永若晴(大鳥)
2017-08-04 23:43:12
Vision 063 四面楚歌
「小丁,大魚而家游到邊到?」我向著對講機喊道。
「我只係見到個海好黑,架船而家向住一個光點行,應該就係黎接佢地既大船。另外好似仲有多一個光點靠近。」
「你聽唔聽到佢地講咩?」
「而家已經聽唔到啦,竊聽器已經失左效。」小丁答道。
「Brain你準備好狙擊就隨時可以行動,而家已經離開左香港水域,毒蛇應該唔會追究。」我望著雷達說道。
「收到,我已經對準毒梟個頭,只要佢一換船就射佢落海。」Brain信心滿滿。
「Brain,如果你係呢個位都進攻會有危險。」荒眼再次提醒他,看來她看到的一定是很壞的未來,我想起Brain的黑色印記也感到不妙。
「我知道架啦,但係如果而家換位既話就好大機會失敗,機會難得,一定唔可以錯過。」Brain的意志絲毫沒有動搖,我也沒有必要再勸阻他了。
皎月高掛,現在時間為晚上十時二十三分,我們埋伏了半天終於來到要動手的時刻了。
「我見到架大船啦!」獲取了毒梟視野的小丁喊道,「而家準備換船,Brain你郁手啦!」
小丁無法將視野與我們共享,只能透過口述通知我們,使只聞其聲而不能看到現場的我特別緊張。
一聲令下,子彈從Brain的狙擊炮中射出,乘著海風向著毒梟的頭顱飛去。
「中左!」Brain激動的喊了一聲。
「Good job!Brain你而家轉換位置,我地準備撤退!」
「唔係呀,係我中左槍。」Brain的聲音突然變得虛弱。
明明我們才是主動的一方,為何Brain的反而會被擊中?
荒眼的預測也實在是太準了。
永若晴(大鳥)
2017-08-05 16:19:34
「你中左槍?」小丁緊張地問道。
「小丁,你幫我睇下毒梟係咪中左槍?」Brain一點都不在乎自己的傷勢。
「佢而家已經成功上左第二架船,好似咩都無發生過咁...呀!你地做咩呀!」突然傳來一陣雜聲,小丁就與我們失去聯絡了。
「小丁!小丁!」我的呼喊沒有得到任何回應。
「荒眼,你知唔知小丁發生咩事?」
「我睇唔到佢會有危險既未來,所以應該唔洗太擔心住。」經她這麼一說,我就放心得多了。
「咁Brain呢?Brain既情況而家點?」
「唔樂觀。」荒眼簡潔地回答。
「Brain,聽唔聽到?Brain,你既傷勢點樣?」
因為得不到得Brain的答覆,我決定親自跑去找他。
「Chaos,如果你去Brain果到既話你都會有危險,而家最安全應該係留係原地。」荒眼說。
「你咁姐係叫我見死不救?」
「我只係唔想再多一個傷員,有時候真係無必要同命運作對,佢就係唔聽我既建議先會咁樣。」
「你錯啦,佢只不過係想完成任務,Brain既人生意義就係將逃出法網既壞人繩之於法,就算要賠上生命都在所不惜。」我急著為Brain抱不平。
「值得咩?」即使隔著話筒,我也感受到荒眼認為Brain這舉動很愚蠢。
「我唔同你拗啦,總之我而家就要去救佢,如果你有咩最後警告話比我聽我會好感激。」
「我見到你比人捅左一刀既未來,如果你想避開既話,就唔好同個女仔糾纏咁耐。」
「邊個女仔?」我驚訝地問道。
「一個我唔識既女仔。祝你好運。」荒眼說罷就掛線,看來她都認為我蠢得無藥可救了。
不過我還是決定要去看一看Brain的狀況。