相比起之前兩個國家,法國較大,城鎮之間嘅距離亦較遠,加上有時唔係踩馬路,冇位出返嚟,所以再次出現缺乏補給嘅情況,可幸喺Daniel屋企去Paris只係一日嘅路程,而我喺Brussels其實買咗啲粟米片做乾糧,不至於餓死。
終於喺Compiegne嘅黑人區搵到地方買嘢食
近來踩得最舒服嘅一段
佢始終係屬於路上
前往Paris嘅呢段路,唔知道係咁啱定真係我黑仔,連續幾次都撞正整路,為咗避開啲碎石路,我繞道而行,但夠膽死轉個頭又有,好似追住我咁。然後,繼荷蘭同比利時combo爆呔之後,嚟到法國,都係不能倖免。
仲要係後呔,麻撚煩
距離Paris只有三十公里,我一路補呔,一路幻想緊究竟呢個係一個點嘅城市。初到歐洲嗰陣,我日日都FF自己去到法國之後,會喺路邊畀個單車教練賞識,邀請我加入車隊,訓練我參加環法,咁就真係巴撚閉。當然,呢件事冇發生,拍電影咩?但事實上,越近Paris,我越不安。
一直喺歐洲趕路,因為我覺得呢個trip我要見識嘅嘢已經夠,基本上過咗土耳其,同人嘅相處早就達到極致,越往西走,我能夠感受到嘅人性溫暖就越少,尤其到咗德國之後,對當時嘅我嚟講,已經夠鐘要完結,只不過係去到一個雞肋位,如果唔去到英國就有啲可惜。於是乎我日趕夜趕,除咗Berlin,我德國打後嘅地方都只係會留一個full day就走,諗返實在太可惜。
畀我再揀多次,我一定會好好享受,畢竟我短期內都唔會再有機會做同樣嘅嘢多一次。如果睇到我寫嘢嘅你有機會出走去睇呢個世界,盡量睇,睇到真係冇辦法唔返嚟,你先好完,因為當你要返嚟面對養家、工作、社會問題等等嘅現實,一切都已經太遲。
Sorry講遠咗,本身想講嘅係,我越真係接近終點,我反而越唔想完,我唔想返去一個每日起身都係同樣地方嘅日子,原來冒險已經注入咗我嘅血液入面,我享受呢種穩定嘅不穩定。即係點?即係我已經習慣咗,每日去唔同地方,認識唔同嘅人,有個目標畀我去達成,呢樣先係我嘅日常生活。
人就係咁矛盾,矛盾在於,單車旅行變咗我comfort zone,我唔敢回歸現實,係咪好諷刺?
我拍一拍換完呔污糟晒嘅雙手,坐上忍者龜,逼自己向住現實呢個血盆大口進發。