黃昏好,好人一生平安
垃圾樓主終於捨得返嚟
……… 然而,鐵欄終是鐵欄,不管怎樣用力,只要它不是大門,這都是不可被人敞開的。
「阿朗 ! 阿朗 ! 我哋番上去觀眾席啦 ! 」Miss Lee拍了拍阿朗的肩膀。
阿朗扭過頭來,只見 Miss Lee豎起了手指公,指著左方的樓梯。
「吓 ? 」
「做咩望到咁入神 ? 唔通你都係佢嘅Fans ?」
「傻啦,我覺得出奇啫 !」
「有咩好出奇 ? 出奇咁靚 ? 」
「Miss Lee,唔係吖,佢係我同班同學嚟,平時佢個樣兇神惡煞咁,我睇唔出佢有咁多Fans啫 !」
「但點解你而家先知嘅 ? 你哋唔係同班同班同學嚟咩 ? 」
阿朗皺起雙眉,頓時被這一道問題所難到了。
只能說今天的Miss Lee,特別的多問題,而且全都是一針見血,針針到肉,不但令阿朗語塞了,還使他的心,莫明的有種刺痛的感覺,可能這就是福爾摩斯的功力。
Miss Lee緩緩地走到他的身旁,雙手也跟著扶在鐵欄上,續道︰
「睇嚟你都係近排先留意佢喎。」
「嗯………」
「係咪同佢發生咗咩事 ? 無啦啦咁留意佢嘅 ? 」
「冇吖 ! 冇事發生,會有咩事發生 ? 」
「你個樣又出賣咗你喇,你唔好當Miss Lee 係細路女先得㗎,雖然我年齡真係細路女咁 !」
「哈 ……」
阿朗忍不住笑了一笑,Miss Lee的無厘頭,讓他的雙眉開始放鬆開來,整個氣氛也沒有剛才的來得灰沉,接著Miss Lee續道︰
「笑番咪好囉,咁你同佢係咪發生咗咩事 ? 」
「嗯……… 如果一個唔想俾人知道自己弱小嘅人,突然係你面前喊,仲好似情緒失控咁,咁即係點 ? 」
「好難答到你喎,得咁少資訊,但我只可以答你,佢覺得你好重要。」
「好重要嘅 ? 即係點解 ?」
看到阿朗這麼緊張的樣子,Miss Lee不自覺的戚起了眉頭,光明正大的,把酸溜溜的香醋暗藏在眼神與話語間 ,凝視著他說道︰
「你好著緊嗰個人喎,我都係今晚TG再解答你啦,如果到時約實我出街嘅時間,可能會解答得更好 !」
「Miss Lee, 唔好啦,而家解答埋我啦 !」
「今晚再講 ! 」
阿朗不停地哀求著Miss Lee,可是,最後她都沒有說出半點話來解答他的種種疑問,只微微的翹起一邊的嘴角。
擾攘一輪後,最終阿朗還是放棄了,他根本上是鬥不過Miss 的,所以只好等到晚上找她。
接著,她沾沾自喜地說道︰
「等你有仔嗰陣先鬥得過我 ! 」
「得喇得喇 ! 」
「睇你個樣,你都唔會咁快番上去㗎啦 !」
「嗯,我想睇埋佢比賽先,你番上先啦。」
「咁我走先喇 ! 係咁先喇 !」
就這樣,Miss Lee便獨自回到觀眾席上,而阿朗則繼續扶著鐵欄,望著那條紅紅的跑道,以及不遠處的穿著白色體育服的Cherry。
「佢同隔離個女仔咁好傾嘅 ? 唔係喎,個女仔係工作人員嚟 ? 個樣都唔似運動員,定都係為咗體育堂嘅分數先參加 ?」
阿朗見著Cherry與身旁的女生交頭接耳,不禁對這女生心生疑問。
但其實她們的行為是稱不上交頭接耳的,只是Cherry單方面的聆聽著這名女生的讚美。
「我真係好鍾意睇你嘅比賽,成日見到你跑嬴對面成條街咁,好正好爽 ! 仲有吖 ……… 」
Cherry聽著聽著,她的心神飄走了,她東張西望的看著四周的漸有生氣的樹與草,看著面前不遠的跑道,縱使她已與跑道亦師亦友,日夜相對,可是,她的視線也不自覺被跑道那鮮艷的紅色所吸引。
突然,微風一吹,帶著少許的春意,也帶著她的髮絲。
這一刻,她才驚覺春天到了。
這一刻,她才發覺自己的頭也亂了。
Cherry俯首閉眼,先是解開頭髮上的帶子,讓那頭捲髮瞬間優美的散在肩上,然後,她用小嘴輕輕叼著髮帶,雙手熟巧的把散亂的秀髮重新束起,這動作散發出陣陣勾魂性感的氣息,特顯了女性的魅力。
就在她把叼著的髮帶繫在秀髮時,那名女生突然問道︰
「係呢,八掛一問,隔離A班嘅阿誠係咪你嘅男朋友嚟 ? 」
未完待續…