠱」。

同時間，佢開始計劃到底要用咩方法對付丘志傑。

佢本來只係想單純自殺令丘志傑死亡，但係後來諗諗下，佢覺得丘志傑害向彩萍痛苦咗咁多年，唔應該就咁了結佢。

心腸惡毒嘅老婆婆提出建議，可以試下用「共生蠱」令丘志傑親手殺死自己所愛嘅人，令佢感受下向彩萍曾經經歷失去摯愛嘅切膚之痛。

石養么同意咗呢個計劃，亦開始思考計劃嘅細節。

由於「共生蠱」要由兩種強勁嘅毒性同時引發，而其中一種毒，就係嚟自向彩萍所養嘅血蠱蟲。

理論上，將丘志傑引嚟雲南係最簡單嘅做法。

所以，石養么就諗出咗一個需要出發去香港完成嘅計劃。

石養么首先聲稱要去雲南文山縣搵下嘅食物材料，所以要離開鄉下一星期。

由於石養么一向言而有信，所以向彩萍亦都不疑有他，好容易就相信咗。

去到香港嘅石養么做嘅第一件事，就係去到向彩萍香港嘅住所。

佢用萬用匙入咗屋之後，先模仿向彩萍寫咗一封信引丘志傑帶老婆去雲南嘅家鄉，再用老婆婆教佢嘅方法喺房入面佈下咗「萬年冬」呢種蠱毒。

呢種蠱毒雖然無害，但係可以用呢種萬蟲潛伏嘅震撼狀態令睇到嘅人出現一種迷惑感，從而好容易失去應有嘅判斷力，對事物嘅抗拒程度降低。

所以有「萬年冬」，就可以增加丘志傑考慮去雲南嘅機會。